စံးထီၣ်ပတြၢၤ 141 - Sgaw Karen Common Bible

မုၢ်ဟါအတၢ်ထုကဖၣ်

¹ ယွၤဧၢ, ယကိးထီၣ်နၤလီၤ. မၤချ့ချ့လၢယဂီၢ်တက့ၢ်. တုၤယကိးထီၣ်နၤဒီး, ကနၣ်ယကလုၢ်တက့ၢ်.

² မ်ယဘါထုကဖၣ်တၢ်အံၤဘၣ်တၢ်ဂံၢ်အီၤဒ် တၢ်ဆိၣ်ကဲၤနၢမူအသိးလၢနမဲာ်ညါ, ဒီးယယူာ်ထီၣ်ယစုအံၤဒ်တၢ်လုၢ်လၢ မုၢ်ဟါအသိးန့ၣ်တက့ၢ်.

³ ယွၤဧၢ, ပာ်တၢ်ပၢၤလၢယထးခိၣ် ဒီးပၢၤဃာ်ယနိးဖံးအတြဲၤတက့ၢ်.

⁴ သုတဘိးဃၣ်ယသးဆူတၢ်အၢဒ်သိးယကလဲၤတၢ် ဒီးပှၤမၤတၢ်အၢလၢအတၢ်မၤ တၢ်အၢတၢ်သီအပူၤန့ၣ်တဂ့ၤ. ဒီးမ်ယသုတအီၣ်အတၢ်အီၣ်ဝံၣ်တဖၣ်တဂ့ၤ.

⁵ မ်ပှၤအတီအလိၤတီၢ်ယၤ မ့တမ့ၢ်သိၣ်ဃီၣ်ယၤလၢ တၢ်သးကညီၤအပူၤန့ၣ်တက့ၢ်. မ်ပှၤအအၢအသီအသိအသုတဘၣ်တၢ်ဖှူအီၤလၢ ယခိၣ်နီတဘျီတဂ့ၤ. အဂ့ၢ်ဒ်အံၤ, ယထုကဖၣ်တၢ်ထီဒါ အတၢ်အၢတၢ်သီတဘိယူၢ်ဃီန့ၣ်လီၤ.

⁶ တုၤအပှၤပၢတၢ်တဖၣ်ဘၣ်တၢ်တ့ၢ်လီၤကွံာ်အီၤလၢ လ့ကဘျၣ်တဖၣ်အလိၤ, ဒီးပှၤဂီၢ်မုၢ်ကအၢၣ်လီၤလၢ ယတၢ်ကတိၤတဖၣ်မ့ၢ်ဝဲတီဝဲန့ၣ်လီၤ.

⁷ အဃံအကွဲလီၤပြံလီၤပြါလၢ တၢ်သွၣ်ခိၣ်အခိၣ်ထိး ဒ်ပှၤထဲၣ်တၢ်တဂၤမၤလီၤကလဲ ဟီၣ်ခိၣ်အသိးန့ၣ်လီၤ.

⁸ မ့မ့ၢ်ယဲဒၣ်အံၤ, ယမဲာ်ကွၢ်စူၢ်တၢ်ဆူနအိၣ် ယယွၤပၢဘၣ်တၢ်ခဲလၢာ်တဂၤဧၢ, ယဃုတၢ်အိၣ်တဒၢလၢနပူၤလီၤ. ဟ့ၣ်လီၤကွံာ်ယၤဆူတၢ်သံအပူၤတဂ့ၤ.

⁹ ပၢၤယၤလၢပျံၤသကွီၤလၢပှၤပာ်လီၤလၢယဂီၢ် ဒီးလၢပှၤမၤတၢ်အၢတဖၣ်အထုဝၣ်ခီန့ၣ်တက့ၢ်.

¹⁰ မ်ပှၤအၢပှၤသီလီၤတဲာ်ကွံာ်ဆူအပျံၤသကွီၤဒၣ်ဝဲအပူၤ, ဖဲယထူၣ်ဖျဲးန့ၣ်တက့ၢ်.