စံးထီၣ်ပတြၢၤ 101 - Sgaw Karen Common Bible

စီၤပၤအတၢ်အၢၣ်လီၤအီလီၤ

¹ ယတၢ်သးဝံၣ်မ့ၢ်တၢ်သးတီဒီး တၢ်စံၣ်ညီၣ်တီအဂ့ၢ်, ဒီးယကသးဝံၣ်အီၤဆူနအိၣ်, ယွၤဧၢ

² ယကပလီၢ်ယသးလၢညါ လၢတၢ်အိၣ်မူလၢ တၢ်ပာ်တၢ်ကမၣ် လၢအလိၤအလီၢ်တအိၣ်ဘၣ်အပူၤန့ၣ်လီး. နကဟဲဆူယအိၣ်အကတီၢ်ဖဲလဲၣ်. လၢယဟံၣ်ပူၤန့ၣ်, ယကအိၣ်မူလၢ တၢ်သးကဆှီအပူၤ,

³ ဒီး တပျဲတၢ်အၢတၢ်သီမၤအသး နီတစုဘၣ်. ပှၤတဖၣ်လၢ အဃၣ်ကွံာ်အသးယံၤဒီး ကစၢ်ယွၤအတၢ်ဖံးတၢ်မၤန့ၣ် ယသးဟ့အီၤ, ဒီးယတမၤဘၣ်အၢယသးဒီး အဝဲသ့ၣ်ဘၣ်.

⁴ တၢ်သးက့ၣ်န့ၣ်ကဟးဖးဒီးယၤလီၤ. ယကအိၣ်တီတီလိၤလိၤဒီး တမၤဘၣ်ဃးဘၣ်ယသးဒီး တၢ်အၢတၢ်သီနီတစဲးဘၣ်. တၢ်အၢန့ၣ်ယတသ့ၣ်ညါဘၣ်.

⁵ ပှၤလၢအခဲၣ်သူခဲၣ်ဂီၤပှၤအိၣ်လၢအဃၢၤန့ၣ် ယကမၤဟးဂီၤကွံာ်အီၤလီၤ. ပှၤလၢအပာ်ထီၣ်ထီအသးဒီးပာ်ကဖၢလၢအသးန့ၣ်, ယတပျဲပူၤအီၤနီတဂၤဘၣ်

⁶ ပှၤလၢအသူၣ်တီသးရၤဒီး ကစၢ်ယွၤန့ၣ်, ယကဘၣ်သူၣ်ဘၣ်သးအီၤဒီး ဒုးအိၣ်အီၤလၢ ယနူၢ်ပူၤစီၤပူၤလီၤ. ပှၤတဖၣ်လၢ အအိၣ်တၢ်သးတီအလၢအပှဲၤန့ၣ် ကမၤဘၣ်ယတၢ်လီၤ.

⁷ ပှၤလၢအလီတၢ်န့ၣ် တအိၣ်တဆိးဘၣ်လၢ ယနူၢ်ပူၤစီၤပူၤဘၣ်. ပှၤလၢအပာ်မၤအသးတဖၣ်န့ၣ် တအိၣ်တဆိးဘၣ်လၢယမဲာ်ညါနီတဂၤဘၣ်.

⁸ ယကမၤဟးဂီၤပှၤတတီတလိၤလၢ ပကီၢ်ပူၤတနံၤဘၣ်တနံၤ ဒီးဟီထီၣ်ကွံာ်ကယဲၢ်ပှၤမၤတၢ်အၢလၢ ယွၤအဝ့ၢ်ပူၤန့ၣ်လီၤ.