လံာ်တၢ်ဂံၢ် 5 - Sgaw Karen Common Bible

ပှၤလၢအတကဆှီဘၣ်တဖၣ်

^1-2 ယွၤစံးဘၣ်စီၤမိၤၡ့, “မၤလိာ်ကီၢ်အံၣ်စရ့လးအပှၤဂီၢ်မုၢ်လၢကနီၣ်ထီၣ်ကွံာ်ပှၤကိး ဂၤဒဲးလၢအအိၣ်ဒီးတၢ်ဆါအၢလီၤပျံၤလၢအဖံးလိၤမ့ၢ်ဂ့ၤ, ပှၤလၢအအိၣ်ဒီးနီၢ်ခိအထံအနိယွၤလီၤတၢ်ဆါမ့ၢ်ဂ့ၤ, ဒီးပှၤကိးဂၤဒဲးလၢအတကဆှီဘၣ်ခီဖျိထိးဘၣ်တၢ်သံစိၣ်မ့ၢ် ဂ့ၤန့ၣ်တက့ၢ်.

³ မၢအဝဲသ့ၣ်ကိးဂၤဒဲးလၢအတကဆှီဘၣ်တဖၣ်ဒ်တၢ်ဘူၣ်တၢ်ဘါ အလုၢ်အလၢ်အိၣ်အသိးဟးထီၣ်ကွံာ်ခဲလၢာ်, ဒ်သိးအဝဲသ့ၣ်သုတမၤဘၣ်အၢသူၣ်ဒဲလီၢ်ကဝီၤဖဲယ အိၣ်ဆိးလၢယပှၤဂီၢ်မုၢ်အသိးအကျါတဂ့ၤအဂီၢ်န့ၣ်တက့ၢ်.”

⁴ ပှၤအံၣ်စရ့လးဖိတဖၣ်စူၢ်တၢ်ဒီးနီၣ်ဟးထီၣ်ကွံာ်အဝဲသ့ၣ်ခဲ လၢာ်လၢသူၣ်ဒဲအလီၢ်န့ၣ်လီၤ.

တၢ်လိးက့ၤတၢ်မၤကမၣ်တဖၣ်

^5-6 ယွၤဟ့ၣ်လီၤစီၤမိၤၡ့လၢ, တၢ်မၤလိာ်တဖၣ်လၢအံၣ်စရ့လးအပှၤဂီၢ်မုၢ်အဂီၢ်ဒ်အဖီလာ်အံၤ အသိးန့ၣ်လီၤ. ဖဲပှၤတဂၤဂၤအသးတတီဒီးယွၤဒီးမၤကမၣ်တၢ်ထီဒါအပှၤအဂၤတဂၤ န့ၣ်,

⁷ အဝဲကဘၣ်အၢၣ်လီၤအတၢ်ကမၣ်ဒီးလိးက့ၤတၢ်အလၢအပှဲၤဃုာ်ဒီးတၢ် ပာ်ဖှိၣ်အါထီၣ်မျးကယၤခံဆံဒီးဟ့ၣ်လီၤအီၤဆူပှၤလၢအမၤကမၣ်ဘၣ် တ့ၢ်ဝဲတဂၤအအိၣ်န့ၣ်လီၤ.

⁸ ဘၣ်ဆၣ်ဒီးပှၤတဂၤန့ၣ်မ့ၢ်သံဝဲဒီးအဘူးအတံၢ်တအိၣ်နီတဂၤလၢ တၢ်ဟ့ၣ်အီၤတၢ်လိးက့ၤကသ့န့ၣ်တၢ်လိးက့ၤကဘၣ်တၢ်ဟ့ၣ်အီၤဆူ ယွၤအအိၣ်လၢပှၤလုၢ်တၢ်အခိၣ်တဖၣ်အဂီၢ်န့ၣ်လီၤ. တၢ်လိးက့ၤအံၤတၢ်ကဘၣ်တၢ်ပာ်ဖှိၣ်အါထီၣ်အီၤဒီးသိဖါလၢကဘၣ် တၢ်သူအီၤလၢတၢ်မၤတၢ်ဘူၣ်တၢ်ဘါအလုၢ်အလီၢ်အတၢ်မၤကဆှီထီၣ် က့ၤလၢပှၤတဂၤန့ၣ်အတၢ်ကမၣ်အဂီၢ်န့ၣ်လီၤ.

