စံးထီၣ်ပတြၢၤ 136 - Sgaw Karen Common Bible

တၢ်စံးဘျုးစံးဖှိၣ်အထါသးဝံၣ်

¹ စံးထီၣ်ပတြၢၤယွၤတက့ၢ်. အဂ့ၢ်ဒ်အံၤ, အဝဲဒၣ်န့ၣ်ဂ့ၤဝဲလီၤ. အဂ့ၢ်ဒ်အံၤ, အတၢ်အဲၣ်ဂၢၢ်ကျၢၤ အိၣ်ဝဲလီၤစိၤလီၤထီလီၤ.

² စံးထီၣ်ပတြၢၤကစၢ်တဖၣ်အကစၢ်အဒိၣ်ကတၢၢ်တဂၤတက့ၢ်. အဂ့ၢ်ဒ်အံၤ, အတၢ်အဲၣ်ဂၢၢ်ကျၢၤ အိၣ်ဝဲလီၤစိၤလီၤထီလီၤ.

³ စံးထီၣ်ပတြၢၤယွၤတဖၣ်အယွၤလၢအဂံၢ်ဆူၣ်ဘါဆူၣ် ကတၢၢ်တဂၤတက့ၢ်. အဂ့ၢ်ဒ်အံၤ, အတၢ်အဲၣ်ဂၢၢ်ကျၢၤ အိၣ်ဝဲလီၤစိၤလီၤထီလီၤ.

⁴ ထဲအဝဲဒၣ်တဂၤဧိၤမၤတၢ်လီၤလိၢ်လီၤလး ဖးဒိၣ်တဖၣ်န့ၣ်လီၤ. အဂ့ၢ်ဒ်အံၤ, အတၢ်အဲၣ်ဂၢၢ်ကျၢၤ အိၣ်ဝဲလီၤစိၤလီၤထီလီၤ.

⁵ အဝဲတ့လီၤဝဲမူခိၣ်လၢအတၢ်ကူၣ်သ့ကူၣ်ဘၣ်လီၤ. အဂ့ၢ်ဒ်အံၤ, အတၢ်အဲၣ်ဂၢၢ်ကျၢၤ အိၣ်ဝဲလီၤစိၤလီၤထီလီၤ.

⁶ အဝဲဒါလီၤဟီၣ်ခိၣ်လၢထံယိာ်ပူၤလီၤ. အဂ့ၢ်ဒ်အံၤ, အတၢ်အဲၣ်ဂၢၢ်ကျၢၤ အိၣ်ဝဲလီၤစိၤလီၤထီလီၤ.

⁷ အဝဲတ့လီၤတၢ်ကပီၤဖးဒိၣ်တဖၣ်လီၤ. အဂ့ၢ်ဒ်အံၤ, အတၢ်အဲၣ်ဂၢၢ်ကျၢၤ အိၣ်ဝဲလီၤစိၤလီၤထီလီၤ.

⁸ မုၢ်တဖျၢၣ်ဒ်သိးအကပၢမုၢ်နံၤလီၤ. အဂ့ၢ်ဒ်အံၤ, အတၢ်အဲၣ်ဂၢၢ်ကျၢၤ အိၣ်ဝဲလီၤစိၤလီၤထီလီၤ.

⁹ လါတဖျၢၣ်ဒီးဆၣ်သ့ၣ်တဖၣ်ဒ်သိးအကပၢမုၢ်နၤလီၤ. အဂ့ၢ်ဒ်အံၤ, အတၢ်အဲၣ်ဂၢၢ်ကျၢၤ အိၣ်ဝဲလီၤစိၤလီၤထီလီၤ.

¹⁰ အဝဲကျီသံကွံာ်ပှၤအဲၤကူပတူးဖိအဖိဝဲၢ်ကိလီၤ. အဂ့ၢ်ဒ်အံၤ, အတၢ်အဲၣ်ဂၢၢ်ကျၢၤ အိၣ်ဝဲလီၤစိၤလီၤထီလီၤ.

¹¹ ဒီးဒုးဟးထီၣ်ကွံာ်အံၣ်စရ့လးလၢကီၢ်အဲၤကူပတူးအပူၤ လီၤ. အဂ့ၢ်ဒ်အံၤ, အတၢ်အဲၣ်ဂၢၢ်ကျၢၤ အိၣ်ဝဲလီၤစိၤလီၤထီလီၤ.

¹² အိၣ်ဒီးအစုဆူၣ်ဒီးအစုဒုၣ်လၢ အယူာ်ထီၣ်အသးလီၤ. အဂ့ၢ်ဒ်အံၤ, အတၢ်အဲၣ်ဂၢၢ်ကျၢၤ အိၣ်ဝဲလီၤစိၤလီၤထီလီၤ.

¹³ မၤသ့ၣ်ဖးပီၣ်လဲၣ်ဂီၤခံခီလီၤ. အဂ့ၢ်ဒ်အံၤ, အတၢ်အဲၣ်ဂၢၢ်ကျၢၤ အိၣ်ဝဲလီၤစိၤလီၤထီလီၤ.

