စံးထီၣ်ပတြၢၤ 143 - Sgaw Karen Common Bible

တၢ်ထုကဖၣ်လၢတၢ်မၤစၢၤအဂီၢ်

¹ ယွၤဧၢ, နၢ်ဟူယတၢ်ထုကဖၣ်တက့ၢ်. လၢနတၢ်တီတၢ်လိၤအပူၤန့ၣ် ဒိကနၣ်လၢ်ယတၢ်ဃ့ကညး ဒီးစံးဆၢလၢ်ယၤလၢနတၢ်သးတီအပူၤန့ၣ်တက့ၢ်.

² ပျဲယၤ, နခ့နပှၤ ဘၣ်တၢ်လိာ်ကွီၢ်တဂ့ၤ. လၢနမဲာ်ညါပှၤလၢအတၢ်ကမၣ်တအိၣ်ဘၣ်န့ၣ် တအိၣ်နီတဂၤဘၣ်.

³ ယဒုၣ်ယဒါတဖၣ်လူၤမၤလီၤဃံၤတ့ၢ်ယၤ ဒီးမၤနၢၤကွံာ်တ့ၢ်လံယၤလၢာ်လၢာ်ဆ့ဆ့န့ၣ်လီၤ. ပာ်ယၤလၢတၢ်ခံးတၢ်နၤအတၢ်စၢဃာ်အပူၤ ဒီးယမၤယသးလီၤဂာ်ဒ် ပှၤလၢအသံတ့ၢ်ဃဲးဃဲးအသိးန့ၣ်လီၤ.

⁴ ယအိၣ်လၢတၢ်သးဟးဂီၤဖးဒိၣ်အပူၤအဃိ, ယအိၣ်ကတဲာ်ကတီၤလံယသးလၢ ယကဟ့ၣ်လီၤကွံာ်ယသးန့ၣ်လီၤ.

⁵ ယသ့ၣ်နီၣ်ထီၣ်က့ၤမုၢ်နံၤမုၢ်သီလၢ အပူၤကွံာ်သ့ၣ်တဖၣ်, ယဆိကမိၣ်ထီၣ်က့ၤတၢ်ဂ့ၢ်လၢနမၤတ့ၢ်ခဲလၢာ်, ယသးဆိကမိၣ်ထီၣ်က့ၤ နတၢ်မၤခဲလၢာ်သ့ၣ်တဖၣ်န့ၣ်လီၤ.

⁶ ယယူာ်ထီၣ်ယစုဆူနအိၣ်လၢတၢ်ထုကဖၣ်အပူၤ, ယသးအံၤသူအသးလၢနၤဒ် ဟီၣ်ခိၣ်အဃ့အသိးန့ၣ်လီၤ. စ့လၤ

⁷ ယွၤဧၢ, မၤချ့ချ့လၢနကမၤစၢၤယၤန့ၣ်တက့ၢ်. ယတၢ်မုၢ်လၢ်လၢာ်ကွံာ်လံ. ဒ်သိးယသုတကဲထီၣ်ဒ်ပှၤလၢအလဲၤလီၤဆူ တၢ်သံအကီၢ်ပူၤတဂ့ၤဒီး, ပာ်တဒၢနမဲာ်ဒီးယၤတဂ့ၤ.

⁸ ဒုးသ့ၣ်နီၣ်ယၤလၢနတၢ်အဲၣ်ဂၢၢ်ကျၢၤကိးဂီၤဒဲးတက့ၢ်. အဂ့ၢ်ဒ်အံၤ, ယသန့ၤယသးလၢနၤလီၤ. သိၣ်လိယၤလၢကျဲလၢယဂ့ၤပိာ်တဘိန့ၣ်တက့ၢ်. အဂ့ၢ်ဒ်အံၤ, ယစိာ်ထီၣ်ယသးဆူနအိၣ်လီၤ.

⁹ ယွၤဧၢ, မၤပူၤဖျဲးယၤလၢယဒုၣ်ယဒါတက့ၢ်. ယဃ့ၢ်ဆူနအိၣ်လၢတၢ်ပူၤဖျဲးအဂီၢ်လီၤ.

¹⁰ သိၣ်လိယၤဒ်သိးယကမၤတၢ်ဘၣ်နသးတက့ၢ်. အဂ့ၢ်ဒ်အံၤ, နမ့ၢ်ယကစၢ်ယွၤလီၤ. မ်နသးလၢအဂ့ၤန့ၣ်ဆှၢယၤလၢကျဲလၢ အမုာ်အပၢၤန့ၣ်တက့ၢ်.

¹¹ ယွၤဧၢ, ပာ်မူယသးလၢနမံၤအဃိန့ၣ်တက့ၢ်. လၢနတၢ်တီတၢ်လိၤအပူၤန့ၣ်, ထုးထီၣ်ကွံာ်ယၤလၢတၢ်ကီတၢ်ခဲ တဖၣ်အပူၤန့ၣ်တက့ၢ်.

¹² ဒီးလၢနတၢ်အဲၣ်ဂၢၢ်ကျၢၤအဃိန့ၣ်, ဒီၣ်တဲာ်ကွံာ်ယဒုၣ်ယဒါတဖၣ်, ဒီးမၤဟးဂီၤကွံာ်ကယဲၢ်ပှၤလၢအမၤအၢယၤ ခဲလၢာ်န့ၣ်တက့ၢ်. အဂ့ၢ်ဒ်အံၤ, ယမ့ၢ်နခ့နပှၤလီၤ.