တၢ်ကတိၤဒိ. 22 - Sgaw Karen Common Bible

¹ နမ့ၢ်ဘၣ်ဃုထၢတၢ်လၢတၢ်မံၤဂ့ၤသၣ်ဂ့ၤဒီးတၢ်ထူးဒိၣ် တၢ်တီၤအါအဘၢၣ်စၢၤန့ၣ်ဃုထၢတၢ်မံၤဂ့ၤသၣ်ဂ့ၤတက့ၢ်. ဒီးတၢ်လီၤယူးယီၣ်ပာ်ကဲန့ၣ်ဂ့ၤန့ၢ်ကျိၣ်ဧိၤစ့ဧိၤဒီးထူ ဧိၤလွဲဧိၤတက့ၢ်လီၤ.

² ပှၤထူးပှၤတီၤဒီးပှၤဖှီၣ်ဖိယာ်ဖိအိၣ်ဒီးတၢ်အံၤတမံၤဃီ န့ၣ်လီၤ. ယွၤတ့လီၤအဝဲသ့ၣ်ခံဖုလိာ်လီၤ.

³ ပှၤသူၣ်ထံသးဆးတဖၣ်န့ၣ်ကထံၣ်တၢ်ကီတၢ်ခဲဟဲဝဲဒီးကပဒ့ၣ်အသး လီၤ. ဘၣ်ဆၣ်ဒီး, ပှၤလၢအတဆိကမိၣ်တၢ်တဂၤန့ၣ်ကလဲၤနုာ်လိၤလိၤ ဆူတၢ်ကီတၢ်ခဲအပူၤဒီးသးအုးက့ၤလၢခံလီၤ.

⁴ အိၣ်ဒီးတၢ်ယူးယီၣ်ပာ်ကဲယွၤဒီးဆီၣ်လီၤနသးတက့ၢ်. ဒီးနကန့ၢ်ဘၣ်တၢ်ထူးတၢ်တီၤတဖၣ်, တၢ်လၤကပီၤ, ဒီးတၢ်အိၣ်မူအါနံၣ်အါလါန့ၣ်လီၤ.

⁵ နမ့ၢ်အဲၣ်နသးသမူဒီး, အိၣ်ယံၤဒီးပျံၤသကွီၤတဖၣ်လၢအဖီၣ်န့ၢ် ပှၤတတီတလိၤလၢကျဲဒီဘိန့ၣ်တက့ၢ်.

⁶ သိၣ်လိဖိသၣ်တဂၤလၢအကဘၣ်အိၣ်မူဒ်လဲၣ်ဒ်လဲၣ်န့ၣ်တက့ၢ်. ဒီးအဝဲကသ့ၣ်နီၣ်ထီၣ်က့ၤဝဲလၢအတၢ်အိၣ်မူတစိၤသးလီၤ.

⁷ ပှၤဖှီၣ်ဖိယာ်ဖိတဖၣ်န့ၣ်မ့ၢ်ပှၤထူးပှၤတီၤအကုၢ်အပှၤလီၤ. ဟံးန့ၢ်လိၢ်န့ၢ်စ့တက့ၢ်. ဒီးနကဲထီၣ်ပှၤဟ့ၣ်လိၢ်တၢ်အကုၢ်လီၤ.

⁸ နမ့ၢ်သူၣ်လီၤဖျးလီၤတၢ်စံၣ်ညီၣ်တတီအချံတဖၣ်ဒီးတၢ်နးတၢ် ဖှီၣ်ကမဲထီၣ်ဒိးထီၣ်ဝဲ, ဒီးနတၢ်မၤနးမၤဖှီၣ်ပှၤအဂၤတဖၣ်ကလီၤဘၣ်က့ၤလၢနဖီခိၣ်လီၤ.

⁹ ဟ့ၣ်ညီတၢ်လၢတၢ်သူၣ်အိၣ်သးအိၣ်အပူၤဒီးနီၤဟ့ၣ်နတၢ်အီၣ်ဒီး ပှၤဖှီၣ်ဖိယာ်ဖိတက့ၢ်. နကဘၣ်ဆိၣ်ဂ့ၤလၢတၢ်န့ၣ်အဃိလီၤ.

