စံးထီၣ်ပတြၢၤ 118 - Sgaw Karen Common Bible

တၢ်စံးဘျုးအတၢ်ထုကဖၣ် လၢတၢ်မၤနၢၤအဃိ

¹ အိ, ဟ့ၣ်ထီၣ်တၢ်စံးဘျုးစံးဖှိၣ်တဖၣ်ဆူ ယွၤအအိၣ်န့ၣ်တက့ၢ်. အဂ့ၢ်ဒ်အံၤ, ယွၤန့ၣ်ဂ့ၤဝဲလီၤ. အဂ့ၢ်ဒ်အံၤ, အတၢ်အဲၣ်အိၣ်ဂၢၢ်ဆိးကျၢၤ လီၤထူလီၤယိာ်လီၤ.

² မ်ပှၤအံၣ်စရ့လးဖိတဖၣ်စံးဝဲ, “အတၢ်အဲၣ်အိၣ်ဝဲလီၤထူလီၤယိာ်” န့ၣ်တက့ၢ်.

³ မ်ယွၤအပှၤလုၢ်တၢ်အခိၣ်တဖၣ်စံးဝဲ, “အတၢ်အဲၣ်အိၣ်ဝဲလီၤထူလီၤယိာ်” န့ၣ်တက့ၢ်.

⁴ မ်ပှၤလၢအဘူၣ်ထီၣ်ဘါထီၣ်အီၤခဲလၢာ်စံးဝဲ, “အတၢ်အဲၣ်အိၣ်ဝဲလီၤထူလီၤယိာ်” န့ၣ်တက့ၢ်.

⁵ ယကိးထီၣ်ယွၤလၢယတၢ်ကိၢ်တၢ်ဂီၤအပူၤလီၤ. အဝဲဒၣ်စံးဆၢယၤဒီးမၤပူၤမၤဖျဲးယၤန့ၣ်လီၤ.

⁶ ယွၤအိၣ်ဒီးယၤဒီးယတပျံၤဘၣ်တၢ်ဘၣ်. ပှၤကညီမၤယၤကသ့မနုၤလဲၣ်.

⁷ ယွၤအိၣ်လၢယအိၣ်တခီလၢကမၤစၢၤယၤလီၤ. ဒီးယကထံၣ်ဘၣ် ယဒုၣ်ယဒါတဖၣ် ဘၣ်တၢ်မၤဃၣ်ကွံာ်အီၤန့ၣ်လီၤ.

⁸ တၢ်ဃ့ၢ်ဆူယွၤအိၣ်န့ၣ်, ဂ့ၤန့ၢ် တၢ်သန့ၤပသးလၢပှၤကညီတက့ၢ်န့ၣ်လီၤ.

⁹ တၢ်ဃ့ၢ်ဆူယွၤအအိၣ်နံၣ်ဂ့ၤန့ၢ်တၢ်သန့ၤပသးလၢပဒိၣ်ဖး ဒိၣ်တက့ၢ်န့ၣ်လီၤ.

¹⁰ ဒုၣ်ဒါအါဂၤအိၣ်ဝးတရံးယၤ, ဘၣ်ဆၣ်ယမၤဟးဂီၤကွံာ်အဝဲသ့ၣ်လၢ ယွၤအစိအကမီၤန့ၣ်လီၤ.

¹¹ အဝဲသ့ၣ်ကဝီၤဃာ်ယၤကိးကပၤဒဲး ဘၣ်ဆၣ်ယမၤဟးဂီၤကွံာ်အဝဲသ့ၣ်လၢ ယွၤအစိအကမီၤလီၤ.

¹² အဝဲသ့ၣ် အိၣ်ဖှိၣ်ဂီၢ်မုၢ်လၢယလိၤ ဒ်ကွဲဧိၤကနဲဧိၤအသိး, ဘၣ်ဆၣ်ဒီး မ့ၣ်အူအီၣ်ကွံာ်အဝဲသ့ၣ်ချ့သဒံးဒ် မ့ၣ်အူအီၣ်တၤဆှုၣ်အသိး, ယမၤဟးဂီၤကွံာ်အဝဲသ့ၣ်လၢ ယွၤအစိကမီၤအပူၤန့ၣ်လီၤ.

¹³ ယဘၣ်တၢ်ဆီၣ်လီၤတ့ၢ်ယၤနးမး ဒ်သိးယကလီၤဃံၤလီၤ. ဘၣ်ဆၣ်ယွၤမၤစၢၤတ့ၢ်လံယၤလံ.

¹⁴ ယွၤမ့ၢ်ယဂံၢ်ယဘါ, ဒီးယတၢ်သးဝံၣ်, မ့ၢ်တ့ၢ်လံဝဲယတၢ်အုၣ်က့ၤခီၣ်က့ၤန့ၣ်လီၤ.

