စံးထီၣ်ပတြၢၤ 105 - Sgaw Karen Common Bible

ကစၢ်ယွၤဒီးအပှၤဂီၢ်မုၢ်

¹ စံးဘျုးစံးဖှိၣ်ယွၤ, ကိးထီၣ်အမံၤ, ဒီးဒုးသ့ၣ်ညါအတၢ်မၤတဖၣ်လၢ အပှၤဂီၢ်မုၢ်အကျါတက့ၢ်.

² သးဝံၣ်ထီၣ်အီၤ, သးဝံၣ်စံးထီၣ်ပတြၢၤအီၤတက့ၢ်. တဲဖျါထီၣ်ကယဲၢ်အတၢ်မၤလီၤလး ခဲလၢာ်န့ၣ်တက့ၢ်.

³ တၢ်လၤတၢ်ကပီၤအိၣ်ဝဲလၢအမံၤစီဆှံအပူၤန့ၣ်လီၤ. မ်ပှၤလၢအဃုယွၤသူၣ်ဖှံသးညီတက့ၢ်.

⁴ ဃုယွၤဒီးအဂံၢ်အဘါတက့ၢ်. ဃုအမဲာ်တထံၣ်ဃီတက့ၢ်.

⁵ သ့ၣ်နီၣ်ထီၣ်က့ၤတၢ်လီၤလးတဖၣ်လၢအမၤတ့ၢ်ဝဲ, အတၢ်မၤလီၤလးတဖၣ်, ဒီးတၢ်စံၣ်ညီၣ်လၢ အဟ့ၣ်လီၤဝဲန့ၣ်တက့ၢ်.

⁶ အခ့အပှၤစီၤအၤဘြၤဟၣ်အချံအသၣ်, ပှၤလၢအဃုထၢတ့ၢ်ဝဲ စီၤယၤကိာ်အဖိအလံၤသ့ၣ်ဧၢ,

⁷ အဝဲဒၣ်န့ၣ်မ့ၢ်ယွၤ, ပကစၢ်ယွၤ, အတၢ်စံၣ်ညီၣ်တဖၣ်အိၣ်ဝဲလၢ ဟီၣ်ခိၣ်ဒီဘ့ၣ်ညါလီၤ.

⁸ အဝဲသ့ၣ်နီၣ်ထီၣ်က့ၤ အတၢ်အၢၣ်လီၤအီလီၤအထူအယိာ်, အတၢ်ကတိၤလၢအမၤလိာ်ဝဲအစိၤတကထိလီၤ.

⁹ အဝဲကဟံးဃာ် အတၢ်အၢၣ်လီၤ လိာ်သးလၢ အမၤတ့ၢ်ဝဲဒီး စီၤအၤဘြၤဟၣ်, ဒီးတၢ်လၢအအၢၣ်လီၤစီၤအံၤစဲးန့ၣ်လီၤ.

¹⁰ ယွၤမၤတၢ်အၢၣ်လီၤအီလီၤတမံၤဒီး စီၤယၤကိာ်, တၢ်အၢၣ်လီၤအီလီၤတမံၤလၢ ကအိၣ်ဂၢၢ်ဆိးကျၢၤလီၤထူလီၤယိာ်န့ၣ်လီၤ.

¹¹ အဝဲစံးဝဲ, “ယကဟ့ၣ်လီၤနၤလၢ ကီၢ်ကနၤဧၣ်, ဒီး တၢ်န့ၣ်ကမ့ၢ်နတၢ်န့ၢ်သါဒၣ်နဲလီၤ.”

¹² ကစၢ်ယွၤအပှၤဂီၢ်မုၢ်အနီၣ်ဂံၢ်စှၤဝဲ, မ့ၢ်ပှၤတမှံၤလၢကီၢ်ကနၤဧၣ်အပူၤလီၤ.

¹³ အဝဲသ့ၣ်ဟးဝ့းဝီၤလၢ ကီၢ်တဘ့ၣ်ဘၣ်တဘ့ၣ်, ဒီး လၢဘီမုၢ်တဘ့ၣ်ဆူ အဂၤတဘ့ၣ်န့ၣ်လီၤ.

¹⁴ ဘၣ်ဆၣ် ကစၢ်ယွၤတပျဲပှၤမၤနးမၤဖှီၣ် အဝဲသ့ၣ်နီတဂၤဘၣ်. အဝဲဟ့ၣ်ပလီၢ်စီၤပၤတဖၣ်, လၢတၢ်ကဟုကယာ်အပှၤဂီၢ်မုၢ်အဂီၢ်, စံးဝဲ

¹⁵ “မၤဘၣ်ဒိဆါယခ့ယပှၤလၢ ယဃုထၢအီၤတဖၣ်တဂ့ၤ. ထိးဘူးယဝံတဖၣ်တဂ့ၤ”

¹⁶ ယွၤဒုးလီၤဘၣ်တၢ်သၣ်ဝံၤလီၤဒိလၢ အဝဲသ့ၣ်အထံအကီၢ်, ဒီးစိာ်ထီၣ်ကွံာ်အတၢ်အီၣ်တၢ်အီခဲလၢာ်လီၤ.

