တၢ်ကတိၤဒိ. 8 - Sgaw Karen Common Bible

တၢ်စံးထီၣ်ပတြၢၤတၢ်ကူၣ်သ့

¹ ဒိကနၣ်တက့ၢ်. တၢ်ကူၣ်သ့ကိးထီၣ်ဝဲ ဒီးတၢ်ကူၣ်တၢ်ဆးမၤဟူထီၣ်အကလုၢ်ဒၣ်ဝဲလီၤ.

² လၢကျဲကပၤကစၢၢ်ဒီခိၣ် ဒီးဖဲကျဲခီဂာ်လိာ်အသးတဖၣ်န့ၣ်, ဆၢထၢၣ်ဝဲလီၤ.

³ ဖဲတၢ်လဲၤနုာ်ဃီၤဆူဝ့ၢ်ပူၤ တြဲၤဖးဒိၣ်တဖၣ်အကပၤန့ၣ်, အဝဲကိးထီၣ်ဝဲ,

⁴ “ယဃ့ကညးသု, ပှၤကညီသ့ၣ်ဧၢ, ဒီးယကိးထီၣ်ဆူပှၤခဲလၢာ်လၢအအိၣ်လၢဟီၣ်ခိၣ်ချၢအံၤလီၤ.

⁵ မ့ၢ်သုတဒိၣ်တုာ်ခိၣ်ပှဲၤဘၣ်ဧါ. မၤလိတၢ်ဒ်သိးသုကဒိၣ်တုာ် ခိၣ်ပှဲၤတက့ၢ်. မ့ၢ်သုသူၣ်တထံသးတဆးဘၣ်ဧါ. မၤလိအိၣ်ဒီးတၢ်သူၣ်ထံ သးဆးတက့ၢ်.

⁶ ဒိကနၣ်ယတၢ်ကတိၤလုၢ်ဒိၣ်ပှ့ၤဒိၣ်တဖၣ်တက့ၢ်. တၢ်လၢယစံးဘၣ်တဲဘၣ်သုခဲလၢာ်ဘၣ်ဝဲတီဝဲလီၤ.

⁷ တၢ်လၢယစံးန့ၣ်မ့ၢ်တၢ်မ့ၢ်တၢ်တီလီၤ. ယသးဟ့တၢ်လီတၢ်ဝ့ၤခဲလၢာ်လီၤ.

⁸ တၢ်လၢယစံးဘၣ်သုကိးထံၣ်ဒဲးမ့ၢ်ဝဲတီဝဲလီၤ. တမ့ၢ်တၢ်ကဘျံးကဘျၣ်ဒီးတၢ်ဆှၢကမၣ်တၢ် နီတမံၤဘၣ်.

⁹ လၢပှၤအိၣ်ဒီးတၢ်ထံၣ်တၢ်လၢသးအဂီၢ်, မ့ၢ်တၢ်အိၣ်ဖျါတြၢၢ် ကလာ်လီၤ. ဒီးပှၤလၢအမၤလိဘၣ်တၢ်အါတဖၣ်အဂီၢ်, မ့ၢ်တၢ်အဘၣ်ခဲလၢာ်လီၤ.

¹⁰ ဃုထၢယတၢ်သိၣ်က့ၤသီက့ၤလၢစ့အလီၢ်, ဒီးဃုထၢတၢ်သ့ၣ်ညါနၢ်ပၢၢ်အါန့ၢ်ဒိၣ်န့ၢ်ထူစီတက့ၢ်.

¹¹ ယဲဒၣ်အံၤယမ့ၢ်တၢ်ကူၣ်သ့ဒီးယဂ့ၤန့ၢ်တၢ်မျၢ်ပလဲ တဖၣ်လီၤ. တၢ်လၢသုသးလီန့ၣ်, သုထိၣ်သတြီၤဒီးယၤတသ့နီတမံၤဘၣ်.

¹² ယဲဒၣ်အံၤယမ့ၢ်တၢ်ကူၣ်သ့ဒီးယအိၣ်ဒီးတၢ်ထံၣ်တၢ်လၢသးန့ၣ်လီၤ. ယအိၣ်ဒီးတၢ်သ့ၣ်ညါနၢ်ပၢၢ်ဒီးတၢ်စံၣ်ညီၣ်တီလီၤ.

