စံးထီၣ်ပတြၢၤ 135 - Sgaw Karen Common Bible

တၢ်စံးထီၣ်ပတြၢၤအထါသးဝံၣ်

¹ စံးထီၣ်ပတြၢၤယွၤတက့ၢ်. စံးထီၣ်ပတြၢၤယွၤအမံၤတက့ၢ်, ယွၤအခ့အပှၤ,

² သုဝဲလၢအမၤတၢ်လၢယွၤအဟံၣ်ပူၤ, လၢပကစၢ်အဟံၣ်အဂၢၤပူၤသ့ၣ်ဧၢ, ဟ့ၣ်အီၤလၢတၢ်စံးထီၣ်ပတြၢၤန့ၣ်တက့ၢ်.

³ စံးထီၣ်ပတြၢၤယွၤတက့ၢ်. အဂ့ၢ်ဒ်အံၤ, ယွၤန့ၣ်ဂ့ၤဝဲလီၤ. သးဝံၣ်ထီၣ်အမံၤတက့ၢ်. အဂ့ၢ်ဒ်အံၤ, အဝဲဒၣ်န့ၣ် သူၣ်ကညီၤသးကညီၤတၢ်န့ၣ်လီၤ.

⁴ အဂ့ၢ်ဒ်အံၤ, ယွၤဃုထၢတ့ၢ်လံဝဲ ယၤကိာ်လၢအဂီၢ်ဒၣ်ဝဲ, အံၣ်စရ့လးဒ်အတၢ်ဒၣ်ဝဲအသိးန့ၣ်လီၤ.

⁵ ယသ့ၣ်ညါလၢယွၤန့ၣ်ဒိၣ်ဝဲ ဒိၣ်န့ၢ်ကစၢ်အဂၤခဲလၢာ်တက့ၢ်လီၤ.

⁶ ယွၤမၤဝဲကယဲၢ်တၢ်ဘၣ်အသး လၢမူခိၣ်, ဒီးလၢဟီၣ်ခိၣ်ချၢ, ဒီးလၢပီၣ်လဲၣ်ပူၤ, ဒီးလၢထံယိာ်ပူၤခဲလၢာ်န့ၣ်လီၤ.

⁷ အဝဲဒၣ်န့ၣ်ဒုးဟဲထီၣ်တၢ်စူၤအတၢ်အၢၣ်လၢဟီၣ်ခိၣ်အကတၢၢ်, ဒီးတ့လီၤလီဝၢ်အဒံးလၢ ကလံၤမုၢ်အဂီၢ်, ဒီးဒုးဟဲထီၣ်ကလံၤလၢ အတၢ်ပာ်ဖှိၣ်အလီၢ်န့ၣ်လီၤ.

⁸ အဝဲဒၣ်န့ၣ်မ့ၢ်ပှၤလၢအကျီသံကွံာ် ပှၤအဲၤကူပတူးအဖိဝဲၢ်ကိ, ဒီးဆၣ်ဖိကီၢ်ဖိဝဲၢ်ကိစ့ၢ်ကီးန့ၣ်လီၤ.

⁹ ဖဲန့ၣ်, အဝဲဒၣ်မၤတၢ်တၢ်ပနီၣ်လီၤလးတဖၣ်ဒီးတၢ်လီၤလိၢ် လီၤလးတဖၣ် လၢကစံၣ်ညီၣ်စီၤပၤဒီး အပဒိၣ်ပပှၢ်တဖၣ်အဂီၢ်လီၤ.

¹⁰ မၤသံကွံာ်ပှၤအါကလုာ် ဒီးမၤသံစီၤပၤဂံၢ်ဆူၣ်ဘါဆူၣ်သ့ၣ်တဖၣ်,

¹¹ ပှၤအမိၢ်ဖိအစီၤပၤစံဃိၣ်, ဒီးဘၤၡၣ်အစီၤပၤဧိာ်, ဒီးကနၤဧၣ်စီၤပၤတဖၣ်ခဲလၢာ်န့ၣ်လီၤ.

¹² ဒီးဟ့ၣ်လီၤအထံအကီၢ်လၢတၢ်န့ၢ်သါ, တၢ်န့ၢ်သါလၢအပှၤဂီၢ်မုၢ် အံၣ်စရ့လးအဂီၢ်န့ၣ်လီၤ.

¹³ ယွၤဧၢ, နမံၤအိၣ်ဝဲလီၤစိၤလီၤထီလီၤ. ယွၤဧၢ, နတၢ်မံၤဟူသၣ်ဖျါ အိၣ်ဝဲအစိၤစိၤအဃၣ်ဃၣ်န့ၣ်လီၤ.

¹⁴ အဂ့ၢ်ဒ်အံၤ, ယွၤကစံၣ်ညီၣ်အိၣ်ပှိၤ အပှၤဂီၢ်မုၢ်လၢအတၢ်ကမၣ်တအိၣ်, ဒီးအိၣ်ဒီးတၢ်သးကညီၤအခ့အပှၤတဖၣ်န့ၣ်လီၤ.

¹⁵ ပှၤကလုာ်တဖၣ်အတၢ်ဂီၤတၢ်ဖီၣ်န့ၣ်မ့ၢ်ကျိၣ်ဧိၤစ့ဧိၤ, ဒီးထူဧိၤလွဲဧိၤလၢပှၤကညီမၤအီၤ လၢအစုန့ၣ်လီၤ.

¹⁶ အဝဲသ့ၣ်အိၣ်ဒီးအထးခိၣ်, ဘၣ်ဆၣ် ကတိၤတၢ်တသ့ဘၣ်. အဝဲသ့ၣ်အိၣ်ဒီးအမဲာ်ချံ, ဘၣ်ဆၣ် ထံၣ်တၢ်တသ့ဘၣ်

¹⁷ အဝဲသ့ၣ်အိၣ်ဒီးအနၢ်, ဘၣ်ဆၣ် နၢ်ဟူတၢ်တသ့ဘၣ် သါထီၣ်သါလီၤဒၣ်လဲာ်တသ့ဘၣ်.

¹⁸ ပှၤလၢအတ့အီၤတဖၣ်ဒီးကယဲၢ်ပှၤလၢ အသန့ၤအသးလၢအီၤခဲလၢာ်န့ၣ်, ကလီၤဂာ်ဒီးတၢ်ဂီၤတၢ်ဖီၣ်လၢအတ့ဝဲတဖၣ်လီၤ.

¹⁹ အံၣ်စရ့လးအပှၤဂီၢ်မုၢ်သ့ၣ်ဧၢ, စံးထီၣ်ပတြၢၤယွၤတက့ၢ်. စီၤအၤဟရိၣ်အပှၤဟံၣ်ဖိသ့ၣ်ဧၢ, စံးထီၣ်ပတြၢၤယွၤတက့ၢ်.

²⁰ စီၤလ့ၤဝံအပှၤဟံၣ်ဖိသ့ၣ်ဧၢ, စံးထီၣ်ပတြၢၤယွၤတက့ၢ်. သုဝဲပှၤလၢအပျံၤယွၤသ့ၣ်ဧၢ, စံးထီၣ်ပတြၢၤယွၤတက့ၢ်.

²¹ စံးထီၣ်ပတြၢၤယွၤလၢ စံယိၣ်အပူၤ, လၢအဟံၣ်လၢ ယရူၤရှလ့ၣ်အပူၤန့ၣ်တက့ၢ်. စံးထီၣ်ပတြၢၤယွၤတက့ၢ်.