စံးထီၣ်ပတြၢၤ 138 - Sgaw Karen Common Bible

တၢ်စံးဘျုးစံးဖှိၣ်အတၢ်ထုကဖၣ်

¹ ယွၤဧၢ, ယစံးထီၣ်ပတြၢၤနၤလၢ ယသးဒီဖျၢၣ်ညါ, ယသးဝံၣ်စံးထီၣ်ပတြၢၤနၤလၢ ကစၢ်သ့ၣ်တဖၣ်အမဲာ်ညါလီၤ.

² ယဃၣ်ဃီၤယမဲာ်နတၢ်လုၢ်ဟံၣ်စီဆှံအအိၣ်, ဆုးလီၤယခိၣ် ဒီးစံးထီၣ်ပတြၢၤနမံၤ လၢနတၢ်အဲၣ်ဂၢၢ်ကျၢၤ ဒီးနတၢ်မ့ၢ်တၢ်တီအဃိန့ၣ်လီၤ. အဂ့ၢ်ဒ်အံၤ, နပာ်ထီၣ်ထီနမံၤဒီး နကလုၢ်ကထါ လၢတၢ်ခဲလၢာ်အဖီခိၣ်န့ၣ်လီၤ.

³ မုၢ်တနံၤလၢယကိးထီၣ်နၤန့ၣ်နစံးဆၢယၤ, ဒီးနဒုးဆူၣ်ထီၣ်ယဂံၢ်ယဘါလၢ ယသးကံၢ်ပူၤလီၤ.

⁴ ယွၤဧၢ, ကယဲၢ်ဟီၣ်ခိၣ်အစီၤပၤခဲလၢာ် ကစံးထီၣ်ပတြၢၤနၤ, အဂ့ၢ်ဒ်အံၤ, အဝဲသ့ၣ်နၢ်ဟူတ့ၢ်လံ နတၢ်ကတိၤလၢနထးခိၣ်လံန့ၣ်လီၤ.

⁵ အဝဲသ့ၣ်ကသးဝံၣ်တၢ်လၢ နမၤတ့ၢ်အီၤအဂ့ၢ် ဒီးနတၢ်လၤကပီၤဖးဒိၣ်အဂ့ၢ်န့ၣ်လီၤ.

⁶ နမ့ၢ်အိၣ်လၢတၢ်လီၢ်လၢ အထီဒိၣ်မးဒၣ်လဲာ်, နအံးက့ၤကွၢ်က့ၤပှၤလၢ အဆီၣ်လီၤအသး, ဒီးပှၤလၢအပာ်ထီၣ်ထီအသးန့ၣ် အိၣ်သဒၢလၢအမဲာ်ညါတသ့ဘၣ်.

⁷ တုၤယလဲၤလၢတၢ်နးတၢ်ဖှီၣ်အပူၤန့ၣ်ဒီး, နပာ်ကီၤယသးသမူ, နယူာ်ထီၣ်နစုထီဒါယဒုၣ်ယဒါအတၢ်သးထီၣ် ဒီးနစုထွဲမၤပူၤဖျဲးယၤလီၤ.

⁸ ယွၤကမၤလၢပှဲၤအတၢ်တိာ်ပာ်ခဲလၢာ်လၢယဂီၢ်န့ၣ်လီၤ. ယွၤဧၢ, နတၢ်အဲၣ်ဂၢၢ်ကျၢၤ အိၣ်ဝဲလီၤထူလီၤယိာ်လီၤ. မ်နသုတလဲၤသဒၣ်နစုအတၢ်မၤန့ၣ်တဂ့ၤ.