စံးထီၣ်ပတြၢၤ 106 - Sgaw Karen Common Bibleကစၢ်ယွၤအတၢ်ဂ့ၤလၢအပှၤဂီၢ်မုၢ်အဂီၢ် 1 စံးထီၣ်ပတြၢၤယွၤတက့ၢ်. စံးဘျုးယွၤတက့ၢ်. အဂ့ၢ်ဒ်အံၤ, အဝဲဒၣ်န့ၣ်ဂ့ၤဝဲလီၤ. အဂ့ၢ်ဒ်အံၤ, အတၢ်အဲၣ်ဂၢၢ်ကျၢၤ အိၣ်ဝဲလီၤထူလီၤယိာ်လီၤ. 2 မ့ၢ်မတၤ ကစံၣ်တဲၤတဲလီၤယွၤအတၢ်မၤလၢအဒိၣ်တဖၣ်, မ့တမ့ၢ်, မ့ၢ်မတၤ ကဒုးနၢ်ဟူအတၢ်စံးထီၣ်ပတြၢၤခဲလၢာ်တဂၤလဲၣ်. 3 ပှၤလၢအတိၢ်န့ၢ်အဝဲအတၢ်မၤလိာ်တဖၣ်, ဒီးပှၤလၢအမၤတၢ်တီတၢ်လိၤ ကိးဆၢကိးကတီၢ်ဒဲးန့ၣ်ဘၣ်ဆိၣ်ဂ့ၤဝဲလီၤ. 4 ယွၤဧၢ, သ့ၣ်နီၣ်ထီၣ်က့ၤယၤဖဲနဒုးနဲၣ် တၢ်ကွၢ်မဲာ်နပှၤဂီၢ်မုၢ်, ဒီးမၤစၢၤယၤဖဲ နအုၣ်က့ၤခီၣ်က့ၤအဝဲသ့ၣ်, န့ၣ်တက့ၢ် 5 ဒ်သိးယကသးခုဘၣ်လၢနပှၤဃုထၢဖိတဖၣ် အတၢ်ဘီၣ်ထီၣ်ညီထီၣ်, ဒ်သိးယကဒိးန့ၢ်ဃုာ်တၢ်သးခုဒီး နပှၤကလုာ်ဒီး ယကဟ့ၣ်က့ၤ တၢ်စံးထီၣ်ပတြၢၤဃုာ်ဒီး နပှၤန့ၢ်သါတၢ်တဖၣ်တက့ၢ်. 6 ပမၤလံတၢ်ဒဲးဘးဒ်ပပၢ်တဖၣ် မၤတ့ၢ်ဝဲအသိး ပမၤကမၣ်တ့ၢ်တၢ်ဒီး အိၣ်မူအၢအၢသီသီန့ၣ်လီၤ. 7 ပမိၢ်ပၢ်ဖံဖုလၢပျၢၤတဖၣ်, လၢကီၢ်အဲၤကူပတူးအပူၤန့ၣ် တနၢ်ပၢၢ်ကစၢ်ယွၤအတၢ်မၤလီၤလးတဖၣ်န့ၣ်ဘၣ်. အဝဲသ့ၣ်သးပ့ၤနီၣ်ကွံာ် လၢကစၢ်ယွၤ ဒုးနဲၣ်တ့ၢ်အီၤအတၢ်အဲၣ်အါဘျီ, ဒီးပူထီၣ်ထီဒါတၢ်ထီကတၢၢ်ယွၤလၢ ပီၣ်လဲၣ်ဂီၤန့ၣ်လီၤ. 8 ဘၣ်ဆၣ်အဝဲဒၣ်အုၣ်က့ၤခီၣ်က့ၤအဝဲသ့ၣ်, ဒ်အဝဲအၢၣ်လီၤတ့ၢ်ဝဲအသိး, ဒ်သိးကပာ်ဖျါထီၣ်အစိဒိၣ်အကမီၤဒိၣ်န့ၣ်လီၤ. 9 အဝဲဟ့ၣ်လီၤအကလုၢ်ဒီး ပီၣ်လဲၣ်ဂီၤဃ့ထီကွံာ်ဝဲ, အဝဲဆှၢခီဖျိအပှၤဂီၢ်မုၢ်လၢ ခိသူၣ်ခိၣ်န့ၣ်လီၤ. 10 အဝဲဒၣ်အုၣ်က့ၤခီၣ်က့ၤအဝဲသ့ၣ်လၢပှၤလၢ အသးဟ့အီၤတဖၣ်အစုပူၤ, ဒီးမၤပူၤဖျဲးအီၤလၢ အဒုၣ်အဒါတဖၣ်အစုပူၤန့ၣ်လီၤ. 