တၢ်ကတိၤဒိ. 25 - Sgaw Karen Common Bible

စီၤၡလိၤမိၤအတၢ်ကူၣ်သ့အတၢ်ကတိၤတဖၣ်လၢအစံးအါထီၣ်ဝဲ

¹ အအံၤမ့ၢ်စီၤၡလိၤမိၤအတၢ်ကူၣ်သ့အတၢ်ကတိၤတဖၣ်လၢအစံးအါထီၣ် ဝဲဒီးဘၣ်တၢ်ကွဲးဆဲအီၤလၢပှၤတဖၣ်လၢကီၢ်ယူဒၤအစီၤပၤဃံး စကံယၤအကွီၢ်ဘျီၣ်ပူၤန့ၣ်လီၤ.

² တၢ်ပာ်တဒၢတၢ်တမံၤန့ၣ်မ့ၢ်ကစၢ်ယွၤအလၤကပီၤလီၤ. တၢ်ဃုထံၣ်မၤဖျါထီၣ်တၢ်တမံၤန့ၣ်မ့ၢ်စီၤပၤတဖၣ် အလၤကပီၤလီၤ.

³ စီၤပၤဆိကမိၣ်တၢ်မနုၤမနုၤန့ၣ်နတသ့ၣ်ညါနီတစုဘၣ်. အတၢ်ဆိကမိၣ်တဖၣ်ပျံကွံာ်ပှၤဒ်မူခိၣ်အိၣ်ထီၣ်ထီဝဲမ့ၢ်ဂ့ၤ, ပီၣ်လဲၣ်ယိာ်ဝဲအသိးမ့ၢ်ဂ့ၤန့ၣ်လီၤ.

⁴ ဟံးထီၣ်ကွံာ်တၢ်တကဆှီတဖၣ်လၢစ့အပူၤတက့ၢ်. ဒီးပှၤပိာ်စ့ဒုးကဲထီၣ်အီၤလၢတၢ်အဃံအလၤတမံၤသ့ဝဲလီၤ.

⁵ ပာ်ပှၤဟ့ၣ်ကူၣ်တၢ်အအၢအသီတဖၣ်ယံၤဒီးစီၤပၤတက့ၢ်. အန့ၣ်ဒီးအတၢ်ပၢတၢ်ပြးကဘၣ်တၢ်သ့ၣ်ညါအီၤလၢ အတၢ်စံၣ်ညီၣ်တီအဃိလီၤ.

⁶ ဖဲနဆၢထၢၣ်လၢစီၤပၤအမဲာ်ညါန့ၣ်မၤဒိၣ်မၤသွါနသးဒီးပာ်မၤ နသးဒ်ပှၤလၢအကါဒိၣ်တဂၤအသိးတဂ့ၤ.

⁷ အဂ့ၢ်ဒ်အံၤ, တၢ်ကွဲန့ၢ်ကိးန့ၢ်နၤဒ်သိးနကဟံးန့ၢ်တၢ်လီၢ်လၢ အထီထီၣ်တတီၤန့ၣ်ဂ့ၤဒိၣ်န့ၢ်ဒံးတၢ်စံးဘၣ်နၤလၢနကဟ့ၣ်လီၤ ကွံာ်နလီၢ်ဆူပှၤလၢအကါဒိၣ်န့ၢ်နၤတက့ၢ်န့ၣ်လီၤ.

⁸ လဲၤချ့ကဲၣ်ဆိးဆူကွီၢ်ဘျီၣ်ပူၤဘၣ်ဃးတၢ်လၢနထံၣ်ဘၣ်တ့ၢ် တမံၤအဂ့ၢ်န့ၣ်တဂ့ၤ. ပှၤအုၣ်အသးအဂၤလၢခံတဂၤမ့ၢ်ဒုးနဲၣ်ဖျါဝဲလၢနကမၣ်လံဒီး, တုၤနုၤတစုနကမၤက့ၤနဲဒ်လဲၣ်.

⁹ ဖဲနၤဒီးပှၤလၢနဃၢၤအိၣ်ဒီးတၢ်ဆိကမိၣ်တမံၤလၢအလီၤဆီလိာ် အသးန့ၣ်, မၤဘၣ်လိာ်က့ၤအီၤလၢသုဝဲကဒဲကဒဲအဘၢၣ်စၢၤဒီးလီၣ်ဖျါတၢ် ခူသူၣ်နီတမံၤတဂ့ၤ.