¹⁷ ဘၣ်ဆၣ် အဝဲဆှၢလီၤဆိ ပှၤတဂၤလၢ အဝဲသ့ၣ်အမဲာ်ညါ, စီၤယိၤသး, ပှၤလၢအဘၣ်တၢ်ဆါကွံာ်အီၤ ဒ်ကုၢ်တဂၤအသိးန့ၣ်လီၤ.

¹⁸ အဝဲအခီၣ်တဖၣ်ဘၣ်တၢ်စၢဃာ်အီၤလၢ ထးသွဲတဖၣ် ဒီးအကိာ်ဘၣ်တၢ်ကွီၤဃာ်အီၤလၢ ထးကွီၤ,

¹⁹ တုၤလီၤလၢ တၢ်လၢ အဝဲတဲဆိပာ်စၢၤဝဲလၢထီၣ်ပှဲၤထီၣ်န့ၣ်လီၤ. ယွၤအကလုၢ်အုၣ်အသးလၢ အဝဲအတၢ်ဘၣ်ဝဲတီဝဲ အဂ့ၢ်န့ၣ်လီၤ.

²⁰ အန့ၣ်ဒီး, အဲၤကူပတူးအစီၤပၤပျဲဟးထီၣ်အီၤ, ဒီး ပှၤကလုာ်တဖၣ် အပှၤပၢတၢ်ပျၢ်ဖျဲးကွံာ်အီၤလီၤ.

²¹ အဝဲပာ်အီၤလၢအတၢ်ပၢတၢ်ပြးအခိၣ်, ဒီးဒုးကဲထီၣ်အီၤလၢ ပှၤပၢထံကီၢ်ဒီဘ့ၣ်,

²² အိၣ်ဒီး တၢ်စိတၢ်ကမီၤလၢ စီၤပၤအပဒိၣ်တဖၣ် အဖီခိၣ်ဒီး တၢ်န့ၢ်စိန့ၢ်ကမီၤလၢ ကသိၣ်လိနဲၣ်ယုၤအပှၤဟ့ၣ်ကူၣ်တၢ်တဖၣ်န့ၣ်လီၤ.

²³ တုၤစီၤယၤကိာ်လဲၤဆူ ကီၢ်အဲၤကူပတူး ဒီးအိၣ်ဝဲဆိးဝဲဖဲ ကီၢ်န့ၣ်အပူၤလီၤ.

²⁴ ယွၤဟ့ၣ်လီၤအပှၤဂီၢ်မုၢ်လၢ ဖိတဖၣ်အါဒံ အါဂၤဒီး မၤဂံၢ်ဆူၣ်ဘါဆူၣ်ထီၣ်အီၤ အါန့ၢ်ဒံး အဒုၣ်အဒါတဖၣ်လီၤ.

²⁵ အဝဲဒုးသးဟ့ပှၤအဲၤကူပတူးဖိတဖၣ်လၢ အပှၤဂီၢ်မုၢ်ဒီး မၤအခ့အပှၤတဖၣ်လၢ တၢ်လီတၢ်ဝ့ၤအပူၤန့ၣ်လီၤ.

²⁶ အန့ၣ်ဒီး, အဝဲမၢလီၤအခ့အပှၤစီၤမိၤၡ့ ဒီးစီၤအၤဟရိၣ်လၢအဃုထၢတ့ၢ်ဝဲန့ၣ်လီၤ.

²⁷ အဝဲသ့ၣ်မၤတ့ၢ်ကစၢ်ယွၤအတၢ်မၤဖးဒိၣ်တဖၣ် ဒီးမၤတၢ်လီၤလးတဖၣ်လၢ ကီၢ်အဲၤကူပတူးအပူၤလီၤ.

²⁸ ကစၢ်ယွၤဆှၢလီၤတၢ်ခံးတၢ်နၤလၢ ကီၢ်အလိၤ, ဘၣ်ဆၣ် ပှၤအဲၤကူပတူးဖိတဖၣ် တစူၢ်ဘၣ်အတၢ်မၤလိာ်ဘၣ်.

²⁹ အဝဲဒုးကဲထီၣ်အဝဲသ့ၣ်အထံကျိတဖၣ်, ဆူတၢ်သွံၣ်ဒီး မၤသံကွံာ်အညၣ်တဖၣ်ခဲလၢာ်လီၤ.

³⁰ အထံအကီၢ်အိၣ်ပှဲၤဒီးဒ့ၣ်တဖၣ် ဒီးတုၤလၢအစီၤပၤအနီဒၣ်လဲာ် ပှဲၤဒီးဒ့ၣ်တဖၣ်န့ၣ်လီၤ.

³¹ ကစၢ်ယွၤဟ့ၣ်လီၤအကလုၢ်ဒီး သၣ်ဘုလါတဖၣ်, ဃးသူဃးလါဒီဖုဒီဂီၢ်အိၣ် ပှဲၤကီၢ်ဒီဘ့ၣ်ညါလီၤ.

