စံးထီၣ်ပတြၢၤ 124 - Sgaw Karen Common Bible

ကစၢ်ယွၤလၢကဟုဘံၣ်ကယာ်ဘၢအပှၤဂီၢ်မုၢ်

¹ မ့တမ့ၢ်ဘၣ်လၢယွၤအိၣ်ဒီးပှၤဘၣ်န့ၣ်ဒီး တၢ်ကမၤအသးဒ်လဲၣ် အံၣ်စရ့လးဧၢ, စံးဆၢတက့ၢ်.

² “မ့တမ့ၢ်ဘၣ်လၢယွၤအိၣ်ဒီးပှၤဘၣ်န့ၣ်ဒီး တုၤပဒုၣ်ပဒါတဖၣ်ဂဲၤဆၢထၢၣ်ထီဒါပှၤန့ၣ်,

³ အဝဲသ့ၣ်ကယူၢ်လီၤကွံာ်မူဒံးပှၤ လၢအဝဲသ့ၣ်အတၢ်သးကဲၤထီၣ်ထီဒါပှၤအပူၤ,

⁴ ဒီးထံဒိၣ်ထီၣ်ကစိာ်ကွံာ်ပှၤ ဒီးထံကလုၣ်ဘၢပှၤ,

⁵ ထံဒိၣ်ဖုးလၢအဟဲယွၤလီၤဆူၣ် ကမၤလီၤအုးသံကွံာ်ပှၤလီၤ.”

⁶ မ်ပစံးဘျုးယွၤလၢအတပျဲပဒုၣ်ပဒါသ့ၣ်တဖၣ် မၤနၢၤပှၤအဃိန့ၣ်တက့ၢ်.

⁷ ပထူၣ်ဖျဲးလံဒ်ထိၣ်တဘ့ၣ်လၢ ပှၤဖီၣ်ထိၣ်အပျံၤသကွီၤအပူၤအသိးန့ၣ်လီၤ. ပျံၤသကွီၤတဲာ်ကွံာ်လံ, ဒီးပဝဲဒၣ်အံၤပထူၣ်ဖျဲးတ့ၢ်လံ.

⁸ တၢ်မၤစၢၤပှၤအိၣ်ဝဲလၢယွၤလၢအတ့လီၤမူခိၣ်ဒီး ဟီၣ်ခိၣ်တဂၤန့ၣ်အမံၤအပူၤလီၤ.