စံးထီၣ်ပတြၢၤ 129 - Sgaw Karen Common Bible

တၢ်ထုကဖၣ်ထီဒါအံၣ်စရ့လး အဒုၣ်အဒါတဖၣ်

¹ အံၣ်စရ့လးဧၢ, တဲဘၣ်ပှၤလၢ နဘၣ်တၢ်မၤနးမၤဖှီၣ်နၤလၢနဒုၣ်နဒါတဖၣ်, စးထီၣ်လၢ နသးစၢ်လံၤလံၤဒ်လဲၣ်အဂ့ၢ်န့ၣ်တက့ၢ်.

² “စးထီၣ်လၢယသးစၢ်လံၤလံၤန့ၣ် ယဒုၣ်ယဒါတဖၣ် မၤနးမၤဖှီၣ်ယၤ နးနးကျံၤကျံၤ, ဘၣ်ဆၣ်အဝဲသ့ၣ်တမၤနၢၤယၤဘၣ်.

³ အဝဲသ့ၣ်ဂဲၤတၢ်လၢ ယချၢဃံဒီး အပူၤလီၢ်တဖၣ် ယိာ်ဝဲဒ်သိးပှၤထဲၣ်တၢ်လၢ စံာ်ပျီပူၤန့ၣ်လီၤ.

⁴ ဘၣ်ဆၣ်တၢ်တီတၢ်လိၤအယွၤတဂၤန့ၣ် မၤပူၤမၤဖျဲးယၤလၢ တၢ်ကဲကုၢ်အပူၤလံ.”

⁵ မ်ပှၤလၢအသးဟ့စံယိၣ်ခဲလၢာ် ဘၣ်တၢ်မၤနၢၤမၤဃၣ်အီၤဒီး နီၣ်ကဒါက့ၤအီၤန့ၣ်တက့ၢ်.

⁶ မ်အမၤအသးဒ်တပံၢ်လၢအမဲထီၣ်လၢဟံၣ်ခိၣ်တဖၣ် လၢအဃ့ထီကွံာ်ဝဲ တချုးလၢအဒိၣ်ထီၣ်န့ၣ်တက့ၢ်.

⁷ ပှၤတပာ်ဖှိၣ်အီၤနီတဂၤဘၣ်. ပှၤတစိာ်ထီၣ်ကွံာ်အီၤအိၣ်ဒီး အကဒိၣ်တဖၣ်န့ၣ်နီတဂၤဘၣ်.

⁸ ပှၤလၢအလဲၤခီဂာ်တၢ်လၢကျဲတဖၣ်တစံးဝဲနီတဂၤလၢ, “မ်ယွၤကဆိၣ်ဂ့ၤသုတက့ၢ်, ပဆိၣ်ဂ့ၤသုလၢယွၤအမံၤလီၤ.” န့ၣ်ဘၣ်.