11 ဒီးထံလုၣ်ဘၢသံကွံာ်အဒုၣ်အဒါတဖၣ်, ဒီးလၢအကျါပှၤတအိၣ်လီၤတဲာ်နီတဂၤဘၣ်. 12 တုၤနုၤတစု, အပှၤဂီၢ်မုၢ်နာ်က့ၤ အတၢ်အၢၣ်လီၤအီလီၤတဖၣ် ဒီးသးဝံၣ်စံးထီၣ်ပတြၢၤအီၤလီၤ. 13 ဘၣ်ဆၣ်အဝဲသ့ၣ်သးပ့ၤနီၣ်အဝဲ အတၢ်မၤတဖၣ်ချ့သဒံး ဒီးမၤတၢ်တအိၣ်ဒီးတၢ်ခိး အဝဲတၢ်ဟ့ၣ်ကူၣ်ဟ့ၣ်ဖးဘၣ်န့ၣ်လီၤ. 14 လၢပှၢ်မုၢ်ကနၢန့ၣ် အဝဲသ့ၣ်ပှဲၤဒီး တၢ်သးဆၢန့ၢ် ဒီးမၤကွၢ်ကစၢ်ယွၤန့ၣ်လီၤ. 15 လၢတၢ်န့ၣ်အဃိ, အဝဲဒၣ်ဟ့ၣ်လီၤတၢ်လၢ အဝဲသ့ၣ်ဃ့ဝဲဃုာ်ဒီး တၢ်ဆါလီၤပျံၤလီၤဖုး လၢအသိးအကျါန့ၣ်လီၤ. 16 ဒီးဖဲပှၢ်မုၢ်ကနၢအပူၤန့ၣ် အဝဲသ့ၣ်အသးက့ၣ်စီၤမိၤၡ့ ဒီး ယွၤအခ့အပှၤစီဆှံစီၤအၤဟရိၣ်လီၤ. 17 တုၤနုၤတစု, ဟီၣ်ခိၣ်အိးထီၣ်အသးဒီး ယူၢ်လီၤကွံာ်စီၤဒၤသၣ် ဒီးကျၢၢ်ဘၢ စီၤအဘံရၣ်ဒီးအပှၤဟံၣ်ဖိဃီဖိန့ၣ်လီၤ. 18 မ့ၣ်အူဟဲလီၤလၢပှၤပိာ်အဝဲသ့ၣ်အခံတဖၣ် အသိးအကျါ, ဒီးအီၣ်ကွံာ် ပှၤအအၢအသီတဖၣ်န့ၣ်လီၤ. 19 ဖဲစံၤနါန့ၣ်အဝဲသ့ၣ်တ့ထီၣ်ဂီၤဖံးဖါဖိတဒုလၢ ထူဒီးဘူၣ်ထီၣ်ဘါထီၣ်တၢ်ဂီၤသိအသးန့ၣ်လီၤ. 20 အဝဲသ့ၣ်လဲလိာ်ကစၢ်ယွၤအလၤကပီၤဒီး ဆၣ်ဖိကီၢ်ဖိလၢအအီၣ်နီၣ်ဧိၤမံၤဧိၤတဒုအဂီၤန့ၣ်လီၤ. 21 အဝဲသ့ၣ်သးပ့ၤနီၣ်ကွံာ်ကစၢ်ယွၤ, ပှၤအုၣ်က့ၤခီၣ်က့ၤအီၤ, ပှၤလၢအမၤတ့ၢ်တၢ်အဒိၣ်တဖၣ်လၢ အဲၤကူပတူးအပူၤန့ၣ်လီၤ. 22 တၢ်လၢအဝဲမၤတ့ၢ်ဝဲဖဲန့ၣ်တဖၣ်လီၤလးဒိၣ်မးလဲၣ်. လၢပီၣ်လဲၣ်ဂီၤန့ၣ်မၤတၢ်လီၤကမၢကမၣ်ဒိၣ်မးလဲၣ်. 23 ဖဲကစၢ်ယွၤစံးလၢ ကမၤဟးဂီၤကွံာ် အပှၤဂီၢ်မုၢ်န့ၣ်, အခ့အပှၤလၢအဃုထၢဝဲစီၤမိၤၡ့ ဂဲၤဆၢထၢၣ်ထီဒါကစၢ်ယွၤ, ဒီးတြီဃာ်အတၢ်သးထီၣ်လၢ ကမၤဟးဂီၤအဝဲသ့ၣ်န့ၣ်လီၤ. 