³² လၢတၢ်စူၤအလီၢ်န့ၣ် အဝဲဟ့ၣ်လီၤသူၣ် ဒီးလီဝၢ်ဒံးလၢ ထံကီၢ်အဖီခိၣ်လီၤ.

³³ အဝဲမၤဟးဂီၤအသ့ၣ်စပံးမုၢ်တဖၣ်, ဒီးအချၢၣ်ဒၢထူၣ်တဖၣ်, ဒီးမၤကၢ်လီၤကွံာ်အသ့ၣ်ခဲလၢာ်န့ၣ်လီၤ.

³⁴ အဝဲဟ့ၣ်လီၤအကလုၢ်ဒီးဒွဲၣ်တဖၣ်ဟဲထီၣ်ဝဲ, အိၣ်အကကွဲၢ်တဖၣ်လၢ တၢ်ဂံၢ်တသ့ဘၣ်,

³⁵ အဝဲသ့ၣ်အီၣ်ကွံာ်တၢ်မုၢ်တၢ်ဘိလၢ ကီၢ်ပူၤခဲလၢာ်, အီၣ်ကွံာ်ကယဲၢ်တၤသူတၤသၣ်တဖၣ်လီၤ.

³⁶ အဝဲမၤသံကွံာ်ကယဲၢ်ကီၢ်အဲၤကူပတူးအဟံၣ်ဒူၣ်ဃီထၢတဖၣ်, အဖိခွါဝဲၢ်ကိခဲလၢာ်န့ၣ်လီၤ.

³⁷ အန့ၣ်ဝံၤဒီး အဝဲဒုးဟးထီၣ်ကွံာ်ပှၤအံၣ်စရ့လးဖိတဖၣ်, အဝဲသ့ၣ်စိာ်ဃုာ်ဒီး စ့ဒီထူ, ဒီးအဝဲသ့ၣ်ခဲလၢာ်အိၣ်ဒီး တၢ်အိၣ်ဆူၣ်အိၣ်ချ့ ဒီးဂံၢ်ဆူၣ်ဘါဆူၣ်ဝဲဒၣ်လီၤ.

³⁸ ပှၤအဲၤကူပတူးဖိတဖၣ် ပျံၤအဝဲသ့ၣ်ဒီး သးခုဝဲဖဲအဝဲသ့ၣ်ဟးထီၣ်ကွံာ်ဝဲန့ၣ်လီၤ.

³⁹ ကစၢ်ယွၤသလၣ်ထီၣ်တၢ်အၢၣ်လၢ အပှၤဂီၢ်မုၢ်အဖီခိၣ်ဒီး ဟ့ၣ်လီၤအီၤ မ့ၣ်အူလၢ မုၢ်နၤဒ်သိးကဟ့ၣ်အဝဲသ့ၣ်လၢတၢ်ကပီၤန့ၣ်လီၤ.

⁴⁰ အဝဲသ့ၣ်ဃ့တၢ်, ဒီးယွၤဆှၢလီၤထိၣ်ဘှၢၣ်တဖၣ်, အဝဲဒၣ်ဟ့ၣ်လီၤတၢ်အီၣ်လၢ မူခိၣ်လၢကဒုးဘျဲးအီၣ် အဝဲသ့ၣ်အဂီၢ်လီၤ.

⁴¹ အဝဲအိးထီၣ်လၢၢ်တဖျၢၣ်ဒီး ထံဟဲဖှိးသဖှိထီၣ်, ယွၤလီၤခီဂာ်ပှၢ်မုၢ်ကနၢ ဒ်ထံကျိတဘိအသိးန့ၣ်လီၤ.

⁴² အဂ့ၢ်ဒ်အံၤ, အဝဲသ့ၣ်နီၣ်ထီၣ်က့ၤအတၢ်အၢၣ်လီၤအီလီၤစီဆှံ ဆူအခ့အပှၤစီၤအၤဘြၤဟၣ်န့ၣ်လီၤ.

⁴³ လၢတၢ်န့ၣ်အဃိအဝဲဆှၢပူၤဖျဲးထီၣ် ပှၤဂီၢ်မုၢ် လၢအဃုထၢဝဲ, ဒီးအဝဲသ့ၣ် သူၣ်ဝံၣ်သးဆၢဒီး ကိးသတြီထီၣ်လၢ တၢ်သးခုအပူၤန့ၣ်လီၤ.

⁴⁴ အဝဲဒၣ်ဟ့ၣ်အဝဲသ့ၣ်လၢ ပှၤဂီၢ်မုၢ်အဂၤအထံအကီၢ်တဖၣ်, ဒီးပျဲအဟံးန့ၢ်ကွံာ်အစံာ်ဧိၤပှဲၤဧိၤတဖၣ်,

⁴⁵ ဒ်သိးအပှၤဂီၢ်မုၢ်ကစူၢ်အတၢ်သိၣ်တၢ်သီတဖၣ်ဒီး တိၢ်န့ၢ်ဖံးဃာ်အတၢ်မၤလိာ်ခဲလၢာ်န့ၣ်လီၤ. စံးထီၣ်ပတြၢၤယွၤတက့ၢ်.