¹⁴ ဒီးဒုးခီဂာ်အံၣ်စရ့လးလၢအသးကံၢ်ပူၤလီၤ. အဂ့ၢ်ဒ်အံၤ, အတၢ်အဲၣ်ဂၢၢ်ကျၢၤ အိၣ်ဝဲလီၤစိၤလီၤထီလီၤ.

¹⁵ မ့မ့ၢ်မၤလီၤအုးသံကွံာ်ဖၤရိၤဒီးအသုးမုၢ် လၢပီၣ်လဲၣ်ဂီၤအပူၤလီၤ. အဂ့ၢ်ဒ်အံၤ, အတၢ်အဲၣ်ဂၢၢ်ကျၢၤ အိၣ်ဝဲလီၤစိၤလီၤထီလီၤ.

¹⁶ ဆှၢခီဖျိအပှၤဂီၢ်မုၢ်လၢပှၢ်မုၢ်ကနၢအပူၤလီၤ. အဂ့ၢ်ဒ်အံၤ, အတၢ်အဲၣ်ဂၢၢ်ကျၢၤ အိၣ်ဝဲလီၤစိၤလီၤထီလီၤ.

¹⁷ ကျီသံကွံာ်စီၤပၤဖးဒိၣ်တဖၣ်လီၤ. အဂ့ၢ်ဒ်အံၤ, အတၢ်အဲၣ်ဂၢၢ်ကျၢၤ အိၣ်ဝဲလီၤစိၤလီၤထီလီၤ.

¹⁸ ဒီးမၤသံကွံာ်စီၤပၤလၢအမံၤဟူထီသါလီၤတဖၣ်လီၤ. အဂ့ၢ်ဒ်အံၤ, အတၢ်အဲၣ်ဂၢၢ်ကျၢၤ အိၣ်ဝဲလီၤစိၤလီၤထီလီၤ.

¹⁹ မၤသံပှၤအမိၢ်ဖိအစီၤပၤစံဃိၣ်လီၤ. အဂ့ၢ်ဒ်အံၤ, အတၢ်အဲၣ်ဂၢၢ်ကျၢၤ အိၣ်ဝဲလီၤစိၤလီၤထီလီၤ.

²⁰ ဒီးမၤသံဘၤၡၣ်အစီၤပၤဧိာ်လီၤ. အဂ့ၢ်ဒ်အံၤ, အတၢ်အဲၣ်ဂၢၢ်ကျၢၤ အိၣ်ဝဲလီၤစိၤလီၤထီလီၤ.

²¹ ဒီးဟ့ၣ်လီၤအထံအကီၢ်ဆူအပှၤဂီၢ်မုၢ် အအိၣ်လီၤ. အဂ့ၢ်ဒ်အံၤ, အတၢ်အဲၣ်ဂၢၢ်ကျၢၤ အိၣ်ဝဲလီၤစိၤလီၤထီလီၤ.

²² ဟ့ၣ်တၢ်န့ၢ်သါလၢအခ့အပှၤ, အံၣ်စရ့လးအဂီၢ်လီၤ. အဂ့ၢ်ဒ်အံၤ, အတၢ်အဲၣ်ဂၢၢ်ကျၢၤ အိၣ်ဝဲလီၤစိၤလီၤထီလီၤ.

²³ ဒီးသ့ၣ်နီၣ်ထီၣ်က့ၤပှၤဖဲပဒုၣ်ပဒါမၤနၢၤပှၤ အကတီၢ်န့ၣ်လီၤ. အဂ့ၢ်ဒ်အံၤ, အတၢ်အဲၣ်ဂၢၢ်ကျၢၤ အိၣ်ဝဲလီၤစိၤလီၤထီလီၤ.

²⁴ ဒီးမၤပူၤမၤဖျဲးပှၤလၢပဒုၣ်ပဒါန့ၣ်လီၤ. အဂ့ၢ်ဒ်အံၤ, အတၢ်အဲၣ်ဂၢၢ်ကျၢၤ အိၣ်ဝဲလီၤစိၤလီၤထီလီၤ.

²⁵ ဟ့ၣ်လီၤတၢ်အီၣ်တၢ်အီလၢကယဲၢ်တၢ်လၢ အအိၣ်ဒီးအသးသမူခဲလၢာ်န့ၣ်လီၤ. အဂ့ၢ်ဒ်အံၤ, အတၢ်အဲၣ်ဂၢၢ်ကျၢၤ အိၣ်ဝဲလီၤစိၤလီၤထီလီၤ.

²⁶ စံးထီၣ်ပတြၢၤကစၢ်ယွၤလၢအအိၣ်ဝဲလၢမူခိၣ်န့ၣ်တက့ၢ်. အဂ့ၢ်ဒ်အံၤ, အတၢ်အဲၣ်ဂၢၢ်ကျၢၤ အိၣ်ဝဲလီၤစိၤလီၤထီလီၤ.