24 အန့ၣ်ဝံၤဒီး, အဝဲသ့ၣ်ညိကွံာ်ထံမုာ်ကီၢ်ပၢၤမ့ၢ်လၢ အဝဲသ့ၣ်တနာ်ကစၢ်ယွၤအတၢ်အၢၣ်လီၤအီလီၤအဃိလီၤ. 25 အဝဲသ့ၣ်အိၣ်လၢအဒဲတဖၣ်အပူၤဒီးကဒူးကဒ့ၣ် ဒီးတဒိကနၣ်ဘၣ်ယွၤအကလုၢ်ကထါဘၣ်. 26 လၢတၢ်န့ၣ်အဃိ အဝဲဒၣ် ဟ့ၣ်လီၤအဝဲသ့ၣ်လၢ တၢ်ဟ့ၣ်ပလီၢ်လီၤတံၢ်လီၤဆဲးတမံၤ လၢကမၤသံကွံာ်အဝဲသ့ၣ်လၢပှၢ်မုၢ်ကနၢ, 27 ဒီးကမၤလီၤပြံလီၤပြါအစၢၤအသွဲၣ်တဖၣ်လၢ ပှၤတဘူၣ်ထီၣ်ဘါထီၣ်ယွၤအသိးအကျါ, ဒီးပျဲအဝဲသ့ၣ်သံကွံာ်လၢ တခီထံတခီကီၢ်အပူၤန့ၣ်လီၤ. 28 မၤကဒီးဖဲပဧိၢ်န့ၣ်, ကစၢ်ယွၤအပှၤဂီၢ် မုၢ်လဲၤသကိးတၢ်လၢ တၢ်ဘူၣ်ထီၣ်ဘါထီၣ်ဘဧၤလးအပူၤ, ဒီးအီၣ်တၢ်လုၢ်တၢ်ပာ်တဖၣ်လၢ တၢ်လုၢ်ထီၣ်အီၤဆူ ကစၢ်လၢအသံတဖၣ်န့ၣ်လီၤ. 29 အဝဲသ့ၣ်မၤသးထီၣ်ယွၤလၢအတၢ်မၤတဖၣ်အဃိ ဒီးတၢ်သံသတြိာ်အိၣ်ထီၣ်လၢအကျါလီၤ. 30 ဘၣ်ဆၣ် စီၤဖံၤနဃၣ်ဆၢထၢၣ် ဒီးစံၣ်ညီၣ်ပှၤမၤကမၣ်တၢ်န့ၣ်, ဒီးတၢ်သံသတြိာ်ဆိကတီၢ်အသးလီၤ. 31 စးထီၣ်ဖဲန့ၣ်တၢ်အံၤ ဘၣ်တၢ်သ့ၣ်နီၣ်ထီၣ်အီၤ ဒ်တၢ်ကွၢ်မဲာ်အီၤအသိးဒီး ကမ့ၢ်တၢ်တစိၤသးလၢ ခါဆူညါအပူၤန့ၣ်လီၤ. 32 ဖဲထံထီၣ်ပၢၢ်မရံၤဘါန့ၣ်, ပှၤဂီၢ်မုၢ်မၤသးထီၣ်ကစၢ်ယွၤ, ဒီးစီၤမိၤၡ့ဘၣ်တၢ်ကိၢ်တၢ်ဂီၤလၢ အဝဲသ့ၣ်အဃိလီၤ. 33 အဝဲသ့ၣ်မ့ၢ်ပှၤမၤကိၢ်မၤဂီၤအဝဲအသးတုၤဒၣ်လဲာ် ဒီးအဝဲကတိၤတၢ်ကတိၤ တအိၣ်ဒီးတၢ်ဆိကမိၣ်ဘၣ်န့ၣ်လီၤ. 34 အဝဲသ့ၣ်တမၤသံကွံာ်ပှၤတဘူၣ်ထီၣ်ဘါထီၣ်ယွၤဒ် ယွၤမၤလိာ်အဝဲသ့ၣ်လၢကမၤဝဲန့ၣ်ဘၣ်. 35 မ့မ့ၢ်ဒိးတ့ဒိးဖျီဃုာ်အသးဒီး အဝဲသ့ၣ် ဒီးအဝဲသ့ၣ်အတၢ်တဘူၣ်ထီၣ်ဘါထီၣ်ယွၤအကျဲတဖၣ်န့ၣ်လီၤ. 36 ကစၢ်ယွၤအပှၤဂီၢ်မုၢ်ဘါထီၣ်တၢ်ဂီၤတၢ်ဖီၣ်တဖၣ် ဒီးတၢ်အံၤဒုးအိၣ်ထီၣ်အဝဲသ့ၣ် အတၢ်ဟးဂီၤန့ၣ်လီၤ. 