¹⁵ ဒိကနၣ်တၢ်သးခုအတၢ်သးဝံၣ်လၢတၢ်မၤနၢၤအဂီၢ် လၢကစၢ်ယွၤအပှၤဂီၢ်မုၢ်အဒဲတဖၣ်အပူၤတက့ၢ်, “ယွၤအစိအကမီၤဖးဒိၣ်မၤဝံၤတ့ၢ်လံတၢ်လံ.

¹⁶ အတၢ်စိတၢ်ကမီၤဟဲစိာ်န့ၢ်ပှၤတၢ်မၤနၢၤ, အစိအကမီၤဖးဒိၣ်လၢတၢ်ဒုးတၢ်ယၤအပူၤလီၤ.”

¹⁷ ယတသံဘၣ်. မ့ၢ်ယကမူဒီး စံၣ်တဲၤတဲလီၤယွၤအတၢ်မၤတဖၣ်လီၤ.

¹⁸ ယွၤသိၣ်ဃီၣ်ယၤနးမးလီၤ. ဘၣ်ဆၣ်ဒီး တဟ့ၣ်လီၤကွံာ်ယၤဆူတၢ်သံဘၣ်.

¹⁹ အိးထီၣ်န့ၢ်ယၤလၢတၢ်လုၢ်ဟံၣ် အတြဲၤတဖၣ်န့ၣ်တက့ၢ်. ယကလဲၤနုာ်ဆူအပူၤဒီးစံးဘျုးစံးဖှိၣ်ယွၤန့ၣ်လီၤ.

²⁰ အအံၤမ့ၢ်ယွၤအတြဲၤလၢ ထဲဒၣ်ပှၤအတီအလိၤဧိၤလဲၤနုာ်သ့ဝဲဒၣ်န့ၣ်လီၤ.

²¹ ယစံးထီၣ်ပတြၢၤနၤ, ယွၤဧၢ. အဂ့ၢ်ဒ်အံၤ, နနၢ်ဟူယၤ, အဂ့ၢ်ဒ်အံၤ, နဟ့ၣ်လီၤယၤတၢ်မၤနၢၤလီၤ.

²² လၢၢ်လၢပှၤသူၣ်ထီၣ်တၢ်ဖိတဖၣ်ညိကွံာ် ဝဲဒ်တၢ်ကလီကလီအသိးန့ၣ်, ကဲထီၣ်လၢၢ်လၢအကါဒိၣ်ကတၢၢ်န့ၣ်လံ.

²³ တၢ်အံၤမ့ၢ်တၢ်လၢယွၤမၤဝဲ ဒီးမ့ၢ်တၢ်လီၤလးလၢ ပထံၣ်ဘၣ်တ့ၢ်လံအီၤလၢပမဲာ်န့ၣ်လီၤ.

²⁴ တၢ်လၢမုၢ်တနံၤအံၤယွၤတ့ဝဲလီၤ. ပကသူၣ်ဖှံသးညီဒီးသူၣ်ခုသးခုလၢအပူၤလီၤ.

²⁵ ယွၤဧၢ, အုၣ်က့ၤခီၣ်က့ၤပှၤတက့ၢ်. ယွၤဧၢ, ဟ့ၣ်ပှၤတၢ်မၤနၢၤတက့ၢ်.

²⁶ ပှၤတဂၤလၢအဟဲလၢယွၤအမံၤန့ၣ် မ်အဘၣ်တၢ်ဆိၣ်ဂ့ၤတက့ၢ်. ပဆိၣ်ဂ့ၤသုလၢယွၤအဟံၣ်ပူၤလီၤ.

²⁷ ယွၤမ့ၢ်ကစၢ်ယွၤလီၤ. အဝဲမ့ၢ်တၢ်ဂ့ၤလၢပဂီၢ်လီၤ. စးထီၣ်တၢ်သးခုအဘူၣ်လၢသုစုပူၤ, ဒီးလဲၤတရံးတၢ်လုၢ်လီၢ်န့ၣ်တက့ၢ်.

²⁸ နမ့ၢ်ယကစၢ်ယွၤဒီးယစံးဘျုးစံးဖှိၣ်နၤလီၤ. ယကတဲဖျါထီၣ်နတၢ်ဒိၣ်တၢ်မုၢ်န့ၣ်လီၤ.

²⁹ စံးဘျုးစံးဖှိၣ်ယွၤတက့ၢ်. အဂ့ၢ်ဒ်အံၤ, အဝဲဒၣ်န့ၣ်ဂ့ၤဝဲလီၤ. အဂ့ၢ်ဒ်အံၤ, အတၢ်အဲၣ်ဂၢၢ်ကျၢၤ အိၣ်ဝဲလီၤထူလီၤယိာ်လီၤ.