တၢ်ကတိၤဒိ. 27 - Sgaw Karen Common Bible

¹ ပာ်ကဖိနသးလၢခဲဂီၤကိာ်အဂ့ၢ်နီတစုတဂ့ၤ. အဂ့ၢ်ဒ်အံၤ, တၢ်ကမၤအသးလၢခဲအံၤဒီးဆူညါအဘၢၣ်စၢၤန့ၣ်, နတသ့ၣ်ညါဘၣ်.

² ပျဲပှၤဂၤစံးထီၣ်ပတြၢၤနၤတက့ၢ်, ပျဲပှၤသမှံၤဒၣ်လဲာ်စံး ထီၣ်ပတြၢၤနၤတက့ၢ်. စံးထီၣ်ပတြၢၤလီၤနသးဒၣ်နဲနီတစုတဂ့ၤ.

³ လၢၢ်ဧိၤလ့ဧိၤဒီးမဲးဧိၤဟီၣ်ဧိၤအတၢ်ဃၢတၢ်စုာ်န့ၣ်တုၤအဘၣ် တၢ်ထိၣ်သတြီၤအီၤဒီးတၢ်ကိၢ်တၢ်ဂီၤလၢတၢ်သူၣ်တထံသးတဆးဒုး အိၣ်ထီၣ်သ့န့ၣ်, တမ့ၢ်တၢ်နီတမံၤဘၣ်.

⁴ တၢ်သူၣ်ဒိၣ်သးဖျိးန့ၣ်အၢသီဒီးမၤဟးဂီၤတၢ်သ့လီၤ. ဘၣ်ဆၣ်ဒီးတုၤတၢ်ထိၣ်သတြီၤအီၤဒီးတၢ်သူၣ်က့ၣ်သးကါန့ၣ်, တမ့ၢ်တၢ်နီတမံၤလၢၤဘၣ်လီၤ.

⁵ ဂ့ၤဒိၣ်တက့ၢ်လၢတၢ်သိၣ်ဃီၣ်ပှၤတဂၤဂၤဖျိဖျိဖျါဖျါအါန့ၢ် ဒံးတၢ်ပျဲအဆိကမိၣ်ဝဲလၢနတသူၣ်အိၣ်သးအိၣ်အီၤနီတစဲးဘၣ် တခီန့ၣ်လီၤ.

⁶ တံၤသကိးတဂၤမ့ၢ်မၤဘၣ်ဒိဘၣ်ထံးနၤဒၣ်လဲာ်, အတၢ်ပာ်အသးမ့ၢ်တၢ်တီတီလိၤလိၤလီၤ. ဘၣ်ဆၣ်, ဖဲဒုၣ်ဒါတဂၤပာ်ထီၣ်အစုလၢနဖံဘၣ်ခိၣ်ဒီး, ပလီၢ်နသးတက့ၢ်.

⁷ ဖဲနဘျဲးအီၣ်တၢ်န့ၣ်, နကဂ့ၢ်လိာ်ဒၣ်လဲာ်ကနဲစီလီၤ. ဘၣ်ဆၣ်ဒီးဖဲတၢ်သၣ်ဝံၤနသးန့ၣ်, တၢ်အီၣ်လၢအခၣ်ဒၣ်လဲာ်ဆၢဝဲလီၤ.

⁸ ပှၤတဂၤလၢအအိၣ်ယံၤဒီးဟံၣ်န့ၣ်, လီၤဂာ်ဒီးထိၣ်တဘ့ၣ်လၢအယံၤဒီးအသွံလီၤ.

⁹ တၢ်နၢမူဒီးသိနၢမူမၤမုာ်မၤခုၣ်အါထီၣ်နသးလီၤ. မ့မ့ၢ်တၢ်ကိၢ်တၢ်ဂီၤမၤလီၤကလဲကွံာ်နသးအတၢ်ဃူတၢ်မုာ်လီၤ.