¹⁰ မ့တမ့ၢ်ဘၣ်ဒီး, ပှၤခဲလၢာ်ကသ့ၣ်ညါဝဲလၢနပၢၤဃာ်တၢ်ခူသူၣ် တမံၤတသ့ဘၣ်ဒီးနအိၣ်မူတြူာ်ကွံာ်တၢ်မဲာ်ဆှးတန့ၢ်နီတဘျီ လၢၤဘၣ်န့ၣ်လီၤ.

¹¹ တၢ်ကတိၤလၢအဘၣ်တၢ်ကတိၤအီၤဘၣ်ဘျီးဘၣ်ဒါန့ၣ်လီၤဂာ်ဒီး သၣ်သွံထူတဖၣ်အိၣ်ဝဲလၢတြၤစ့အပူၤအသိးန့ၣ်လီၤ.

¹² ပှၤလၢအတၢ်လဲၤခီဖျိအါတဂၤအတၢ်ဟ့ၣ်ပလီၢ်တထံၣ်ဆူ ပှၤတဂၤဂၤလၢအသးအိၣ်ဒိကနၣ်အီၤန့ၣ်, လုၢ်ဒိၣ်ပှ့ၤဒိၣ်အါန့ၢ်ဒံးပသံးထူတဖၣ်မ့ၢ်ဂ့ၤ, တၢ်ကယၢကယဲ လၢအဘၣ်တၢ်မၤအီၤလၢထူစီမ့ၢ်ဂ့ၤတက့ၢ်န့ၣ်လီၤ.

¹³ ပှၤစိာ်တၢ်ကစီၣ်လၢတၢ်နာ်န့ၢ်အီၤသ့တဂၤန့ၣ်မၤမူမၤဂဲၤက့ၤ ပှၤလၢအမၢလီၤအီၤတဂၤအသး, လီၤဂာ်ဒ်ထံခုၣ်လၢတၢ်ကိၢ်ခါကူးဘုအကတီၢ်အသိးန့ၣ်လီၤ.

¹⁴ ပှၤလၢအအၢၣ်လီၤအသးလၢကဟ့ၣ်တၢ်ဒီးတဟ့ၣ်ဝဲနီတဘျီဘၣ်တဖၣ် န့ၣ်, လီၤဂာ်ဒီးတၢ်အၢၣ်တဖၣ်ဒီးကလံၤလၢတဟဲစိာ်မူခိၣ်ထံ ဘၣ်အသိးန့ၣ်လီၤ.

¹⁵ တၢ်မၢန့ၢ်ဆီၣ်ခံတၢ်လၢတၢ်သးစူၤအပူၤန့ၣ်မၤလီၤပှီၢ်ကွံာ်တၢ် တြီအဆူၣ်ကတၢၢ်ဒီးမၤန့ၢ်ပှၤပၢတၢ်တဖၣ်အသးဒၣ်လဲာ်သ့ဝဲလီၤ.

¹⁶ အီၣ်ကနဲစီအါန့ၢ်နကြၢးအီၣ်န့ၣ်တဂ့ၤ. မ့ၢ်အါကဲၢ်ဆိးဒီး ကဒုးဘှိးထီၣ်နၤလီၤ.

¹⁷ လဲၤအိၣ်သကိးပှၤလၢနဃၢၤခဲခဲအံၤတဂ့ၤ. အသးကလီၤဘှံးလၢနဃိ, ဒီးကသးဟ့ဘၣ်ဖုးနၤလီၤ.

¹⁸ တၢ်အုၣ်အသးကဘျံးကဘျၣ်တမံၤန့ၣ်မၤသံတၢ်သ့ထဲသိးဒီးနးတဘ့ၣ်, တၢ်ဒုးအနီၣ်တီၢ်တဘိ, မ့တမ့ၢ်, ပျၢ်တဘိလၢအခိၣ်စူန့ၣ်လီၤ.