⁹ ဒ်န့ၣ်အသိးကယဲၢ်တၢ်ဟ့ၣ်မၤဘူၣ်ဆီလၢပှၤအံၣ်စရ့လးဖိတဖၣ်ဟ့ၣ် ဆူယွၤအအိၣ်န့ၣ်ဘၣ်ဃးဒီးပှၤလုၢ်တၢ်အခိၣ်တဂၤလၢအဝဲ သ့ၣ်ဟ့ၣ်ဝဲဆူအအိၣ်န့ၣ်လီၤ.

¹⁰ ပှၤလုၢ်တၢ်အခိၣ်တဂၤဘၣ်တဂၤကဘၣ်ဟံးဃးတၢ်လုၢ်မၤဘူၣ်တဖၣ်လၢ အဘၣ်တၢ်ဟ့ၣ်လီၤအီၤန့ၣ်လီၤ.

ကွီၢ်ဘၣ်ဃးဒီးမါတဖၣ်လၢဝၤတဖၣ်အသးဒ့ဒီလၢအဖီခိၣ်

^11-12 ယွၤမၤလိာ်စီၤမိၤၡ့လၢ, အကဟ့ၣ်လီၤတၢ်သိၣ်လိနဲၣ်ယုၤတဖၣ်ဆူပှၤအံၣ်စရ့လးဖိတဖၣ် အအိၣ်ဒ်လၢလာ်အံၤအသိးန့ၣ်လီၤ. တၢ်ကမၤအသးလၢပှၤပိာ်ခွါတဂၤအသးဒ့ဒီထီၣ်လၢအမါန့ၣ်အသး တတီဒီးအီၤဒီးမၤဘၣ်အၢအသးခီဖျိတၢ်မံဃုာ်ဒီးပှၤပိာ်ခွါ အဂၤတဂၤန့ၣ်လီၤ.

¹³ ဘၣ်ဆၣ်အဝၤတဂၤအံၤတသ့ၣ်ညါလီၤတံၢ်ဝဲ, မ့ၢ်လၢအမါပာ်ခူသူၣ် တၢ်ဂ့ၢ်အံၤ,

¹⁴ ဒီးပှၤအုၣ်အသးတအိၣ်နီတဂၤဘၣ်, ဒီးပိာ်မုၣ်န့ၣ်တဘၣ်တၢ်ဖီၣ်န့ၢ်အီၤဘၣ်ဖဲတၢ်မၤအသးအခါဘၣ် အဃိန့ၣ်လီၤ. မ့တမ့ၢ်ဒ်န့ၣ်ဘၣ်ဒီးတၢ်ကမၤအသးလၢဝၤတဂၤန့ၣ်အသးကဒ့ဒီထီၣ် အမါဖဲအမါတခီအသးတီဒၣ်ဒီးအီၤအခါဒၣ်လဲာ်န့ၣ်လီၤ.

¹⁵ လၢတၢ်မၤအသးဒ်သိးအံၤတခါဂ့ၤတခါဂ့ၤအပူၤန့ၣ်ပှၤပိာ်ခွါ တဂၤန့ၣ်ကဘၣ်လဲၤကိးအမါဆူပှၤလုၢ်တၢ်အခိၣ်အအိၣ်လီၤ. အဝဲကဘၣ်လဲၤစိာ်ဃုာ်စ့ၢ်ကီးဘုမုယီၤအကိၣ်ကမူၣ်လီၤတယၢၢ် တအ့ဖးဆံဆဲၣ်ပူတပူဒ်တၢ်လီၤဘၣ်အီၤအသိးလၢတၢ်လုၢ်မၤဘူၣ် အဂီၢ်, ဘၣ်ဆၣ်ဒီးတဘၣ်လူလီၤသ့ၣ်စၤယံးအသိလၢကိၣ်ကမူၣ် အဖီခိၣ်မ့ၢ်ဂ့ၤ, တဘၣ်ပာ်ထီၣ်တၢ်နၢမူမ့ၢ်ဂ့ၤလၢကိၣ်ကမူၣ်အလိၤ မ့ၢ်ဂ့ၤဘၣ်. အဂ့ၢ်ဒ်အံၤ, တၢ်န့ၣ်မ့ၢ်တၢ်လုၢ်မၤဘူၣ်တမံၤလၢဝၤတဂၤလၢ အသးဒ့ဒီမၤဝဲဒ်သိးကမၤဖျါထီၣ်တၢ်မ့ၢ်တၢ်တီအဂီၢ်န့ၣ်လီၤ.

