စံးထီၣ်ပတြၢၤ 119 - Sgaw Karen Common Bibleယွၤအတၢ်သိၣ်တၢ်သီ 1 ပှၤလၢအလဲၤတၢ်လၢယွၤတၢ်သိၣ်တၢ်သီအပူၤ, ဒီးအကျဲတအိၣ်ဘၣ်ဒီးတၢ်ကမၣ်န့ၣ်, ဘၣ်ဆိၣ်ဂ့ၤဝဲလီၤ. 2 ပှၤလၢအတိၢ်န့ၢ်ဖံးဃာ်အတၢ်အုၣ်အသး ဒီးဃုယွၤလၢအသးဒီဖျၢၣ်ညါန့ၣ်, ဘၣ်ဆိၣ်ဂ့ၤဝဲလီၤ. 3 တမၤစ့ၢ်ကီးတၢ်ကမၣ်နီတမံၤဘၣ်. အဝဲသ့ၣ်လဲၤတၢ်လၢယွၤအကျဲတဖၣ်အပူၤလီၤ. 4 နမၤလိာ်တ့ၢ်ပှၤလၢ ပဘၣ်တိၢ်န့ၢ်ဟံးဃာ် နတၢ်သိၣ်တၢ်သီထံထံဆးဆးလီၤ. 5 မ်ယကျဲကအိၣ်ဂၢၢ်ဆိးကျၢၤ လၢယတၢ်တိၢ်န့ၢ်ဖံးဃာ် နတၢ်မၤလိာ်အဃိန့ၣ်တက့ၢ်. 6 တုၤယဟ့ၣ်လီၤယတၢ်ဆိကမိၣ်လၢ နတၢ်မၤလိာ်ခဲလၢာ်ဒီး, ယတဘၣ်တၢ်မၤမဲာ်ဆှးယၤဘၣ်. 7 တုၤယမၤလိနတၢ်စံၣ်ညီၣ်တီတဖၣ်အဂ့ၢ်န့ၣ်ဒီး ယကစံးထီၣ်ပတြၢၤနၤလၢ ယသူၣ်တီသးလိၤအပူၤန့ၣ်လီၤ. 8 ယကတိၢ်န့ၢ်နတၢ်မၤလိာ်တဖၣ်လီၤ. မ်နသုတလဲၤသဒၣ်ကွံာ်ယၤနီတစုတဂ့ၤ. တၢ်ဒိကနၣ်ယွၤအတၢ်သိၣ်တၢ်သီ 9 ပှၤဖိၣ်သၣ်ခွါကမၤကဆှီအကျဲဒ်လဲၣ်. မ့ၢ်အဘၣ်ပလီၢ်အသးဒ် နကလုၢ်ကထါအသိးန့ၣ်လီၤ. 10 ယဃုနၤလၢယသးဒီဖျၢၣ်ညါလီၤ. မ်ယသုတဟးဖျိးကွံာ်လၢနတၢ်မၤလိာ်တဖၣ်န့ၣ်တဂ့ၤ. 11 ယပာ်ဖှိၣ်နကလုၢ်နကထါလၢယသးကံၢ်ပူၤ ဒ်သိးယသုတမၤကမၣ်ဘၣ်နၤတဂ့ၤလီၤ. 12 ယွၤဧၢ, မ်နဘၣ်တၢ်စံးထီၣ်ပတြၢၤနၤတက့ၢ်. သိၣ်လိယၤလၢနတၢ်မၤလိာ်န့ၣ်တက့ၢ်. 13 ယကတဲကဒါက့ၤ တၢ်သိၣ်တၢ်သီခဲလၢာ် လၢနဟ့ၣ်လီၤန့ၣ်, လၢယကလုၢ်ဖးဒိၣ်လီၤ. 14 ယမုာ်လၤသးခုလၢတၢ်ပိာ်ထွဲနတၢ်မၤလိာ်သ့ၣ်တဖၣ် ဒိၣ်န့ၢ်တၢ်အိၣ်ဒီးတၢ်စုလီၢ်ခီၣ်ခိၣ်လၢ အအါန့ၣ်လီၤ. 15 ယမၤလိနတၢ်သိၣ်လီၤသီလီၤတဖၣ်, ဒီးယသမံသမိးကွၢ်နတၢ်သိၣ်လိသီလိတဖၣ်လီၤ. 16 ယကမုာ်လၤသးခုလၢနတၢ်မၤလိာ်တဖၣ်အပူၤလီၤ. ယတသးပ့ၤနီၣ်ဘၣ်နကလုၢ်ကထါဘၣ်. တၢ်သူၣ်ခုသးခုလၢယွၤတၢ်သိၣ်တၢ်သီအပူၤ 17 မၤဂ့ၤနခ့နပှၤ, ဒ်သိးယကမူ ဒီးတိၢ်န့ၢ်ဖံးဃာ်နတၢ်သိၣ်လိသီလိ တဖၣ်န့ၣ်တက့ၢ်. 18 အိးထီၣ်ယမဲာ်တက့ၢ်. ဒီးယကထံၣ်ဘၣ်တၢ်နတၢ်မ့ၢ်တၢ်တီလီၤလိၢ်လီၤလးတဖၣ်လၢ နတၢ်သိၣ်တၢ်သီအပူၤလီၤ. 19 ယမ့ၢ်ဒၣ်ပှၤသမှံၤလၢဟီၣ်ခိၣ်ချၢအံၤလီၤ. သုတပာ်ခူသူၣ်နတၢ်မၤလိာ်တဖၣ်လၢယၤတဂ့ၤ. 20 ယဆၢသ့ၣ်ညါနတၢ်စံၣ်ညီၣ်တဖၣ် ကိးဆၢကိးကတီၢ်ဒဲး တုၤယသူၣ်ကၢ်ယသးလီၤယဲလီၤ. 21 ပှၤလၢအပာ်ထီၣ်ထီအသး, လၢအဘၣ်တၢ်ဆိၣ်အၢလၢ အဟးဖျိးလၢ နတၢ်မၤလိာ်တဖၣ်အကျဲန့ၣ်, နသိၣ်ဃီၣ်လံအီၤလံ. 22 မၤပူၤမၤဖျဲးယၤလၢအဝဲသ့ၣ်အတၢ်ဒုၣ်ဒွဲၣ် ဒီးအတၢ်မၤတရီတပါန့ၣ်တက့ၢ်. အဂ့ၢ်ဒ်အံၤ, ယတိၢ်န့ၢ်နတၢ်သိၣ်တၢ်သီတဖၣ်လီၤ. 23 ပဒိၣ်ဖးဒိၣ်တဖၣ်ဒၣ်လဲာ်ဆ့ၣ်နီၤဒီးကူၣ်ထီဒါယၤလီၤ. မ့မ့ၢ်ယဲဒၣ်အံၤယကမၤလိ နတၢ်သိၣ်လိသီလိတဖၣ်န့ၣ်လီၤ. 