¹⁰ သးပ့ၤနီၣ်နတံၤသကိးတဖၣ်ဒီးနပၢ်အတံၤသကိးတဖၣ်တဂ့ၤ. နမ့ၢ်အိၣ်လၢတၢ်ကိၢ်တၢ်ဂီၤအပူၤဒီးဃ့နဒီပုၢ်ဝဲၢ်အတၢ်မၤစၢၤ တဂ့ၤ. ပှၤလၢနဃၢၤလၢအအိၣ်ဘူးဒီးနၤတဂၤမၤစၢၤနၤက သ့အါန့ၢ်ဒံးနဒီပုၢ်ဝဲၢ်လၢအအိၣ်ယံၤတဂၤတက့ၢ်န့ၣ်လီၤ.

¹¹ ယဖိခွါဧၢ, ကူၣ်တၢ်သ့တက့ၢ်ဒီးယကသူၣ်ခုသးခုယဲလီၤ. ဒီးယကအိၣ်ဒီးတၢ်စံးဆၢလၢပှၤတဂၤလၢ်လၢ်လၢအဒုၣ်ဒွဲၣ် ယၤန့ၣ်လီၤ.

¹² ပှၤလၢအအိၣ်ဒီးတၢ်သူၣ်ဆးသးဆးန့ၣ်, ကထံၣ်ဆိတၢ်ကိၢ်တၢ်ဂီၤဟဲဝဲဒီးပဒ့ၣ်အီၤလီၤ. မ့မ့ၢ်, ပှၤလၢအတဆိကမိၣ်တၢ်တဂၤန့ၣ်ကလဲၤနုာ်ဝဲဆူအပူၤလိၤ လိၤဒီးကပီၢ်ယၢ်လီၤက့ၤအသးလၢခံလီၤ.

¹³ ပှၤတဂၤလၢ်လၢ်လၢအသးတဆးတုၤဒၣ်လဲာ်အအုၣ်ကီၤအသးလၢ ကဟံးန့ၢ်မူဒါလၢပှၤလၢအတသ့ၣ်ညါဝဲတဂၤအဒ့ၣ်ကမၣ်အဂီၢ်န့ၣ်, ကြၢးတၢ်ဟံးဃာ်အတၢ်စုလီၢ်ခီၣ်ခိၣ်ဒၣ်ဝဲတဖၣ်ဒ်တၢ်အုၣ်ကီၤ အသိးလၢတၢ်ကဟ့ၣ်က့ၤဒ့ၣ်ကမၣ်အဂီၢ်န့ၣ်လီၤ.

¹⁴ တၢ်ထိၣ်ဂဲၤဆၢထၢၣ်နတံၤသကိးဂီၤဂီၤလၢနတၢ်ဆၢဂ့ၤဆၢဝါအီၤ လၢနကလုၢ်ဖးဒိၣ်န့ၣ်, ကမ့ၢ်ဘၣ်ဖုးနဆိၣ်အၢအီၤတခီန့ၣ်လီၤ.

¹⁵ မါလၢအအ့န့တဂၤန့ၣ်, လီၤဂာ်ဒီးထံလီၤစီၤစီာ်, စီာ်, စီာ်, လၢတၢ်စူၤအမုၢ်တနံၤအသိးလီၤ.

¹⁶ နမၤဘှ့ၣ်မၤဘှီၣ် အီၤကသ့ဒ်လဲၣ်. မ့ၢ်နကျဲးစၢးတြီကွၢ်ကလံၤအူ တၢ်, မ့တမ့ၢ်ဘၣ်ဒီး, မ့ၢ်နကျဲးစၢးစိာ်ကွၢ်သိပှဲၤလၢနစုပူၤတဘျီဘျီဧါ.

¹⁷ ဒ်ထးကျ့အ့ၣ်အသးအသိးန့ၣ်, ပှၤမၤလိန့ၢ်တၢ်လၢတဂၤဒီးတဂၤ အအိၣ်လီၤ.

