တၢ်ကတိၤဒိ. 10 - Sgaw Karen Common Bible

စီၤၡလိၤမိၤအတၢ်ကူၣ်သ့အတၢ်ကတိၤတဖၣ်

¹ အအံၤမ့ၢ်စီၤၡလိၤမိၤအတၢ်ကူၣ်သ့အတၢ်ကတိၤတဖၣ်လီၤ. ဖိခွါလၢအကူၣ်သ့တဂၤန့ၣ်, အပၢ်ဒိးဘၣ်တၢ်လၤကပီၤလၢအဃိလီၤ. မ့မ့ၢ်, ပှၤဟးဂီၤဖိတဂၤန့ၣ်, ဟဲစိာ်တၢ်သးအုးလၢအမိၢ်အဂီၢ်လီၤ.

² တၢ်ထူးတၢ်တီၤလၢနမၤန့ၢ်လၢတၢ်တတီတလိၤအပူၤတမၤဂ့ၤနၤဘၣ်. မ့မ့ၢ်တၢ်တီတၢ်လိၤန့ၣ်, ကမၤပူၤဖျဲးနသးသမူလီၤ.

³ ယွၤတပျဲပှၤအဂ့ၤတဖၣ်ကသၣ်ဝံၤလီၤဒိဘၣ်. မ့မ့ၢ်, ကတြီပှၤတတီတလိၤတဖၣ်လၢအတၢ်သူၣ်လီသးကွံ န့ၣ်လီၤ.

⁴ တၢ်အိၣ်ကၢၣ်အိၣ်ကျူန့ၣ်, ကမၤဖှီၣ်လီၤယာ်လီၤနၤလီၤ. မ့မ့ၢ်, တၢ်မၤတၢ်ဆူၣ်ဆူၣ်န့ၣ်ကဒုးထူးထီၣ်တီၤထီၣ်နၤလီၤ.

⁵ ပှၤလၢအထၢဖှိၣ်တၢ်လၢတၢ်ကိၢ်ခါအကတီၢ်န့ၣ်, မ့ၢ်ဖိခွါလၢအကူၣ်တၢ်သ့လီၤ. မ့မ့ၢ်, ပှၤလၢအမံဝဲလၢကူးဘု အကတီၢ်န့ၣ်, မ့ၢ်ဖိခွါလၢဟဲစိာ်တၢ်မဲာ်ဆှးန့ၣ်လီၤ.

⁶ ပှၤအဂ့ၤတဂၤကဒိးန့ၢ်တၢ်ဆိၣ်ဂ့ၤတဖၣ်လီၤ. မ့မ့ၢ်, ပှၤတတီတလိၤတဂၤအတၢ်ကတိၤတဖၣ်ပာ်ခူသူၣ်အတၢ်စုဆူၣ် ခီၣ်တကးအန့ဆၢၣ်တမံၤန့ၣ်လီၤ.

⁷ ပှၤအဂ့ၤတဖၣ်န့ၣ်ကဘၣ်တၢ်သ့ၣ်နီၣ်ထီၣ်က့ၤအီၤဒ်တၢ်ဆိၣ်ဂ့ၤတမံၤ အသိးလီၤ. မ့မ့ၢ်ပှၤအၢပှၤသီတဂၤန့ၣ်တယံာ်ဘၣ်ဒီးကဘၣ် တၢ်သးပ့ၤနီၣ်ကွံာ်အီၤလီၤ.

⁸ ပှၤလၢအသူၣ်ဖးသးဆးန့ၣ်တူၢ်လိာ်တၢ်ဟ့ၣ်ကူၣ်အဂ့ၤလီၤ. ပှၤလၢအကတိၤတၢ်လၢတၢ်သူၣ်တထံသးတဆးအပူၤတဖၣ်န့ၣ်, ကတုၤလၢတၢ်ဟးဂီၤလီၤ.

⁹ ပှၤအတီအလိၤတဖၣ်လဲၤတၢ်ဂၢၢ်ဂၢၢ်ကျၢၤကျၢၤလီၤ. မ့မ့ၢ်ပှၤလၢအမၤဒၢက့ၣ်ဒၢကူအကျဲတဖၣ်န့ၣ်, ကဘၣ်တၢ်ဖီၣ်န့ၢ်အီၤလီၤ.

