တၢ်ကတိၤဒိ. 6 - Sgaw Karen Common Bible

တၢ်ဟ့ၣ်ပလီၢ်အါထီၣ်တဖၣ်

¹ ယဖိခွါဧၢ, မ့ၢ်နအၢၣ်လီၤအီလီၤတ့ၢ်နသးလၢနကဟံးန့ၢ်မူဒါ လၢပှၤအဂၤတဂၤအဒ့ၣ်ကမၣ်တဖၣ်အဂီၢ်ဧါ.

² မ့ၢ်နဘၣ်တၢ်ဖီၣ်န့ၢ်တ့ၢ်နၤလၢနတၢ်ကတိၤဒၣ်နဲဒီးဘၣ်တ့ၢ်ပျံၤ သကွီၤလၢနတၢ်အၢၣ်လီၤအီလီၤဒၣ်နဲတဖၣ်န့ၣ်ဧါ.

³ မ့မ့ၢ်ဒ်န့ၣ်ဒီး, ယဖိခွါဧၢ, နလီၤဘၣ်လၢအဝဲအစုပူၤလံ. ဘၣ်ဆၣ်ကျဲလၢနကထူၣ်ဖျဲးထီၣ်မ့ၢ်ဒ်အံၤလီၤ. လဲၤချ့ချ့ဆူအအိၣ်ဒီးဃ့ကညးအီၤလၢကပျၢ်နၤတက့ၢ်.

⁴ ပျဲတၢ်မံလီၤဘၣ်နၤမ့ၢ်ဂ့ၤ, ဆိကတီၢ်ဒီးအိၣ်ဘှံးအိၣ်သါဒၣ် လဲာ်မ့ၢ်ဂ့ၤန့ၣ်တဂ့ၤ.

⁵ ဟးထီၣ်ကွံာ်လၢပျံၤသကွီၤအပူၤဒ်ထိၣ်တဘ့ၣ်, မ့တမ့ၢ်ဒ်တၤဟိတဒု, ဃ့ၢ်ပူၤဖျဲးထီၣ်ကွံာ်လၢပှၤခးတၢ်ဖိအစုပူၤအသိးန့ၣ်တက့ၢ်.

⁶ ပှၤလၢအကၢၣ်တဖၣ်ကြၢးမၤန့ၢ်တၢ်မၤလိတမံၤလၢတၢၢ်ဧိၤတြၤဧိၤ အတၢ်အိၣ်မူအကျဲန့ၣ်လီၤ.

⁷ အဝဲသ့ၣ်အပှၤခိၣ်ပှၤနၢ်မ့ၢ်ဂ့ၤ, အပှၤအဒိၣ်မ့ၢ်ဂ့ၤ, အပှၤပၢအီၤမ့ၢ်ဂ့ၤတအိၣ်ဘၣ်.

⁸ ဘၣ်ဆၣ်, ဖဲတၢ်ကိၢ်ခါန့ၣ်ပာ်ဖှိၣ်အတၢ်အီၣ်ဒီးအိၣ်ကတဲာ် ကတီၤအသးလၢတၢ်ဂိၢ်ခါအဂီၢ်လီၤ.

⁹ ပှၤအကၢၣ်ကမံဒံးလၢလီၢ်မံခိၣ်ဆံးယံာ်လဲၣ်, ကဂဲၤဆၢထၢၣ်ဝဲ လၢအခါမတၤလဲၣ်.

¹⁰ အဝဲစံးဝဲ, “ယကမံတစိၢ်ဖိ, ယကတဝံယစုတဖၣ်ဒီးအိၣ်ဘှံးတစိၢ် ဖိလီၤ.”

¹¹ ဘၣ်ဆၣ်ဒီးဖဲအမံဝဲအဖၢမုၢ်န့ၣ်, တၢ်ဖှီၣ်တၢ်ယာ်ကမၤဒၢၣ်ဘၣ် အီၤဒ်တမျိၤတမျာ်အိၣ်ဒီးစုကဝဲၤအသိးန့ၣ်လီၤ.