¹⁰ ဟီထီၣ်ကွံာ်ပှၤပာ်ထီၣ်ထီအသးတဂၤတက့ၢ်. အန့ၣ်ဒီး, တၢ်ကတိၤဂ့ၢ်လိာ်ဘှီလိာ်တဖၣ်မ့ၢ်ဂ့ၤ, တၢ်အ့ၣ်လိာ်ဆိးက့လိာ်မ့ၢ်ဂ့ၤ, ဒီးတၢ်ကတိၤဒုၣ်ဒွဲၣ်တအိၣ်လၢၤဘၣ်.

¹¹ နမ့ၢ်အဲၣ်တၢ်သးကဆှီဒီးတၢ်ကတိၤလၢအဘျုးဒိၣ်ဖှိၣ်အါန့ၣ်, စီၤပၤကကဲထီၣ်နတံၤသကိးလီၤ.

¹² ယွၤအံးထွဲကွၢ်ထွဲတၢ်ဒ်သိးတၢ်မ့ၢ်တၢ်တီအံၤကဘၣ်တၢ်ပၢၤဃာ် အီၤဂ့ၤဂ့ၤဘၣ်ဘၣ်, ခီဖျိတၢ်ပာ်ဖျါထီၣ်ပှၤလီတၢ်တဖၣ်အတၢ်ကတိၤန့ၣ်, တဘၣ်ဘၣ်အဂ့ၢ်လီၤ.

¹³ ပှၤအကၢၣ်တဂၤအိၣ်ဒၣ်လၢဟံၣ်ပူၤဒီးစံးဝဲ, ယမ့ၢ်ဟးထီၣ်ဆူတၢ်ချၢဒီးခ့ယုၢ်တဒုကမၤသံဘၣ်ဖုးယၤလီၤ.

¹⁴ တၢ်အဲၣ်ဘၢမါအဲၣ်ဘၢဝၤန့ၣ်မ့ၢ်ပျံၤသကွီၤတခါလၢအဖီၣ်န့ၢ်ပှၤ တဖၣ်လၢယွၤသးဒိၣ်ဘၣ်အီၤန့ၣ်လီၤ.

¹⁵ ဖိလံၤတဖၣ်ညီနူၢ်လိာ်မၢးအသးဒီးမၤတၢ်နါစံၢ်နါစိၤတဖၣ်လီၤ. ဘၣ်ဆၣ်ဒီးတၢ်သိၣ်ဃီၣ်အနီၣ်တီၢ်တဘိကသိၣ်လိအဝဲသ့ၣ်လၢကဘၣ်အိၣ် မူပာ်သူၣ်ပာ်သးဒ်လဲၣ်ဒ်လဲၣ်န့ၣ်လီၤ.

¹⁶ နမ့ၢ်ဟ့ၣ်တၢ်ဟ့ၣ်တဖၣ်ဆူပှၤထူးပှၤတီၤတဖၣ်မ့ၢ်ဂ့ၤ, နမ့ၢ်မၤနးမၤဖှီၣ်ပှၤဖှီၣ်ဖိယာ်ဖိလၢနကထူးထီၣ်တီၤထီၣ်ဒၣ် နဲအဂီၢ်မ့ၢ်ဂ့ၤဒီး, နကစၢ်ဒၣ်နဲနကဖှီၣ်လီၤယာ်လီၤန့ၣ်လီၤ.

တၢ်ကူၣ်သ့အတၢ်စံးတၢ်ကတိၤ အထံၣ်သၢဆံ

¹⁷ ဒိးနနၢ်, ဒီးယကသိၣ်လိနၤတၢ်လၢပှၤကူၣ်သ့တဖၣ်ကတိၤတ့ၢ်ဝဲလီၤ. မၤလိအဝဲသ့ၣ်အတၢ်သိၣ်လိတဖၣ်,

¹⁸ ဒီးနသ့ၣ်နီၣ်ထီၣ်အီၤဒီးယၢၤထီၣ်က့ၤအီၤမ့ၢ်သ့ဒီး, နကသးခုနဲလီၤ.

