တၢ်ကတိၤဒိ. 13 - Sgaw Karen Common Bible

¹ ဖိခွါလၢအကူၣ်တၢ်သ့န့ၣ်ပာ်သူၣ်ပာ်သးသပှၢ်ပှၢ်ဖဲအပၢ်သိၣ်က့ၤ သီက့ၤအီၤန့ၣ်လီၤ. မ့မ့ၢ်ပှၤလၢအပာ်ထီၣ်ထီအသးန့ၣ်, တအၢၣ်လီၤအတၢ်ကမၣ်နီတစုဘၣ်.

² ပှၤအဂ့ၤကဘၣ်တၢ်ဟ့ၣ်ဘျုးက့ၤအီၤလၢတၢ်လၢအကတိၤဝဲအဃိလီၤ. မ့မ့ၢ်ပှၤလၢအလီတၢ်ဝ့ၤတၢ်တဖၣ်န့ၣ်သၣ်ဝံၤတၢ်စုဆူၣ်ခီၣ်တကး န့ၣ်လီၤ.

³ ပှၤလၢအပၢၤအထးခိၣ်န့ၣ်ဟံးဃာ်အသးသမူလီၤ. မ့မ့ၢ်ပှၤလၢအကတိၤနါစိၤတၢ်န့ၣ်မၤဟးဂီၤလီၤအသးဒၣ်ဝဲလီၤ.

⁴ ပှၤအကၢၣ်တဂၤအသးဆၢန့ၢ်တၢ်တမံၤမံၤထဲအံၤထဲနုၤနာ်က့, မၤဝဲတန့ၢ်ဘၣ်. မ့မ့ၢ်ပှၤလၢအမၤတၢ်ဆူၣ်ဆူၣ်တဂၤကမၤန့ၢ်တၢ်ခဲ လၢာ်လၢအဆၢန့ၢ်ဘၣ်ဝဲလီၤ.

⁵ ပှၤအတီအလိၤသးဟ့တၢ်လီတၢ်ဝ့ၤတဖၣ်လီၤ. မ့မ့ၢ်ပှၤအၢပှၤသီအတၢ်ကတိၤတဖၣ်လီၤမဲာ်ဆှးဒီးအလၤကပီၤ တအိၣ်ဘၣ်န့ၣ်လီၤ.

⁶ တၢ်တီတၢ်လိၤကဟုကယာ်ပှၤလၢအတၢ်ကမၣ်တအိၣ်ဘၣ်တဖၣ်လီၤ. တၢ်အၢတၢ်သီမ့ၢ်ပှၤတၢ်ဒဲးဘးဖိတဖၣ်အတၢ်လီၤပှီၢ်န့ၣ်လီၤ.

⁷ ပှၤတနီၤနီၤအတၢ်တအိၣ်နီတမံၤနာ်က့, ပာ်မၤအသးဒ်အမ့ၢ်ပှၤထူး ပှၤတီၤလီၤ. မ့မ့ၢ်အဂၤတဖၣ်ပာ်မၤအသးဒ်အမ့ၢ်ပှၤအဖှီၣ်နာ်က့, အိၣ်ဒီးအတၢ်ထူးတၢ်တီၤအါမးန့ၣ်လီၤ.

⁸ ပှၤအထူးအတီၤတဂၤကဘၣ်သူအစ့လၢကမၤပူၤဖျဲးအသးသမူ အဂီၢ်လီၤ. ဘၣ်ဆၣ်ဒီးပှၤတမၤပျံၤမၤဖုးပှၤအဖှီၣ်အယာ်တဂၤန့ၣ် နီတဂၤဘၣ်.

⁹ ပှၤတီပှၤလိၤတဖၣ်လီၤဂာ်ဒ်တၢ်ကပီၤလၢအကပီၤဝဲဆှံဆှံအသိး န့ၣ်လီၤ. မ့မ့ၢ်ပှၤတတီတလိၤတဖၣ်လီၤဂာ်ဒ်မ့ၣ်အူဒၢလၢ အလီၤပံာ်ကွံာ်ဝဲအသိးန့ၣ်လီၤ.

¹⁰ တၢ်ပာ်ထီၣ်ထီသးန့ၣ်ဒုးအိၣ်ထီၣ်ဒၣ်ထဲတၢ်ကီတၢ်ခဲဧိၤန့ၣ်လီၤ. မ့မ့ၢ်ပှၤလၢအတူၢ်လိာ်တၢ်ဟ့ၣ်ကူၣ်န့ၣ်, မ့ၢ်တၢ်ကူၣ်သ့ဒိၣ်ဒၣ်တၢ် တက့ၢ်လီၤ.

¹¹ တၢ်ထူးတၢ်တီၤလၢနမၤန့ၢ်အီၤညီညီန့ၣ်, ကလီၤမၢ်ကွံာ်န့ၢ်နၤချ့ သဒံးလီၤ. မ့မ့ၢ်နမၤန့ၢ်အီၤဒံးကီဒံးခဲဒီး, နတၢ်ကအိၣ်ဒံးအါန့ၣ်လီၤ.

¹² ဖဲတၢ်မုၢ်လၢ်ဘၣ်တၢ်မၤလီၤသဘှံးအီၤဒီး, သးလီၤသဘှံးဝဲလီၤ. မ့မ့ၢ်တုၤတၢ်ဆၢန့ၢ်တမံၤကဲထီၣ်လိၣ်ထီၣ်ဝဲန့ၣ်, မၤပှဲၤနၤဒီးတၢ်သးခုလီၤ.