37 အဝဲသ့ၣ်လုၢ်ထီၣ်အဖိခွါတဖၣ်ဒီးအဖိမုၣ်တဖၣ်, ဒ်တၢ်လုၢ်တၢ်ပာ်တဖၣ် အသိးဆူကနၤဧၣ် အတၢ်ဂီၤတၢ်ဖီၣ်တဖၣ်လီၤ. 38 ဒီးလူလီၤတၢ်သွံၣ်လၢအတၢ်ဒဲးဘးတအိၣ်ဘၣ်, ဒီးထံကီၢ်ဘၣ်တၢ်တကဆှီဘၣ်လၢပှၤမၤသံတၢ်တဖၣ်အဃိလီၤ. 39 အဝဲသ့ၣ်မၤတကဆှီအသးလၢ အတၢ်မၤတဖၣ်အဃိ, ဒီးတသးတီဒီး ကစၢ်ယွၤန့ၣ်ဘၣ်. 40 လၢတၢ်န့ၣ်အဃိယွၤအသးထီၣ်ကဲၤထီၣ်အပှၤဂီၢ်မုၢ် ဒီးအဝဲအသးဘၣ်အၢအဝဲသ့ၣ်န့ၣ်လီၤ. 41 အဝဲဒၣ်စူးကွံာ်ညိကွံာ်အဝဲသ့ၣ် ဆူပှၤတဘူၣ်ထီၣ်ဘါထီၣ်ယွၤ အစိကမီၤအပူၤဒီး အဒုၣ်အဒါတဖၣ်ပၢဘၣ်အဝဲသ့ၣ်န့ၣ်လီၤ. 42 အဒုၣ်အဒါတဖၣ်မၤနးမၤဖှီၣ်အီၤ ဒီးအဝဲသ့ၣ်ဘၣ်တၢ်ဆီၣ်လီၤအီၤလၢ အဒုၣ်အဒါတဖၣ်အတၢ်စိတၢ်ကမီၤအဖီလာ်လီၤ. 43 ယွၤမၤပူၤဖျဲးအပှၤဂီၢ်မုၢ်အါဘျီဘၣ်ဆၣ်ဒီး အဝဲသ့ၣ်ဃုထၢပူထီၣ်ထီဒါအီၤ, ဒီးလီၤဘျၢယိာ်ထီၣ်လၢ တၢ်ဒဲးဘးအပူၤလီၤ. 44 အန့ၣ်ဒၣ်လဲာ်, ဖဲအဝဲသ့ၣ်ကိးထီၣ်န့ၣ် ယွၤနၢ်ဟူအဝဲသ့ၣ်ဒီး အဝဲပာ်သူၣ်ပာ်သးလၢ အဝဲသ့ၣ်အတၢ်ကိၢ်တၢ်ဂီၤန့ၣ်လီၤ. 45 လၢအဝဲသ့ၣ်အဂီၢ် ယွၤသ့ၣ်နီၣ်ထီၣ်က့ၤ အတၢ်အၢၣ်လီၤအီလီၤဒီး လၢအတၢ်အဲၣ်ဒိၣ်ဝဲအဃိ, အဝဲထိၣ်ကဆှၣ်လီၤက့ၤအသးန့ၣ်လီၤ. 46 အဝဲထိးဘၣ်ပှၤမၤနးမၤဖှီၣ် အဝဲသ့ၣ်တဖၣ်အသး ဒ်သိးကသးကညီၤက့ၤအဝဲသ့ၣ်န့ၣ်လီၤ. 47 ယွၤပကစၢ်ဧၢယွၤ, အုၣ်က့ၤခီၣ်က့ၤပှၤတက့ၢ်. ကိးက့ၤပှၤလၢ ပှၤကလုာ်တဖၣ်အကျါ ဒ်သိးပကစံးဘျုးစံးဖှိၣ်နၤ ဒီးစံးထီၣ်ပတြၢၤနမံၤစီဆှံန့ၣ်တက့ၢ်. 48 စံးထီၣ်ပတြၢၤယွၤ, အံၣ်စရ့လးအကစၢ်ယွၤတက့ၢ်. စံးထီၣ်ပတြၢၤအီၤခဲအံၤဒီးလီၤထူလီၤယိာ်တက့ၢ်. မ်ပှၤခဲလၢာ်စံးဝဲ, “အၤမ့ၣ်တက့ၢ်.” စံးထီၣ်ပတြၢၤယွၤတက့ၢ်. |
Sgaw Karen Common Bible © Bible Society of Myanmar, 1992.
Bible Society of Myanmar