လံာ်တၢ်ဂံၢ် 3 - Sgaw Karen Common Bibleစီၤအၤဟရိၣ်အဖိခွါတဖၣ် 1 အဝဲအံၤမ့ၢ်စီၤအၤဟရိၣ်ဒီးစီၤမိၤၡ့အဟံၣ်ဖိဃီဖိတဖၣ်, ဖဲအကတီၢ်လၢယွၤကတိၤတ့ၢ်တၢ်ဒီးစီၤမိၤၡ့လၢကစၢၢ်စံၤနါ အဒီခိၣ်န့ၣ်လီၤ. 2 စီၤအၤဟရိၣ်အိၣ်ဒီးအဖိခွါလွံၢ်ဂၤလၢအမ့ၢ်, စီၤနၤဒး, စီၤအဘံဟူၤ, စီၤအလၤဧစၢ်ဒီးစီၤအံသမၢ်န့ၣ်လီၤ. 3 အဝဲသ့ၣ်ဘၣ်တၢ်ဖှူအီၤဒီးပာ်စုအီၤဒ်ပှၤလုၢ်တၢ်အခိၣ်တဖၣ်အသိး န့ၣ်လီၤ. 4 ဘၣ်ဆၣ်ဒီးစီၤနၤဒးဒီးစီၤအဘံဟူၤတဖၣ်ဘၣ်တၢ်မၤသံကွံာ်အီၤ ဖဲအဝဲသ့ၣ်လုၢ်ထီၣ်တၢ်လုၢ်မ့ၣ်အူလၢအတစီဆှံဘၣ်ဆူယွၤအအိၣ် လၢကစၢၢ်စံၤနါအပှၢ်မုၢ်ကနၢပူၤအခါန့ၣ်လီၤ. အဝဲသ့ၣ်အဖိအလံၤတအိၣ်ဘၣ်နီတဂၤဘၣ်. လၢတၢ်န့ၣ်အဃိစီၤအလၤဧစၢ်ဒီးစီၤအံသမၢ်န့ၣ်မၤပှၤလုၢ်တၢ် အခိၣ်အတၢ်မၤဖဲစီၤအၤဟရိၣ်မူဒံးအဖၢမုၢ်န့ၣ်လီၤ. ပှၤလ့ၤဝံဖိတဖၣ်ဘၣ်တၢ်ဃုထၢပာ်လီၤအီၤလၢကမၤတၢ်လၢပှၤ လုၢ်တၢ်အခိၣ်တဖၣ်အဂီၢ် 5-6 ဒီးယွၤစံးဘၣ်စီၤမိၤၡ့, “ဟဲကိးဃီၤပှၤလ့ၤဝံဖိအဒူၣ်ဒီးဃုထၢပာ်လီၤအဝဲသ့ၣ်ဒ် ပှၤလုၢ်တၢ်အခိၣ်စီၤအၤဟရိၣ်အခ့အပှၤတဖၣ်အသိးတက့ၢ်. 7 အဝဲသ့ၣ်ကဘၣ်မၤတၢ်မၤလၢအလီၤဘၣ်အီၤလၢယွၤအိၣ်ဝဲ ဆိးဝဲအဒဲစီဆှံအဂီၢ်ဒီးကဘၣ်မၤတၢ်လၢပှၤလုၢ်တၢ်အခိၣ်တဖၣ် အဂီၢ်ဒီးလၢပှၤဂီၢ်မုၢ်ခဲလၢာ်အဂီၢ်န့ၣ်လီၤ. 8 အဝဲသ့ၣ်ကဘၣ်ဟံးန့ၢ်မူဒါလၢကယဲၢ်ဒဲစီဆှံအတၢ်ပီးတၢ်လီ တဖၣ်အဂီၢ်ဒီးမၤတၢ်လၢပှၤအံၣ်စရ့လးဖိအဂၤတဖၣ်အဂီၢ်န့ၣ်လီၤ. 