¹⁰ ပှၤတဂၤလၢအပာ်ခူသူၣ်တၢ်မ့ၢ်တၢ်တီန့ၣ်, ဒုးအိၣ်ထီၣ်တၢ်ကီ တၢ်ခဲလီၤ. မ့မ့ၢ်, ပှၤတဂၤလၢအကတိၤဘှီက့ၤတၢ်ဖျါဖျါန့ၣ်, မၤတၢ်လၢတၢ်ဃူတၢ်ဖိးအဂီၢ်လီၤ.

¹¹ ပှၤအဂ့ၤတဂၤအတၢ်ကတိၤတဖၣ်မ့ၢ်တၢ်မူအထံထီၣ်ပၢၢ်လီၤ. မ့မ့ၢ်ပှၤအအၢအသီတဂၤအတၢ်ကတိၤတဖၣ်ပာ်ခူသူၣ်တၢ်စု ဆူၣ်ခီၣ်တကးအန့ဆၢၣ်တမံၤန့ၣ်လီၤ.

¹² တၢ်သးဟ့န့ၣ်ထိၣ်ဂဲၤထီၣ်တၢ်အ့ၣ်လိာ်ဆိးက့လိာ်လီၤ. မ့မ့ၢ်, တၢ်အဲၣ်တၢ်ကွံကွၢ်ကပာ်ကွံာ်တၢ်မၤကမၣ်ခဲလၢာ်လီၤ.

¹³ ပှၤလၢအအိၣ်ဒီးတၢ်ကူၣ်တၢ်ဆးန့ၣ်, ကတိၤတၢ်ကူၣ်သ့အတၢ်ကတိၤ လီၤ. မ့မ့ၢ်, ပှၤလၢအသူၣ်တထံအသးတဆးန့ၣ်, ကြၢးဘၣ်တၢ်စံၣ်ညီၣ်အီၤလီၤ.

¹⁴ ပှၤကူၣ်သ့န့ၣ်, ဂုာ်မၤန့ၢ်တၢ်သ့ၣ်ညါနၢ်ပၢၢ်ခဲလၢာ်လီၤ. မ့မ့ၢ်, ဖဲပှၤဟးဂီၤဖိကတိၤတၢ်န့ၣ်, တၢ်ကီတၢ်ခဲအိၣ်တယံၤဘၣ် န့ၣ်လီၤ.

¹⁵ တၢ်ထူးတၢ်တီၤန့ၣ်အိၣ်ပှိၤပှၤထူးပှၤတီၤလီၤ. မ့မ့ၢ်တၢ်ဖှီၣ်တၢ်ယာ်မၤဟးဂီၤပှၤဖှီၣ်ဖိယာ်ဖိလီၤ.

¹⁶ တၢ်မၤဂ့ၤတၢ်အဘူးအလဲမ့ၢ်တၢ်မူလီၤ. မ့မ့ၢ်, တၢ်ဒဲးဘးဆှၢတၢ်ဆူတၢ်မၤအါထီၣ်တၢ်ဒဲးဘးန့ၣ်လီၤ.

¹⁷ ပှၤလၢအဒိကနၣ်တၢ်ဖဲအဘၣ်တၢ်သိၣ်က့ၤသီက့ၤအီၤန့ၣ်ကမူဝဲ လီၤ. မ့မ့ၢ်ပှၤလၢအတတူၢ်လိာ်ဘၣ်ဝဲလၢအတၢ်ကမၣ်လံ န့ၣ်အိၣ်လၢတၢ်လီၤဘၣ်ယိာ်အပူၤလီၤ.

¹⁸ ပှၤတဂၤလၢအပာ်ခူသူၣ်အတၢ်သူၣ်ဟ့သးဟ့န့ၣ်မ့ၢ်ပှၤလီတၢ် တဂၤလီၤ. ပှၤတဂၤဂ့ၤတဂၤဂ့ၤလၢအသီၣ်ဝံသဲကလၤန့ၣ်, မ့ၢ်ပှၤဟးဂီၤဖိလီၤ.

¹⁹ နတၢ်ကတိၤဒံးအါ, နမၤဒဲးဘးတၢ်ကဒံးအါတက့ၢ်လီၤ. နမ့မ့ၢ်ပှၤလၢအကူၣ်တၢ်သ့ဒီးနကအိၣ်ဘှ့ၣ်အိၣ်ဘှီၣ်န့ၣ်လီၤ.

²⁰ ပှၤအဂ့ၤတဂၤအတၢ်ကတိၤတဖၣ်လီၤဂာ်ဒီးစ့လၢအကဆှီန့ၣ်လီၤ. ပှၤအအၢအသီတဂၤအတၢ်ဆိကမိၣ်တဖၣ်အလုၢ်အပှ့ၤတအိၣ်ဘၣ်.