24 နတၢ်သိၣ်လီၤသီလီၤတဖၣ် ဟ့ၣ်ယၤတၢ်သူၣ်မံသးမုာ်လီၤ. မ့ၢ်တၢ်ဟ့ၣ်ကူၣ်ဟ့ၣ်ဖးယၤလီၤ. တၢ်ပာ်လီၤသးလၢတၢ်ဒိကနၣ် ယွၤအတၢ်သိၣ်တၢ်သီ 25 ယသးစဲဘူးဒီးဟီၣ်ခိၣ်အကမူၣ်လီၤ. ယဘၣ်တၢ်ဆီၣ်လီၤယၤလၢ ဖၣ်ဆါအကျါလီၤ. မၤမူထီၣ်က့ၤယၤဒ်နကလုၢ်နကထါအသိးန့ၣ်တက့ၢ်. 26 ယအၢၣ်လီၤအီလီၤတ့ၢ်တၢ်လၢ ယမၤအီၤခဲလၢာ် ဒီးနစံးဆၢယၤလီၤ. သိၣ်လိယၤလၢနကျဲတဖၣ်န့ၣ်တက့ၢ်. 27 ဒုးနၢ်ပၢၢ်ယၤလၢ နတၢ်သိၣ်တၢ်သီအကျဲတဖၣ်န့ၣ်တက့ၢ်. ဒီးယကဆိကမိၣ်တၢ်လၢ နတၢ်မၤလီၤလးတဖၣ်အဂ့ၢ်န့ၣ်လီၤ. 28 ယသးပှံၢ်ကွံာ်ဝဲလၢတၢ်သူၣ်အုးသးအုးအဃိလီၤ. ဟ့ၣ်ဆူၣ်ထီၣ်က့ၤယဂံၢ်ယဘါဒ် နကလုၢ်နကထါအသိးန့ၣ်တက့ၢ်. 29 ပၢၤဃးယၤလၢတၢ်ကဘျံးကဘျၣ်အကျဲတဖၣ်, ဒီးမၤဘျုးမၤဖှိၣ်ယၤခီဖျိ နတၢ်သိၣ်တၢ်သီန့ၣ်တက့ၢ်. 30 တၢ်အကလုၢ်တီအကျဲန့ၣ်ယဃုထၢတ့ၢ်လံ. နတၢ်စံၣ်ညီၣ်တဖၣ်န့ၣ် ယပာ်လီၤလၢယမဲာ်ညါလီၤ. 31 ယွၤဧၢ, ယအိၣ်စဲဘူးဒီးနတၢ်သိၣ်လိသီလိတဖၣ်လီၤ. မ်ယသုတဘၣ်တၢ်မဲာ်ဆှးတဂ့ၤ. 32 တုၤနဟ့ၣ်အါထီၣ်ယၤယတၢ်သ့ၣ်ညါနၢ်ပၢၢ်တၢ်န့ၣ်ဒီး ယကစူၢ်နတၢ်မၤလိာ်တဖၣ်လၢ တၢ်သးဆူၣ်အပူၤလီၤ. တၢ်ထုကဖၣ်လၢတၢ်နၢ်ပၢၢ်တၢ်အဂီၢ် 33 ယွၤဧၢ, သိၣ်လိယၤလၢနတၢ်သိၣ်တၢ်သီ အကျဲန့ၣ်တက့ၢ်. ဒီးယကတိၢ်န့ၢ်ဖံးဃာ်အီၤတုၤအကတၢၢ်လီၤ. 34 ဟ့ၣ်လၢ်ယၤတၢ်နၢ်ပၢၢ်ဒ်သိး ယကတိၢ်န့ၢ်ဟံးဃာ်နတၢ်သိၣ်တၢ်သီ ဒီးမၤထွဲအီၤလၢယသးဒီဖျၢၣ်ညါန့ၣ်တက့ၢ်. 35 ဆှၢယၤလၢနတၢ်မၤလိာ်အကျဲန့ၣ်တက့ၢ်. အဂ့ၢ်ဒ်အံၤ, ယမုာ်လၤတၢ်လၢအပူၤလီၤ. 36 ဘိးဃၣ်ယသးဆူနတၢ်သိၣ်တၢ်သီတဖၣ်, ဒီးသုတမ့ၢ်ဆူတၢ်သးကွံန့ၣ်တဂ့ၤ. 37 ဒုးဃၣ်ကွံာ်ယမဲာ်လၢတၢ်ကွၢ်တၢ်ကလီကလီ ဒီးဟ့ၣ်လၢ်ယၤတၢ်မူလၢ နကျဲဧိၤကပူၤဧိၤန့ၣ်တက့ၢ်. 38 ဒုးအိၣ်ဂၢၢ်ဆိးကျၢၤနတၢ်အၢၣ်လီၤဆူနခ့နပှၤ, တၢ်အၢၣ်လီၤလၢနပာ်အီၤလၢ ပှၤလၢအစူၢ်နၤအဂီၢ်န့ၣ်တက့ၢ်. 39 မၤပူၤဖျဲးယၤလၢတၢ်ဒုၣ်ဒွဲၣ်လၢယပျံၤအီၤန့ၣ်တက့ၢ်. နတၢ်စံၣ်ညီၣ်တဖၣ်လီၤလးဆံးဒိၣ်လဲၣ်. 40 ကွၢ်ကွၢ်, ယဆၢတိၢ်န့ၢ်ဘၣ်နတၢ်သိၣ်တၢ်သီတဖၣ်လီၤ. ဟ့ၣ်လၢ်ယၤတၢ်အိၣ်မူအသီလၢ နတၢ်တီတၢ်လိၤအပူၤန့ၣ်တက့ၢ်. တၢ်သန့ၤသးလၢယွၤအတၢ်သိၣ်တၢ်သီ 41 ယွၤဧၢ, ဒုးနဲၣ်လၢ်ယၤလၢနအဲၣ်ယၤထဲလဲၣ်န့ၣ်တက့ၢ်. ဒီးအုၣ်က့ၤခီၣ်က့ၤယၤဒ် နတၢ်အၢၣ်လီၤအသိးန့ၣ်တက့ၢ်. 42 ဒီးယကအိၣ်ဒီးတၢ်စံးဆၢလၢ ပှၤလၢအဒုၣ်ဒွဲၣ်ယၤအဂီၢ်န့ၣ်လီၤ. အဂ့ၢ်ဒ်အံၤ, ယသန့ၤယသးလၢနကလုၢ်နကထါအပူၤလီၤ. 43 ဒုးစံးဒုးကတိၤယၤတၢ်တီတၢ်လိၤ ကိးဆၢကတီၢ်ဒဲးန့ၣ်တက့ၢ်. အဂ့ၢ်ဒ်အံၤ, ယတၢ်မုၢ်လၢ်အိၣ်လၢ နတၢ်စံၣ်ညီၣ်တဖၣ်အပူၤန့ၣ်လီၤ. 44 ယကတိၢ်န့ၢ်ဟံးဃာ်နတၢ်သိၣ်တၢ်သီတထံၣ်ဃီ အစိၤစိၤအဃၣ်ဃၣ်န့ၣ်လီၤ. 45 ဒီးယကလဲၤတၢ်လၢတၢ်သဘျ့အလၢအပှဲၤအပူၤလီၤ. အဂ့ၢ်ဒ်အံၤ, ယဃုတ့ၢ်လံ နတၢ်သိၣ်တၢ်သီတဖၣ်န့ၣ်လံ. 46 ယကကတိၤတၢ်လၢနတၢ်အုၣ်နသးအဂ့ၢ်တဖၣ် လၢစီၤပၤတဖၣ်အမဲာ်ညါ ဒီးယတဘၣ်တၢ်မၤမဲာ်ဆှးယၤဘၣ်. 