စံးထီၣ်ပတြၢၤ 112 - Sgaw Karen Common Bible

ပှၤအဂ့ၤအဝါအတၢ်သးခု

¹ စံးထီၣ်ပတြၢၤယွၤတက့ၢ်. ပှၤလၢအပျံၤယွၤ, ပှၤလၢအသးခုဒိၣ်ဒိၣ်ကလဲာ်လၢတၢ်စူၢ် အတၢ်မၤလိာ်အပူၤန့ၣ်ဘၣ်ဆိၣ်ဂ့ၤဝဲလီၤ.

² အစၢၤအသွဲၣ်တဖၣ်ကဆူၣ်ထီၣ်လၢ ထံဧိၤကီၢ်ဧိၤအပူၤ, ပှၤအတီအလိၤတစိၤန့ၣ်ကဘၣ်တၢ်ဆိၣ်ဂ့ၤလီၤ.

³ တၢ်ထူးတၢ်တီၤဒီးတၢ်စုလီၢ်ခီၣ်ခိၣ်တဖၣ်န့ၣ် အိၣ်လၢအဟံၣ်ပူၤ ဒီးအတၢ်တီတၢ်လိၤအိၣ်ဝဲလီၤထူလီၤယိာ်လီၤ.

⁴ တၢ်ကပီၤကပီၤထီၣ်လၢ တၢ်ခံးကျါ လၢပှၤအဂ့ၤတဖၣ်အဂီၢ် လၢပှၤတဖၣ်လၢ အသူၣ်ကညီၤသးကညီၤတၢ် သးအိၣ်တၢ်ဒီး တီဝဲလိၤဝဲအဂီၢ်န့ၣ်လီၤ.

⁵ ပှၤလၢအသူၣ်အိၣ်သးအိၣ်တၢ်ဒီးဟ့ၣ်လိၢ်တၢ်, ပှၤလၢမၤအတၢ်ဖံးတၢ်မၤလၢ တၢ်စံၣ်ညီၣ်တီအပူၤန့ၣ်ဘၣ်ဆိၣ် ဂ့ၤဝဲလီၤ.

⁶ အဂ့ၢ်ဒ်အံၤ, ပှၤအတီအလိၤန့ၣ် တဟူးတဝးဘၣ်နီတဘျီဘၣ်. အဝဲကဘၣ်တၢ်သ့ၣ်နီၣ်ထီၣ်က့ၤအီၤ လီၤထူလီၤယိာ်လီၤ.

⁷ အဝဲတပျံၤဘၣ်တၢ်ကစီၣ်အအၢအသီတဖၣ်ဘၣ်. အသးန့ၣ်အိၣ်ဂၢၢ်ဆိးကျၢၤ ဒီးသန့ၤအသးလၢယွၤလီၤ.

⁸ အဝဲတဘၣ်ယိၣ်ဘၣ်ဘီမ့ၢ်ဂ့ၤ ပျံၤတၢ်ဖုးတၢ်မ့ၤဂ့ၤဘၣ်. အဝဲကထံၣ်ဘၣ်အဒုၣ်အဒါဘၣ်. တၢ်မၤဃၣ်အီၤသပှၢ်ကတၢၢ်လီၤ.

⁹ အဝဲဟ့ၣ်တၢ်လၢတၢ်သးအိၣ် ဆူပှၤလၢအလိၣ်ဘၣ်တၢ် ဒီးအတၢ်သးကညီၤန့ၣ် တလီၤတိၢ်ဘၣ်နီတဘျီဘၣ်. အဝဲကအိၣ်ဒီးအစိအကမီၤ ဒီးကဘၣ်တၢ်ယူးယီၣ်ပာ်ကဲအီၤန့ၣ်လီၤ.

¹⁰ ပှၤတတီတလိၤထံၣ်ဘၣ်ဝဲတၢ်အံၤဒီး အသးဒိၣ်ထီၣ်လီၤ. အ့ၣ်စဃံးအမဲဒီးပှံၢ်လီၤကွံာ်ဝဲဒၣ်န့ၣ်လီၤ. ပှၤတတီတလိၤအတၢ်ဆၢန့ၢ်ဘၣ်တဖၣ်န့ၣ် တုၤဝဲဆူတၢ်ဟးဂီၤလီၤထူလီၤယိာ်လီၤ.