¹³ တၢ်ပျံၤယွၤန့ၣ်မ့ၢ်တၢ်သးဟ့တၢ်အၢတၢ်သီလီၤ. ယသးဟ့တၢ်ပာ်ထီၣ်ထီသးဒီးတၢ်ပာ်ကဖၢလၢသး, ကျဲအအၢအသီတဖၣ်ဒီးတၢ်ကတိၤလီတၢ်တဖၣ်လီၤ.

¹⁴ ယအိၣ်ဒီးတၢ်တိာ်ပာ်တဖၣ်ဒီးမၤကဲထီၣ်အီၤလီၤ. ယအိၣ်ဒီးတၢ်သ့ၣ်ညါနၢ်ပၢၢ်ဒီးယဂံၢ်ဆူၣ်ဘါဆူၣ်လီၤ.

¹⁵ ယမၤစၢၤစီၤလိၣ်စီၤပၤတဖၣ်လၢကပၢတၢ်, ဒီးပှၤပၢတၢ်တဖၣ်လၢကမၤအိၣ်ထီၣ်တၢ်သိၣ်တၢ်သီအဂ့ၤတဖၣ်လီၤ.

¹⁶ ပှၤပၢတၢ်ခဲလၢာ်လၢဟီၣ်ခိၣ်ပၢတၢ်လၢယတၢ်မၤစၢၤ အပူၤ, ပဒိၣ်ပပှၢ်တဖၣ်ဒီးပှၤတူၢ်ဒိၣ်ကီၤဒိၣ်တဖၣ်စ့ၢ်ကီးလီၤ.

¹⁷ ယအဲၣ်ပှၤတဖၣ်လၢအအဲၣ်ယၤဒီးပှၤလၢအဃုယၤန့ၣ်, ကထံၣ်န့ၢ်ယၤလီၤ.

¹⁸ ယအိၣ်ဒီးတၢ်ထူးတၢ်တီၤတဖၣ်ဒီးတၢ်လၤကပီၤလၢယဟ့ၣ်အီၤ, တၢ်ဘီၣ်ထီၣ်ညီထီၣ်ဒီးတၢ်မၤန့ၢ်မၤနၢၤန့ၣ်လီၤ.

¹⁹ တၢ်လၢသုဒိးန့ၢ်လၢယအိၣ်န့ၣ်ဂ့ၤဒိၣ်န့ၢ်ထူအစီ, ဒီးဂ့ၤဒိၣ်န့ၢ်စ့အကဆှီကတၢၢ်တက့ၢ်န့ၣ်လီၤ.

²⁰ ယလဲၤတၢ်လၢကျဲတီကျဲလိၤအပူၤ ဒီးယပိာ်ထွဲတၢ်စံၣ်ညီၣ်တီအကျဲတဖၣ်လီၤ.

²¹ ယဟ့ၣ်လီၤတၢ်ထူးတၢ်တီၤဆူပှၤတဖၣ်လၢအအဲၣ်ယၤ ဒီးမၤပှဲၤအဟံၣ်တဖၣ်လၢတၢ်လုၢ်ဒိၣ်ပှ့ၤဒိၣ်န့ၣ်လီၤ.

²² ယွၤတ့လီၤယၤအဆိကတၢၢ်ဒီးလၢပျၢၤလၢကစၢၤယမ့ၢ် တၢ်အဆိကတၢၢ်လၢအတၢ်မၤတဖၣ်အကျါန့ၣ်လီၤ.

²³ လၢဟီၣ်ခိၣ်တချုးကဲထီၣ်ဒံးဒၣ်လဲာ်, ယဘၣ်တၢ်ဒုးကဲထီၣ်ယၤအဆိကတၢၢ်လၢတၢ်အခီၣ်ထံးလံၤလံၤန့ၣ်လီၤ.

²⁴ ယအိၣ်ဖျဲၣ်ထီၣ်တ့ၢ်လၢပီၣ်လဲၣ်တဖၣ်အမဲာ်ညါ, ဖဲထံမူထီၣ်ပၢၢ်တအိၣ်ဒံးဘၣ်ဒၣ်လဲာ်န့ၣ်လီၤ.