¹⁶ ပှၤလုၢ်တၢ်အခိၣ်ကဘၣ်ကိးထီၣ်ပိာ်မုၣ်ဒီးမၢအဟဲဆၢထၢၣ်လၢတၢ် လုၢ်လီၢ်အမဲာ်ညါန့ၣ်လီၤ.

¹⁷ အဝဲကလူလီၤထံစီဆှံတနီၤဆူသလၢဟီၣ်ခိၣ်တဖျၢၣ်အပူၤဒီးဟံး န့ၢ်ဟီၣ်ခိၣ်တနီၤလၢအအိၣ်လၢယွၤအိၣ်ဝဲဆိးဝဲအဒဲစီဆှံ အကဝီၤပူၤဒီးဒၢနုာ်လီၤအီၤဆူထံကျါလၢကမၤခၣ်ထီၣ်အီၤ အဂီၢ်န့ၣ်လီၤ.

¹⁸ ဒီးအဝဲကဘ့ၣ်လီၤပိာ်မုၣ်န့ၣ်အခိၣ်သူဒီးဒၢနုာ်လီၤတၢ်လုၢ် မၤဘူၣ်အကိၣ်ကမူၣ်န့ၣ်ဆူပိာ်မုၣ်အစုပူၤန့ၣ်လီၤ. ပှၤလုၢ်တၢ်အခိၣ်န့ၣ်ကဘၣ်ဟံးဃးလီခီလၢတၢ်ဒၢနုာ်ဃးတၢ်ခၣ်ထံ လၢအဟဲစိာ်တၢ်ဆိၣ်အၢတမံၤလၢအစုပူၤလီၤ.

¹⁹ ဝံၤဒီးပှၤလုၢ်တၢ်အခိၣ်ကမၢပိာ်မုၣ်တဂၤန့ၣ်မၤတၢ်ဆိၣ်လီၤသး အတၢ်အၢၣ်လီၤဒ်ပှၤလုၢ်တၢ်အခိၣ်ကတိၤထီၣ်ဝဲအသိး, လၢအစံးဝဲ, “နမ့ၢ်တမၤကမၣ်မုၣ်ကမၣ်ခွါဘၣ်ဒီး, နတဘၣ်တၢ်မၤဆါနၤလၢတၢ်ဆိၣ်အၢလၢထံအံၤဟဲစိာ်ဝဲန့ၣ်ဘၣ်.

²⁰ ဘၣ်ဆၣ်ဒီးနမ့ၢ်မၤတၢ်မၤကမၣ်မုၣ်ကမၣ်ခွါဒီး,

²¹ မ်ယွၤဒုးကဲထီၣ်နမံၤလၢတၢ်ဆိၣ်အၢတမံၤလၢနပှၤကလုာ်အကျါတက့ၢ်. မ်အဒုးသံးကတူၢ်နဒၢလီၢ်အကျိၤလၢကဃ့ထီ ဒီးနဟၢဖၢကညိးထီၣ်တက့ၢ်.

²² မ်ထံအံၤလဲၤနုာ်ဆူနဟၢဖၢအပူၤဒီးဒုးညိးထီၣ်နဟၢဖၢဒီး ဒုးသံးကတူၢ်နဒၢလီၢ်အကျိၤန့ၣ်တက့ၢ်.” ပိာ်မုၣ်န့ၣ်ကဘၣ်စံးဆၢကဒါက့ၤဝဲ, “ယဘၣ်သူၣ်ဘၣ်သးလၢတၢ် အံၤဒီးမ်ယွၤမၤဝဲဒ်န့ၣ်အသိးတက့ၢ်.”