47 အဂ့ၢ်ဒ်အံၤ, ယထံၣ်န့ၢ်ယတၢ်မုာ်တၢ်လၤလၢ နတၢ်မၤလိာ်တဖၣ် လၢယအဲၣ်ဘၣ်အီၤအပူၤန့ၣ်လီၤ. 48 ယပာ်ကဲနတၢ်မၤလိာ်တဖၣ်လၢယအဲၣ်ဘၣ်အီၤအဃိ, ဒီးယကဆိကမိၣ်ထီၣ် နတၢ်သိၣ်တၢ်သီတဖၣ်န့ၣ်လီၤ. တၢ်နာ်န့ၢ်ယွၤအတၢ်သိၣ်တၢ်သီ 49 သ့ၣ်နီၣ်ထီၣ်က့ၤနတၢ်အၢၣ်လီၤဒီးယၤ, နခ့နပှၤ, တၢ်လၢအဟ့ၣ်တ့ၢ်လံယၤ တၢ်မုၢ်လၢ်န့ၣ်တက့ၢ်. 50 အအံၤမ့ၢ်တၢ်လၢအမၤမုာ်ထီၣ်က့ၤယၤလၢ ယတၢ်နးတၢ်ဖှီၣ်အပူၤဒၣ်လဲာ်န့ၣ်လီၤ. နတၢ်အၢၣ်လီၤဟ့ၣ်ယၤတၢ်မူန့ၣ်လီၤ. 51 ပှၤပာ်ထီၣ်ထီအသးတဖၣ်န့ၣ်ဒုၣ်ဒွဲၣ်ယၤ နးမးတထံၣ်ဃီလီၤ. ဘၣ်ဆၣ်ယတဟးဖးဒီး နတၢ်သိၣ်တၢ်သီန့ၣ်ဘၣ်. 52 ယွၤဧၢ, ယသ့ၣ်နီၣ်ထီၣ်က့ၤနတၢ်စံၣ်ညီၣ်တဖၣ်လၢပျၢၤ ဒီးတၢ်သ့ၣ်တဖၣ်အံၤမၤမုာ်ထီၣ်က့ၤယၤလီၤ. 53 ဖဲပှၤတတီတလိၤလဲၤသဒၣ်နတၢ်သိၣ်တၢ်သီဒီး, ယသးကိၢ်ထီၣ်ဒိၣ်ဒိၣ်ကလဲာ်လီၤ. 54 နတၢ်သိၣ်တၢ်သီန့ၣ်မ့ၢ်ယတၢ်သးဝံၣ်တဖၣ် ဖဲယအိၣ်သမှံၤလၢဟီၣ်ခိၣ်အံၤအပူၤန့ၣ်လီၤ. 55 ယွၤဧၢ, ယသ့ၣ်နီၣ်ထီၣ်က့ၤနမံၤလၢမုၢ်နၤ, ဒီးယတိၢ်န့ၢ်ဖံးဃာ်နတၢ်သိၣ်တၢ်သီလီၤ. 56 တၢ်ဆိၣ်ဂ့ၤသ့ၣ်တဖၣ်အံၤဟဲလီၤတ့ၢ်လံလၢ ယဖီခိၣ်မ့ၢ်လၢယတိၢ်န့ၢ်ဖံးဃာ် နတၢ်မၤလိာ်သ့ၣ်တဖၣ်အဃိန့ၣ်လီၤ. တၢ်ဟ့ၣ်လီၤသးနီၢ်နီၢ်လၢ ယွၤအတၢ်သိၣ်တၢ်သီအပူၤ 57 ယွၤမ့ၢ်ယဂီၢ်လီၤ. ယအၢၣ်လီၤယသးလၢယကတိၢ်န့ၢ်ဖံးဃာ် နကလုၢ်နကထါတဖၣ်န့ၣ်လီၤ. 58 ယဃ့ကညးနၤလၢယသးဒီဖျၢၣ်ညါ, လၢနကသူၣ်ကညီၤသးကညီၤလၢ်ယၤ ဒ်နတၢ်အၢၣ်လီၤအသိးန့ၣ်တက့ၢ်. 59 တုၤယဆိကမိၣ်ထီၣ်ယကျဲတဖၣ်န့ၣ်ဒီး, ယဃၣ်ကွံာ်ယခီၣ်ဆူ နတၢ်အုၣ်နသးတဖၣ်အအိၣ်န့ၣ်လီၤ. 60 လၢတၢ်တမၤယံာ်မၤနီၢ်သးဘၣ်အပူၤ, ယမၤချ့ချ့ဒ်သိးယကတိၢ်န့ၢ်ဖံးဃာ် နတၢ်မၤလိာ်တဖၣ်န့ၣ်လီၤ. 61 ပှၤတတီတလိၤအပျံၤသကွီၤဘၣ်တၢ်ပာ်လီၤအီၤ လၢကဖီၣ်န့ၢ်ယၤဒၣ်လဲာ်, ယတသးပ့ၤနီၣ်ဘၣ်နတၢ်သိၣ်တၢ်သီဘၣ်. 62 ယဂဲၤဆၢထၢၣ်လၢဖးဖီမုၢ်ဒ်သိး ယကစံးထီၣ်ပတြၢၤနၤလၢနတၢ်တီတၢ်လိၤ အတၢ်စံၣ်ညီၣ်တဖၣ်အဃိလီၤ. 63 ယဒီတံၤဒီသကိးဒီးကယဲၢ်ပှၤလၢအပျံၤနၤ, ဒီးတိၢ်န့ၢ်ဖံးဃာ်နတၢ်မၤလိာ်တဖၣ်န့ၣ်လီၤ. 64 ယွၤဧၢ, ဟီၣ်ခိၣ်အံၤပှဲၤဝဲဒီးနတၢ်အဲၣ်ဂၢၢ်ကျၢၤန့ၣ်လီၤ. သိၣ်လိယၤလၢနတၢ်သိၣ်တၢ်သီတဖၣ်န့ၣ်တက့ၢ်. ယွၤအတၢ်သိၣ်တၢ်သီအလုၢ်အပှ့ၤ 65 ယွၤဧၢ, ဒ်နကလုၢ်နကထါအသိးန့ၣ်, နမၤဂ့ၤတ့ၢ်လံနခ့နပှၤလံန့ၣ်လီၤ. 66 ဟ့ၣ်လီၤယၤလၢတၢ်ကူၣ်သ့အဂ့ၤ, ဒီးတၢ်သ့ၣ်ညါန့ၣ်တက့ၢ်. အဂ့ၢ်ဒ်အံၤ, ယသန့ၤယသးလၢ နတၢ်မၤလိာ်တဖၣ်န့ၣ်လီၤ. 67 ယတချုးဘၣ်ဒံးဘၣ်တၢ်နးတၢ်ဖှီၣ်ဒီး, ယညီနုၢ်ဟးဖျိးကျဲလီၤ. မ့မ့ၢ်ခဲကနံၣ်အံၤ, ယတိၢ်န့ၢ်ဖံးဃာ် နကလုၢ်နကထါလီၤ. 68 နမ့ၢ်တၢ်ဂ့ၤဒီးနမၤဂ့ၤတၢ်လီၤ. သိၣ်လိယၤလၢ နတၢ်သိၣ်တၢ်သီတဖၣ်န့ၣ်တက့ၢ်. 