9 မူဒါထဲတမံၤဧိၤလၢပှၤလ့ၤဝံဖိတဖၣ်ကဘၣ်မၤဝဲန့ၣ်မ့ၢ်တၢ် မၤစၢၤစီၤအၤဟရိၣ်ဒီးအဖိခွါတဖၣ်န့ၣ်လီၤ. 10 နကဘၣ်ဃုထၢပာ်လီၤစီၤအၤဟရိၣ်ဒီးအဖိခွါတဖၣ်လၢကမၤပှၤလုၢ် တၢ်အခိၣ်အတၢ်မၤတဖၣ်အဂီၢ်န့ၣ်လီၤ. ဒီးပှၤအဂၤတဂၤလၢ်လၢ်လၢအဂုာ်မၤအဝဲသ့ၣ်အတၢ်မၤန့ၣ် ကဘၣ်တၢ်မၤသံကွံာ်အီၤန့ၣ်လီၤ.” 11-12 ဒီးယွၤစံးဘၣ်စီၤမိၤၡ့, “ခဲကနံၣ်အံၤပှၤလ့ၤဝံဖိတဖၣ်န့ၣ်ကဘၣ်မ့ၢ် ယတၢ်လီၤ. ဖဲယမၤသံကွံာ်ကယဲၢ်ပှၤအဲၤကူပတူးဖိတဖၣ်အဖိဝဲၢ်ကိန့ၣ်, ယပာ်စီဆှံတ့ၢ်ပှၤအံၣ်စရ့လးဖိအဟံၣ်ဒူၣ်ဃီထၢတဒူၣ်စုာ်စုာ် အဖိခွါဝဲၢ်ကိဒီးကယဲၢ်အဆၣ်ဖိကီၢ်ဖိအဝဲၢ်ကိစုာ်စုာ်လၢ ယဂီၢ်ဒၣ်ယဲန့ၣ်လီၤ. 13 ခဲကနံၣ်အံၤလၢယကအိၣ်ဒီးအံၣ်စရ့လးအဖိခွါဝဲၢ်ကိတဖၣ်ဒ် ယတၢ်ဒၣ်ယဲအလီၢ်န့ၣ်, ယအိၣ်ဒီးပှၤလ့ၤဝံဖိတဖၣ်ဒီးအဝဲသ့ၣ်ဘၣ်ဃးဒီးယၤလီၤ. ယဲဒၣ်အံၤယမ့ၢ်ယွၤလီၤ.” တၢ်ထၢဖှိၣ်ဂံၢ်နီၣ်ပှၤလ့ၤဝံဖိတဖၣ်အနီၣ်ဂံၢ် 14 ဒီးယွၤမၤလိာ်စီၤမိၤၡ့လၢကစၢၢ်စံၤနါအပှၢ်မုၢ်ကနၢအပူၤ, 15 လၢအကဂံၢ်ဒီးကွဲးနီၣ်ပှၤလ့ၤဝံဖိတဖၣ်ဒ်အဒူၣ်တဖၣ်ဒီးအဟံၣ် ဖိဃီဖိဒၣ်ဝဲတဖၣ်အသိးဒီးဆဲးလီၤကယဲၢ်ပိာ်ခွါလၢအသးအိၣ်တလါဒီး ဆူအဖီခိၣ်အမံၤ, 16 ဒီးစီၤမိၤၡ့မၤဝဲဒၣ်လီၤ. 17 စီၤလ့ၤဝံအိၣ်ဒီးအဖိခွါသၢဂၤလၢအမ့ၢ်, စီၤက့ရၡိၣ်, စီၤကဃး, ဒီးစီၤမရၤရံၤန့ၣ်လီၤ. အဝဲသ့ၣ်တဖၣ်မ့ၢ်ဒူၣ်ထၢတဖၣ်အပၢ်ဖးဒိၣ်လၢပျၢၤတဖၣ်လၢပှၤဟဲ လီၤစၢၤလီၤသွဲၣ်လၢအီၤတဖၣ်ဟံးန့ၢ်အဝဲသ့ၣ်အမံၤန့ၣ်လီၤ. 