စံးထီၣ်ပတြၢၤ 26 - Sgaw Karen Common Bible

ပှၤအတီအလိၤအတၢ်ထုကဖၣ်

¹ ယွၤဧၢ, စံၣ်ညီၣ်ယၤတက့ၢ်. အုၣ်နသးလၢယတၢ်ကမၣ်တအိၣ်ဘၣ်အဂ့ၢ်တက့ၢ်. အဂ့ၢ်ဒ်အံၤ, ယမၤတၢ်လၢအမ့ၢ်အတီ ဒီးယနာ်နၤလၢလၢပှဲၤပှဲၤလီၤ.

² ဃုကွၢ်ယၤဒီးမၤကွၢ်ယၤ, ယွၤဧၢ, စံၣ်ညီၣ်ယသးအတၢ်ဆၢန့ၢ်ဒီး ယတၢ်ဆိကမိၣ်တဖၣ်န့ၣ်တက့ၢ်.

³ အဂ့ၢ်ဒ်အံၤ, နတၢ်အဲၣ်ဂၢၢ်ကျၢၤအိၣ်လၢယမဲာ်ညါ, ဒီးယလဲၤတၢ်လၢတၢ်သးတီဒီးနၤအပူၤလီၤ.

⁴ ယတဆ့ၣ်နီၤဒီးပှၤလီတၢ်ဘၣ်, ယတမၤဘၣ်ထွဲယသးဒီး ပှၤပာ်မၤအသးသ့ၣ်တဖၣ်န့ၣ်ဘၣ်.

⁵ ယသးဟ့ပှၤမၤတၢ်အၢအတၢ်ရိဖှိၣ် ဒီးဟးဆှဲးပှၤတတီတလိၤန့ၣ်လီၤ.

⁶ ယွၤဧၢ, ယသ့ယစုလၢတၢ်ဒဲးဘးတအိၣ်ဘၣ်အပူၤ ဒီးလဲၤဆူနတၢ်လုၢ်လီၢ်လၢ တၢ်ဘူၣ်ထီၣ်ဘါထီၣ်နၤအဂီၢ်လီၤ.

⁷ ယသးဝံၣ်တၢ်စံးထီၣ်ပတြၢၤအတၢ်သးဝံၣ် ဒီးတဲဖျါထီၣ်နတၢ်မၤလီၤလးခဲလၢာ်လီၤ.

⁸ ယွၤဧၢ, ယအဲၣ်ဟံၣ်လၢနအိၣ်နဆိး, တၢ်လီၢ်လၢနလၤကပီၤအိၣ်ဝဲအလီၢ်န့ၣ်လီၤ.

⁹ တဘၣ်မၤဟးဂီၤယၤဃုာ်ဒီးပှၤတၢ်ဒဲးဘးဖိသ့ၣ်တဖၣ်, ဒီးယသးသမူဃုာ်ဒီးပှၤမၤသံတၢ်သ့ၣ်တဖၣ်,

¹⁰ ပှၤလၢအမၤတၢ်အၢကိးဆၢကတီၢ်ဒဲး ဒီးပှၤလၢအိၣ်ကတဲာ်ကတီၤအသးထီဘိလၢ ကဟံးန့ၢ်ခိၣ်ဖးကဘျံးကဘျၣ်န့ၣ်တဂ့ၤ.

¹¹ ယဲဒၣ်ယၤအံၤ, ယမၤတၢ်လၢအမ့ၢ်အတီလီၤ. သူၣ်ကညီၤသးကညီၤလၢ်ယၤဒီး မၤပူၤဖျဲးယၤတက့ၢ်.

¹² ယပူၤဖျဲးဒီးတၢ်ဘၣ်ယိၣ်ဘၣ်ဘီခဲလၢာ်, ယစံးထီၣ်ပတြၢၤယွၤလၢအပှၤဂီၢ်မုၢ် အတၢ်အိၣ်ဖှိၣ်ရိဖှိၣ်အပူၤလီၤ.