69 ပှၤပာ်အသးထီၣ်ထီတဖၣ်န့ၣ်, ကူၣ်ထီၣ်ဖးလီၤတၢ်ကတိၤကဘျံးကဘျၣ် ထီဒါယၤလီၤ. ဘၣ်ဆၣ် ယစူၢ်နတၢ်သိၣ်တၢ် သီတဖၣ်လၢယသးဒီဖျၢၣ်ညါလီၤ. 70 ပှၤသ့ၣ်တဖၣ်အံၤတအိၣ်ဒီးတၢ်နၢ်ပၢၢ်ဘၣ်. ဘၣ်ဆၣ်ယထံၣ်န့ၢ်တၢ်မုာ်တၢ်လၤလၢ နတၢ်သိၣ်တၢ်သီအပူၤန့ၣ်လီၤ. 71 ယဘၣ်တၢ်နးတၢ်ဖှီၣ်န့ၣ်ဂ့ၤဝဲလၢယဂီၢ် လၢယကမၤလိနတၢ်သိၣ်တၢ်သီ တဖၣ်အဂီၢ်န့ၣ်လီၤ. 72 နတၢ်သိၣ်တၢ်သီလၢနထးခိၣ်အံၤ ဂ့ၤဝဲလၢယဂီၢ်ဒိၣ်န့ၢ်ဒံးထူဧိၤလွဲဧိၤ ဒီး ကျိၣ်ဧိၤစ့ဧိၤအကထိတဖၣ်တက့ၢ်န့ၣ်လီၤ. ယွၤအတၢ်သိၣ်တၢ်သီအတၢ်တီတၢ်လိၤ 73 နတ့လီၤပာ်လီၤယၤဒီး ပၢၤဃာ်ယၤပူၤပူၤဖျဲးဖျဲးလီၤ. ဟ့ၣ်ယၤတၢ်နၢ်ပၢၢ်ဒ်သိး ယကမၤလိနတၢ်မၤလိာ်တဖၣ်န့ၣ်တက့ၢ်. 74 ပှၤလၢအပျံၤနၤန့ၣ်ကထံၣ်ယၤဒီးအသးကခုလီၤ. အဂ့ၢ်ဒ်အံၤ, ယမုၢ်လၢ်တၢ်လၢ နကလုၢ်ကထါအပူၤလီၤ. 75 ယွၤဧၢ, ယသ့ၣ်ညါလၢ နတၢ်စံၣ်ညီၣ်တဖၣ်န့ၣ် မ့ၢ်အတီအလိၤ ဒီးလၢနတၢ်တီတၢ်လိၤအပူၤ နသိၣ်ဃီၣ်ယၤလီၤ. 76 မ်နတၢ်အဲၣ်ဂၢၢ်ကျၢၤမၤမုာ်ထီၣ်က့ၤယၤ ဒ်နအၢၣ်လီၤနခ့နပှၤအသိးန့ၣ်တက့ၢ်. 77 မ်နတၢ်သူၣ်ကညီၤသးကညီၤလီၤဘၣ်ယၤ, ဒ်သိးယကမူတက့ၢ်. အဂ့ၢ်ဒ်အံၤ, နတၢ်သိၣ်တၢ်သီ မ့ၢ်ယတၢ်မုာ်လၤလီၤ. 78 မ်ပှၤပာ်ထီၣ်ထီအသးန့ၣ်ကဘၣ်တၢ်မၤမဲာ်ဆှးအီၤ မ့ၢ်လၢမၤအၢယၤလၢ တၢ်ကဘျံးကဘျၣ်အဃိန့ၣ်တက့ၢ်. မ့မ့ၢ်ယဲဒၣ်အံၤယကဆိကမိၣ်တၢ်လၢ နတၢ်မၤလိာ်တဖၣ်န့ၣ်လီၤ. 79 မ်ပှၤလၢအပျံၤနၤတဖၣ် ဒီးပှၤလၢအသ့ၣ်ညါနတၢ်မၤ လိာ်တဖၣ်ဃၣ်အသးဆူယအိၣ်တက့ၢ်. 80 မ်ယသးလၢထီၣ်ပှဲၤထီၣ်လၢ တၢ်ဒိကနၣ်နတၢ်မၤလိာ်အပူၤဒ်သိး ယသုတဘၣ်တၢ်မဲာ်ဆှးတဂ့ၤအဂီၢ်န့ၣ်တက့ၢ်. တၢ်ထုကဖၣ်လၢတၢ်ပူၤဖျဲးအဂီၢ် 81 ယွၤဧၢ, ယလီၤဘှံးယဲလၢယအိၣ်ခိးကွၢ်လၢ် နတၢ်အုၣ်က့ၤခီၣ်က့ၤယၤန့ၣ်လီၤ. ယပာ်ယတၢ်နာ်လၢနကလုၢ်နကထါအပူၤန့ၣ်လီၤ. 82 ယမဲာ်ချံတဖၣ်ဘှံးဝဲလၢအခိးကွၢ်လၢ် နတၢ်အၢၣ်လီၤဖဲယစံး, “နကမၤစၢၤယၤအကတီၢ်ဖဲလဲၣ်” န့ၣ်လီၤ. 83 အဂ့ၢ်ဒ်အံၤ, ယမၤယသးဒ်ထံဒၢတၢ်ဖံးလၢ မ့ၣ်အူခုၣ်အပူၤအသိးန့ၣ်လီၤ. နာ်သက့ယတသးပ့ၤနီၣ် နတၢ်မၤလိာ်တဖၣ်န့ၣ်ဘၣ်. 84 နခ့နပှၤကဘၣ်အိၣ်ခိးဒံးဆံးယံာ်လဲၣ်. နကစံၣ်ညီၣ်ပှၤမၤအၢမၤသီယၤန့ၣ် အဆၢကတီၢ်ဖဲလဲၣ်. 85 ပှၤပာ်ထီၣ်ထီအသးတဖၣ် ခူၣ်လီၤတၢ်ပူၤလၢယဂီၢ်လီၤ. အဝဲသ့ၣ်မ့ၢ်ပှၤလၢတဒိကနၣ် ယွၤအတၢ်သိၣ်တၢ်သီဘၣ်န့ၣ်လီၤ. 86 နတၢ်မၤလိာ်ခဲလၢာ်တဖၣ်န့ၣ်မ့ၢ်အမ့ၢ်အတီလီၤ. ပှၤမၤအၢမၤသီယၤလၢတၢ်ကဘျံးကဘျၣ်လီၤ. မၤစၢၤယၤတက့ၢ်. 87 အဝဲသ့ၣ်ဘူးမးလၢကမၤသံတ့ၢ်ယၤလၢ ဟီၣ်ခိၣ်ချၢလီၤ. ဘၣ်ဆၣ်ယတလဲၤသဒၣ် နတၢ်မၤလိာ်တဖၣ်န့ၣ်ဘၣ်. 88 လၢနတၢ်အဲၣ်ဂၢၢ်ကျၢၤအပူၤပာ်မူယၤ ဒ်သိး ယကတိၢ်န့ၢ်ဟံးဃာ် နထးခိၣ်အတၢ်အုၣ်အသးန့ၣ်တက့ၢ်. တၢ်နာ်န့ၢ်လၢယွၤအတၢ်သိၣ်တၢ်သီအပူၤ 89 ယွၤဧၢ, နကလုၢ်ကထါအိၣ်ဂၢၢ်ဆိးကျၢၤလၢ မူခိၣ်အပူၤလီၤစိၤလီၤထီလီၤ. 