²⁵ ယအိၣ်ဖျဲၣ်ထီၣ်တ့ၢ်လၢကစၢၢ်ကလိတဖၣ်အမဲာ်ညါ, တချုးဒံးဒၣ်လဲာ်လၢတၢ်လူၢ်ခိၣ်တဖၣ်ဆီလီၤအသးလၢအလီၢ်,

²⁶ တချုးလၢယွၤတ့လီၤဟီၣ်ခိၣ်ဒီးအပျီတဖၣ်မ့ၢ်ဂ့ၤ, ဟီၣ်ခိၣ်ကမူၣ်အဆိကတၢၢ်တစှီၤဒံးဒၣ်လဲာ်မ့ၢ်ဂ့ၤအဆၢကတီၢ်န့ၣ် လီၤ.

²⁷ ယအိၣ်လံဖဲန့ၣ်ဖဲယွၤပာ်လီၤမူခိၣ်လၢအလီၢ်ဒၣ်ဝဲ, ဒီးဖဲအသလၣ်ထီၣ်မူထံးလၢပီၣ်လဲၣ်အထံဖံးခိၣ်,

²⁸ ဖဲအပာ်လီၤတ့ၢ်တၢ်အၢၣ်တဖၣ်လၢမူခိၣ်, ဖဲအအိးထီၣ်တ့ၢ်ပီၣ်လဲၣ်အထံထီၣ်ပၢၢ်တဖၣ်,

²⁹ ဒီးဖဲအဟ့ၣ်လီၤတ့ၢ်အကလုၢ်လၢပီၣ်လဲၣ်အထံတဖၣ်အသုတဟဲ ထီၣ်အါန့ၢ်အစံးပာ်တ့ၢ်ဝဲတဂ့ၤအဂီၢ်န့ၣ်လီၤ. ယအိၣ်လံဖဲန့ၣ်, ဖဲအဝဲပာ်လီၤဟီၣ်ခိၣ်အခီၣ်ထံးတဖၣ်န့ၣ်လီၤ.

³⁰ ယအိၣ်ဖဲအကပၤဒ်ပှၤသ့တ့တၢ်သူၣ်ထီၣ်တဂၤအသိး, ယမ့ၢ်အတၢ်သးခုအဂံၢ်ထံးကိးနံၤဒဲး, သးခုထီဘိလၢအမဲာ်ညါ,

³¹ သးခုဃုာ်ဒီးဟီၣ်ခိၣ်ဒီဘ့ၣ်ဒီးသးမုာ်သးခုဒီးပှၤဟီၣ်ခိၣ် ဖိန့ၣ်လီၤ.

³² ဒီးခဲကနံၣ်အံၤပှၤသးစၢ်သ့ၣ်ဧၢ, ကနၣ်ယကလုၢ်တက့ၢ်. မၤဒ်ယစံးဘၣ်သုအသိးဒီးသုကဘၣ်ဆိၣ်ဂ့ၤလီၤ.

³³ ဒိတနၣ်တၢ်လၢတၢ်သိၣ်လိတ့ၢ်သုန့ၣ်တက့ၢ်. ကွၢ်ကပာ်ကွံာ်အီၤတဂ့ၤ. ကဲထီၣ်ပှၤကူၣ်တၢ်သ့တက့ၢ်.

³⁴ ပှၤလၢအဒိကနၣ်ယၤ, ပှၤလၢအအိၣ်လၢယတြဲၤကိးနံၤဒဲး ဒီးခိးတၢ်လၢယဟံၣ်အကျဲစၢၤန့ၣ်ဘၣ်ဆိၣ်ဂ့ၤဝဲလီၤ.

³⁵ ပှၤလၢအထံၣ်န့ၢ်ယၤထံၣ်န့ၢ်တၢ်မူ ဒီးယွၤကဘၣ်အသးလၢအီၤလီၤ.

³⁶ ပှၤလၢအတထံၣ်န့ၢ်ယၤန့ၣ်, မၤဆါလီၤဒၣ်အသးဒၣ်ဝဲန့ၣ်လီၤ. ပှၤတဂၤလၢ်လၢ်လၢအသးဟ့ယၤန့ၣ်, အဲၣ်တၢ်သံလီၤ.”