စံးထီၣ်ပတြၢၤ 139 - Sgaw Karen Common Bible

ကစၢ်ယွၤအတၢ်သ့ၣ်ညါဒီး အတၢ်အံးထွဲကွၢ်ထွဲအလၢအပှဲၤ

¹ ယွၤဧၢ, နဃုကွၢ်ထံယၤဒီးနသ့ၣ်ညါယၤလီၤ.

² ယဆ့ၣ်နီၤဒီးယဆၢထၢၣ်န့ၣ်နသ့ၣ်ညါလီၤ. နနၢ်ပၢၢ်ယတၢ်ဆိကမိၣ်တဖၣ်လၢအယံၤလီၤ.

³ နထံၣ်တ့ၢ်လံယကျဲဒီးယတၢ်မံလီၤ. ဒီးနသ့ၣ်ညါယကျဲဧိၤကပူၤဧိၤခဲလၢာ်န့ၣ်လီၤ.

⁴ တချုးလၢယကတိၤတၢ်ဒံးဘၣ်န့ၣ်, နသ့ၣ်ညါတ့ၢ်လံတၢ်လၢယကစံးကတိၤန့ၣ်လီၤ.

⁵ နအိၣ်ဝးတရံးယၤကိးကပၤဒဲး, နကဟုဘံၣ်ကယာ်ဘၢယၤလၢ နတၢ်စိတၢ်ကမီၤန့ၣ်လီၤ.

⁶ နတၢ်သ့ၣ်ညါဒ်အံၤလီၤလးကဲၣ်ဆိးလၢယဂီၢ်, အိၣ်ထီၣ်ထီဝဲ, ယနၢ်ပၢၢ်ယဲတသ့ဘၣ်.

⁷ ယကလဲၤပူၤကွံာ်လၢနသးဆူလဲၣ်. မ့တမ့ၢ်ယကဃ့ၢ်ကွံာ်လၢနမဲာ်ညါဆူလဲၣ်.

⁸ ယမ့ၢ်လဲၤထီၣ်ဆူမူခိၣ်ဒီးနအိၣ်ဖဲန့ၣ်, ယမ့ၢ်ဒါလီၤယလီၢ်မံလၢပျုၤပူၤဒီး နအိၣ်ဖဲန့ၣ်လီၤ.

⁹ ယမ့ၢ်ဟံးန့ၢ်မုၢ်ဂီၤအဒံးဆ့, ဒီးအိၣ်လၢပီၣ်လဲၣ်အကတၢၢ်န့ၣ်ဒီး,

¹⁰ ဖဲန့ၣ်ဒၣ်လဲာ်နစုကဆှၢယၤ, ဒီးနစုထွဲကဖီၣ်ဃာ်ယၤလီၤ.

¹¹ ယမ့ၢ်စံး, “မ်တၢ်ခံးမၤဘံၣ်မၤဘၢယၤ, ဒီးတၢ်ကပီၤအိၣ်ဝးတရံးယၤ ကဲထီၣ်မုၢ်နၤတက့ၢ်.” ဒၣ်လဲာ်,

¹² တၢ်ခံးတၢ်နၤန့ၣ်တခံးဘၣ်ဝဲလၢနဂီၢ်ဘၣ်. မုၢ်နၤကပီၤဝဲဒ်မုၢ်ဆါအသိး, အဂ့ၢ်ဒ်အံၤ, တၢ်ခံးမၤသးဒီးနၤဒ် တၢ်ကပီၤအသိးန့ၣ်လီၤ.

¹³ အဂ့ၢ်ဒ်အံၤ, နမၤတၢ်အက့ၢ်အဂီၤလၢယပူၤတဖၣ်, နဒုးကဲထီၣ်ယၤလၢယမိၢ်အဟၢဖၢပူၤလီၤ.

¹⁴ ယစံးထီၣ်ပတြၢၤနၤ, အဂ့ၢ်ဒ်အံၤ နမ့ၢ်တၢ်လီၤပျံၤအလီၢ် နတၢ်မၤတဖၣ်န့ၣ် မ့ၢ်တၢ်လီၤကမၢကမၣ်ဒီး တၢ်လီၤလးလီၤ. နသ့ၣ်ညါလၢလၢပှဲၤပှဲၤန့ၣ်လီၤ.