90 နတၢ်မ့ၢ်တၢ်တီအိၣ်ဝဲအစိၤစိၤအဃၣ်ဃၣ်, နတ့လီၤပာ်လီၤဟီၣ်ခိၣ်, ဒီးအိၣ်ဂၢၢ်ဆိးကျၢၤဝဲလီၤ. 91 တၢ်ခဲလၢာ်အိၣ်ဝဲတုၤမုၢ်မဆါတနံၤအံၤ မ့ၢ်လၢနတၢ်မၤလိာ်အဃိန့ၣ်လီၤ. အဂ့ၢ်ဒ်အံၤ, ကယဲၢ်တၢ်ခဲလၢာ်ခဲဆ့မ့ၢ်နခ့နပှၤလီၤ. 92 နတၢ်သိၣ်တၢ်သီမ့တမ့ၢ်ယတၢ်မုာ်လၤအဂ့ၤန့ၣ်ဘၣ်ဒီး ယကဟးဂီၤတ့ၢ်လံလၢ ယဘၣ်တၢ်နးတၢ်ဖှီၣ်အပူၤလံ. 93 ယတသးပ့ၤနီၣ်ဘၣ်နတၢ်မၤလိာ်တဖၣ်နီတဘျီဘၣ်. အဂ့ၢ်ဒ်အံၤ, နမၤမူထီၣ်က့ၤယၤလၢအီၤလီၤ. 94 ယမ့ၢ်နတၢ်လီၤ. အုၣ်က့ၤခီၣ်က့ၤယၤတက့ၢ်. အဂ့ၢ်ဒ်အံၤ, ယဃုနတၢ်မၤလိာ်တဖၣ်လီၤ. 95 ပှၤတတီတလိၤခိးယၤလၢကမၤဟးဂီၤယၤလီၤ. မ့မ့ၢ်ယဲဒၣ်အံၤယဆိကမိၣ်တၢ်လၢ နတၢ်အုၣ်နသးတဖၣ်အဂ့ၢ်လီၤ. 96 ယထံၣ်န့ၢ်တ့ၢ်လံလၢ တၢ်ခဲလၢာ်အိၣ်ဒီးအကတၢၢ်န့ၣ်လီၤ. မ့မ့ၢ်နတၢ်မၤလိာ်န့ၣ် အကတၢၢ်တအိၣ်ဘၣ်န့ၣ်လီၤ. တၢ်အဲၣ်ယွၤအတၢ်သိၣ်တၢ်သီ 97 ယအဲၣ်နတၢ်သိၣ်တၢ်သီဆံးဒိၣ်လဲၣ်. ယဆိကမိၣ်တၢ်လၢအဂ့ၢ်အကျိၤသ့သ့တနံၤလီၤ. 98 နတၢ်မၤလိာ်န့ၣ်ဒုးကူၣ်သ့ထီၣ်ယၤအါန့ၢ် ယဒုၣ်ယဒါတဖၣ်န့ၣ်လီၤ. အဂ့ၢ်ဒ်အံၤ, အိၣ်ဒီးယၤလီၤထူလီၤယိာ်န့ၣ်လီၤ. 99 ယအိၣ်ဒီးတၢ်နၢ်ပၢၢ်အါန့ၢ် ပှၤသိၣ်လိယၤခဲလၢာ်တက့ၢ်လီၤ. အဂ့ၢ်ဒ်အံၤ, ယဆိကမိၣ် နတၢ်အုၣ်နသးတဖၣ်အဂ့ၢ်အကျိၤလီၤ. 100 ယနၢ်ပၢၢ်တၢ်အါန့ၢ်ပှၤလၢအသးပှၢ်တက့ၢ်လီၤ. အဂ့ၢ်ဒ်အံၤ, ယတိၢ်န့ၢ်ဖံးဃာ် နတၢ်မၤလိာ်တဖၣ်လီၤ. 101 ယတြီကွံာ်ယခီၣ်လၢကယဲၢ်ကျဲအအၢအသီ ဒ်သိး ယကတိၢ်န့ၢ်ဖံးဃာ်နကလုၢ်ကထါလီၤ. 102 ယတလဲၤသဒၣ်ဘၣ်နတၢ်သိၣ်တၢ်သီတဖၣ်န့ၣ်ဘၣ်. အဂ့ၢ်ဒ်အံၤ, နကစၢ်ဒၣ်နဲ နသိၣ်လိတ့ၢ်ယၤလီၤ. 103 လၢယလ့ၣ်ကွၢ်တၢ်န့ၣ် နကလုၢ်နကထါဆၢဆံးဒိၣ်လဲၣ်. ဆၢန့ၢ်ကနဲစီလၢယကိာ်ပူၤန့ၣ်တက့ၢ်လီၤ. 104 ယဒိးန့ၢ်တၢ်ကူၣ်သ့ခီဖျိ နတၢ်သိၣ်တၢ်သီတဖၣ်န့ၣ်လီၤ. မၤသးဒ်န့ၣ်ဒီးယသးဟ့တၢ်ကတိၤ ကဘျံးကဘျၣ်အကျဲခဲလၢာ်န့ၣ်လီၤ. တၢ်ကပီၤလၢယွၤအတၢ်သိၣ်တၢ်သီ 105 နကလုၢ်ကထါန့ၣ် မ့ၢ်မ့ၣ်အူဒၢတဖျၢၣ်လၢယခီၣ်အဂီၢ်, ဒီးတၢ်ကပီၤတဖျၢၣ်လၢယကျဲအဂီၢ်လီၤ. 106 ယမၤတၢ်ဆိၣ်တမံၤဒီး ပာ်ဂၢၢ်ပာ်ကျၢၤအီၤလၢယကပိာ်ထွဲနတၢ်သိၣ်တၢ် သီတဖၣ်လၢ အတီအလိၤန့ၣ်လီၤ. 107 ယွၤဧၢ, ယဘၣ်တၢ်နးတၢ်ဖှီၣ်နးမးလီၤ. မၤမူထီၣ်က့ၤယၤဒ် နကလုၢ်ကထါအသိးန့ၣ်တက့ၢ်. 108 ယွၤဧၢ, တူၢ်လိာ်ဘၣ်ယတၢ်စံးထီၣ်ပတြၢၤ အတၢ်ထုကဖၣ်န့ၣ်တက့ၢ်. ဒီးသိၣ်လိယၤလၢနတၢ်မၤလိာ်တဖၣ်န့ၣ်တက့ၢ်. 109 ယအိၣ်ကတဲာ်ကတီၤယသးထီဘိလၢ တၢ်သံခ့သံပှၤအဂီၢ်လီၤ. ယတသးပ့ၤနီၣ်ဘၣ်နတၢ်သိၣ်တၢ်သီဘၣ်. 110 ပှၤတတီတလိၤပာ်ပျံၤသကွီၤလၢယဂီၢ်လီၤ. ဘၣ်ဆၣ်ဒီးယတဟးဖျိးကွံာ်လၢ နတၢ်မၤလိာ်တဖၣ်န့ၣ်ဘၣ်. 111 နတၢ်အုၣ်နသးတဖၣ် မ့ၢ်ယတၢ်န့ၢ်သါလီၤထူလီၤယိာ်လီၤ. အဂ့ၢ်ဒ်အံၤ, အဝဲန့ၣ် မ့ၢ်ယသးအတၢ်သူၣ်ဖှံသးညီန့ၣ်လီၤ. 