စံးထီၣ်ပတြၢၤ 144 - Sgaw Karen Common Bible

စီၤပၤစံးထီၣ်ပတြၢၤကစၢ်ယွၤ လၢတၢ်မၤနၢၤအဃိ

¹ ယွၤ, ယလၢၢ်ယလ့, ပှၤလၢအသိၣ်လိယစုလၢတၢ်ဒုးအဂီၢ်, ဒီးယစုမုၢ်စုနၢတဖၣ်လၢ တၢ်ဒုးသုးအဂီၢ်တဂၤန့ၣ်, မ်အဘၣ်တၢ်စံးထီၣ်ပတြၢၤအီၤတက့ၢ်.

² အဝဲမ့ၢ်ယလၢၢ်ဒီးယတိာ်, ယတၢးထီၣ်ထီ ဒီးပှၤမၤပူၤဖျဲးယၤ, ယကတီၤတဘ့ၣ်ဒီးပှၤလၢယသန့ၤယသးလၢအီၤ, ပှၤလၢအဆီၣ်လီၤပှၤဂီၢ်မုၢ်တဖၣ်လၢ ယဖီလာ်န့ၣ်လီၤ.

³ ယွၤဧၢ, ပှၤကညီလၢနပာ်သူၣ်ပာ်သးလၢအီၤ, ဒီးပှၤကညီဖိလၢနဆိကမိၣ်လၢအဂ့ၢ်န့ၣ်, မ့ၢ်မနုၤလဲၣ်.

⁴ အဝဲလီၤဂာ်ဒ်တၢ်သါတဘီအသိး ဒီးအမုၢ်နံၤတဖၣ်မၤအသးဒ်တၢ်အကဒုလၢ အလဲၤပူၤကွံာ်အသိးန့ၣ်လီၤ.

⁵ ယွၤဧၢ, မၤသကူးလီၤနမူခိၣ်ဒီးဟဲလီၤတက့ၢ်. ထိးကစၢၢ်ကလိတက့ၢ်. ဒီးမ့ၣ်အူလုၣ်ကခုၣ်ထီၣ်ဝဲလီၤ.

⁶ မၢလီၤလီဝၢ်အဒံး, ဒီးမၤလီၤပြံလီၤပြါနဒုၣ် နဒါတဖၣ်တက့ၢ်. ခးထီၣ်နပျၢ်တဖၣ်ဒီးဒုးဃ့ၢ်ကွံာ်အဝဲသ့ၣ်န့ၣ်တက့ၢ်.

⁷ ယူာ်လီၤနစုလၢ တၢ်ထီၣ်ထီ, ထုးထီၣ်ကွံာ်ယၤလၢ ထံယိာ်ပူၤဒီးမၤပူၤဖျဲးယၤ, အုၣ်က့ၤခီၣ်က့ၤယၤလၢ ပှၤတခီဘီမုၢ် တဖၣ်အစိကမီၤအပူၤတက့ၢ်.

⁸ အဝဲသ့ၣ်တတဲတၢ်မ့ၢ်တၢ်တီနီတစုဘၣ်. မၤကဘျံးကဘျၣ်တၢ်လၢ အဆိၣ်တၢ်အပူၤဒၣ်လဲာ်န့ၣ်လီၤ.

⁹ ကစၢ်ယွၤဧၢ, ယကသးဝံၣ်ထီၣ်နၤလၢတၢ်သးဝံၣ်အသီ, ယကဒ့တနၢ်ဒီးသးဝံၣ်ထီၣ်နၤလီၤ.

¹⁰ နဟ့ၣ်တၢ်မၤနၢၤဆူစီၤပၤတဖၣ်, ဒီးမၤပူၤဖျဲးနခ့နပှၤစီၤဒၤဝံးန့ၣ်လီၤ.

¹¹ အုၣ်က့ၤခီၣ်က့ၤယၤလၢယဒုၣ်ယဒါအအၢအသီတဖၣ်, မၤပူၤဖျဲးယၤလၢပှၤတခီဘီမုၢ်ဖိအစိအကမီၤ, ပှၤတဖၣ်လၢ တတဲတၢ်မ့ၢ်တၢ်တီနီတစုဒီး မၤကဘျံးကဘျၣ်ဒၣ်လဲာ်တၢ်လၢ အမၤတၢ် ဆိၣ်အပူၤန့ၣ်တက့ၢ်.

¹² မ်ပဖိခွါတဖၣ်လၢအသးစၢ်အကတီၢ်န့ၣ်, ကလီၤဂာ်ဒီးသ့ၣ်ဖိတဖၣ်လၢ အဒိၣ်ထီၣ်ပှဲၤဂံၢ်ပှဲၤဘါန့ၣ်တက့ၢ်. မ်ပဖိမုၣ်တဖၣ်ကမၤအသးဒ် လၢၢ်နၢၣ်စိးပျၤအသး လၢပှၤမၤဃံမၤလၤနူၢ်ဧိၤစီၤဧိၤအသိးန့ၣ်တက့ၢ်,

¹³ မ်ပသိၣ်ဧိၤဖီဧိၤပှဲၤဝဲဒီး တၤသူတၤသၣ်ကိးကလုာ်ဒဲး မ်ပသိကဖှံလီၤအဒုအကထိတဖၣ်, ဒီးအကလးတဖၣ်လၢပပျီပူၤ,

¹⁴ မ်ပဂီၤဘုၣ်. ဂီၤဖံးတဖၣ်ကဒၢထီၣ်အါအါကလဲာ် ဒီးအဖိသုတလီၤတဲာ်နီတဒုတဂ့ၤ. မ်တၢ်ကိးပသူထီၣ်လၢတၢ်ကိၢ်တၢ်ဂီၤအပူၤ အသုတအိၣ်ထီၣ်လၢပကျဲတဖၣ်န့ၣ်တဂ့ၤ.

¹⁵ ပှၤကလုာ်လၢတၢ်အံၤမ့ၢ်ဝဲတီဝဲလၢ အဂီၢ်န့ၣ်ဘၣ်ဆိၣ်ဂ့ၤဝဲလီၤ. ပှၤဂီၢ်မုၢ်လၢ ကစၢ်ယွၤမ့ၢ် အယွၤန့ၣ်ဘၣ်ဆိၣ်ဂ့ၤဝဲလီၤ.