တၢ်ကတိၤဒိ. 3 - Sgaw Karen Common Bible

တၢ်ဟ့ၣ်ကူၣ်ဆူပှၤပိာ်ခွါသးစၢ်တဖၣ်

¹ ယဖိခွါဧၢ, သးပ့ၤနီၣ်ယသိၣ်က့ၤသီက့ၤတၢ်တဂ့ၤ. တၢ်လၢယမၤလိာ်နၤဒ်သိးနကမၤအီၤန့ၣ်ဟံးဃာ်အီၤထီဘိ တက့ၢ်.

² ယတၢ်သိၣ်က့ၤသီက့ၤကဟ့ၣ်နၤတၢ်အိၣ်ကၢအိၣ်ခိးဒီးတၢ်အိၣ်မူ လၢအဘီၣ်ထီၣ်ညီထီၣ်ဝဲန့ၣ်လီၤ.

³ ဒုးလဲၤသဒၣ်တၢ်သးတီဒီးတၢ်သူၣ်တီသးရၤလၢနအိၣ်တဂ့ၤ. စၢထီၣ်အီၤလၢနကိာ်အလိၤဒီးကွဲးအီၤလၢနသးအလိၤတက့ၢ်.

⁴ နမ့ၢ်မၤတၢ်အံၤဒီး, ကစၢ်ယွၤဒီးပှၤကညီကသးမုာ်သးခုလၢနဃိ လီၤ.

⁵ သန့ၤနသးလၢယွၤလၢနသးဒီဖျၢၣ်ညါတက့ၢ်. ဒီးသုတသန့ၤနသးလၢတၢ်လၢနဆိကမိၣ်နသ့ၣ်ညါန့ၣ်တဂ့ၤ.

⁶ သ့ၣ်ညါအၢၣ်လီၤယွၤလၢနကျဲခဲလၢာ်အပူၤတက့ၢ်. ဒီးအဝဲဒၣ်ကဒုးနဲၣ်နၤကျဲအဘၣ်လီၤ.

⁷ ပျဲနတၢ်ဆိကမိၣ်ဆှၢနၤလၢနကူၣ်တၢ်သ့န့ၢ်ဒံးနမ့ၢ်တၢ်န့ၣ်တဂ့ၤ. စူၢ်ဒၣ်ထဲယွၤဒီးဂ့ၢ်လိာ်တၢ်မၤကမၣ်တၢ်တက့ၢ်.

⁸ နမ့ၢ်မၤဒ်အံၤဒီးကမ့ၢ်ကသံၣ်ဖီၣ်အဂ့ၤလၢအကမၤဘျါက့ၤနပူၤလီၢ် တဖၣ်အဂီၢ်ဒီးမၤကိညၢ်ထီၣ်က့ၤနတၢ်ဆါန့ၣ်လီၤ.

⁹ မၤလၤကပီၤယွၤလၢနတၢ်လုၢ်ထီၣ်ပာ်ထီၣ်တမံၤ, လၢအမ့ၢ်တၢ်အဂ့ၤကတၢၢ်လၢတၢ်လၢနဟီၣ်ခိၣ်အတၤသၣ်အကျါတက့ၢ်.

¹⁰ နမ့ၢ်မၤဒီး, နသိၣ်ဧိၤဖီဧိၤကပှဲၤဒီးဘုဧိၤဟုဧိၤဒီး နစပံးထံကအါဝဲတုၤဒၣ်လဲာ်တၢ်ပာ်ဖှိၣ်အီၤခဲလၢာ်အဂီၢ်တၢ်လီၢ် တအိၣ်လၢၤဘၣ်န့ၣ်လီၤ.

¹¹ ယဖိခွါဧၢ, ဖဲယွၤသိၣ်ဃီၣ်နၤန့ၣ်ပာ်သူၣ်ပာ်သးသပှၢ်ပှၢ်ဒီး တူၢ်လိာ်အီၤဒ်တၢ်ဟ့ၣ်ပလီၢ်တမံၤအသိးတက့ၢ်.