112 ယပာ်လီၤယသးလၢ ယကတိၢ်န့ၢ်နတၢ်မၤလိာ်တဖၣ် တုၤမုၢ်တနံၤလၢယသံန့ၣ်လီၤ. တၢ်ပူၤဖျဲးအလီၢ်လၢယွၤ အတၢ်သိၣ်တၢ်သီအပူၤ 113 ပှၤလၢအသးခံဖျၢၣ်တဖၣ်န့ၣ်ယသးဟ့အီၤလီၤ. မ့မ့ၢ်နတၢ်သိၣ်တၢ်သီန့ၣ်ယအဲၣ်အီၤလီၤ. 114 နမ့ၢ်ယတၢ်အိၣ်တဒၢအလီၢ်, ဒီးယကတီၤတဘ့ၣ်လီၤ. ယမုၢ်လၢ်တၢ်လၢနကလုၢ်ကထါအပူၤလီၤ. 115 ပှၤမၤတၢ်အၢသ့ၣ်တဖၣ်ဧၢ, ဟးဖးဒီးယၤ, ဒ်သိးယကတိၢ်န့ၢ်ဟံးဃာ် ယကစၢ်အတၢ်မၤလိာ်တဖၣ်န့ၣ်တက့ၢ်. 116 ဒုးအိၣ်ဂၢၢ်ဆိးကျၢၤယၤဒ်နကလုၢ်ကထါ အသိးန့ၣ်တက့ၢ်. ဒီးယကမူလီၤ. မ်ယသုတဘၣ်တၢ်မဲာ်ဆှးလၢ ယတၢ်မုၢ်လၢ်အဃိန့ၣ်တဂ့ၤ. 117 မၤစၢၤယၤတက့ၢ်. ဒီးယကတုၤလၢ တၢ်အုၣ်က့ၤခီၣ်က့ၤယၤလီၤ. ဒီးယကတိၢ်နီၣ်နတၢ်မၤလိာ်တဖၣ်တထံၣ်ဃီလီၤ. 118 ကယဲၢ်ပှၤလၢအဟးဖျိးလၢ နတၢ်မၤလိာ်အကျဲခဲလၢာ်တဖၣ်န့ၣ်, နညိကွံာ်အီၤလီၤ. အတၢ်လီတၢ်န့ၣ်မ့ၢ်တၢ်ကလီကလီလီၤ. 119 ကယဲၢ်ပှၤတတီတလိၤခဲလၢာ်လၢဟီၣ်ခိၣ်ချၢန့ၣ်, နတ့ၢ်လီၤကွံာ်အီၤဒ်တၢ်ကမှံၤကမှီာ် အသိးန့ၣ်လီၤ. မၤသးဒ်န့ၣ်ဒီး ယအဲၣ်နတၢ်အုၣ်နသးတဖၣ်န့ၣ်လီၤ. 120 ယညၣ်ကနိးလၢတၢ်ပျံၤနၤအဃိ, ဒီးယပျံၤနတၢ်စံၣ်ညီၣ်တဖၣ်လီၤ. တၢ်ဒိကနၣ်ယွၤအတၢ်သိၣ်တၢ်သီ 121 ယမၤတ့ၢ်လံတၢ်လၢအဘၣ်ဒီးတၢ်လၢအဂ့ၤန့ၣ်လီၤ. ဟ့ၣ်လီၤကွံာ်ယၤဆူ ယဒုၣ်ယဒါတဖၣ်အစုပူၤတဂ့ၤ. 122 အၢၣ်လီၤလၢနကမၤစၢၤနခ့နပှၤန့ၣ်တက့ၢ်. ပျဲပှၤပာ်ထီၣ်ထီအသးမၤနၢၤမၤဃၣ်ယၤတဂ့ၤ. 123 ယမဲာ်ချံဘှံးဝဲလၢယခိးကွၢ်လၢ်နတၢ်မၤစၢၤလၢ တၢ်ပူၤဖျဲးအဂီၢ်န့ၣ်လီၤ. အဂ့ၢ်ဒ်အံၤ, နအၢၣ်လီၤတ့ၢ်ယၤလၢ တၢ်မၤပူၤဖျဲးအဂီၢ်လီၤ. 124 မၤနခ့နပှၤဒ်နတၢ်အဲၣ်ဂၢၢ်ကျၢၤအသိး, ဒီးသိၣ်လိယၤလၢနတၢ်မၤလိာ်တဖၣ်န့ၣ်တက့ၢ်. 125 ယဲဒၣ်အံၤယမ့ၢ်နခ့နပှၤလီၤ. ဒုးနၢ်ပၢၢ်ယၤဒ်သိးယကသ့ၣ်ညါ နတၢ်အုၣ်နသးတဖၣ်န့ၣ်တက့ၢ်. 126 ဆၢကတီၢ်ဘၣ်လံလၢယွၤကမၤတၢ်လီၤ. အဂ့ၢ်ဒ်အံၤ, နတၢ်သိၣ်တၢ်သီတဖၣ် ဘၣ်တၢ်ဘိးကဒါကွံာ်အီၤလံ. 127 မၤသးဒ်န့ၣ်ဒီးယအဲၣ်နတၢ်မၤလိာ်တဖၣ် အါန့ၢ်ထူဧိၤလွဲဧိၤ, ဒီးထူစီတက့ၢ်လီၤ. 128 ဒီးယပိာ်ထွဲနတၢ်မၤလိာ်ခဲလၢာ်အခံလီၤ. ကယဲၢ်ကျဲဘၣ်ဃးဒီးတၢ်ကဘျံးကဘျၣ်န့ၣ် ယသးဟ့အီၤကိးဘိဒဲးလီၤ. တၢ်သးအိၣ်ဒိကနၣ်ယွၤအတၢ်သိၣ်တၢ်သီ 129 နတၢ်အုၣ်နသးတဖၣ်န့ၣ်လီၤလးဝဲလီၤ. မၤသးဒ်န့ၣ်ဒီးယတိၢ်န့ၢ်အီၤလၢ ယသူၣ်ယသးဒီဖျၢၣ်ညါလီၤ. 130 တၢ်ဒုးနဲၣ်ဖျါထီၣ်နကလုၢ်နကထါန့ၣ် ဟ့ၣ်ထီၣ်တၢ်ကပီၤ, ဒီးဒုးနၢ်ပၢၢ်ပှၤလၢအတမၤလိဘၣ်တၢ်ဘၣ်လီၤ. 131 ယအဲးထီၣ်ယထးခိၣ်လၢ ယဆၢန့ၢ်တၢ်နးနးကလဲာ်န့ၣ်လီၤ. အဂ့ၢ်ဒ်အံၤ, ယဆၢန့ၢ်နတၢ်မၤလိာ်တဖၣ်လီၤ. 132 ဃၣ်နသးဆူယအိၣ်, ဒီးသူၣ်ကညီၤသးကညီၤယၤ ဒ်နညီနုၢ်မၤပှၤလၢ အအဲၣ်နမံၤအသိးန့ၣ်တက့ၢ်. 133 ဒုးထွဲယခီၣ်လၢနကလုၢ်ကထါအပူၤဒ်နအၢၣ်လီၤတ့ၢ်အသိး န့ၣ်တက့ၢ်. ဒီးမ်တၢ်အၢတၢ်သီအသုတပၢယၤနီတမံၤတဂ့ၤ. 