စံးထီၣ်ပတြၢၤ 142 - Sgaw Karen Common Bible

တၢ်ထုကဖၣ်လၢတၢ်မၤစၢၤအဂီၢ်

¹ ယကိးထီၣ်ယွၤလၢတၢ်မၤစၢၤအဂီၢ်, ယဃ့ကညးတၢ်ဒီးအီၤန့ၣ်လီၤ.

² ယလူလီၤယတၢ်ကအုကစွါလၢအမဲာ်ညါ, ယတဲအီၤလၢယတၢ်ကီတၢ်ခဲ ခဲလၢာ်လီၤ.

³ တုၤယသးလီၤဘှံးလီၤဘျါဒီးသးဟးဂီၤန့ၣ်, အဝဲသ့ၣ်ညါယကဘၣ်မၤတၢ်မနုၤလဲၣ်န့ၣ်လီၤ. လၢကျဲလၢယပိာ်အီၤအပူၤန့ၣ်, ယဒုၣ်ယဒါတဖၣ် ပာ်လီၤခူသူၣ်ထုလၢယဂီၢ်လီၤ.

⁴ တုၤယကွၢ်တၢ်လၢယကပိာ်ကပၤန့ၣ်ဒီး ယတထံၣ်န့ၢ်ဘၣ်ပှၤလၢကမၤစၢၤယၤနီတဂၤဘၣ်. ပှၤမၤပူၤဖျဲးယၤတအိၣ်ဘၣ်. ပှၤကွၢ်ထွဲယၤတအိၣ်ဘၣ်.

⁵ ယွၤဧၢ, ယကိးထီၣ်နၤလၢတၢ်မၤစၢၤအဂီၢ်, နဲဒၣ်ယွၤဧၢ, နမ့ၢ်ပှၤလၢအဒီဒၣ်အိၣ်ပှိၤယၤ, နမ့ၢ်တၢ်ခဲလၢာ်လၢယဆၢဒိးန့ၢ်ဘၣ်အီၤလၢ တၢ်အိၣ်မူအံၤအပူၤန့ၣ်လီၤ.

⁶ ကနၣ်ယတၢ်ကိးထီၣ်လၢတၢ်မၤစၢၤအဂီၢ်တက့ၢ်. အဂ့ၢ်ဒ်အံၤ, ယလီၤဒးကွံာ်လၢ တၢ်သူၣ်ဟးဂီၤသးဟးဂီၤအပူၤလီၤ. မၤပူၤဖျဲးယၤလၢယဒုၣ်ယဒါသ့ၣ်တဖၣ်တက့ၢ်. အဝဲသ့ၣ်ဆူၣ်ကဲာ်ဆိးလၢယဂီၢ်န့ၣ်လီၤ.

⁷ ဒုးထူၣ်ဖျဲးထီၣ်ယၤလၢ ယတၢ်ကိၢ်တၢ်ဂီၤအပူၤတက့ၢ်. အန့ၣ်ဒီးယကစံးထီၣ်ပတြၢၤနၤမ့ၢ်လၢ နတၢ်မၤဂ့ၤယၤအဃိ, လၢနပှၤဂီၢ်မုၢ်အတၢ်အိၣ်ဖှိၣ်အပူၤန့ၣ်လီၤ. နကမၤဂ့ၤယၤလၢလၢပှဲၤပှဲၤလီၤ.