18 စီၤက့ရၡိၣ်အဖိခွါအိၣ်ခံဂၤလၢအမ့ၢ်, စီၤလံးဘနံၤဒီးစီၤ ၡံမံၤန့ၣ်လီၤ. 19 စီၤကဃးအဖိခွါအိၣ်လွံၢ်ဂၤလၢအမ့ၢ်, စီၤဧၤမရၣ်, စီၤယံးစဟၢ်, စီၤဃ့ဘြိၣ်, ဒီးစီၤဧူးစံၤအ့လးန့ၣ်လီၤ. 20 စီၤမရၤရံၤအဖိခွါအိၣ်ခံဂၤလၢအမ့ၢ်, စီၤမးဃလံၤဒီးစီၤ မူၡံၤန့ၣ်လီၤ. အဝဲသ့ၣ်မ့ၢ်ဒူၣ်ထၢတဖၣ်အပၢ်ဖးဒိၣ်လၢပျၢၤ တဖၣ်လၢပှၤဟဲလီၤစၢၤလီၤသွဲၣ်လၢအီၤတဖၣ်ဟံးန့ၢ်အဝဲသ့ၣ် အမံၤန့ၣ်လီၤ. 21 စီၤက့ရၡိၣ်အဒူၣ်ထၢန့ၣ်မ့ၢ်စီၤလံးဘနံၤဒီးစီၤၡံမံၤအဟံၣ် ဖိဃီဖိတဖၣ်အတၢ်ပာ်ဖှိၣ်ထီၣ်အသးန့ၣ်လီၤ. 22 ပှၤပိာ်ခွါအနီၣ်ဂံၢ်ခဲလၢာ်ပာ်ဖှိၣ်စးထီၣ်လၢပှၤအသးအိၣ် တလါဒီးအါန့ၢ်တလါန့ၣ်ဆဲးလီၤတ့ၢ်အမံၤအိၣ်ဝဲ, နွံကထိယဲၢ်ကယၤ ဂၤန့ၣ်လီၤ. 23 ပှၤအဒူၣ်ထၢအံၤကဘၣ်သူၣ်ဒဲလၢမုၢ်နုာ်တကပၤဖဲဒဲစီဆှံအလီၢ် ခံ, 24 အိၣ်ဒီးစီၤလၤအ့လးအဖိခွါစီၤအ့လယၤစာ်ဒ်ဒူၣ်ထၢအံၤအခိၣ် အသိးန့ၣ်လီၤ. 25 အဝဲသ့ၣ်တဖၣ်န့ၣ်ဘၣ်ဟံးန့ၢ်မူဒါလၢဒဲစီဆှံ, အနီၣ်ကျၢၢ်ဘၢလၢတၢ်အိပူၤ, အနီၣ်ကျၢၢ်ဘၢလၢတၢ်ချၢ, ကျဲစၢၤအယၣ်ဘျးသဒၢ, 26 ယၣ်ဘျးသဒၢလၢဂၢၤလၢအအိၣ်ဝးတရံးဒဲစီဆှံ, ဒီးတၢ်လုၢ်လီၢ်, ဒီးယၣ်ဘျးသဒၢလၢဂၢၤအကျဲစၢၤအဂီၢ်န့ၣ်လီၤ. အဝဲသ့ၣ်အမူအဒါအိၣ်ဝဲလၢကယဲၢ်တၢ်မၤဘၣ်ဃးဒီးတၢ်ပီးတၢ်လီ တဖၣ်အံၤအဂီၢ်န့ၣ်လီၤ. 27 စီၤကဃးအဒူၣ်အထၢန့ၣ်မ့ၢ်စီၤဧၤမရၣ်, စီၤယံးစဟၢ်, စီၤဃ့ ဘြိၣ်ဒီး, စီၤဧူးစံၤအ့လး, အဟံၣ်ဖိဃီဖိတဖၣ်အတၢ်ပာ်ဖှိၣ်ထီၣ်အသး န့ၣ်လီၤ. 