134 အုၣ်က့ၤခီၣ်က့ၤယၤလၢပှၤကညီအတၢ်မၤအၢမၤသီ ဒ်သိးယကတိၢ်န့ၢ်ဖံးဃာ် နတၢ်မၤလိာ်တဖၣ်န့ၣ်တက့ၢ်. 135 ဒုးကပီၤထီၣ်နမဲာ်လၢနခ့နပှၤအလိၤ, ဒီးသိၣ်လိယၤလၢနတၢ်မၤလိာ်တဖၣ်န့ၣ်တက့ၢ်. 136 ယမဲာ်ထံယွၤလီၤဝဲဒ်ထံကျိအသိး, မ့ၢ်လၢပှၤတတိၢ်န့ၢ်ဘၣ်နတၢ်သိၣ်တၢ်သီ အဃိန့ၣ်လီၤ. ယွၤအတၢ်သိၣ်တၢ်သီအတၢ်တီတၢ်လိၤ 137 ယွၤဧၢ, နမ့ၢ်တၢ်တီတၢ်လိၤ ဒီးနတၢ်စံၣ်ညီၣ်တဖၣ်န့ၣ်တီဝဲလိၤဝဲလီၤ. 138 နဟ့ၣ်တ့ၢ်လံနတၢ်သိၣ်တၢ်သီတဖၣ် လၢအတီဝဲလိၤဝဲလၢလၢပှဲၤပှဲၤန့ၣ်လီၤ. 139 ယတၢ်သးဒိၣ်ထီၣ်အီၣ်တၢ်လၢယပူၤဒ်မ့ၣ်အူအသိး မ့ၢ်လၢယဒုၣ်ယဒါတဖၣ်တဒိကနၣ် နတၢ်မၤလိာ်တဖၣ်အဃိန့ၣ်လီၤ. 140 နတၢ်အၢၣ်လီၤမ့ၢ်တၢ်လၢအလီၤတံၢ်ဒိၣ်မး, ဒီးနခ့နပှၤအဲၣ်အီၤလီၤ. 141 ယမ့ၢ်ပှၤအဆံးဒီးပှၤတပာ်ကဲဘၣ်ယၤဘၣ်. ဘၣ်ဆၣ်ယတသးပ့ၤနီၣ်ဘၣ် နတၢ်မၤလိာ်တဖၣ်ဘၣ်. 142 နတၢ်တီတၢ်လိၤန့ၣ်ကအိၣ်ဝဲလီၤထူလီၤယိာ်, ဒီးနတၢ်သိၣ်တၢ်သီန့ၣ်မ့ၢ်တၢ်မ့ၢ်တၢ်တီလီၤ. 143 တၢ်နးတၢ်ဖှီၣ်ဒီးတၢ်ကိၢ်တၢ်ဂီၤန့ၣ်ဘၣ်လံယၤလံ. ဘၣ်ဆၣ်နတၢ်မၤလိာ်တဖၣ်န့ၣ် မ့ၢ်ယတၢ်သူၣ်ဖှံသးညီလီၤ. 144 နတၢ်အုၣ်နသးတဖၣ်န့ၣ် မ့ၢ်တၢ်တီတၢ်လိၤထီဘိလီၤ. ဒုးနၢ်ပၢၢ်ယၤတက့ၢ်, ဒီးယကမူလီၤ. တၢ်ထုကဖၣ်လၢတၢ်ပူၤဖျဲးအဂီၢ် 145 ယွၤဧၢ, ယဃ့ကညးတၢ်လၢယသးဒီဖျၢၣ်ညါလီၤ. စံးဆၢလၢ်ယၤတက့ၢ်. ယကတိၢ်န့ၢ်နတၢ်မၤလိာ်တဖၣ်လီၤ. 146 ယကိးထီၣ်နၤလီၤ. အုၣ်က့ၤခီၣ်က့ၤယၤတက့ၢ်. ဒီးယကတိၢ်န့ၢ်နတၢ်သိၣ်တၢ်သီတဖၣ်လီၤ. 147 တချုးမုၢ်ဟဲထီၣ်ဒံးဘၣ်ဒီးယကိးထီၣ်နၤလၢ တၢ်မၤစၢၤအဂီၢ်လီၤ. ယမုၢ်လၢ်တၢ်လၢနကလုၢ်ကထါအပူၤန့ၣ်လီၤ. 148 ဒီနၤညါန့ၣ်ယဆိးသီယဲဒ်သိးယကဆိကမိၣ် တၢ်လၢ နကလုၢ်ကထါအဂ့ၢ်လီၤ. 149 ယွၤဧၢ, ဒိကနၣ်လၢ်ယကလုၢ်လၢနတၢ်အဲၣ် ဂၢၢ်ကျၢၤအပူၤန့ၣ်တက့ၢ်. လၢနစံၣ်ညီၣ်တၢ်အပူၤန့ၣ်ပာ်မူယၤတက့ၢ်. 150 ပှၤလၢအမၤအၢယၤလၢအအိၣ်ဒီးတၢ်တိာ် အအၢအသီတဖၣ်န့ၣ် သုးဘူးအသး, ဒီးအဝဲသ့ၣ်အိၣ်ယံၤဝဲဒီးနတၢ်သိၣ်တၢ်သီလီၤ. 151 ယွၤဧၢ, ဘၣ်ဆၣ်နအိၣ်ဘူးနဲဒီးယၤ ဒီးနတၢ်မၤလိာ်ခဲလၢာ်န့ၣ်မ့ၢ်အမ့ၢ်အတီလီၤ. 152 နတၢ်အုၣ်နသးတဖၣ်န့ၣ်ယသ့ၣ်ညါတ့ၢ်လၢပျၢၤ, လၢနပာ်လီၤအီၤလီၤထူလီၤယိာ်န့ၣ်လီၤ. တၢ်ဃ့သကွံၢ်ကညးလၢတၢ်မၤစၢၤအဂီၢ် 153 ကွၢ်ယတၢ်နးတၢ်ဖှီၣ်, ဒီးမၤပူၤဖျဲးလၢ်ယၤတက့ၢ်. အဂ့ၢ်ဒ်အံၤ, နတၢ်သိၣ်တၢ်သီန့ၣ် ယတသးပ့ၤနီၣ်ဘၣ်. 154 အိၣ်ပှိၤယကွီၢ်, ဒီးမၤပူၤဖျဲးယၤတက့ၢ်. ဒ်နတၢ်အၢၣ်လီၤအသိးန့ၣ်ဟ့ၣ်လၢ်ယၤ တၢ်မူန့ၣ်တက့ၢ်. 155 တၢ်အုၣ်က့ၤခီၣ်က့ၤန့ၣ်အိၣ်ယံၤဝဲဒီး ပှၤတတီတလိၤတဖၣ်န့ၣ်လီၤ. အဂ့ၢ်ဒ်အံၤ, အဝဲသ့ၣ်တဖၣ်န့ၣ် တဃုနတၢ်မၤလိာ်တဖၣ်န့ၣ်ဘၣ်. 156 ယွၤဧၢ, နတၢ်သူၣ်ကညီၤသးကညီၤန့ၣ်ဒိၣ်နီၢ်မးလီၤ. ဟ့ၣ်လၢ်ယၤတၢ်မူဒ် နတၢ်စံၣ်ညီၣ်အသိးန့ၣ်တက့ၢ်. 