¹² ယွၤသိၣ်ဃီၣ်ပှၤလၢအအဲၣ်ဝဲတဖၣ်, ဒ်ပၢ်တဂၤသိၣ်ဃီၣ် အဖိခွါတဂၤလၢအဒိးဘၣ်တၢ်လၤကပီၤလၢအဃိသ့ဝဲအသိးန့ၣ်လီၤ.

¹³ ပှၤလၢအကဲထီၣ်ပှၤကူၣ်သ့ဒီးမၤန့ၢ်တၢ်သ့ၣ်ညါနၢ်ပၢၢ်န့ၣ် ဘၣ်ဆိၣ်ဂ့ၤဝဲနီၢ်နီၢ်လီၤ.

¹⁴ အဂ့ၢ်ဒ်အံၤ, တၢ်န့ၢ်ဘၣ်လၢအီၤန့ၣ်, ဂ့ၤဒိၣ်န့ၢ်တၢ်န့ၢ်ဘၣ်လၢ စ့ညၣ်တက့ၢ်ဒီးအဘျုးအဖှိၣ်န့ၣ်ဂ့ၤဒိၣ်န့ၢ်ထူတက့ၢ်လီၤ.

¹⁵ တၢ်ကူၣ်သ့အံၤအလုၢ်အပှ့ၤအိၣ်ဒိၣ်န့ၢ်တၢ်မျၢ်ပလဲတဖၣ်တက့ၢ်လီၤ. ကယဲၢ်တၢ်လၢနသးလီအီၤခဲလၢာ်န့ၣ်နထိၣ်သတြီၤဒီးအီၤတန့ၢ် ဘၣ်.

¹⁶ တၢ်ကူၣ်သ့ဟ့ၣ်နၤတၢ်အိၣ်ကၢအိၣ်ခိး, ဃုာ်ဒီးတၢ်ထူးတၢ်တီၤ ဒီးတၢ်လၤကပီၤစ့ၢ်ကီးလီၤ.

¹⁷ တၢ်ကူၣ်သ့မၤမုာ်မၤခုၣ်နတၢ်အိၣ်မူ, ဒီးဆှၢနၤလၢကျဲမုာ် ကျဲခုၣ်သ့ဝဲန့ၣ်လီၤ.

¹⁸ ပှၤလၢအကဲထီၣ်ပှၤကူၣ်သ့တဖၣ်န့ၣ်, ဘၣ်ဆိၣ်ဂ့ၤဝဲနီၢ်နီၢ်လီၤ. တၢ်ကူၣ်သ့ကဟ့ၣ်အဝဲသ့ၣ်လၢတၢ်မူလီၤ.

¹⁹ ယွၤတ့လီၤတ့ၢ်ဟီၣ်ခိၣ်လၢအတၢ်ကူၣ်သ့, ဒီးလၢအတၢ်သ့ၣ်ညါဒၣ်ဝဲန့ၣ်ကျဲၤလီၤပာ်လီၤမူခိၣ်လၢအလီၢ် အကျဲလီၤ.

²⁰ အတၢ်ကူၣ်သ့ဒုးယွၤလီၤထံကျိတဖၣ်, ဒီးတၢ်အၢၣ်တဖၣ်ဒ်သိးကဟ့ၣ်တၢ်စူၤထံလၢဟီၣ်ခိၣ်လီၤ.

²¹ ယဖိခွါဧၢ, ဟံးဃာ်နတၢ်ကူၣ်သ့ဒီးတၢ်ထံၣ်တၢ်လၢသးအမဲာ်တက့ၢ်. ပျဲတၢ်သ့ၣ်ညါတဖၣ်အံၤဟးဖးဒီးနၤလ့ၤတက့ၤတဂ့ၤ.

²² အဝဲသ့ၣ်ကဟ့ၣ်နၤလၢတၢ်မူ, တၢ်မူလၢအအိၣ်ဒီးတၢ်သူၣ်ဖှံ သးညီဒီးတၢ်ဘၣ်ဆိၣ်ဂ့ၤနီၢ်နီၢ်န့ၣ်လီၤ.

²³ နကလဲၤဘၣ်လၢနကျဲပူၤဒုၣ်ပူၤဒါ, ဒီးနခီၣ်တဘၣ်တိၢ်ဒၣ်လဲာ်ဘၣ် လီၤ.