²³ ဝံၤဒီးပှၤလုၢ်တၢ်အခိၣ်ကကွဲးလီၤတၢ်ဆိၣ်အၢအံၤဒီးသ့လီၤတၢ် ကွဲးန့ၣ်ဆူတၢ်ခၣ်ထံအသလၢအပူၤန့ၣ်လီၤ.

²⁴ တချုးလၢအဝဲမၢဒံးပိာ်မုၣ်အံၤအီထံလၢအကဟ့ၣ်အီၤတၢ်ဆါအၢ နးနးကလဲာ်အံၤန့ၣ်,

²⁵ ပှၤလုၢ်တၢ်အခိၣ်ကဟံးန့ၢ်တၢ်လုၢ်မၤဘူၣ်အကိၣ်ကမူၣ်လၢပိာ်မုၣ် အစုပူၤဒီးယူာ်ထီၣ်အီၤလၢတၢ်ပာ်စီဆှံထီၣ်အီၤဆူယွၤအအိၣ် အဂီၢ်, ဒီးပာ်ထီၣ်အီၤလၢတၢ်လုၢ်လီၢ်အဖီခိၣ်န့ၣ်လီၤ.

²⁶ ဝံၤဒီးပှၤလုၢ်တၢ်အခိၣ်ကဟံးထီၣ်ကိၣ်ကမူၣ်တစှီၤဒ်တၢ်လုၢ်တၢ် ပာ်အပနီၣ်တမံၤဒီးဆိၣ်ကဲၤအီၤလၢတၢ်လုၢ်လီၢ်အဖီခိၣ်န့ၣ်လီၤ. လၢခံကတၢၢ်အဝဲကမၢပိာ်မုၣ်အီထံန့ၣ်လီၤ.

²⁷ ပိာ်မုၣ်န့ၣ်မ့ၢ်မၤတ့ၢ်တၢ်မၤကမၣ်မုၣ်ကမၣ်ခွါဒီး, ထံန့ၣ်ကမၤဘၣ်ဒိဆါအီၤနးနးကလဲာ်လီၤ. အဝဲအဟၢဖၢကညိးထီၣ် ဒီးအဒၢလီၢ်အကျိၤကသံးကတူၢ်အသးန့ၣ်လီၤ. အဝဲအမံၤကကဲထီၣ်တၢ်ဆိၣ်အၢတမံၤလၢပှၤဂီၢ်မုၢ်အကျါန့ၣ်လီၤ.

²⁸ မ့မ့ၢ်အဝဲအတၢ်ကမၣ်မ့ၢ်တအိၣ်ဘၣ်ဒီး, တၢ်တမၤဆါအီၤဘၣ်ဒီးအဝဲ ဒၢထီၣ်ဖိတဖၣ်ကသ့ဝဲန့ၣ်လီၤ.

²⁹ အအံၤမ့ၢ်ယူဒၤအတၢ်သိၣ်တၢ်သီလၢကွီၢ်တဖၣ်လၢအဘၣ်ထွဲဒီးပိာ် ခွါတဂၤသးကါတၢ်ဒီးကဲထီၣ်တၢ်သးဒ့ဒီလၢအဂီၢ်လၢအဝဲအမါ မၤတၢ်မၤကမၣ်မုၣ်ကမၣ်ခွါ, အဂ့ၢ်န့ၣ်လီၤ.

³⁰ ပိာ်မုၣ်န့ၣ်ကဘၣ်တၢ်ဒုးဆၢထၢၣ်အီၤလၢတၢ်လုၢ်လီၢ်အမဲာ်ညါ, ဒီးပှၤလုၢ်တၢ်အခိၣ်ကမၤတၢ်ဘူၣ်တၢ်ဘါအတၢ်လုၢ်တၢ်လၢ်အံၤန့ၣ်လီၤ.

³¹ ဝၤတဂၤကဘၣ်တၢ်ပျၢ်ဖျဲးအီၤလၢအတၢ်ကမၣ်, မ့မ့ၢ်ပိာ်မုၣ်တဂၤန့ၣ်, မ့ၢ်မၤကမၣ်တၢ်ဒီး, ကတူၢ်ဘၣ်တၢ်ဒ်အကြၢးဝဲဘၣ်ဝဲဒီးအီၤအသိးန့ၣ်လီၤ.