¹⁵ ဖဲယဃံတဖၣ်အက့ၢ်အဂီၤဘၣ်တၢ်ဒုးကဲထီၣ်အီၤ, ပာ်ဖှိၣ်အီၤလီၤတံၢ်လီၤဆဲးလၢ ယမိၢ်အဒၢလီၢ်ပူၤ, ဖဲယဒိၣ်ထီၣ်လၢ တၢ်ခူသူၣ်အပူၤဖဲန့ၣ်န့ၣ်, နသ့ၣ်ညါလၢယအိၣ်ဖဲန့ၣ်,

¹⁶ နထံၣ်တ့ၢ်ယၤတချုးလၢယအိၣ်ဖျဲၣ်ထီၣ်, မုၢ်နံၤတဖၣ်လၢအဘၣ်တၢ်ပာ်အီၤလၢယဂီၢ်န့ၣ် အိၣ်ကွဲးတ့ၢ်လံအသးလၢနလံာ်ပူၤ, တချုးလၢတၢ်သ့ၣ်တဖၣ် အိၣ်ထီၣ်ဒံးဘၣ်ဒၣ်လဲာ်န့ၣ်လီၤ.

¹⁷ ကစၢ်ယွၤဧၢ, နတၢ်ဆိကမိၣ်တဖၣ်န့ၣ် မ့ၢ်တၢ်လုၢ်ဒိၣ်ပှ့ၤဒိၣ်လၢယဂီၢ်ဆံးဒိၣ်လဲၣ်. မ့ၢ်တၢ်လၢအဒိၣ်ဝဲမုၢ်ဝဲနးမးလဲၣ်.

¹⁸ ယမ့ၢ်ဘၣ်ဂံၢ်အီၤဒီး, အဝဲသ့ၣ် အနီၣ်ဂံၢ်ကအါန့ၢ်ဒံး မဲးဧိၤဟီၣ်ဧိၤန့ၣ်လီၤ. တုၤယဖုးသံနီၣ်ထီၣ်ဒီး ယအိၣ်ဒံးဒီးနၤလီၤ.

¹⁹ ကစၢ်ယွၤဧၢ, ယသးအိၣ်မးလၢ နကမၤသံပှၤ တတီတလိၤန့ၣ်လီၤ. ယသးအိၣ်မးလၢ ပှၤမၤဆူၣ်မၤစိးတၢ်တဖၣ် ကဟးဖးဒီးယၤန့ၣ်လီၤ.

²⁰ အဝဲသ့ၣ်စံးအၢစံးသီတၢ်လၢနဂ့ၢ် ဒီးအဝဲသ့ၣ်စံးကတိၤတၢ်အၢတၢ်သီ ထီဒါနမံၤန့ၣ်လီၤ.

²¹ ယွၤဧၢ, မ့ၢ်ယတသးဟ့ဘၣ်ပှၤလၢ အသးဟ့နၤန့ၣ်ဘၣ်ဧါ, ဒီးမ့ၢ်ယတသးဘၣ်အၢဘၣ်ပှၤလၢ အဂဲၤထၢၣ်ထီဒါနၤန့ၣ်ဘၣ်ဧါ.

²² ယသးဟ့အဝဲသ့ၣ်လၢာ်လၢာ်ဆ့ဆ့, ယပာ်အဝဲသ့ၣ်လၢယဒုၣ်ယဒါတဖၣ်န့ၣ်လီၤ.

²³ ကစၢ်ယွၤဧၢ, ဃုကွၢ်ယၤ, ဒီးသ့ၣ်ညါယသးတက့ၢ်. မၤကွၢ်ယၤ, ဒီးသ့ၣ်ညါ ယတၢ်ဆိကမိၣ်တဖၣ်န့ၣ်တက့ၢ်.

²⁴ ဒီးကျဲအအၢလၢယပူၤမ့ၢ်အိၣ်, တအိၣ်လဲၣ်န့ၣ်ကွၢ်, ဒီးဆှၢယၤလၢကျဲအထူအယိာ်အပူၤတက့ၢ်.