စံးထီၣ်ပတြၢၤ 25 - Sgaw Karen Common Bible

တၢ်ထုကဖၣ်လၢတၢ်ပၢတၢ်ဆှၢဒီး တၢ်ကဟုဘံၣ်ကယာ်ဘၢအဂီၢ်

¹ ယွၤဧၢ, ယဆှၢထီၣ်ယသးဆူနအိၣ်လီၤ.

² ယကစၢ်ယွၤဧၢ, ယနာ်နၤလီၤ. မ်ယသုတဘၣ်တၢ်မၤမဲာ်ဆှးယၤတဂ့ၤ. မ်ယဒုၣ်ယဒါအသုတသးခုလၢယဖီခိၣ်တဂ့ၤ.

³ ပှၤလၢအနာ်နၤသ့ၣ်တဖၣ်တဘၣ်တၢ်မၤနၢၤအီၤဘၣ်. မ့မ့ၢ်ဘၣ်ဒၣ်ထဲပှၤလၢအချ့ဝဲလၢ တၢ်ပူထီၣ်နၤအပူၤတဖၣ်န့ၣ်လီၤ.

⁴ ယွၤဧၢ, သိၣ်လိယၤလၢနကျဲတဖၣ် ဒီးဒုးသ့ၣ်ညါယၤလၢနကျဲတဖၣ်န့ၣ်တက့ၢ်.

⁵ သိၣ်လိယၤလၢယကအိၣ်မူဒ်နတၢ်မ့ၢ်တၢ်တီအသိး, အဂ့ၢ်ဒ်အံၤ, နမ့ၢ်ယကစၢ်ယွၤလၢအမၤပူၤဖျဲးယၤလီၤ. ထီဘိယနာ်နၤန့ၣ်လီၤ.

⁶ ယွၤဧၢ, သ့ၣ်နီၣ်ထီၣ်က့ၤနတၢ်သူၣ်ကညီၤသးကညီၤဒီးနတၢ် အဲၣ်ဂၢၢ်ကျၢၤ လၢနပာ်ဖျါတ့ၢ်အီၤလၢပျၢၤန့ၣ်တက့ၢ်.

⁷ ယသးစၢ်အတၢ်ဒဲးဘးဒီးအတၢ်ကမၣ်သ့ၣ်တဖၣ်န့ၣ်ပျၢ်လၢ်ဘၣ်တက့ၢ်. ယွၤဧၢ, လၢနတၢ်အဲၣ်ဂၢၢ်ကျၢၤဒီး နတၢ်ဂ့ၤတၢ်ဝါအပူၤန့ၣ်, သ့ၣ်နီၣ်ထီၣ်က့ၤယၤတက့ၢ်.

⁸ အဂ့ၢ်ဒ်အံၤ, ယွၤန့ၣ်တီဝဲလိၤဝဲဒီးဂ့ၤဝဲ, ဒုးနဲၣ်ပှၤတၢ်ဒဲးဘးဖိသ့ၣ်တဖၣ်လၢကျဲန့ၣ်လီၤ.

⁹ အဝဲဆှၢပှၤဆီၣ်လီၤအသးတဖၣ်လၢကျဲမ့ၢ်ကျဲတီအပူၤ ဒီးဒုးနဲၣ်အဝဲသ့ၣ်လၢအတၢ်ဘၣ်အသးန့ၣ်လီၤ.

¹⁰ ပှၤလၢအပၢၤဃာ်ယွၤအတၢ်အၢၣ်လီၤဒီး ဒိကနၣ်အတၢ်မၤလိာ်တဖၣ်န့ၣ်, အဝဲဆှၢဝဲလၢတၢ်သးတီဒီးတၢ်အဲၣ်အပူၤန့ၣ်လီၤ.

¹¹ ဟံးဃာ်နတၢ်အၢၣ်လီၤ, ယွၤဧၢ, ဒီးပျၢ်လၢ်ဘၣ်ယတၢ်ဒဲးဘးတဖၣ်န့ၣ်တက့ၢ်. ယအိၣ်ဒီးတၢ်ဒဲးဘးအါမးလီၤ.