¹⁸ အံးထွဲကွၢ်ထွဲချၢၣ်ဒၢတထူၣ်ဒီးနကအိၣ်ဒီးချၢၣ်ဒၢအသၣ်တဖၣ် လၢတၢ်အီၣ်အဂီၢ်လီၤ. တၢ်ခ့တၢ်ပှၤတဂၤလၢအကွၢ်ထွဲဒီးမၤစၢၤအကစၢ်န့ၣ်ကဒိးဘၣ်တၢ် မၤလၤမၤကပီၤအီၤလီၤ.

¹⁹ ဒ်နကွၢ်လီၤထံဒီးနထံၣ်က့ၤနမဲာ်သၣ်ဒၣ်နဲအသိးန့ၣ်, တၢ်လၢနထံၣ်အီၤလၢနသးပူၤန့ၣ်, မ့ၢ်နကစၢ်ဒၣ်နဲလီၤ.

²⁰ ပှၤကညီအသးဆၢန့ၢ်တၢ်န့ၣ်လီၤဂာ်ဒ်ပှၤသံတဖၣ်အကီၢ်လၢဒၢးအိၣ် ဒံးဝဲအါမးတဘိယူာ်ဃီအသိးန့ၣ်လီၤ.

²¹ ထူဒီးစ့ဘၣ်တၢ်မၤကွၢ်အီၤလၢမ့ၣ်အူလီၤ. ပှၤကညီတဂၤအမံၤဂ့ၤသၣ်ဂ့ၤဘၣ်တၢ်မၤကွၢ်အီၤသ့စ့ၢ်ကီးန့ၣ်လီၤ.

²² နမ့ၢ်ဒိတီၢ်ပှၤအမၢးတဂၤတုၤအသံတယူာ်ဘၣ်အသးဒၣ်လဲာ်န့ၣ်, နဒိတီၢ်ထုးထီၣ်ကွံာ်အတၢ်မၢးလၢအပူၤတန့ၢ်ဒံးဘၣ်.

²³ ကွၢ်ထွဲနသိဒီးဂီၤဖံးတဖၣ်လီၤတံၢ်လီၤဆဲးတသ့ဖဲအသ့တက့ၢ်.

²⁴ မ့ၢ်အဂ့ၢ်ဒ်လဲၣ်န့ၣ်, တၢ်ထူးတၢ်တီၤတမ့ၢ်တၢ်ဂၢၢ်တၢ်ကျၢၤဘၣ်. ပှၤကလုာ်တဖၣ်ဒၣ်လဲာ်တအိၣ်လီၤထူလီၤယိာ်ဘၣ်.

²⁵ ဖဲဘုအသီတဝီမဲထီၣ်သၣ်ထီၣ်ဝဲအခါန့ၣ်, ကူးဘုလီၢ်လံၤ, ဒီးနီၣ်ဧိၤမံၤဧိၤလၢကစၢၢ်တဖၣ်အကပၤတက့ၢ်.

²⁶ နမၤကဲထီၣ်တၢ်ကူတၢ်သိးတဖၣ်လၢနသိတဖၣ်အဆူၣ်သ့ဝဲဒီးပှ့ၤ ဟီၣ်ခိၣ်လၢစ့လၢနမၤန့ၢ်အီၤခီဖျိနဆါကွံာ်နမဲာ်တဲးလဲး တနီၤသ့ဝဲလီၤ.

²⁷ ဒီးမဲာ်တဲးလဲးအဂၤလၢအအိၣ်တီၢ်တဖၣ်ကဟ့ၣ်ထီၣ်နၤဒီးနဟံၣ်ဖိ ဃီဖိလၢတၢ်နုၢ်ထံ, ဒီးလၢနခ့နပှၤပိာ်မုၣ်တဖၣ်အဂီၢ်စ့ၢ်ကီးန့ၣ်လီၤ.