²⁴ တုၤနမံလီၤလၢလီၢ်မံခိၣ်ဒီးနတပျံၤဘၣ်တၢ်ဘၣ်. ဒီးနကမံလၢတၢ်သူၣ်တုၤလီၤသးတုၤလီၤအပူၤသီတနၤကျၢၤလီၤ.

²⁵ နတဘၣ်ဘၣ်ယိၣ်လၢတၢ်တတၢးတနါသတူၢ်ကလာ်တဖၣ်က ဟဲဘၣ်နၤ, ဒ်ကလံၤမုၢ်ဟဲဘၣ်ပှၤတတီတလိၤတဖၣ်အသိးန့ၣ်ဘၣ်.

²⁶ ယွၤကအံးထွဲကွၢ်ထွဲနၤလီၤ. တပျဲနလီၤတဲာ်ကွံာ်ဆူ ပျံၤသကွီၤအပူၤဘၣ်.

²⁷ ဖဲနမၤသ့တဘျီလၢ်လၢ်န့ၣ်, မၤဂ့ၤပှၤလၢလိၣ်ဘၣ်အီၤတဖၣ်န့ၣ်တက့ၢ်.

²⁸ နမၤစၢၤအီၤခဲအံၤမ့ၢ်သ့ဒီး, တဲပှၤလၢနဃၢၤနီတစုလၢအကအိၣ်ခိးဝဲ တုၤခဲမုၢ်ဆ့ၣ်တဂ့ၤ.

²⁹ ကူၣ်အၢတၢ်တမံၤမံၤလၢကမၤဘၣ်ဒိဆါပှၤလၢနဃၢၤလၢအအိၣ်ဘူး ဒီးနၤဒီးနာ်န့ၢ်နၤန့ၣ်တဂ့ၤ.

³⁰ ဂ့ၢ်လိာ်ဘှီလိာ်တၢ်ကလီကလီဒီးပှၤတဂၤဂၤဖဲအဝဲတမၤဆါတ့ၢ် ဘၣ်နၤနီတမံၤန့ၣ်တဂ့ၤ.

³¹ သူၣ်က့ၣ်သးကါပှၤမၤအၢမၤသီတၢ်တဖၣ်မ့ၢ်ဂ့ၤဆၢမၤတၢ်ဒ်အဝဲသ့ၣ် မၤဝဲအသိးမ့ၢ်ဂ့ၤန့ၣ်တဂ့ၤ.

³² အဂ့ၢ်ဒ်အံၤ, ယွၤသးဟ့ပှၤလၢအမၤတၢ်အၢတၢ်သီလီၤ. မ့မ့ၢ်ပှၤအတီအလိၤတဖၣ်န့ၣ်တူၢ်လိာ်ဝဲဆူအတၢ်ရ့လိာ်မုာ်လိာ် အပူၤလီၤ.

³³ ယွၤပာ်ဖှိၣ်တၢ်ဆိၣ်အၢတမံၤလၢပှၤတတီတလိၤအဟံၣ်တဖၣ်အဖီခိၣ် လီၤ. မ့မ့ၢ်ဆိၣ်ဂ့ၤပှၤအတီအလိၤတဖၣ်အတၢ်အိၣ်တၢ်ဆိးအလီၢ်န့ၣ်လီၤ.

³⁴ အဝဲဒုၣ်ဒွဲၣ်ပှၤဒုၣ်ဒွဲၣ်တၢ်တဖၣ်ဒီးဒုးနဲၣ်ဖျါထီၣ်အဘျုး အဖှိၣ်လၢပှၤဆီၣ်လီၤအသးတဖၣ်န့ၣ်လီၤ.

³⁵ ပှၤကူၣ်တၢ်သ့တဖၣ်ကန့ၢ်သါတၢ်လၤကပီၤလီၤ. မ့မ့ၢ်ပှၤဟးဂီၤဖိတဖၣ်န့ၣ်ကပာ်ဖှိၣ်အါထီၣ်ဒၣ်အတၢ်မဲာ်ဆှး န့ၣ်လီၤ.