စံးထီၣ်ပတြၢၤ 122 - Sgaw Karen Common Bible

တၢ်စံးထီၣ်ပတြၢၤဝ့ၢ်ယရူၤၡလ့ၣ်

¹ တုၤပှၤစံးဘၣ်ယၤ, မ်ပလဲၤထီၣ်သကိးဆူယွၤအဟံၣ်တက့ၢ်န့ၣ်ယသူၣ်ခုယသးခု လီၤ.

² ယရူၤၡလ့ၣ်ဧၢ, ပခီၣ်ဆၢထၢၣ်တ့ၢ်လံလၢနပဲတြီတဖၣ်အပူၤလီၤ.

³ ယရူၤၡလ့ၣ်န့ၣ်ဘၣ်တၢ်တ့အီၤ ဒ်ဝ့ၢ်လၢအဆီလီၤတံၢ်လိာ်အသးအသိးန့ၣ်လီၤ.

⁴ ပှၤအဒူၣ်, ယွၤအဒူၣ်သ့ၣ်တဖၣ်လဲၤထီၣ်ဖဲန့ၣ် ဒ်တၢ်မၤလိာ်အံၣ်စရ့လးအသိး, ဒ်သိးကစံးထီၣ်ပတြၢၤယွၤအမံၤအဂီၢ်န့ၣ်လီၤ.

⁵ အဂ့ၢ်ဒ်အံၤ, တၢ်စံၣ်ညီၣ်အလီၢ်ပစိာ်တဖၣ်, စီၤဒၤဝံးအဟံၣ်အလီၢ်ပစိာ်တဖၣ်န့ၣ် အိၣ်ဝဲဖဲန့ၣ်လီၤ.

⁶ ဘါထုကဖၣ်န့ၢ်တၢ်လၢ ယရူၤၡလ့ၣ်အတၢ်ဃူတၢ်ဖိးအဂီၢ်န့ၣ်တက့ၢ်. ပှၤလၢအအဲၣ်နၤတဖၣ်န့ၣ် မ်အကဘီၣ်ထီၣ်ညီထီၣ်န့ၣ်တက့ၢ်.

⁷ မ်တၢ်ဃူတၢ်ဖိးအိၣ်လၢနခိၣ်ဒူအပူၤ ဒီးတၢ်ဘီၣ်တၢ်ညီအိၣ်လၢ နစီၤပၤအဟံၣ်ပူၤန့ၣ်တက့ၢ်.”

⁸ လၢယဒီပုၢ်ဝဲၢ်ဒီးယတံၤသကိးတဖၣ်အဃိန့ၣ်ယကစံးဘၣ်ဝ့ၢ် ယရူၤၡလ့ၣ် “မ်တၢ်ဃူတၢ်ဖိးအိၣ်လၢနပူၤန့ၣ်တက့ၢ်.”

⁹ လၢယွၤပကစၢ်အဟံၣ်အဃိန့ၣ် ယကဃုနတၢ်ဂ့ၤတၢ်ဝါလီၤ.