စံးထီၣ်ပတြၢၤ 108 - Sgaw Karen Common Bible

တၢ်ထုကဖၣ်ဃ့တၢ်မၤစၢၤလၢတၢ်ထီဒါ ဒုၣ်ဒါတဖၣ်အဂီၢ်

¹ ကစၢ်ယွၤဧၢ, ယအိၣ်ဒီးတၢ်နာ်န့ၢ်နၤလၢာ်လၢာ်ဆ့ဆ့လီၤ. ယကသးဝံၣ်တၢ်ဒီးစံးထီၣ်ပတြၢၤနၤလီၤ. ယသးဧၢ, ဂဲၤထၢၣ်တက့ၢ်.

² ဂဲၤထၢၣ်, ယသီတူၢ်ဒီးတနၢ်သ့ၣ်ဧၢ, ယကထိၣ်ဂဲၤထီၣ်မုၢ်န့ၣ်လီၤ.

³ ယွၤဧၢ, လၢပှၤကလုာ်တဖၣ်အကျါန့ၣ် ယကစံးဘျုးစံးဖှိၣ်နၤ, လၢပှၤဂီၢ်မုၢ်တဖၣ်အကျါ န့ၣ်ယကစံးထီၣ်ပတြၢၤနၤလီၤ.

⁴ အဂ့ၢ်ဒ်အံၤ, နတၢ်အဲၣ်ဂၢၢ်ကျၢၤဒိၣ်ဝဲလၢမူခိၣ်အဖီခိၣ်, နတၢ်သူၣ်တီသးလိၤ ပၢၢ်တုၤလၢတၢ်အၢၣ်တဖၣ်န့ၣ်လီၤ.

⁵ ယွၤဧၢ, မ်နဘၣ်တၢ်ပာ်ထီၣ်ထီနၤလၢမူခိၣ်အဖီခိၣ်, မ်နတၢ်လၤတၢ်ကပီၤအိၣ်လၢ ဟီၣ်ခိၣ်ဒီဘ့ၣ်ညါအလိၤန့ၣ်တက့ၢ်.

⁶ ဒ်သိးပှၤလၢနအဲၣ်အီၤကပူၤဖျဲးအဂီၢ်န့ၣ်, ဟ့ၣ်လီၤတၢ်မၤစၢၤလၢနစုထွဲ, ဒီးစံးဆၢယၤတက့ၢ်.

⁷ ကစၢ်ယွၤအၢၣ်လီၤတ့ၢ်လံတၢ်လၢအတၢ်လီၢ်စီဆှံ အပူၤစံးဝဲ, လၢတၢ်မၤနၢၤအပူၤယကနီၤဖးၡက့ၣ်, ဒီးဟ့ၣ်လီၤစူးကိၤသးအတၢ်ပၢၤခိၣ် ဆူယပှၤဂီၢ်မုၢ်လီၤ.

⁸ ကံးလဧးမ့ၢ်ယတၢ်, ဒီးမနၤၡ့ၤမ့ၢ်ယတၢ်စ့ၢ်ကီးလီၤ. အ့ဖရဲၣ်မ့ၢ်ယခိၣ်သလုးထး, ယူဒၤမ့ၢ်ယစီၤပၤအနီၣ်ထိးဘိလီၤ.

⁹ မိၤအးမ့ၢ်ယသ့စီတၢ်အသရာ်တဖျၢၣ်, ယကွံာ်ယခီၣ်ဖံးလၢယကကိးထီၣ်တၢ်မၤနၢၤလၢ အဒိၣ်အဖီခိၣ် ဒ်တၢ်ပနီၣ်တမံၤလၢ ယမၤနၢၤအီၤအသိးန့ၣ်လီၤ. ယကကိးထီၣ်လၢ တၢ်မၤနၢၤအပူၤလၢ ဖလ့ၡသးအဖီခိၣ်လီၤ.

¹⁰ ကစၢ်ယွၤဧၢ, မ့ၢ်မတၤတဂၤကဒုးလဲၤယၤဆူ ဝ့ၢ်အိၣ်ဒီးအခိၣ်ဒူန့ၣ်လဲၣ်. မ့ၢ်မတၤကဆှၢယၤဆူအဒိၣ်တဂၤလဲၣ်.

¹¹ မ့ၢ်နညိကွံာ်တ့ၢ်လံပှၤနီၢ်နီၢ်ဧါ. မ့ၢ်နတဟးထီၣ်ဒီး လဲၤဒုးတၢ်ဒီး ပသုးမုၢ်တဖၣ်န့ၣ်ဘၣ်ဧါ.

¹² မၤစၢၤပှၤလၢပတၢ်ထီဒါပဒုၣ်ပဒါန့ၣ်တက့ၢ်. ပှၤကညီအတၢ်မၤစၢၤန့ၣ်, မ့ၢ်တၢ်တဂိာ်တသီၣ်ဘၣ်တၢ်လီၤ.

¹³ ပကမၤတၢ်ဒီး တၢ်ဂံၢ်ဆူၣ်ဘါဆူၣ်လၢ ယွၤလီၤ. အဂ့ၢ်ဒ်အံၤ, အဝဲဒၣ်န့ၣ် ကယီၢ်တံၢ်လီၤ ပဒုၣ်ပဒါလီၤ.