စံးထီၣ်ပတြၢၤ 24 - Sgaw Karen Common Bible

စီၤပၤဖးဒိၣ်

¹ ဟီၣ်ခိၣ်ဒီးတၢ်လၢအအိၣ်လၢအပူၤ ခဲလၢာ်အံၤ မ့ၢ်ယွၤအတၢ်လီၤ. ဟီၣ်ခိၣ်ဒီးပှၤလၢအအိၣ်ဝဲဆိးဝဲလၢအပူၤ ခဲလၢာ်အံၤ မ့ၢ်အတၢ်လီၤ.

² အဂ့ၢ်ဒ်အံၤ, ပာ်လီၤဝဲအခီၣ်ထံးလၢထံယိာ်ပူၤလၢဟီၣ်ခိၣ် အဖီလာ်, ဒီးဒုးအိၣ်ဂၢၢ်ဆိးကျၢၤအီၤလၢ ပီၣ်လဲၣ်အတၢ်ဃိာ်အပူၤန့ၣ်လီၤ.

³ မ့ၢ်မတၤကလဲၤထီၣ်ဆူယွၤအကစၢၢ်တဂၤန့ၣ်လဲၣ်. မ့ၢ်မတၤကဆၢထၢၣ်လၢ အလီၢ်စီဆှံအပူၤတဂၤန့ၣ်လဲၣ်.

⁴ မ့ၢ်ဒၣ်ပှၤလၢအစုစီဆှံဝဲဒီးအသးကဆှီဝဲ, ပှၤလၢအတဘါထီၣ်ဘၣ် တၢ်ဂီၤတၢ်ဖီၣ်တဖၣ် ဒီးတဆိၣ်ဘၣ်တၢ်လၢ တၢ်လီတၢ်ဝ့ၤအပူၤဘၣ်န့ၣ်လီၤ.

⁵ ယွၤကဆိၣ်ဂ့ၤအီၤဒီးကမၤပူၤဖျဲးအီၤ, ဒီးကစၢ်ယွၤကစံးလၢအတၢ်ဒဲးဘး တအိၣ်ဘၣ်န့ၣ်လီၤ.

⁶ ပှၤဒ်သိးအံၤတဖၣ်မ့ၢ်ပှၤလၢအဟဲဆူကစၢ်ယွၤအအိၣ်, မ့ၢ်ပှၤလၢအဟဲဆူ စီၤယၤကိာ်အကစၢ်ယွၤအမဲာ်ညါန့ၣ်လီၤ. စ့လၤ

⁷ တြဲၤသ့ၣ်ဧၢ, အိးထီၣ်သုသးလဲၢ်လဲၢ် ပဲတြီလၢပျၢၤသ့ၣ်ဧၢ, အိးထီၣ်သုသး ဒ်သိးစီၤပၤလၢအအိၣ်ဒီးအလၤကပီၤ ကဟဲနုာ်ဘၣ်အဂီၢ်န့ၣ်တက့ၢ်.

⁸ စီၤပၤဖးဒိၣ်တဂၤအံၤမ့ၢ်မတၤလဲၣ်. အဝဲမ့ၢ်ယွၤလၢအဂံၢ်ဆူၣ်ဘါဆူၣ်ဒီးအိၣ်ဒီးအစိကမီၤ, ယွၤလၢအမၤနၢၤတၢ်လၢတၢ်ဒုးအပူၤန့ၣ်လီၤ.

⁹ တြဲၤသ့ၣ်ဧၢ, အိးထီၣ်သုသးလဲၢ်လဲၢ်, ပဲတြီလၢပျၢၤသ့ၣ်ဧၢ, အိးထီၣ်သုသး, ဒ်သိးစီၤပၤလၢအအိၣ်ဒီးအလၤကပီၤ ကဟဲနုာ်ဘၣ်အဂီၢ်န့ၣ်တက့ၢ်.

¹⁰ စီၤပၤဖးဒိၣ်တဂၤအံၤမ့ၢ်မတၤလဲၣ်. ယွၤလၢအမၤနၢၤတၢ်, အဝဲမ့ၢ်စီၤပၤဖးဒိၣ်န့ၣ်လီၤ. စ့လၤ