စံးထီၣ်ပတြၢၤ 116 - Sgaw Karen Common Bible

ပှၤလၢအဘၣ်တၢ်မၤပူၤဖျဲးအီၤလၢတၢ်သံ

¹ ယအဲၣ်ယွၤကွံယွၤမ့ၢ်လၢ အဝဲနၢ်ဟူတ့ၢ်လံယကလုၢ် ဒီးယတၢ်ဃ့ကညးတဖၣ်အဃိန့ၣ်လီၤ.

² အဂ့ၢ်ဒ်အံၤ, အဝဲဒိကနၣ်ယၤအဃိ, ယကကိးထီၣ်အီၤတစိၤဒၣ်ယၤန့ၣ်လီၤ.

³ တၢ်သံအတၢ်ပျံၤတၢ်ဖုးအိၣ်ဝးတရံးယၤ, တၢ်သွၣ်ခိၣ်အတၢ်လီၤပျံၤလီၤဖုး အိၣ်ဘူးဒီးယၤန့ၣ်လီၤ. ယပှဲၤလုာ်ကွံာ်ဒီးတၢ်ပျံၤတၢ်ဖုး ဒီးတၢ်ဘၣ်ယိၣ်ဘၣ်ဘီန့ၣ်လီၤ.

⁴ အန့ၣ်ဒီးယကိးထီၣ်ယွၤ, “ယွၤဧၢ, ယဃ့ကညးနၤလီၤ. မၤထူၣ်ဖျဲးယသးသမူတက့ၢ်.”

⁵ ယွၤမ့ၢ်တၢ်သးကညီၤဒီးတၢ်တီတၢ်လိၤန့ၣ်လီၤ. ပကစၢ်ယွၤန့ၣ်မ့ၢ်တၢ်သးကညီၤလီၤ.

⁶ ယွၤကဟုဘံၣ်ကယာ်ဘၢပှၤလၢ တၢ်မၤစၢၤအီၤတအိၣ်, ဒီးဖဲယအိၣ်လၢတၢ်ပျံၤတၢ်ဖုးအလီၢ်န့ၣ်ဒီး အဝဲအုၣ်က့ၤခီၣ်က့ၤယၤလီၤ.

⁷ ယသးဧၢ, သးဒ့ဒီတဂ့ၤ အဂ့ၢ်ဒ်အံၤယွၤမၤဂ့ၤတ့ၢ်လံနၤလံ.

⁸ ယွၤမၤပူၤဖျဲးတ့ၢ်လံယၤလၢတၢ်သံ, ဆိကတီၢ်ကွံာ်ယမဲာ်ထံမဲာ်နိတဖၣ် ဒီးပၢၤဃာ်ယၤလၢတၢ်ဒိးဘၣ်တၢ်မၤနၢၤန့ၣ်လီၤ.

⁹ လၢတၢ်န့ၣ်အဃိ, ယလဲၤတၢ်လၢယွၤအမဲာ်ညါ, လၢပှၤမူသ့ၣ်တဖၣ်အဟီၣ်ခိၣ်အပူၤန့ၣ်လီၤ.

¹⁰ ယနာ်ဒံးဒၣ်တၢ်, ဖဲယစံးလၢ “ယဘၣ်တၢ်မၤနးမၤဖှီၣ်ယၤ ဒိၣ်ဒိၣ်မုၢ်မုၢ်အခါဒၣ်လဲာ်,”

¹¹ ဒီးဖဲယပျံၤတၢ်ဒီးစံး, “ပနာ်န့ၢ်ပှၤတသ့နီတဂၤဘၣ်” အခါဒၣ်လဲာ်န့ၣ်လီၤ.

¹² ယကဟ့ၣ်ကၣ်ယွၤလၢအမၤဂ့ၤယၤတဂၤလၢ တၢ်ခဲလၢာ်အဃိန့ၣ်လၢမနုၤတမံၤလဲၣ်.

¹³ ယကဟံးန့ၢ်တၢ်အုၣ်က့ၤခီၣ်က့ၤအလီခီ ဒီးကိးထီၣ်ယွၤအမံၤလီၤ.

¹⁴ ယကမၤဘူၣ်ယွၤလၢ တၢ်ဘၣ်ဃးဒီး ယဆိၣ်တၢ်လၢ အပှၤဂီၢ်မုၢ်ခဲလၢာ် အမဲာ်ညါခဲကနံၣ်အံၤလီၤ.

¹⁵ အပှၤစီဆှံတဖၣ်အတၢ်သံန့ၣ် မ့ၢ်တၢ်လုၢ်ဒိၣ်ပှ့ၤဒိၣ်လၢယွၤအမဲာ်ညါလီၤ.

¹⁶ ယွၤဧၢ, ယမ့ၢ်နခ့နပှၤလီၤ. ယမၤနတၢ်မၤဒ်ယမိၢ်မၤတ့ၢ်ဝဲအသိးန့ၣ်လီၤ. နအုၣ်က့ၤခီၣ်က့ၤတ့ၢ်လံယၤလၢတၢ်သံန့ၣ်လံ.

¹⁷ ယကဟ့ၣ်နၤလၢတၢ်စံးဘျုးစံးဖှိၣ်အတၢ်လုၢ်ထီၣ် ဒီးကိးထီၣ်ယွၤအမံၤန့ၣ်လီၤ.

¹⁸ ယကဟ့ၣ်ယတၢ်အၢၣ်လီၤအီလီၤတဖၣ် ဆူယွၤလၢအပှၤဂီၢ်မုၢ်ခဲလၢာ်အမဲာ်ညါ,

¹⁹ လၢယွၤအဟံၣ်အဂၢၤတဖၣ်အပူၤ, လၢနပူၤ, ယရူၤၡလ့ၣ်ဧၢ, စံးထီၣ်ပတြၢၤယွၤတက့ၢ်.