စံးထီၣ်ပတြၢၤ 110 - Sgaw Karen Common Bible

ယွၤဒီးစီၤပၤလၢအဃုထၢတ့ၢ်ဝဲ

¹ ယွၤစံးဘၣ်ယကစၢ်စီၤပၤ, “ဆ့ၣ်နီၤလၢယစုထွဲ တုၤယပာ်နဒုၣ်နဒါတဖၣ်လၢ နခီၣ်ယီၢ်လီၢ်န့ၣ်တက့ၢ်.

² ယွၤကမၤလဲၢ်ထီၣ်နစီၤပၤအစိကမီၤ စးထီၣ်လၢစံယိၣ်န့ၣ်လီၤ. အဝဲစံးဝဲ, “ပၢတၢ်လၢနဒုၣ်နဒါတဖၣ်အဖီခိၣ်တက့ၢ်.”

³ မုၢ်တနံၤလၢနဒုးနဒုၣ်နဒါတဖၣ်န့ၣ်, နပှၤဂီၢ်မုၢ်ကဟ့ၣ်လီၤအသးလၢ တၢ်သးအိၣ်အပူၤလီၤ. ဒ်မုၢ်ဂီၤအပစီၤထံအသိး နပှၤသးစၢ်တဖၣ်ကဟဲဆူနအိၣ်လၢ ကစၢၢ်စီဆှံတဖၣ်အလိၤလီၤ.

⁴ ယွၤမၤတၢ်အၢၣ်လီၤသမှံၤသပှၢ်တမံၤဒီး တထုးက့ၤဘၣ်ဝဲဘၣ်. “နကမ့ၢ်ပှၤလုၢ်တၢ်အခိၣ်တဂၤလီၤထူလီၤယိာ်, လၢစီၤမၤလကံစဒ့းအပှၤလုၢ်တၢ်အခိၣ်အလုၢ်အလၢ်အပူၤန့ၣ်လီၤ.”

⁵ ယွၤအိၣ်လၢနစုထွဲတခီလီၤ. လၢအသးထီၣ်အမုၢ်နံၤန့ၣ်အဝဲကမၤဟးဂီၤကွံာ် စီၤပၤတဖၣ်န့ၣ်လီၤ.

⁶ အဝဲကဟ့ၣ်လီၤတၢ်စံၣ်ညီၣ်လၢ ပှၤကလုာ်တဖၣ်အလိၤ ဒီးမၤပှဲၤတၢ်ဒုးပျီလၢတၢ်သံစိၣ်တဖၣ်, ဒီးကမၤနၢၤစီၤပၤတဖၣ်လၢအအိၣ်လၢ ဟီၣ်ခိၣ်ခဲလၢာ်န့ၣ်လီၤ.

⁷ စီၤပၤကအိတၢ်လၢထံကျိလၢကျဲကပၤ ဒီးအဂံၢ်အဘါကဆူၣ်ထီၣ်က့ၤဝဲ, ဒီးအဝဲကဂဲၤဆၢထၢၣ်လၢတၢ်မၤနၢၤန့ၣ်လီၤ.