စံးထီၣ်ပတြၢၤ 147 - Sgaw Karen Common Bible

လၢတၢ်စံးထီၣ်ပတြၢၤကစၢ်ယွၤ လၢအအိၣ်ဒီးအစိအကမီၤ

¹ စံးထီၣ်ပတြၢၤယွၤတက့ၢ်. အဂ့ၢ်ဒ်အံၤ, တၢ်သးဝံၣ်စံးထီၣ်ပတြၢၤ ပကစၢ်ယွၤန့ၣ်မ့ၢ်တၢ်ဂ့ၤလီၤ. တၢ်စံးထီၣ်ပတြၢၤအီၤန့ၣ် မ့ၢ်တၢ်မုာ်သူၣ်မုာ်သးဒီး တၢ်ကြၢးဝဲဘၣ်ဝဲလီၤ.

² ယွၤသူၣ်ထီၣ်ဝ့ၢ်ယရူၤၡလ့ၣ်, အဝဲပာ်ဖှိၣ်က့ၤအံၣ်စရ့လး အပှၤဘၣ်တၢ်စိာ်မၢကဲကုၢ်အီၤန့ၣ်လီၤ.

³ အဝဲဒၣ်မၤဘျါက့ၤပှၤလၢအသူၣ်ကၢ်အသးလီၤ, ဒီးဘိၣ်ထီၣ်အဝဲသ့ၣ်အပူၤလီၢ်တဖၣ်လီၤ.

⁴ အဝဲစံၣ်ညီၣ်တဲာ်ဆၣ်ဧိၤဖီဧိၤအတၢ်ဂံၢ်, ဒီးကိးဝဲအမံၤခဲလၢာ်လီၤ.

⁵ ပယွၤန့ၣ်ဒိၣ်ဝဲ, ဒီးအစိအကမီၤအိၣ်အါမးလီၤ. အတၢ်ကူၣ်သ့ကူၣ်ဘၣ်န့ၣ်တၢ်ထိၣ်အီၤတဲာ်အီၤ တသ့ဘၣ်.

⁶ ပှၤလၢအဆီၣ်လီၤအသးန့ၣ်ယွၤဝံၢ်ဆၢထၢၣ်အီၤလီၤ. မ့မ့ၢ်ပှၤတတီတလိၤန့ၣ် ဆီၣ်လီၤဝဲလၢဟီၣ်ခိၣ်လိၤလီၤ.

⁷ သးဝံၣ်ထီၣ်ယွၤလၢတၢ်စံးထီၣ်ပတြၢၤတက့ၢ်. သးဝံၣ်ထီၣ်ပကစၢ် ယွၤအိၣ်ဒီးတနၢ်တက့ၢ်.

⁸ အဝဲဒၣ်မၤဘၢမူခိၣ်လၢတၢ်အၢၣ်, ကတဲာ်ကတီၤတၢ်စူၤလၢဟီၣ်ခိၣ်အဂီၢ်, ဒီးဒုးမဲထီၣ်နီၣ်ဧိၤမံၤဧိၤလၢ ကစၢၢ်ကလိအလိၤန့ၣ်လီၤ.

⁹ အဝဲဟ့ၣ်လီၤတၢ်အီၣ်လၢဆၣ်ဖိကီၢ်ဖိအဂီၢ်, ဒီးဘုၣ်အီၣ်စိးဝၣ်ဃးဖိလၢအကိးထီၣ်န့ၣ်လီၤ.

¹⁰ အတၢ်မုာ်လၤန့ၣ်တအိၣ်လၢ ကသ့ၣ်လၢအဂံၢ်ဆူၣ်တဖၣ်အပူၤ ဒီးအတၢ်သူၣ်ခုသးခုန့ၣ်တအိၣ်ဘၣ်လၢပှၤသုးဖိလၢ အဒူအဃိၤတဖၣ်အပူၤန့ၣ်ဘၣ်.

¹¹ မ့မ့ၢ်ယွၤမုာ်လၤဝဲလၢပှၤလၢအပျံၤအီၤ, ပှၤလၢအမုၢ်လၢ်တၢ်လၢ အတၢ်အဲၣ်ဂၢၢ်ကျၢၤအပူၤန့ၣ်လီၤ.

¹² ယရူၤၡလ့ၣ်ဧၢ, စံးထီၣ်ပတြၢၤယွၤတက့ၢ်. စံယိၣ်ဧၢ, စံးထီၣ်ပတြၢၤနကစၢ်ယွၤတက့ၢ်.

¹³ အဂ့ၢ်ဒ်အံၤ, အဝဲမၤကျၢၤလံနတြဲၤအနီၣ်ဘိ, အဝဲဆိၣ်ဂ့ၤဆိၣ်ဝါနဖိနလံၤအိၣ်လၢနပူၤလီၤ.

¹⁴ အဝဲပာ်လီၤတၢ်ဃူတၢ်ဖိးလၢနကီၢ်အဃၢၤ, အဝဲဒုးဘျဲးအီၣ်ဘျဲးအီနၤလၢ ဘုဧိၤဟုဧိၤလၢအဂ့ၤကတၢၢ်လီၤ.

¹⁵ အဝဲဟ့ၣ်လီၤအတၢ်မၤလိာ်ဆူဟီၣ်ခိၣ် ဒီးတၢ်လၢအစံးဝဲန့ၣ်ဝံၤဝဲချ့သဒံးန့ၣ်လီၤ.

¹⁶ အဝဲဟ့ၣ်လီၤမူခိၣ်ဖီဒ်သိအဆူၣ်အသိး, မၤလီၤပြံလီၤပြါနါဝာ်ဒ်ဖၣ်ဆါအသိးန့ၣ်လီၤ.

¹⁷ အဝဲဒုးဟဲစူၤလီၤသူၣ်ဒ်မဲးဧိၤဟီၣ်ဧိၤအသိး ဒီးပှၤတူၢ်တၢ်ခုၣ်လၢအဆှၢလီၤဝဲန့ၣ် တသ့နီတဂၤဘၣ်.

¹⁸ အဝဲဟ့ၣ်လီၤအကလုၢ်ဒီးထံလီၤသကၤပှံၢ်လီၤဝဲ အဝဲဒုးအူထီၣ်ကလံၤဒီးထံတဖၣ်ယွၤလီၤဝဲလီၤ.

¹⁹ အဝဲဟ့ၣ်လီၤအပှၤဂီၢ်မုၢ်လၢ အတၢ်ကစီၣ်, အတၢ်မၤလိာ်ဒီးအတၢ်သိၣ်တၢ်သီတဖၣ် ဆူအံၣ်စရ့လးန့ၣ်လီၤ.

²⁰ အဝဲတမၤတ့ၢ်တၢ်ဒ်အံၤလၢ ပှၤကလုာ်အဂၤတဖၣ်န့ၣ်ဘၣ်. အဝဲသ့ၣ်တသ့ၣ်ညါ အတၢ်သိၣ်တၢ်သီတဖၣ်န့ၣ်ဘၣ်. စံးထီၣ်ပတြၢၤယွၤတက့ၢ်.