စံးထီၣ်ပတြၢၤ 104 - Sgaw Karen Common Bible

တၢ်စံးထီၣ်ပတြၢၤပှၤလၢအတ့လီၤတၢ်

¹ ယသးဧၢ, စံးထီၣ်ပတြၢၤယွၤတက့ၢ်. ယွၤယကစၢ်ယွၤဧၢ, နဒိၣ်ဝဲဒိၣ်နီၢ်မးလီၤ. နကူနသိးဒီးတၢ်လၤတၢ်ကပီၤ ဒီးတၢ်ကဟုကညီၢ်လီၤ.

² နမၤဘၢနသးလၢတၢ်ကပီၤဒ်ယၣ်အသိး, နသလၣ်ထီၣ်မူခိၣ်ဒ် ဒဲတဖျၢၣ်အသိး,

³ ဒီးနသူၣ်ထီၣ်နဟံၣ်လၢ ထံဖီခိၣ်လီၤ နသူတၢ်အၢၣ်တဖၣ်ဒ် နလ့ၣ်ကဟၣ်အသိး ဒီးလဲၤတၢ်လၢကလံၤအဒံးဆ့အဖီခိၣ်လီၤ.

⁴ နသူကလံၤတဖၣ်ဒ် နပှၤစိာ်တၢ်ကစီၣ်တဖၣ်အသိး ဒီးလီဝၢ်ဒံးတဖၣ်အတၢ်ကပြ့ၢ်ထီၣ်ဒ် နခ့နပှၤတဖၣ်အသိးန့ၣ်လီၤ.

⁵ နပာ်လီၤဂၢၢ်ကျၢၤဟီၣ်ခိၣ်လၢ အခီၣ်ထံးတဖၣ်အဖီခိၣ် ဒ်သိးအသုတဟူးတဝးဘၣ်နီတဘျီတဂ့ၤန့ၣ်လီၤ.

⁶ နမၤဘၢအီၤဒီးပီၣ်လဲၣ် ဒ်ဆ့ကၤဖးဒိၣ်တဘ့ၣ်အသိး ဒီးထံအိၣ်ထီၣ်ထီလၢဝဲလၢကစၢၢ်ကလိတဖၣ် အဖီခိၣ်လီၤ.

⁷ ဖဲနသိၣ်ဃီၣ်ထံတဖၣ်န့ၣ် အဝဲသ့ၣ်ယွၤလီၤဝဲ, ယွၤလီၤဝဲချ့ချ့ ဖဲအဝဲသ့ၣ်နၢ်ဟူနကိးထီၣ်နတၢ်မၤလိာ်န့ၣ်လီၤ.

⁸ အဝဲသ့ၣ် ယွၤလီၤဝဲလၢ ကစၢၢ်တဖၣ်အလိၤဒီး ဆူတၢ်တြီၤတဖၣ်အပူၤ, ဆူတၢ်လီၢ်လၢနပာ်လီၤလၢ အဝဲသ့ၣ်အဂီၢ်န့ၣ်လီၤ.

⁹ နပာ်လီၤတၢ်အဆၢတဖၣ်လၢအဝဲသ့ၣ်သုတလဲၤခီဂာ်ဝဲ နီတစုတဂ့ၤ ဒီးဒ်သိးအသုတဟဲက့ၤလုၣ်ဘၢကဒီး ဟီၣ်ခိၣ်တဂ့ၤအဂီၢ်န့ၣ်လီၤ.

¹⁰ နဒုးယွၤလီၤထံထီၣ်ပၢၢ်တဖၣ်လၢ တၢ်တြီၤတဖၣ်အပူၤ ဒီးထံကျိတဖၣ် ယွၤလီၤလၢ တၢ်လူၢ်တဖၣ်အကဆူးန့ၣ်လီၤ.

¹¹ အဝဲသ့ၣ်ဟ့ၣ်ထီၣ်ထံလၢ ဆၣ်ဖိကီၢ်ဖိအမံၤတဖၣ်အဂီၢ် ဒီးဖဲန့ၣ်ကသ့ၣ်ယီၤအမံၤ အီဘျဲးအီ အတၢ်သူအသးလၢထံလီၤ.