28 ပှၤပိာ်ခွါလၢအသးအိၣ်တလါဒီးဆူအဖီခိၣ်လၢအဘၣ်တၢ်ကွဲးနီၣ် အမံၤန့ၣ်ခဲလၢာ်ပာ်ဖှိၣ်အနီၣ်ဂံၢ်အိၣ်ဝဲ, ဃိးကထိဃုကယၤဂၤန့ၣ်လီၤ. 29 ပှၤအဒူၣ်ထၢအံၤကဘၣ်သူၣ်ထီၣ်အဒဲလၢဒဲစီဆှံအကလံၤထံးတခီ 30 အိၣ်ဒီး-စီၤဧူးစံၤအ့လးအဖိခွါစီၤအလံစဖၣ်ဒ်ဒူၣ်ထၢအခိၣ် အသိးန့ၣ်လီၤ. 31 အဝဲသ့ၣ်ဘၣ်ဟံးန့ၢ်မူဒါလၢတၢ်အၢၣ်လီၤအီလီၤအတလါ, စီၢ်နီၤခိၣ်, တၢ်ပာ်မ့ၣ်အူဒၢအလီၢ်, တၢ်လုၢ်လီၢ်တဖၣ်ဒီးတၢ် အဃၢၤအဃိာ်တဖၣ်လၢပှၤလုၢ်တၢ်အခိၣ်တဖၣ်သူဝဲလၢတၢ်အလီၢ်စီဆှံ အပူၤဒီးယၣ်ဘျးသဒၢဖဲတၢ်အလီၢ်စီဆှံကတၢၢ်အကျဲစၢၤအဂီၢ်န့ၣ် လီၤ. အဝဲသ့ၣ်အမူအဒါအိၣ်ဝဲလၢကယဲၢ်တၢ်ဖံးတၢ်မၤဘၣ်ဃးဒီးတၢ်ပီး တၢ်လီတဖၣ်အံၤအဂီၢ်န့ၣ်လီၤ. 32 ပှၤလ့ၤဝံဖိတဖၣ်အခိၣ်မ့ၢ်ဝဲပှၤလုၢ်တၢ်အခိၣ်စီၤအၤဟရိၣ်အဖိ ခွါစီၤအလၤဧစၢ်န့ၣ်လီၤ. အဝဲမ့ၢ်ပှၤအခိၣ်လၢပှၤတဖၣ်လၢအမၤအမူအဒါလၢတၢ်အလီၢ်စီဆှံ အပူၤအဂီၢ်န့ၣ်လီၤ. 33 စီၤမရၤရံၤအဒူၣ်ထၢန့ၣ်မ့ၢ်စီၤမးဃလံၤ, စီၤမူၡံၤအဟံၣ်ဖိဃီဖိတဖၣ်အတၢ်ပာ်ဖှိၣ်ထီၣ်အသးန့ၣ်လီၤ. 34 ပှၤပိာ်ခွါလၢအသးအိၣ်တလါဒီးဆူအဖီခိၣ်လၢအဘၣ်တၢ်ကွဲးနီၣ် အမံၤန့ၣ်ခဲလၢာ်ပာ်ဖှိၣ်အနီၣ်ဂံၢ်အိၣ်ဝဲ, ဃုကထိခံကယၤ ဂၤန့ၣ်လီၤ. 35 ပှၤအဒူၣ်ထၢအံၤကဘၣ်သူၣ်ထီၣ်အဒဲလၢဒဲစီဆှံအကလံၤစိးတခီ, အိၣ်ဒီးစီၤအဘံဃယ့းလးအဖိခွါစီၤစူရံၤအ့လးဒ်ဒူၣ်ထၢ အံၤအခိၣ်အသိးန့ၣ်လီၤ. 