¹⁹ ယသးအိၣ်လၢနကပာ်နတၢ်နာ်လၢယွၤအပူၤလီၤ. လၢတၢ်န့ၣ်အဃိဒီး, ယကစံးဘၣ်တဲဘၣ်နၤလၢတၢ်သ့ၣ်တဖၣ်ခဲအံၤ န့ၣ်လီၤ.

²⁰ ယကွဲးလီၤတ့ၢ်တၢ်စံးတၢ်ကတိၤအထံၣ်သၢဆံလၢနဂီၢ်လီၤ. အိၣ်ဝဲဒီးတၢ်သ့ၣ်ညါဒီးတၢ်ဟ့ၣ်ကူၣ်အဂ့ၤတဖၣ်လီၤ.

²¹ ဒီးကသိၣ်လိနၤလၢတၢ်မ့ၢ်တၢ်တီနီၢ်နီၢ်မ့ၢ်တၢ်မနုၤလဲၣ်န့ၣ် လီၤ. အန့ၣ်ဝံၤဒီးဖဲတၢ်မၢလီၤနၤလၢနကဃုထံၣ်န့ၢ်အီၤဒီး, နကဟဲက့ၤစိာ်ကဒါက့ၤတၢ်စံးဆၢအဘၣ်န့ၣ်လီၤ.

-၁-

²² မ့ၢ်လၢနမၤသ့အဃိဒီး, ဃုမၤဘျုးနသးလၢပှၤဖှီၣ်ဖိယာ်ဖိ တဖၣ်အဖီခိၣ်တဂ့ၤ. ပှၤလၢအဆၢထၢၣ်လၢကွီၢ်ဘျီၣ်ဒီးမၤစၢၤလီၤ က့ၤအသးတသ့တဖၣ်န့ၣ်, ဃုမၤဘျုးနသးလၢအဖီခိၣ်တဂ့ၤ.

²³ ယွၤကလိာ်ကွီၢ်တၢ်လၢအဝဲသ့ၣ်အဂီၢ်ဒီးပှၤတဂၤလၢ်လၢ်လၢ အမၤပျံၤမၤဖုးအဝဲသ့ၣ်တဖၣ်အသးသမူန့ၣ်, ယွၤကမၤပျံၤမၤဖုးက့ၤအသးသမူလီၤ.

-၂-

²⁴ မၤတံၤမၤသကိးဒီးပှၤတဖၣ်လၢအသးဒိၣ်ထီၣ်ကဲၤထီၣ်ချ့ဒီးမၤ တပျုာ်တပျီၤတၢ်တဖၣ်န့ၣ်တဂ့ၤ.

²⁵ နကမၤလိန့ၢ်ဘၣ်ဖုးအလုၢ်အလၢ်တဖၣ်ဒီးလဲလိာ်က့ၤနသးတန့ၢ်ဘၣ် ဖုးန့ၣ်လီၤ.

-၃-

²⁶ အၢၣ်လီၤဟံးန့ၢ်မူဒါလၢပှၤအဂၤတဂၤအဒ့ၣ်ကမၢ်တဖၣ်အဂီၢ်တဂ့ၤ.

²⁷ နဟ့ၣ်က့ၤမ့ၢ်တန့ၢ်ဘၣ်ဖုးဒီး, အဝဲသ့ၣ်ကဟံးန့ၢ်ကွံာ်ဒၣ်လဲာ် နလီၢ်မံခးန့ၣ်လီၤ.

-၄-

²⁸ ဟီၣ်ခိၣ်အဆၢအပနီၣ်လီၢ်လံၤတဖၣ်လၢနမိၢ်ပၢ်ဖံဖုလၢပျၢၤတဖၣ် ပာ်လီၤတ့ၢ်ဝဲန့ၣ်, သုးကွံာ်အီၤနီတဘျီတဂ့ၤ.

-၅-

²⁹ ဒုးနဲၣ်ယၤပှၤတဂၤလၢအမၤတၢ်မၤအဂ့ၤတမံၤန့ၣ်တက့ၢ်. ဒီးယကဒုးနဲၣ်နၤပှၤတဂၤလၢအဂ့ၤန့ၢ်ဒံးပှၤအါတက့ၢ်ဒီးကြၢး ဒီးစီၤပၤတဖၣ်အတၢ်ရ့လိာ်မုာ်လိာ်န့ၣ်လီၤ.