¹² ထိၣ်တဖၣ်မၤဝဲအသွံဒီးသးဝံၣ်ထီၣ်တၢ် ဖဲသ့ၣ်လၢအအိၣ်လၢတၢ်အကပိာ်ကပၤ အခံလိၤန့ၣ်လီၤ.

¹³ နဒုးစူၤလီၤတၢ်လၢမူခိၣ်ဆူ တၢ်လူၢ်တဖၣ်အလိၤ ဒီးဟီၣ်ခိၣ်ပှဲၤဝဲဒီးနတၢ်ဆိၣ်ဂ့ၤတဖၣ်လီၤ.

¹⁴ နဒုးမဲထီၣ်နီၣ်ဧိၤမံၤဧိၤလၢဆၣ်ဖိကီၢ်ဖိအဂီၢ် ဒီးတၢ်မုၢ်တၢ်ဘိတဖၣ်လၢ ပှၤကညီကသူၣ်လီၤဖျးလီၤဝဲ ဒ်သိးကဒုးဟဲထီၣ်တၢ်အီၣ်တၢ်အီလၢ ဟီၣ်ခိၣ်အဂီၢ်,

¹⁵ ဒီးစပံးထံလၢကမၤသးခုပှၤကညီအသး, သိလၢအကဒုးကပီၤထီၣ်ပှၤကညီအမဲာ်, ဒီးကိၣ်လၢကဟ့ၣ်ဂံၢ်ဟ့ၣ်ဘါ ပှၤကညီအသးအဂီၢ်လီၤ.

¹⁶ ယွၤအသ့ၣ်လၢအသူၣ်လီၤဝဲလၢအမ့ၢ် လဘၤနိၣ်အသ့ၣ်ဆှိအ့ရ့းန့ၣ်, ဒိးန့ၢ်ဘၣ်တၢ်စူၤထံလၢလၢပှဲၤပှဲၤန့ၣ်လီၤ.

¹⁷ ဖဲန့ၣ်ထိၣ်တဖၣ်မၤဝဲအသွံ ဒီးသ့ၣ်ဆှိတဖၣ်န့ၣ်မ့ၢ်ထိၣ်ဖးဒိၣ်အဟံၣ်လီၤ.

¹⁸ ကစၢၢ်အထီတဖၣ်မ့ၢ်တၢ်အိၣ်တၢ်ဆိးအလီၢ်လၢမဲာ်တဲးလဲးမံၤ တဖၣ်အဂီၢ် ဒီးလၢၢ်ဧိၤလ့ဧိၤမ့ၢ်တၢ်မူပူၤဖျဲးအလီၢ်လၢ ယူၣ်ၡဖၣ်အဂီၢ်လီၤ.

¹⁹ နတ့လီၤတ့ၢ်လံလါလၢတၢ်မၤနီၣ်တၢ်အခ့အခါအဂီၢ် ဒီးမုၢ်န့ၣ်သ့ၣ်ညါတၢ် လီၤနုာ်အဆၢကတီၢ်န့ၣ်လီၤ.

²⁰ နတ့လီၤမုၢ်နၤ, ဒီး ဆၣ်ဖိကီၢ်ဖိအမံၤခဲလၢာ်ဟဲထီၣ်လၢ တၢ်ခံးတၢ်နၤအကျါလီၤ.

²¹ ခ့ယုၢ်ဖိတဖၣ်ကညီၤထီၣ်ထွဲအဆၣ်အခံ, ဖဲအဃုအီၣ်အဆၣ်လၢ ကစၢ်ယွၤဟ့ၣ်လီၤအီၤန့ၣ်လီၤ.

²² ဖဲမုၢ်ဟဲထီၣ်န့ၣ်ဒီးအဝဲသ့ၣ်က့ၤကဒါက့ၤဝဲ ဒီးမံလီၤဝဲလၢအတဝၢတဖၣ်အပူၤန့ၣ်လီၤ.

²³ ပှၤကညီဟးထီၣ်ဆူအတၢ်မၤအလီၢ် ဒီးမၤတၢ်တုၤလၢ မုၢ်ဟါလီၤတစုန့ၣ်လီၤ.

²⁴ ယွၤဧၢ, နမၤတၢ်အါမံၤလီၤ. နမၤတၢ်ခဲလၢာ်န့ၣ် ပှဲၤမးဒီး တၢ်ကူၣ်သ့မးလဲၣ်. ဟီၣ်ခိၣ်ပှဲၤဝဲဒီး နတၢ်ဘၣ်တ့တဖၣ်လီၤ.