36 အဝဲသ့ၣ်ဘၣ်တၢ်ဟ့ၣ်လီၤအီၤမူဒါလၢဒဲစီဆှံအသ့ၣ်ကွီၣ်တဖၣ်, အနီၣ်ဘိတဖၣ်, အထူၣ်တဖၣ်, အခီၣ်ထံးတဖၣ်ဒီးကယဲၢ်တၢ်သူၣ်ထီၣ်ထီထီၣ်အီၤအတၢ် ပီးတၢ်လီတဖၣ်အဂီၢ်န့ၣ်လီၤ. အဝဲသ့ၣ်အမူအဒါအိၣ်ဝဲလၢကယဲၢ်တၢ်ဖံးတၢ်မၤဘၣ်ဃးဒီးတၢ်ပီး တၢ်လီတဖၣ်အံၤအဂီၢ်န့ၣ်လီၤ. 37 အဝဲသ့ၣ်ဘၣ်မူဘၣ်ဒါစ့ၢ်ကီးလၢဒဲအထူၣ်တဖၣ်, အထူၣ်ခီၣ်ထံးတဖၣ်, ဒဲအနီၣ်ပျၤတဖၣ်, ဒီးပျံၤတဖၣ်လၢဒဲအဂၢၤအချၢအဂီၢ်န့ၣ်လီၤ. 38 စီၤမိၤၡ့, စီၤအၤဟရိၣ်ဒီးအဖိခွါတဖၣ်န့ၣ်ကဘၣ်သူၣ်ထီၣ်အဒဲ လၢဒဲစီဆှံအမဲာ်ညါလၢအမုၢ်ထီၣ်တခီန့ၣ်လီၤ. အဝဲသ့ၣ်အမူအဒါအိၣ်ဝဲလၢကမၤတၢ်ခ့တၢ်ပှၤအတၢ်မၤတဖၣ်လၢတၢ် အလီၢ်စီဆှံအပူၤလၢကီၢ်အံၣ်စရ့လးအပှၤဂီၢ်မုၢ်အဂီၢ်န့ၣ်လီၤ. ပှၤအဂၤတဂၤလၢ်လၢ်လၢအဂုာ်မၤအဝဲသ့ၣ်အတၢ်မၤတဖၣ်န့ၣ်ကဘၣ်တၢ်မၤ သံကွံာ်အီၤန့ၣ်လီၤ. 39 ပှၤလ့ၤဝံဖိအပိာ်ခွါလၢအသးအိၣ်တလါဒီးဆူအဖီခိၣ်တဖၣ်အနီၣ် ဂံၢ်ခဲလၢာ်ပာ်ဖှိၣ်, လၢစီၤမိၤၡ့ကွဲးနီၣ်ဝဲတဖၣ်ဒ်အဒူၣ်ထၢဒၣ်ဝဲဒ် ယွၤမၤလိာ်တ့ၢ်အသိးန့ၣ်, အိၣ်ဝဲဒၣ်ခံကလးခံကထိ ဂၤန့ၣ်လီၤ. ပှၤလ့ၤဝံဖိတဖၣ်ဟံးန့ၢ်ဖိခွါဝဲၢ်ကိတဖၣ်အလီၢ် 40 ဒီးယွၤစံးဘၣ်စီၤမိၤၡ့, “ကယဲၢ်ပှၤအံၣ်စရ့လးဖိအဖိခွါ ဝဲၢ်ကိတဖၣ်န့ၣ်ဘၣ်ဃးဒီးယၤလီၤ. မၤသးဒ်န့ၣ်ဒီးကွဲးနီၣ်ကယဲၢ်ပှၤ အံၣ်စရ့လးပိာ်ခွါဝဲၢ်ကိ, ကိးဂၤဒဲးလၢအသးအိၣ်တလါဒီးဆူအဖီခိၣ်အမံၤန့ၣ်တက့ၢ်. 