²¹ ပှၤအဂ့ၤတဂၤအတၢ်ကတိၤတဖၣ်ဒုးဘၣ်ဘျုးပှၤအါဂၤလီၤ. ဘၣ်ဆၣ်ဒီးနမၤသံလီၤနသးလၢတၢ်သူၣ်တထံသးတဆးသ့ဝဲလီၤ.

²² ယွၤအတၢ်ဆိၣ်ဂ့ၤန့ၣ်, ဒုးထူးတီၤထီၣ်နၤလီၤ. ဒီးအဝဲတပာ်ဖှိၣ်တၢ်သူၣ်အုးသးအုးဆူနတၢ်ထူးတၢ်တီၤန့ၣ်ဘၣ်.

²³ ပှၤဟးဂီၤဖိသးခုလၢအမၤတၢ်ဒဲးဘးအပူၤလီၤ. ပှၤလၢအအိၣ်ဒီးတၢ်ကူၣ်တၢ်ဆးန့ၣ်, မုာ်လၤဝဲလၢတၢ်ကူၣ်သ့အပူၤ လီၤ.

²⁴ ပှၤတီပှၤလိၤမၤန့ၢ်တၢ်လၢအဆၢန့ၢ်ဘၣ်ဝဲလီၤ. မ့မ့ၢ်, ပှၤတတီတလိၤကဒိးန့ၢ်ဘၣ်တၢ်လၢအပျံၤဝဲအဒိၣ်ကတၢၢ်န့ၣ် လီၤ.

²⁵ ကလံၤသီၣ်ဂီၤဟဲလီၤဝဲဒီးပှၤတတီတလိၤတဖၣ်ဒံကွံာ်ဒံဖျိး ကွံာ်ဝဲလီၤ. မ့မ့ၢ်, ပှၤအတီအလိၤတဖၣ်အိၣ်ဂၢၢ်ဆိးကျၢၤဝဲတဘိ ယူာ်ဃီလီၤ.

²⁶ မၢပှၤအကၢၣ်တဂၤမၤတၢ်တမံၤမံၤလၢနဂီၢ်နီတစုတဂ့ၤ. အဝဲကမၤအ့န့နသးဒ်တၤဆံၣ်ထံလၢနမဲအဖီခိၣ်ဒီးမ့ၣ်အူလုၢ် လၢနမဲာ်ချံပူၤအသိးန့ၣ်လီၤ.

²⁷ တၢ်ပျံၤယွၤန့ၣ်ဒုးထီထီၣ်တၢ်အိၣ်မူလီၤ. မ့မ့ၢ်, ပှၤတတီတလိၤအနံၣ်အလါကဖုၣ်ဝဲလီၤ.

²⁸ ပှၤအဂ့ၤတဖၣ်အတၢ်မုၢ်လၢ်န့ၣ်, ဆှၢအီၤဆူတၢ်သးခုလီၤ. မ့မ့ၢ်, ပှၤအၢပှၤသီတဖၣ်န့ၣ်ကွၢ်စိတၢ်ဆူညါတသ့နီတမံၤဘၣ်.

²⁹ ယွၤကဟုကယာ်ပှၤအတီအလိၤတဖၣ်လီၤ. မ့မ့ၢ်, မၤဟးဂီၤကွံာ်ပှၤမၤကမၣ်တၢ်ခဲလၢာ်လီၤ.

³⁰ ပှၤအတီအလိၤကအိၣ်ဂၢၢ်ဆိးကျၢၤတဘိယူၢ်ဃီလီၤ. မ့မ့ၢ်, ပှၤတတီတလိၤန့ၣ်တအိၣ်ဘၣ်ဝဲလၢထံဧိၤကီၢ်ဧိၤအပူၤဘၣ်.

³¹ ပှၤအတီအလိၤကတိၤတၢ်ကူၣ်သ့လီၤ. မ့မ့ၢ်, ပျ့ၤလၢအကတိၤတၢ်အၢ တၢ်သီန့ၣ်ကဘၣ်တၢ်ဒီၣ်တဲာ်ကွံာ်အီၤလီၤ.

³² ပှၤအတီအလိၤသ့ၣ်ညါတၢ်အဂ့ၤလၢကဘၣ်စံးကတိၤဝဲလီၤ. မ့မ့ၢ်, ပှၤတတီတလိၤကတိၤတၢ်တဖၣ်လၢအမၤဘၣ်ဒိဘၣ်ထံးတၢ်ထီဘိလီၤ.