စံးထီၣ်ပတြၢၤ 19 - Sgaw Karen Common Bible

ကစၢ်ယွၤအလၤကပီၤလၢတၢ်ဘၣ်တ့အပူၤ

¹ မူခိၣ်လီၣ်ဖျါထီၣ်ကစၢ်ယွၤအလၤကပီၤ, ဒီးမူကပိာ်လိၤပာ်ဖျါ အစုအတၢ်ဖံးတၢ်မၤန့ၣ်လီၤ.

² မုၢ်တနံၤစံးဘၣ်မုၢ်တနံၤဒၣ် ဒီးမုၢ်တနၤ ဒုးနဲၣ်တၢ်သ့ၣ်ညါလၢမုၢ်တနၤဒၣ်န့ၣ်လီၤ.

³ တၢ်စံးတၢ်ကတိၤတအိၣ်, တၢ်အကလုၢ်တအိၣ်, တၢ်အသီၣ်တဘၣ်တၢ်နၢ်ဟူအီၤဘၣ်,

⁴ နာ်သက့အတၢ်ကစီၣ်လဲၤသကုၤဟီၣ်ခိၣ်, ဒီးအကလုၢ်ကထါတဖၣ် လဲၤတုၤဟီၣ်ခိၣ်အကတၢၢ်လီၤ. ကစၢ်ယွၤသူၣ်ထီၣ်တၢ်အိၣ်တၢ်ဆိးအလီၢ်လၢမူခိၣ် လၢမုၢ်အဂီၢ်,

⁵ လၢအဟဲထီၣ်လၢမုၢ်ဂီၤလီၤဂာ်ဒ် တလးမူးပိာ်ခွါလၢအဟဲထီၣ်လၢအဒၢးပူၤအသိး, အသူၣ်ခုသးခုဝဲဒ်ပှၤအဂံၢ်ဆူၣ်ဘါဆူၣ်လၢ အကဃ့ၢ်သတြီၤတၢ်တဂၤအသိး,

⁶ ဟဲထီၣ်ဝဲလၢမူခိၣ်အကတၢၢ်တကပၤ ဒီးလဲၤခီဖျိဝဲတုၤလၢအတကပၤအကတၢၢ်န့ၣ်လီၤ. တၢ်အိၣ်တဒၢလၢမုၢ်အတၢ်ကိၢ် တအိၣ်နီတမံၤဘၣ်.

ယွၤအတၢ်သိၣ်တၢ်သီ

⁷ ယွၤအတၢ်သိၣ်တၢ်သီလၢဝဲပှဲၤဝဲ ဒီးမၤကျၢၤထီၣ်က့ၤပသးလီၤ. ယွၤအတၢ်အုၣ်အသးန့ၣ်မ့ၢ်ဝဲတီဝဲ, ဒီးဒုးကူၣ်သ့ပှၤလၢအတမၤလိဘၣ်တၢ်ဘၣ်လီၤ.

⁸ ယွၤအကလုၢ်ကထါန့ၣ်တီဝဲလိၤဝဲ, ဒီးမၤခုထီၣ်က့ၤပသးလီၤ. ယွၤအတၢ်မၤလိာ်န့ၣ်ကဆှီဝဲ ဒီးမၤကပီၤထီၣ်က့ၤပမဲာ်လီၤ.

⁹ တၢ်ပျံၤယွၤန့ၣ်စီဝဲဆှံဝဲ, ဒီးအိၣ်ဝဲအစိၤစိၤအဃၣ်ဃၣ်လီၤ. ယွၤအတၢ်စံၣ်ညီၣ်တဖၣ်န့ၣ်မ့ၢ်အမ့ၢ်အတီ ဒီးလိၤဝဲတီဝဲခဲလၢာ်လီၤ.

¹⁰ ပဆၢဒိးန့ၢ်ဘၣ်အီၤအလီၢ်အိၣ်ဒိၣ်န့ၢ်ထူ, ဒီးဒိၣ်န့ၢ်ထူအစီလၢအအါတက့ၢ်န့ၣ်လီၤ. မ့ၢ်အဆၢန့ၢ်ကနဲစီ, ဒီးကနဲစီလၢအလီၤစီၤလၢ ကနဲအခိၣ်ထံအလိၤတက့ၢ်န့ၣ်လီၤ.

¹¹ နခ့နပှၤဒိးတၢ်ဒုးပလီၢ်အသးစ့ၢ်ကီးလၢအီၤ, ပှၤလၢအတိၢ်န့ၢ်အီၤန့ၣ် ဒိးန့ၢ်အဘျုးဖးဒိၣ်လီၤ.

¹² ပှၤထံၣ်သ့ၣ်ညါအတၢ်ကမၣ်ဒၣ်ဝဲ တသ့နီတဂၤဘၣ်. ယွၤဧၢ, မၤကဆှီယၤလၢ တၢ်ကမၣ်ခူသူၣ်တဖၣ်န့ၣ်တက့ၢ်.

¹³ တြီဃာ်စ့ၢ်ကီးနခ့နပှၤလၢတၢ်ဒဲးဘးအဒူတက့ၢ်. မ်အသုတပၢယၤတဂ့ၤ, မ့မ့ၢ်ဒ်န့ၣ်ဒီး, တၢ်ပာ်တၢ်ကမၣ်လၢယလိၤအလီၢ်တအိၣ်ဘၣ်ဒီး ယကပူၤဖျဲးဒီးတၢ်ကမၣ်အဒိၣ်အယိာ်န့ၣ်လီၤ.

¹⁴ မ်ယထးခိၣ်အတၢ်ကတိၤ ဒီးယသးအတၢ်ဆိကမိၣ်န့ၣ် ဘၣ်နသးတက့ၢ်. ယလၢၢ်ဒီးတၢ်ပှ့ၤက့ၤယၤ, ယွၤဧၢ.