41 ဘၣ်ဆၣ်ဒီးလၢအဝဲသ့ၣ်အလီၢ်န့ၣ်ယဃ့ကယဲၢ်ပှၤလ့ၤဝံဖိတဖၣ်ဒ် ယတၢ်အသိးန့ၣ်လီၤ. ယဲဒၣ်အံၤယမ့ၢ်ယွၤလီၤ. ယဃ့စ့ၢ်ကီးပှၤလ့ၤဝံဖိတဖၣ်အဂီၤဘုၣ်ဂီၤဖံးလၢကယဲၢ်ဂီၤ ဘုၣ်ဂီၤဖံးဝဲၢ်ကိတဖၣ်အလီၢ်န့ၣ်လီၤ.” 42 စီၤမိၤၡ့စူၢ်တၢ်ဒီးကွဲးနီၣ်ကယဲၢ်ပှၤပိာ်ခွါဝဲၢ်ကိတဖၣ် 43 လၢအသးအိၣ်တလါဒီးဆူအဖီခိၣ်လီၤ. အနီၣ်ဂံၢ်ခဲလၢာ်ပာ်ဖှိၣ် အိၣ်ဝဲ, ခံကလးခံကထိခံကယၤနွံဆံသၢ ဂၤန့ၣ်လီၤ. 44-45 ဒီးယွၤစံးဘၣ်စီၤမိၤၡ့, “ခဲအံၤပာ်စီဆှံထီၣ်ပှၤလ့ၤဝံဖိတဖၣ်ဒ်ယတၢ်အသိးလၢကယဲၢ် ပှၤအံၣ်စရ့လးဖိအဖိခွါဖိဝဲၢ်ကိတဖၣ်အလီၢ်, ဒီးပာ်စီဆှံထီၣ်စ့ၢ်ကီးပှၤလ့ၤဝံဖိတဖၣ်အဂီၤဘုၣ်ဂီၤဖံး အဝဲၢ်ကိလၢပှၤအံၣ်စရ့လးဖိအဂီၤဘုၣ်ဂီၤဖံးကီၢ်ဖိအဝဲၢ်ကိ တဖၣ်အလီၢ်တက့ၢ်. 46 မ့ၢ်လၢပှၤအံၣ်စရ့လးဖိအဖိခွါဝဲၢ်ကိတဖၣ်အနီၣ်ဂံၢ်အါန့ၢ် ပှၤလ့ၤဝံဖိတဖၣ်ခံကယၤနွံဆံသၢဂၤအဃိဒီး, သုကဘၣ်ပှ့ၤကဒါက့ၤသုဖိခွါအနီၣ်ဂံၢ်အဘျဲၣ်တဖၣ်န့ၣ်လီၤ. 47 လၢတဂၤအဂီၢ်န့ၣ်သုကဘၣ်ဟ့ၣ်ယဲၢ်ၡက့လးဒ်တၢ်သိၣ်တၢ်သီ အနီၣ်ထိၣ်အိၣ်ဝဲဒၣ်အသိး 48 ဒီးတိၢ်အံၤဟ့ၣ်လီၤဆူစီၤအၤဟရိၣ် ဒီးအဖိခွါတဖၣ်အအိၣ်တ က့ၢ်.” 49-50 စီၤမိၤၡ့စူၢ်တၢ်, ဒီးဟံးန့ၢ်ဝဲစ့တကထိသၢကယၤဃုဆံယဲၢ် ၡက့လး 51 ဒီးဟ့ၣ်လီၤအီၤဆူစီၤအၤဟရိၣ်ဒီးအဖိခွါတဖၣ်အအိၣ်န့ၣ်လီၤ. |
Sgaw Karen Common Bible © Bible Society of Myanmar, 1992.
Bible Society of Myanmar