¹³ နမ့ၢ်ဂ့ၢ်လိာ်တၢ်ဟ့ၣ်ကူၣ်အဂ့ၤအဘၣ်ဒီး, နဃ့န့ၢ်တၢ်ကီတၢ်ခဲန့ၣ်လီၤ. ပိာ်ထွဲအီၤ, ဒီးနကပူၤဖျဲးလီၤ.

¹⁴ ပှၤကူၣ်သ့အတၢ်သိၣ်တၢ်သီတဖၣ်န့ၣ်မ့ၢ်တၢ်မူအထံထီၣ်ပၢၢ်လီၤ. ကမၤစၢၤနၤဒ်သိးနကပူၤဖျဲးဖဲနသးသမူအိၣ်လၢတၢ်လီၤဘၣ်ယိာ် အပူၤန့ၣ်လီၤ.

¹⁵ တၢ်သူၣ်ဆးသးဆးန့ၣ်, မၤန့ၢ်တၢ်ယူးယီၣ်ပာ်ကဲလီၤ. ဘၣ်ဆၣ်ပှၤလၢတၢ်နာ်န့ၢ်အီၤတသ့တဖၣ်အိၣ်လံဝဲလၢတၢ်ဟးဂီၤ အကျဲခိၣ်လီၤ.

¹⁶ ပှၤလၢအသူၣ်ထံသးဆးတဖၣ်ဆိကမိၣ်တၢ်ထီဘိတချုးလၢအမၤတၢ် တမံၤမံၤန့ၣ်လီၤ. မ့မ့ၢ်ပှၤအမၢးတဖၣ်န့ၣ်ပာ်ဖျါတၢ်တမၤလိမၤဒိးဘၣ် တၢ်န့ၣ်လီၤ.

¹⁷ ပှၤစိာ်တၢ်ကစီၣ်လၢတၢ်နာ်န့ၢ်အီၤတသ့တဖၣ်ဒုးအိၣ်ထီၣ်တၢ်ကီတၢ် ခဲလီၤ. မ့မ့ၢ်ပှၤလၢတၢ်နာ်န့ၢ်အီၤသ့တဖၣ်ဟဲစိာ်တၢ်ဃူတၢ်ဖိးလီၤ.

¹⁸ ပှၤတဂၤလၢအတမၤလိတၢ်ဘၣ်န့ၣ်, ကဖှီၣ်လီၤယာ်လီၤဝဲဒီးကဘၣ် တၢ်မဲာ်ဆှးလီၤ. မ့မ့ၢ်ပှၤတဂၤလၢ်လၢ်လၢအဒိကနၣ်တၢ်သိၣ်က့ၤသီ က့ၤအီၤန့ၣ်, ဘၣ်တၢ်ယူးယီၣ်ပာ်ကဲအီၤလီၤ.

¹⁹ တၢ်ဒိးန့ၢ်ဘၣ်တၢ်လၢနဆၢန့ၢ်ဘၣ်အီၤန့ၣ်ဂ့ၤဆံးဒိၣ်လဲၣ်. ပှၤဟးဂီၤဖိဂ့ၢ်လိာ်လၢကဃၣ်ကွံာ်အသးယံၤဒီးတၢ်အၢလီၤ.

²⁰ လဲၤတၢ်ဒီးပှၤကူၣ်သ့ဒီးနကကဲထီၣ်ပှၤကူၣ်သ့န့ၣ်လီၤ. နမ့ၢ်မၤတံၤမၤသကိးဒီးပှၤဟးဂီၤဖိတဖၣ်န့ၣ်နကဟးဂီၤလီၤ.

²¹ တၢ်ကီတၢ်ခဲလူၤပိာ်ထွဲပှၤတၢ်ဒဲးဘးဖိတဖၣ်အခံသကုၤဆးဒးလီၤ. မ့မ့ၢ်ပှၤတီပှၤလိၤတဖၣ်ကဘၣ်တၢ်ဟ့ၣ်ဘျုးက့ၤအီၤလၢတၢ်ဂ့ၤ တဖၣ်လီၤ.

²² ပှၤအဂ့ၤတဂၤကအိၣ်ဒီးတၢ်ထူးတၢ်တီၤလၢကပာ်လီၤတဲာ်တ့ၢ်ဝဲလၢ အလံၤတဖၣ်အဂီၢ်လီၤ. မ့မ့ၢ်ပှၤတၢ်ဒဲးဘးဖိတဖၣ်အတၢ်ထူးတၢ်တီၤန့ၣ်ကလဲၤဆူပှၤတီ ပှၤလိၤတဖၣ်အအိၣ်လီၤ.

²³ ဟီၣ်ခိၣ်လၢပှၤတထူအီၤထဲၣ်အီၤတဖၣ်ဟ့ၣ်ထီၣ်တၢ်အီၣ်အါမးသ့ဝဲ လၢပှၤဖှီၣ်ဖိယာ်ဖိအဂီၢ်လီၤ. မ့မ့ၢ်ပှၤတတီတလိၤတဖၣ်တြီတၢ်လၢတၢ်ကထူအီၤထဲၣ်အီၤအဂီၢ် လီၤ.

²⁴ နမ့ၢ်တစံၣ်ညီၣ်နဖိခွါဘၣ်ဒီးနတအဲၣ်အီၤဘၣ်. နမ့ၢ်အဲၣ်အီၤဒီးနကသိၣ်က့ၤသီက့ၤအီၤလီၤ.

²⁵ ပှၤတီပှၤလိၤအိၣ်ဒီးတၢ်အီၣ်လၢလၢပှဲၤပှဲၤလၢကအီၣ်ဝဲအဂီၢ်လီၤ. မ့မ့ၢ်ပှၤအၢပှၤသီတဖၣ်န့ၣ်သၣ်ဝံၤသၣ်စ့ၤတဘိယူၢ်ဃီန့ၣ်လီၤ.