စံးထီၣ်ပတြၢၤ 140 - Sgaw Karen Common Bible

တၢ်ထုကဖၣ်လၢတၢ်ကဟုဘံၣ်ကယာ်ဘၢ အဂီၢ်

¹ ယွၤဧၢ, မၤပူၤဖျဲးလၢ်ယၤလၢပှၤအအၢအသီ, ပၢၤယၤလၢပှၤစုဆူၣ်ခီၣ်တကးအစုပူၤန့ၣ်တက့ၢ်.

² အဝဲသ့ၣ်တဖၣ်န့ၣ်ကူၣ်ထီၣ်တၢ်အၢတၢ်သီလၢ အသးကံၢ်ပူၤ ဒီးထိၣ်ဟူးထိၣ်ဂဲၤ တၢ်အ့ၣ်လိာ်ဆိးက့လိာ်တဖၣ်တဘိယူၢ်ဃီန့ၣ်လီၤ.

³ အပျ့ၤသ့ၣ်တဖၣ်လီၤဂာ်ဒ်ဂုၢ်လၢအဖျးသံတၢ်, ဒီးအတၢ်ကတိၤတဖၣ်လီၤဂာ်ဒ် ဂုၢ်သီအစုၣ်အသိးန့ၣ်လီၤ. စ့လၤ

⁴ ယွၤဧၢ, ကဟုကယာ်ဒီးမၤပူၤယၤလၢ ပှၤတတီတလိၤအစုပူၤ, ပၢၤဃာ်ယၤလၢပှၤစုဆူၣ်ခီၣ်တကး လၢအကူၣ်ထီၣ်တၢ်လီၤဃံၤလၢယဂီၢ်န့ၣ်တက့ၢ်.

⁵ ပှၤလၢအပာ်ထီၣ်ထီအသးတဖၣ် ပာ်လီၤပျံၤသကွီၤခူသူၣ်လၢယဂီၢ်, ဒီးဒါလီၤပှာ်ဧိၤစၤဧိၤလၢကျဲလိၤ, အဝဲသ့ၣ်ဆဲထီၣ်ထုလၢယဂီၢ်လီၤ. စ့လၤ

⁶ ယစံးဘၣ်ယွၤ, “နမ့ၢ်ယကစၢ်ယွၤလီၤ. ယွၤဧၢ,” ကနၣ်ယဃ့ကညးတၢ်အသီၣ်န့ၣ်တက့ၢ်.

⁷ ယယွၤ, ပၢဘၣ်တၢ်ခဲလၢာ်, ယတၢ်အုၣ်က့ၤခီၣ်က့ၤကစၢ်ဧၢ, နကဟုကယာ်တ့ၢ်လံယၤလၢ တၢ်ဒုးသုးအပူၤန့ၣ်လီၤ.

⁸ ယွၤဧၢ, ပှၤတတီတလိၤအတၢ်ဆၢန့ၢ်တဖၣ်န့ၣ် ဟ့ၣ်လီၤအီၤတဂ့ၤ. မ်အကူၣ်ထီၣ်တၢ်အၢန့ၣ်သုတကဲထီၣ်တၢ်တဂ့ၤ. စ့လၤ

⁹ ပျဲယဒုၣ်ယဒါတဖၣ် မၤနၢၤယၤတဂ့ၤ, မ်အတၢ်ကတိၤမၤပျံၤမၤဖုးထီဒါယၤတဖၣ်န့ၣ် လီၤဘၣ်ကဒါက့ၤလၢအလိၤတက့ၢ်.

¹⁰ မ်မ့ၣ်အူကဖးလၢဂီၤကဲၤလီၤတဲာ်လၢအလိၤ, မ်အဘၣ်တၢ်တ့ၢ်လီၤကွံာ်အီၤဆူတၢ်ပူၤတပူၤ, ဒီးအသုတဟဲက့ၤထီၣ်က့ၤနီတစုလၢၤတဂ့ၤ.

¹¹ မ်ပှၤလၢအကတိၤခဲၣ်သူခဲၣ်ဂီၤတၢ်တဖၣ်, အသုတအိၣ် ဂၢၢ်ဆိးကျၢၤဘၣ်လၢထံဧိၤကီၢ်ဧိၤပူၤန့ၣ်တဂ့ၤ. မ်တၢ်တတၢးတနါမၤဒၢၣ်ကွံာ် ပှၤမၤဆူၣ်မၤစိးတၢ်တဖၣ်န့ၣ်တက့ၢ်.

¹² ယွၤဧၢ, ယသ့ၣ်ညါလၢ နဒီဒၣ်အိၣ်ပှိၤပှၤဖှီၣ်ဖိယာ်ဖိ အတၢ်ဂ့ၢ်တၢ်ကျိၤ, ဒီးပှၤလိၣ်ဘၣ်တၢ်မၤစၢၤ အတၢ်ခွဲးတၢ်ယာ်တဖၣ်န့ၣ်လီၤ.

¹³ မ့ၢ်မးပှၤအတီအလိၤကစံးထီၣ်ပတြၢၤနမံၤ, ပှၤအတီအလိၤကအိၣ်ဝဲဆိးဝဲလၢနမဲာ်ညါလီၤ.