စံးထီၣ်ပတြၢၤ 21 - Sgaw Karen Common Bible

တၢ်စံးထီၣ်ပတြၢၤလၢတၢ်မၤနၢၤအဂီၢ်

¹ ယွၤဧၢ, စီၤပၤသးခုဝဲလၢနဟ့ၣ်အီၤတၢ်ဂံၢ်တၢ်ဘါ, ဒီးသးဖှံဝဲလၢနဒုးမၤနၢၤအီၤတၢ်အဃိန့ၣ်လီၤ.

² နဟ့ၣ်တ့ၢ်အီၤတၢ်လၢအသးဆၢန့ၢ်ဘၣ်ဝဲ, ဒီးတၢ်လၢအထးခိၣ်ဃ့ဝဲန့ၣ် နတတြီဘၣ်အီၤဘၣ်. စ့လၤ

³ နသဂၢၢ်အီၤအိၣ်ဒီးတၢ်ဆိၣ်ဂ့ၤလီၤဆီတဖၣ် ဒီးနပာ်ခိၣ်သလုးထူလၢအခိၣ်လိၤလီၤ.

⁴ ဃ့ဝဲတၢ်မူလၢနၤ, ဒီးနဟ့ၣ်အီၤလၢ တၢ်အိၣ်ကၢအိၣ်ခိး ဒီးတၢ်မူလီၤထူလီၤယိာ်လီၤ.

⁵ အလၤကပီၤဒိၣ်ဝဲမ့ၢ်လၢနတၢ်မၤစၢၤအဃိ, နပာ်တၢ်လီၤဘီလီၤမုၢ်ဒီး တၢ်ကဟုကညီၢ်လၢအလိၤန့ၣ်လီၤ.

⁶ နတၢ်ဆိၣ်ဂ့ၤတဖၣ်အိၣ်ဒီးအီၤထီဘိ ဒီးနတၢ်အိၣ်ဒီးအီၤအံၤမၤပှဲၤအီၤလၢတၢ်သးခုလီၤ.

⁷ အဂ့ၢ်ဒ်အံၤ, စီၤပၤသန့ၤအသးလၢယွၤ, သ့တၢ်လၢာ်ကစၢ် ဒီးတဟူးတဝးဘၣ်လၢ တၢ်ထီကတၢၢ်ယွၤ အတၢ်အဲၣ်ဂၢၢ်ကျၢၤအဃိန့ၣ်လီၤ.

⁸ စီၤပၤအစုကဖီၣ်န့ၢ်အဒုၣ်အဒါခဲလၢာ်, ဒီးအစုထွဲကဖီၣ်န့ၢ်ပှၤလၢ အသးဟ့အီၤခဲလၢာ်န့ၣ်လီၤ.

⁹ တုၤအအိၣ်ဖျါထီၣ်ဒီး ကမၤဟးဂီၤကွံာ်အဝဲသ့ၣ်ဒ် မ့ၣ်အူအီၣ်ကွံာ်တၢ်အသိးန့ၣ်လီၤ. ယွၤကမၤဟးဂီၤကွံာ်အဝဲသ့ၣ်လၢအတၢ်သးဒိၣ်အပူၤ ဒီးမ့ၣ်အူကအီၣ်ကွံာ်အဝဲသ့ၣ်လီၤ.

¹⁰ အစၢၤအသွဲၣ်လၢအပူၤဖျဲးတအိၣ်တီၢ်နီတဂၤဘၣ်, စီၤပၤကမၤသံအီၤခဲလၢာ်လီၤ.

¹¹ အဝဲသ့ၣ်အိၣ်ဒီးအတၢ်ကူၣ်ထီၣ်ဖးလီၤထီဒါအီၤ, ဘၣ်ဆၣ်တကဲထီၣ်လိၣ်ထီၣ်ဝဲဘၣ်.

¹² အဝဲကခးအဝဲသ့ၣ်လၢပျၢ် တဖၣ် ဒီးအဝဲသ့ၣ်ကဃၣ်ကွံာ်အသးဒီးဃ့ၢ်ဝဲဒၣ်န့ၣ်လီၤ.

¹³ ယွၤဧၢ, ပစံးထီၣ်ပတြၢၤနၤ လၢနဂံၢ်ဆူၣ်နဘါဆူၣ်အဃိ, ပကသးဝံၣ်ဒီးစံးထီၣ်ပတြၢၤနစိနကမီၤန့ၣ်လီၤ.