¹⁹ တၢ်သန့ၤပသးလၢပှၤလၢတၢ်နာ်န့ၢ်အီၤတသ့တဂၤဖဲတၢ်ကိၢ်တၢ်ဂီၤ ဖးဒိၣ်တမံၤအဆၢကတီၢ်န့ၣ်, လီၤဂာ်ဒ်တၢ်ကျဲးစၢးအ့ၣ်အီၣ်တၢ်လၢမဲလၢအတကျၢၤတဘ့ၣ်ဒီး တၢ်ဟးလၢခီၣ်လၢအဆၢတလံာ်ကွံာ်တခီအသိးန့ၣ်လီၤ.

²⁰ တၢ်သးဝံၣ်န့ၢ်တၢ်လၢပှၤအသးလီၤစၢ်လီၤဘှါတဂၤအဂီၢ်န့ၣ်, လီၤဂာ်ဒ်တၢ်ဘ့ၣ်ကွံာ်အကူအသိးတဖၣ်လၢတၢ်ဂိၢ်အမုၢ်တနံၤ, မ့တမ့ၢ်, တၢ်လံာ်လူာ်အံသၣ်လၢတၢ်ပူၤလီၢ်တပူၤအသိးန့ၣ်လီၤ.

²¹ နဒုၣ်နဒါတၢ်မ့ၢ်သၣ်ဝံၤအသးဒီးလုၢ်အီၣ်အီၤတက့ၢ်. တၢ်မ့ၢ်သူအသးလၢထံဒီးဟ့ၣ်အီအီၤလၢထံတလီခီတက့ၢ်.

²² နကဒုးလီၤဘၣ်တၢ်မဲာ်ဆှးလၢအဖီခိၣ်နးနးကျံးကျံးဒီးယွၤ ကဟ့ၣ်ဘူးဟ့ၣ်လဲနၤလီၤ.

²³ တၢ်သီၣ်ဝံသဲကလၤဟဲစိာ်တၢ်သူၣ်ဒိၣ်သးဖျိးဒ်ကလံၤလၢ ကလံၤစိးဟဲစိာ်တၢ်စူၤထံလီၤတံၢ်လီၤဆဲးအသိးန့ၣ်လီၤ.

²⁴ တၢ်အိၣ်လၢဟံၣ်ခိၣ်ဒုးအဖီခိၣ်န့ၣ်ဂ့ၤဒိၣ်န့ၢ်ဒံးတၢ်အိၣ် သကိးလၢဟံၣ်ပူၤဃုာ်ဒီးမါလၢအအ့န့တဂၤတက့ၢ်န့ၣ်လီၤ.

²⁵ တၢ်နၢ်ဟူဘၣ်တၢ်ကစီၣ်အမုာ်ဟဲလၢထံယံၤကီၢ်ယံၤန့ၣ်လီၤဂာ်ဒီး တၢ်အီဘၣ်ထံခုၣ်ဖဲပသးဃ့ထီဒီးတၢ်သူပသးလၢထံအဆၢကတီၢ် န့ၣ်လီၤ.

²⁶ ပှၤအဂ့ၤတဂၤလၢအဟ့ၣ်လီၤကွံာ်အသးဆူပှၤအၢသီတဂၤဂၤအစုပူၤ န့ၣ်ဒုးသ့ၣ်နီၣ်ထီၣ်က့ၤနၤလၢထံမူတပူၤလၢအဘၣ်တၢ်မၤဘၣ်အၢ အီၤ, မ့တမ့ၢ်, ထံပူၤလၢအအိၣ်ဒီးစုၣ်လၢအပူၤန့ၣ်လီၤ.

²⁷ ကနဲစီအါကဲၣ်ဆိးန့ၣ်အၢလၢနဂီၢ်လီၤ. ဒ်န့ၣ်အသိး, တၢ်ကျဲးစၢးမၤန့ၢ်တၢ်စံးထီၣ်ပတြၢၤအါကဲၣ်ဆိးန့ၣ်မ့ၢ်တၢ် တမံၤဃီလီၤ.

²⁸ နပၢၤဃးနတၢ်သူၣ်ဒိၣ်သးဖျိးမ့ၢ်တန့ၢ်ဘၣ်ဒီး, နမၤစၢၤလီၤနသးတသ့ဘၣ်ဒ်ဝ့ၢ်တဝ့ၢ်လၢအခိၣ်ဒူတအိၣ်, ဒီးအိၣ်အိးထီၣ်အသးလၢတၢ်ဟဲဒုးန့ၢ်အီၤအဂီၢ်အသိးန့ၣ်လီၤ.