စံးထီၣ်ပတြၢၤ 126 - Sgaw Karen Common Bible

တၢ်ထုကဖၣ်လၢတၢ်မၤပူၤမၤဖျဲးအဂီၢ်

¹ တုၤယွၤဃၣ်ကဒါက့ၤစံယိၣ်အတၢ်ကဲကုၢ်ဒီး, ပမၤပသးဒ်ပှၤလၢအမံမီၢ်တၢ်အသိးန့ၣ်လီၤ.

² တုၤနုၤတစု, ပထးခိၣ်ပှဲၤဝဲဒီးတၢ်နံၤတၢ်အ့ ဒီးပပျ့ၤပှဲၤဝဲဒီးတၢ်ကိးထီၣ်လၢတၢ်သးခုန့ၣ်လီၤ. တုၤနုၤတစုပှၤကလုာ်ဂၤတဖၣ်စံးကတိၤတၢ်လၢ ပဂ့ၢ်ဒီးစံးဝဲ, “ယွၤမၤတၢ်အဒိၣ်တဖၣ်လၢအဂီၢ်လီၤ.”

³ ယွၤမၤတၢ်အဒိၣ်တဖၣ်လၢပဂီၢ်, ဒီးပသးခုလၢအဃိလီၤ.

⁴ ယွၤဧၢ, မၤဘီၣ်ထီၣ်ညီထီၣ်က့ၤကဒီးပှၤ ဒ်တၢ်စူၤလီၤဟဲစိာ်ကဒါက့ၤထံဆူ ထံကျိကၢၢ်နံၤလၢအဃ့ထီအသိးန့ၣ်တက့ၢ်.

⁵ မ်ပှၤလၢအဖှံတၢ်အိၣ်ဒီးအမဲာ်ထံလီၤန့ၣ် ကကူးတၢ်အိၣ်ဒီးတၢ်သးခုတက့ၢ်.

⁶ ပှၤလၢအလဲၤတၢ်အိၣ်ဒီးအမဲာ်ထံလီၤ, စိာ်တၢ်ချံလၢကဖှံလီၤတၢ်အဂီၢ်န့ၣ်, ကဟဲက့ၤဆူဟံၣ်လၢတၢ်သးခုအတၢ်ကိးထီၣ် စိာ်ဃုာ်ဒီးအဘုကဒိၣ်တဖၣ်န့ၣ်လီၤ.