¹² ပှၤတဂီာ်တသီၣ်, ပှၤအၢပှၤသီတဖၣ်လဲၤဝ့ၤဝီၤဒီးကတိၤ လီတၢ်လီၤ.

¹³ အဝဲသ့ၣ်ဖျးအမဲာ်, ဒီးနဲၣ်စုနဲၣ်ခီၣ်လၢကလီန့ၢ်သုအဂီၢ် လီၤ.

¹⁴ ကူၣ်တၢ်အၢတထံၣ်ဃီလၢသးလၢအတမ့ၢ်တတီအပူၤ, ဒီးထိၣ်ဂဲၤထီၣ်တၢ်ကီတၢ်ခဲသကုၤဆးဒးလီၤ.

¹⁵ လၢတၢ်အံၤအဃိ, တၢ်နးတၢ်ဖှီၣ်ဖးဒိၣ်ကလီၤဘၣ်အဝဲသ့ၣ်သတူၢ် ကလာ်ဒီးလၢတစိၢ်ဖိအတီၢ်ပူၤကဘၣ်တၢ်မၤကၢ်မၤဘျဲးအီၤဒီးတၢ် မၤဘျါက့ၤလၢအဂီၢ်တအိၣ်ဘၣ်န့ၣ်လီၤ.

¹⁶ တၢ်အိၣ်ဝဲဒၣ်နွံမံၤလၢယွၤသးဟ့ဒီးသးဘၣ်အၢအီၤန့ၣ်လီၤ.

¹⁷ မဲာ်ကွၢ်တၢ်အိၣ်ဒီးတၢ်ပာ်ထီၣ်ထီသး, ပျ့ၤလၢအလီတၢ်, စုလၢအမၤသံပှၤလၢအတၢ်ကမၣ်တအိၣ်,

¹⁸ သးလၢအဆိကမိၣ်ထီၣ်တၢ်ကူၣ်အၢကူၣ်သီ, ခီၣ်လၢအခါထီၣ်ချ့ချ့ဆူတၢ်အၢအအိၣ်,

¹⁹ ပှၤအုၣ်အသးလၢကတိၤလီတၢ်တခါဝံၤတခါ, ဒီးပှၤလၢအထိၣ်ဂဲၤ ထီၣ်တၢ်ကီတၢ်ခဲလၢတံၤသကိးတဖၣ်အကျါန့ၣ်လီၤ.

တၢ်ဟ့ၣ်ပလီၢ်ထီဒါတၢ်အဲၣ်ဘၢမါအဲၣ်ဘၢဝၤ

²⁰ ယဖိခွါဧၢ, မၤဒ်နပၢ်မၤလိာ်နၤအသိး, ဒီးသးပ့ၤနီၣ်နမိၢ် အတၢ်သိၣ်လိတ့ၢ်နၤတဂ့ၤ.

²¹ ဟံးဃာ်အဝဲသ့ၣ်အတၢ်ကတိၤတဖၣ်ဒီးနၤတထံၣ်ဃီဒီးစၢတံၢ်အီၤလၢ နသးအလိၤတက့ၢ်.

²² တုၤနလဲၤတၢ်ဒီးကဆှၢနၤ, တုၤနမံလီၤဒီးကပၢၤနၤ, ဒီးကဟ့ၣ်ကူၣ်ဟ့ၣ်ဖးနၤလၢမုၢ်ဆါအကတီၢ်လီၤ.

²³ အတၢ်သိၣ်က့ၤသီက့ၤတဖၣ်န့ၣ်, မ့ၢ်မ့ၣ်အူဒၢလၢအကပီၤထီၣ်ဝဲ, ဒီးအတၢ်ဘှီဘၣ်က့ၤသိၣ်လိနၤလၢနကအိၣ်မူဒ်လဲၣ်သ့ဝဲန့ၣ်လီၤ.

²⁴ ကတြီဃာ်နၤလၢပိာ်မုၣ်ဟးဂီၤတဖၣ်, ဒီးလၢပှၤဂၤအမါတဖၣ်အတၢ် ကတိၤကလံာ်န့ၢ်နၤန့ၣ်လီၤ.