²⁵ အိၣ်ဒီးပီၣ်လဲၣ်လၢအဒိၣ်ဝဲ, ဒီးလဲၢ်ဝဲ, ဖဲတၢ်ဘၣ်တ့တဖၣ်လၢအဒိၣ်ဝဲမ့ၢ်ဂ့ၤဆံးဝဲမ့ၢ်ဂ့ၤ အိၣ်ဝဲအါမးလၢတၢ်ဂံၢ်အီၤတသ့ဘၣ်န့ၣ်လီၤ.

²⁶ ကဘီတဖၣ်လဲၤတၢ်ဖဲန့ၣ်, ဒီးသမၣ်လၢအမ့ၢ်ပီၣ်လဲၣ်အတၢ်မုၢ်ဃၢ် လၢနတ့လီၤအီၤလိာ်ကွဲဝဲဖဲန့ၣ်လီၤ.

²⁷ တၢ်ခဲလၢာ်အံၤန့ၣ်ကွၢ်ထီၣ်နၤ, ဒ်သိးလၢအကတီၢ်ဘၣ်န့ၣ်, နကဟ့ၣ်လီၤအီၤလၢအတၢ်အီၣ်လီၤ.

²⁸ တၢ်လၢနဟ့ၣ်လီၤအီၤန့ၣ်အဝဲသ့ၣ်ထၢထီၣ်ဝဲ ဒီးဖဲနသလၣ်ထီၣ်နစုန့ၣ် အဝဲသ့ၣ်ဘျဲးအီၣ်ဘျဲးအီလၢတၢ်ဂ့ၤလီၤ.

²⁹ ဖဲနပာ်တဒၢနမဲာ်န့ၣ်ဒီးအဝဲသ့ၣ်အသူၣ်ပျံၤသးဖုးဝဲ, ဒီးဖဲနထုးကွံာ်အတၢ်သါန့ၣ်ဒီးအဝဲသ့ၣ်သံဝဲ ဒီးက့ၤဝဲဆူဟီၣ်ခိၣ်အကမူၣ်လီၤ.

³⁰ ဘၣ်ဆၣ်ဖဲနဟ့ၣ်လီၤအီၤတၢ်သါန့ၣ်ဒီး အဝဲသ့ၣ်ဘၣ်တၢ်တ့အီၤ, ဒီးနဟ့ၣ်က့ၤတၢ်မူအသီလၢဟီၣ်ခိၣ်လီၤ.

³¹ မ်ယွၤအလၤကပီၤအိၣ်ဝဲလီၤထူလီၤယိာ်, မ်ယွၤသးခုလၢအတၢ်မၤအပူၤန့ၣ်တက့ၢ်.

³² အဝဲကွၢ်လီၤဟီၣ်ခိၣ်ဒီးဟီၣ်ခိၣ်ဆှဲးဆှိးဝဲ, အဝဲထိးဘၣ်ကစၢၢ်ကလိဒီး မ့ၣ်အူလုၣ်ခုၣ်ထီၣ်ဝဲလီၤ.

³³ ယသးသမူအဖၢမုၢ်ဒီးယကစံးထီၣ်ပတြၢၤယွၤ, ဒီးဖဲယအိၣ်ဒံးအဖၢမုၢ်ဒီး ယကသးဝံၣ်ယကစၢ်ယွၤလီၤ.

³⁴ မ်ယတၢ်ဆိကမိၣ်န့ၣ်ဘၣ်အသးတက့ၢ်. ဒီး, ယကသးခုလၢယွၤအပူၤလီၤ.

³⁵ မ်ပှၤတၢ်ဒဲးဘးဖိတဖၣ်ကလၢာ်ကွံာ်ဝဲလၢ ဟီၣ်ခိၣ်ချၢတက့ၢ်. ဒီးမ်ပှၤတတီတလိၤတဖၣ်သုတအိၣ်လၢၤတဂ့ၤ. ယသးဧၢ, စံးထီၣ်ပတြၢၤယွၤတက့ၢ်. စံးထီၣ်ပတြၢၤယွၤတက့ၢ်.