စံးထီၣ်ပတြၢၤ 113 - Sgaw Karen Common Bible

လၢတၢ်စံးထီၣ်ပတြၢၤယွၤ အတၢ်ဂ့ၤတၢ်ဝါအပူၤ

¹ စံးထီၣ်ပတြၢၤယွၤတက့ၢ်. ယွၤအခ့အပှၤသ့ၣ်ဧၢ, စံးထီၣ်ပတြၢၤတၢ်, စံးထီၣ်ပတြၢၤယွၤအမံၤန့ၣ်တက့ၢ်.

² မ်အမံၤဘၣ်တၢ်စံးထီၣ်ပတြၢၤအီၤခဲအံၤ ဒီးအစိၤစိၤအဃၣ်ဃၣ်တက့ၢ်.

³ မ်ယွၤအမံၤဘၣ်တၢ်စံးထီၣ်ပတြၢၤအီၤ, လၢမုၢ်ထီၣ်တုၤဆူမုၢ်နုာ်န့ၣ်တက့ၢ်.

⁴ ယွၤအိၣ်ထီၣ်ထီလၢပှၤကိးကလုာ်ဒဲးအဖီခိၣ်, ဒီးအလၤကပီၤအိၣ်ဝဲလၢမူခိၣ်အဖီခိၣ်လီၤ.

⁵ မ့ၢ်မတၤလီၤဂာ်ဒ် ယွၤပကစၢ်ယွၤအသိး လၢအအိၣ်ဝဲဆိးဝဲလၢ တၢ်လီၢ်ထီၣ်ထီန့ၣ်တဂၤလဲၣ်.

⁶ ဘၣ်ဆၣ်အဝဲဆီၣ်လီၤအသး ဒ်သိးကထံၣ်မူခိၣ်ဒီးဟီၣ်ခိၣ်န့ၣ်လီၤ.

⁷ အဝဲစိာ်ကဖီထီၣ်ပှၤဘၣ်ဖှီၣ်ဘၣ်ယာ်လၢ ဟီၣ်ခိၣ်အကမူၣ်ပူၤ, အဝဲစိာ်ထီၣ်ထီပှၤလိၣ်ဘၣ်တၢ်မၤစၢၤလၢ အတၢ်သူၣ်ကိၢ်သးဂီၤအပူၤ

⁸ ဒ်သိးအကဒုးကဲထီၣ်အဝဲသ့ၣ်လၢစီၤပၤဖိခွါတဖၣ်, ပှၤဂီၢ်မုၢ်အစီၤပၤဖိခွါတဖၣ် အတံၤသကိးန့ၣ်လီၤ.

⁹ အဝဲမၤလၤကပီၤပိာ်မုၣ်တူာ်ဖိတဖၣ် လၢအဟံၣ်ပူၤ, ဒုးသးခုအဝဲသ့ၣ်ခီဖျိဟ့ၣ်အီၤဖိတဖၣ်န့ၣ်လီၤ. စံးထီၣ်ပတြၢၤယွၤတက့ၢ်.