¹² ပှၤလၢအစူၢ်ယွၤန့ၣ်, ကမၤလိန့ၢ်တၢ်လၢအီၤဘၣ်ဃး ကျဲလၢအဝဲသ့ၣ်ကြၢးပိာ်ထွဲဝဲဒၣ်န့ၣ်လီၤ.

¹³ အဝဲသ့ၣ်ကဘီၣ်ထီၣ်ညီထီၣ်ထီဘိ ဒီးအဖိတဖၣ်ကဒိးန့ၢ်ဘၣ်ထံဧိၤကီၢ်ဧိၤန့ၣ်လီၤ.

¹⁴ ယွၤမ့ၢ်ပှၤလၢအစူၢ်အီၤတဖၣ်အတံၤသကိး ဒီးမၤဂၢၢ်မၤကျၢၤ အတၢ်အၢၣ်လီၤအီလီၤဒီးအဝဲသ့ၣ်န့ၣ်လီၤ.

¹⁵ ယကွၢ်ထီၣ်တၢ်ဆူယွၤအအိၣ်လၢတၢ်မၤစၢၤအဂီၢ်ကိးဆၢကိး ကတီၢ်ဒဲးန့ၣ်လီၤ. ဒီးအဝဲဒၣ်မၤပူၤမၤဖျဲးယၤလၢ တၢ်လီၤပျံၤလီၤဖုးအလီၢ်န့ၣ်လီၤ.

¹⁶ ယွၤဧၢ, ဃၣ်နသးဆူယအိၣ်ဒီး သူၣ်ကညီၤသးကညီၤလၢ်ယၤတက့ၢ်. မ့ၢ်လၢယအိၣ်ထဲတဂၤဧိၤဒီး ယဂံၢ်ယဘါစၢ်အဃိန့ၣ်လီၤ.

¹⁷ မၤမုာ်ထီၣ်ယသးလၢအတၢ်ကိၢ်တၢ်ဂီၤတဖၣ် ဒီးထုးထီၣ်ကွံာ်ယၤလၢ ယတၢ်ကီတၢ်ခဲတဖၣ်အပူၤန့ၣ်တက့ၢ်.

¹⁸ ကွၢ်ဆိကမိၣ်ယတၢ်ကီတၢ်ခဲဒီးယတၢ်နးတၢ်ဖှီၣ် ဒီးပျၢ်လၢ်ဘၣ်ယတၢ်ဒဲးဘးခဲလၢာ်န့ၣ်တက့ၢ်.

¹⁹ ကွၢ်တက့ၢ်. ယဒုၣ်ယဒါသ့ၣ်တဖၣ်အိၣ်ပှံၤဂၤလဲၣ်, ဒီးကွၢ်အဝဲသ့ၣ်သးဟ့ယၤထဲလဲၣ်န့ၣ်တက့ၢ်.

²⁰ ကဟုဘံၣ်ကယာ်ဘၢယၤဒီးမၤပူၤဖျဲးယၤ, ဒီးဒုးမၤနၢၤယၤလၢယဒုၣ်ယဒါတဖၣ်န့ၣ်တက့ၢ်. အဂ့ၢ်ဒ်အံၤ, ယသန့ၤယသးလၢနၤလီၤ.

²¹ မ်ယတၢ်ဂ့ၤတၢ်ဝါဒီးယတၢ်သူၣ်တီသးလိၤ ပာ်မူယၤတက့ၢ်. အဂ့ၢ်ဒ်အံၤ, ယနာ်နၤလီၤ.

²² ကစၢ်ယွၤဧၢ, မၤပူၤဖျဲးနပှၤဂီၢ်မုၢ်အံၣ်စရ့လး လၢအတၢ်ကိၢ်တၢ်ဂီၤခဲလၢာ်အပူၤန့ၣ်တက့ၢ်.