စံးထီၣ်ပတြၢၤ 115 - Sgaw Karen Common Bible

ကစၢ်ယွၤလၢအမ့ၢ်ဝဲတီဝဲတဂၤ

¹ ထဲဒၣ်နၤတဂၤဧိၤ, ယွၤဧၢ, ထဲဒၣ်နၤတဂၤဧိၤ မ်တၢ်ဟ့ၣ်နၤလၢတၢ်လၤကပီၤ ဒီးတမ့ၢ်ဘၣ်ဆူပှၤဘၣ်. အဂ့ၢ်ဒ်အံၤ, မ့ၢ်လၢနတၢ်အဲၣ်ဂၢၢ်ကျၢၤ ဒီးနတၢ်သူၣ်တီသးလိၤအဃိန့ၣ်လီၤ.

² ဘၣ်မနုၤလၢပှၤကလုာ်တဖၣ်စံးဝဲ “အကစၢ်ယွၤအိၣ်ဖဲလဲၣ်” န့ၣ်လဲၣ်.

³ ပကစၢ်အိၣ်လၢမူခိၣ်န့ၣ်လီၤ. ဒီးဖဲဒၣ်အသးန့ၣ်မၤဝဲဒၣ်လီၤ.

⁴ အဝဲသ့ၣ်အတၢ်ဂီၤတၢ်ဖီၣ်တဖၣ်န့ၣ် ဘၣ်တၢ်မၤအီၤလၢစ့ဒီးထူဒီး မ့ၢ်ပှၤကညီအတၢ်မၤလၢအစုတဖၣ်န့ၣ်လီၤ.

⁵ အဝဲသ့ၣ်အိၣ်ဒီးအထးခိၣ်, ဘၣ်ဆၣ်ကတိၤတၢ်တသ့ဘၣ်. အိၣ်ဒီးအမဲာ်ချံတဖၣ် ဘၣ်ဆၣ်ထံၣ်တၢ်တသ့ဘၣ်.

⁶ အဝဲသ့ၣ်အိၣ်ဒီးအနၢ်တဖၣ်, ဘၣ်ဆၣ်နၢ်ဟူတၢ်တသ့ဘၣ်. အိၣ်ဒီးအနါဒ့တဖၣ် ဘၣ်ဆၣ်နၢကွၢ်တၢ်တသ့ဘၣ်.

⁷ အဝဲသ့ၣ်အိၣ်ဒီးအစုတဖၣ်, ဘၣ်ဆၣ်ကလၢၢ်ကွၢ်တၢ်တသ့ဘၣ်. အိၣ်ဒီးအခီၣ်တဖၣ် ဘၣ်ဆၣ်ဟးဝဲတသ့ဘၣ်. အဝဲသ့ၣ်မၤသီၣ်တၢ်အကလုၢ်တသ့ဘၣ်.

⁸ မ်ကယဲၢ်ပှၤလၢအတ့အဝဲသ့ၣ်ဒီးနာ်တၢ်လၢအပူၤန့ၣ် ကဲထီၣ်လီၤဂာ်ဒီးတၢ်ဂီၤတဖၣ်လၢ အဝဲသ့ၣ်တ့တ့ၢ်ဝဲန့ၣ်တက့ၢ်.

⁹ သုဝဲအံၣ်စရ့လးအပှၤဂီၢ်မုၢ်သ့ၣ်ဧၢ, သန့ၤသုသးလၢယွၤတက့ၢ်. အဝဲဒၣ်မၤစၢၤသုဒီးကဟုဘံၣ်ကယာ်ဘၢသုလီၤ.

¹⁰ သုဝဲကစၢ်ယွၤအပှၤလုၢ်တၢ်အခိၣ်သ့ၣ်ဧၢ, သန့ၤသုသးလၢယွၤတက့ၢ်. အဝဲဒၣ်မၤစၢၤသုဒီးကဟုဘံၣ်ကယာ်ဘၢသုလီၤ.

¹¹ ပှၤလၢအဘူၣ်ထီၣ်ဘါထီၣ်ယွၤခဲလၢာ်သ့ၣ်ဧၢ, သန့ၤသုသးလၢယွၤတက့ၢ်. အဝဲဒၣ်မၤစၢၤသုဒီးကဟုဘံၣ်ကယာ်ဘၢသုလီၤ.

¹² ယွၤသ့ၣ်နီၣ်ထီၣ်က့ၤပှၤဒီးကဆိၣ်ဂ့ၤပှၤလီၤ. အဝဲကဆိၣ်ဂ့ၤအံၣ်စရ့လးအပှၤဂီၢ်မုၢ် ဒီးအပှၤလုၢ်တၢ်အခိၣ်ခဲလၢာ်န့ၣ်လီၤ.

¹³ အဝဲကဆိၣ်ဂ့ၤပှၤကိးဂၤဒဲးလၢအမၤလၤကပီၤအီၤ, ပှၤအဒိၣ်ဒီးပှၤအဆံးဒ်သိးသိးန့ၣ်လီၤ.

¹⁴ မ်ယွၤဟ့ၣ်သုလၢဖိတဖၣ် သုဝဲဒီးသုစၢၤသုသွဲၣ်တဖၣ်တက့ၢ်.

¹⁵ မ်သုဘၣ်ဆိၣ်ဂ့ၤလၢယွၤ, လၢအတ့လီၤမူခိၣ်ဒီးဟီၣ်ခိၣ်န့ၣ်တက့ၢ်.

¹⁶ မူခိၣ်န့ၣ်ဘၣ်ဃးဒၣ်ဒီးယွၤတဂၤဧိၤန့ၣ်လီၤ. မ့မ့ၢ်ဟီၣ်ခိၣ်န့ၣ်ဟ့ၣ်လီၤဝဲဆူပှၤကညီလီၤ.

¹⁷ ယွၤတဘၣ်တၢ်စံးထီၣ်ပတြၢၤအီၤလၢပှၤသံ, ဒီးပှၤတဂၤလၢ်လၢ်လၢအလဲၤလီၤဆူ တၢ်ဘှ့ၣ်တၢ်ဘှီၣ်အကီၢ်န့ၣ်ဘၣ်.

¹⁸ မ့မ့ၢ်ပဝဲ, ပှၤလၢအမူသ့ၣ်တဖၣ်, ပကစံးဘျုးစံးဖှိၣ်အီၤ ခဲအံၤဒီးအစိၤစိၤအဃၣ်ဃၣ်လီၤ. စံးထီၣ်ပတြၢၤယွၤတက့ၢ်.