²⁵ ပျဲအဝဲသ့ၣ်အတၢ်ဃံတၢ်လၤလ့ပစီန့ၢ်နၤတဂ့ၤ. ပျဲအမဲာ်ချံလၢအကလံာ်လွဲတၢ်အပျံၤသကွီၤန့ၣ်ဖီၣ်န့ၢ်နၤတ ဂ့ၤ.

²⁶ ပှၤတဂၤဒိးလဲဃဲသဲမုၣ်တဂၤလၢကိၣ်တလိၣ်အပှ့ၤသ့ဝဲ, ဘၣ်ဆၣ်တၢ်အဲၣ်ဘၢမါအဲၣ်ဘၢဝၤအပှ့ၤကလံၤန့ၣ်ကမ့ၢ်တၢ်လၢ အအိၣ်ဒီးအီၤခဲလၢာ်လီၤ.

²⁷ နစိာ်မ့ၣ်အူလၢနသးနါပှၢ်ဒီးတအီၣ်နကူနသိးတဖၣ်န့ၣ်ဘၣ်ကသ့ဧါ.

²⁸ နလဲၤတၢ်လၢမ့ၣ်အူကဖးတဖၣ်အဖီခိၣ်ဒီးမ့ၣ်အူတအီၣ်နခီၣ်န့ၣ်ဘၣ် ကသ့ဧါ.

²⁹ တၢ်မံဃုာ်ဒီးပှၤအဂၤတဂၤအမါန့ၣ်မ့ၢ်တၢ်လၢအလီၤပျံၤလီၤဖုး ဒ်န့ၣ်အသိးလီၤ. ပှၤလၢအမၤတၢ်အံၤတဂၤလၢ်လၢ်န့ၣ်ကတူၢ်ဘၣ်ဝဲလီၤ.

³⁰ တၢ်ဘျၣ်တဂၤတၢ်မ့ၢ်သၣ်ဝံၤအသးဒီးမ့ၢ်ဟုၣ်တၢ်န့ၣ်, ပှၤတသးဘၣ်အၢဘၣ်အီၤဘၣ်ဧါ.

³¹ တုၤမ့ၢ်တၢ်ဖီၣ်န့ၢ်အီၤဒီး, အဝဲကဘၣ်ဟ့ၣ်က့ၤတၢ်အါန့ၢ်အလီၢ်နွံစး, ကဘၣ်ဟ့ၣ်တၢ်လၢအအိၣ်ဒီးအီၤခဲလၢာ်လီၤ.

³² မ့မ့ၢ်ပှၤတဂၤလၢအအဲၣ်ဘၢတၢ်န့ၣ်အသးတဆးဘၣ်နီတစဲးဘၣ်. အဝဲမၤဟးဂီၤလီၤအသးဒၣ်ဝဲန့ၣ်လီၤ.

³³ အဝဲကဘၣ်တၢ်မၤမဲာ်ဆှးအီၤဒီးတၢ်တီၢ်အီၤဒီးကဘၣ်တၢ်ဒုၣ်ဒွဲၣ် အီၤလီၤစိၤလီၤထီန့ၣ်လီၤ.

³⁴ အဂ့ၢ်ဒ်အံၤ, ဝၤတဂၤအတၢ်သးက့ၣ်ဒုးကဲၤထီၣ်အတၢ်သးဒိၣ်, ဒီးတုၤအဟ့ၣ်ကၣ်တၢ်န့ၣ်အတၢ်သးကညီၤတအိၣ်ဘၣ်.

³⁵ အဝဲတတူၢ်လိာ်ဘၣ်တၢ်လိးက့ၤတမံၤလၢ်လၢ်န့ၣ်ဘၣ်. ဒီးတၢ်ဟ့ၣ်အါထဲလဲၣ်ဂ့ၤထဲလဲၣ်ဂ့ၤန့ၣ်မၤသးမံအတၢ်သးဒိၣ် တန့ၢ်ဘၣ်.