157 ပှၤလၢအမၤအၢမၤသီယၤဒီးမ့ၢ်ယဒုၣ်ယဒါ တဖၣ်န့ၣ်အိၣ်အါဂၤလီၤ. ဘၣ်ဆၣ်ယတဟးဆှဲးဘၣ် နတၢ်အုၣ်နသးတဖၣ်န့ၣ်ဘၣ်. 158 ယကွၢ်ပှၤလီတၢ်ဖိလၢယတၢ်သးကိၢ်ထီၣ်န့ၣ်လီၤ. အဂ့ၢ်ဒ်အံၤ, အဝဲသ့ၣ်တဖၣ်န့ၣ် တတိၢ်န့ၢ်ဘၣ် နတၢ်မၤလိာ်တဖၣ်န့ၣ်ဘၣ်. 159 ယွၤဧၢ, ယအဲၣ်နတၢ်မၤလိာ်တဖၣ်ဒ်လဲၣ်န့ၣ် ကွၢ်ဆိကမိၣ်တက့ၢ်. ပာ်ကီၤယသးသမူ ဒ်နတၢ်အဲၣ်အသိးတက့ၢ်. 160 နကလုၢ်ကထါအကံၢ်အလဲန့ၣ် မ့ၢ်တၢ်တီတၢ်လိၤလီၤ. ဒီးနတၢ်တီတၢ်လိၤအတၢ်စံၣ်ညီၣ်တဖၣ်န့ၣ် အိၣ်ဝဲလီၤစိၤလီၤထီကိးထံၣ်ဒဲးလီၤ. တၢ်ပာ်စီဆှံဆူယွၤအတၢ်သိၣ်တၢ်သီ 161 ပဒိၣ်ဖးဒိၣ်မၤအၢမၤသီယၤကလီကလီလီၤ. ဘၣ်ဆၣ်ဒီးယယူးယီၣ်နတၢ်သိၣ်တၢ်သီလီၤ. 162 ယသူၣ်ဖှံသးညီလၢနတၢ်အၢၣ်လီၤအီလီၤတဖၣ်အပူၤ ဒ်ပှၤလၢအထံၣ်န့ၢ်တၢ်ထူးတၢ်တီလုၢ်ဒိၣ်ပှၤဒိၣ် အါအါကလဲာ်အသိးန့ၣ်လီၤ. 163 တၢ်ကတိၤကဘျံးကဘျၣ်န့ၣ်ယသးဟ့အီၤ, ဒီးယသးဘၣ်အၢအီၤလီၤ. မ့မ့ၢ်နတၢ်သိၣ်တၢ်သီန့ၣ်ယအဲၣ်အီၤလီၤ. 164 တနံၤနွံစုယစံးထီၣ်ပတြၢၤနၤလၢနတၢ်တီတၢ်လိၤ အတၢ်စံၣ်ညီၣ်တဖၣ်အဃိလီၤ. 165 ပှၤလၢအအဲၣ်နတၢ်သိၣ်တၢ်သီတဖၣ်န့ၣ် အိၣ်ဒီးတၢ်ဃူတၢ်ဖိးအါမးလီၤ. တၢ်မၤလီၤဃံၤအီၤတသ့ဘၣ်နီတမံၤဘၣ်. 166 ယွၤဧၢ, ယမုၢ်လၢ်နတၢ်အုၣ်က့ၤခီၣ်က့ၤ ဒီးယတိၢ်န့ၢ်ဖံးဃာ်နတၢ်မၤလိာ်တဖၣ်န့ၣ်လီၤ. 167 နတၢ်အုၣ်နသးတဖၣ်န့ၣ် ယတိၢ်န့ၢ်ဖံးဃာ်လၢယသးဒီဖျၢၣ်ညါ, ဒီးယအဲၣ်အီၤဒိၣ်ဒိၣ်ကလဲာ်လီၤ. 168 ယတိၢ်န့ၢ်နတၢ်မၤလိာ်ဒီး နတၢ်အုၣ်နသးတဖၣ်န့ၣ်လီၤ. အဂ့ၢ်ဒ်အံၤ, ယကျဲဧိၤကပူၤဧိၤအိၣ်ဝဲလၢ နမဲာ်ညါခဲလၢာ်လီၤ. တၢ်ထုကဖၣ်လၢတၢ်မၤစၢၤအဂီၢ် 169 ယွၤဧၢ, မ်ယတၢ်ကိးထီၣ်လၢတၢ်မၤစၢၤအဂီၢ် ဟဲထီၣ်ဆူနအိၣ်တက့ၢ်. ဒုးနၢ်ပၢၢ်လၢ်ယၤဒ်နကလုၢ်ကထါအသိးန့ၣ်တက့ၢ်. 170 မ်ယတၢ်ထုကဖၣ်ဟဲထီၣ်ဆူနအိၣ်တက့ၢ်. ဒီးမၤပူၤဖျဲးယၤဒ်နကလုၢ်ကထါအသိးန့ၣ်တက့ၢ်. 171 ယထးခိၣ်ကစံးထီၣ်ပတြၢၤနၤထီဘိ မ့ၢ်လၢနသိၣ်လိယၤ နတၢ်သိၣ်တၢ်သီတဖၣ်အဃိန့ၣ်လီၤ. 172 ယပျ့ၤကသးဝံၣ်ထီၣ်နကလုၢ်ကထါလီၤ. အဂ့ၢ်ဒ်အံၤ, နတၢ်မၤလိာ်တဖၣ်န့ၣ် မ့ၢ်အမ့ၢ်အတီခဲလၢာ်လီၤ. 173 မ်နစုအိၣ်ကတဲာ်ကတီၤအသးလၢ ကမၤစၢၤယၤန့ၣ်တက့ၢ်. အဂ့ၢ်ဒ်အံၤ, ယဃုထၢနတၢ်မၤလိာ်တဖၣ်လီၤ. 174 ယွၤဧၢ, ယဆၢန့ၢ်ဘၣ်နတၢ်အုၣ်က့ၤခီၣ်က့ၤ ဒီးနတၢ်သိၣ်တၢ်သီန့ၣ်မ့ၢ်ယတၢ်သူၣ်ဖှံသးညီလီၤ. 175 ဟ့ၣ်ယၤတၢ်မူဒ်သိးယကစံးထီၣ်ပတြၢၤနၤတက့ၢ်. ဒီးမ်နစံၣ်ညီၣ်တၢ်တဖၣ်န့ၣ်မၤစၢၤယၤတက့ၢ်. 176 ယဟးဖျိးကျဲဒ်သိလၢအဟါမၢ်တဒုအသိးလီၤ. ဟဲဒီးဃုက့ၤနခ့နပှၤတက့ၢ်. အဂ့ၢ်ဒ်အံၤ, ယတသးပ့ၤနီၣ်ဘၣ် နတၢ်မၤလိာ်တဖၣ်ဘၣ်လီၤ. |
Sgaw Karen Common Bible © Bible Society of Myanmar, 1992.
Bible Society of Myanmar