လံာ်တၢ်ဂံၢ် 23 - Sgaw Karen Common Bible

¹ အဝဲစံးဘၣ်စီၤဘၤလး, “ဘှီထီၣ်တၢ်လုၢ်လီၢ်နွံခါလၢယဂီၢ် ဖဲအံၤ, ဒီးဟဲစိာ်န့ၢ်ယၤကျီၢ်ဖါနွံဒုဒီးသိဖါနွံဒုတက့ၢ်.”

² စီၤဘၤလးမၤဝဲဒ်တၢ်တဲဘၣ်အီၤအသိးဒီးအဝဲဒီးစီၤဘံးလၣ် လုၢ်ထီၣ်ကျီၢ်ဖါတဒုဒီးသိဖါတဒုလၢတၢ်လုၢ်လီၢ်တခါစုာ်စုာ် အဖီခိၣ်န့ၣ်လီၤ.

³ အန့ၣ်ဝံၤဒီးစီၤဘံးလၣ်စံးဘၣ်စီၤဘၤလး, “ဆၢထၢၣ်ဖဲအံၤလၢနတၢ်လုၢ်မ့ၣ်အူအကပၤဖဲယလဲၤဒ်သိးယကကွၢ် တၢ်လၢမ့ၢ်ယွၤကဟဲသဂၢၢ်ယၤမ့တမ့ၢ်တသဂၢၢ်ယၤဘၣ်လဲၣ်အခါန့ၣ်တ က့ၢ်. ယကတဲဘၣ်နၤတၢ်ကိးမံၤဒဲးလၢအဝဲလီၣ်ဖျါဝဲဆူယအိၣ်န့ၣ် လီၤ.” မၤသးဒ်န့ၣ်ဒီး, အဝဲလဲၤထီၣ်ဆူတၢ်လူၢ်ဒီခိၣ်ထဲတဂၤဧိၤ,

⁴ ဒီးကစၢ်ယွၤသဂၢၢ်အီၤလီၤ. စီၤဘံးလၣ်စံးဘၣ်အီၤ, “ယဘှီထီၣ်တၢ်လုၢ်လီၢ်နွံခါဒီးယလုၢ်ထီၣ်ကျီၢ်ဖါတဒု, သိဖါတဒုလၢတၢ်လုၢ်လီၢ်တခါစုာ်စုာ်အဖီခိၣ်လံ.”

⁵ ယွၤတဲဘၣ်စီၤဘံးလၣ်တၢ်လၢကဘၣ်တဲဝဲ, ဒီးဆှၢလီၤကဒါက့ၤ အီၤဆူစီၤဘၤလးအအိၣ်လၢကဟ့ၣ်လီၤအီၤအဝဲအတၢ်ကစီၣ်န့ၣ်လီၤ.

⁶ မၤသးဒ်န့ၣ်ဒီး, အဝဲက့ၤကဒါက့ၤဒီးထံၣ်ဘၣ်စီၤဘၤလးဆၢထၢၣ် ဒံးဒၣ်ဖဲအတၢ်လုၢ်မ့ၣ်အူအကပၤဃုာ်ဒီးကယဲၢ်ကီၢ်မိၤအးအပှၤ ခိၣ်ပှၤနၢ်ခဲလၢာ်န့ၣ်လီၤ.

⁷ စီၤဘံးလၣ်ထုထီၣ်အတၢ်ကတိၤလၢဝံအကျိာ်စံးဝဲ, “ကီၢ်မိၤအးအစီၤပၤဘၤလးဟဲကိးန့ၢ်ယၤလၢကီၢ်စူၤရံအပူၤ, လၢမုၢ်ထီၣ်ကစၢၢ်ခိၣ်တဖၣ်ဒီးစံးဝဲ, ဟဲဒီးကတိၤတၢ်လၢယဂီၢ်တက့ၢ်. ပာ်လီၤတၢ်ဆိၣ်အၢတမံၤလၢကီၢ်အံၣ်စရ့လး အပှၤဂီၢ်မုၢ်အဖီခိၣ်တက့ၢ်.

⁸ ပှၤလၢကစၢ်ယွၤတဆိၣ်အၢတ့ၢ်အီၤန့ၣ် ယကဆိၣ်အၢအီၤဒ်လဲၣ်. ဒီးပှၤလၢယွၤတဆိၣ်ဃီၣ်အီၤန့ၣ်ယကဆိၣ်ဃီၣ်အီၤ ဒ်လဲၣ်.

⁹ လၢလ့ဖးထီတဖၣ်အဒီခိၣ်န့ၣ်ယထံၣ်ဘၣ်အဝဲသ့ၣ်သ့ဝဲ, ယခိးကွၢ်အဝဲသ့ၣ်လၢတၢ်လူၢ်တဖၣ်အဖီခိၣ်သ့ဝဲလီၤ. အဝဲသ့ၣ်မ့ၢ်ပှၤတကလုာ်လၢအအိၣ်ဒၣ်အတၢ်ဒၣ်ဝဲ, အဝဲသ့ၣ်သ့ၣ်ညါဝဲလၢအဘၣ်ဆိၣ်ဂ့ၤအါန့ၢ်ဒံးပှၤကလုာ်ဂၤ တဖၣ်တက့ၢ်န့ၣ်လီၤ.

¹⁰ ကီၢ်အံၣ်စရ့လးအစၢၤအသွဲၣ်တဖၣ်လီၤဂာ်ဒ်ဖၣ်ကမူၣ်အသိး, အဝဲသ့ၣ်အါဝဲဂီၢ်ဝဲလၢတၢ်ကဂံၢ်အီၤအဂီၢ်န့ၣ်လီၤ. မ်ယမုၢ်နံၤမုၢ်သီတဖၣ်ကတၢၢ်ဝဲဒ်ပှၤတဂၤလၢကစၢ်ယွၤအပှၤဂီၢ် မုၢ်အကျါအသိး, မ်ယသံယဲလၢတၢ်ဃူတၢ်မုာ်အပူၤဒ်ပှၤအတီအလိၤတဂၤအသိးန့ၣ် တက့ၢ်.”

¹¹ အန့ၣ်ဒီးစီၤဘၤလးစံးဘၣ်စီၤဘံးလၣ်, “နမၤယၤဒ်လဲၣ်ခီ လဲၣ်. ယဟဲကိးနၤဆူအံၤလၢနကဆိၣ်အၢယဒုၣ်ယဒါတဖၣ်လီၤ. ဘၣ်ဆၣ်ဒီးကယဲၢ်တၢ်လၢနမၤတ့ၢ်န့ၣ်မ့ၢ်တၢ်ဆိၣ်ဂ့ၤအဝဲသ့ၣ်န့ၣ် လီၤ.”

¹² အဝဲစံးဆၢဝဲဒၣ်, “ယစံးယဲသ့ဒၣ်ထဲတၢ်လၢယွၤမၢယစံးဧိၤ န့ၣ်လီၤ.”

စီၤဘံးလၣ်အတၢ်ကတိၤလၢဝံအကျိာ် ခံဘျီတဘျီ

¹³ တုၤနုၤတစုစီၤဘၤလးစံးဘၣ်စီၤဘံးလၣ်, “ဟဲပိာ်ယခံဆူတၢ်လီၢ်အဂၤတတီၤ, တၢ်လီၢ်ဖဲနကထံၣ်ဘၣ်ဒၣ်ထဲ ပှၤအံၣ်စရ့လးဖိတနီၤဧိၤန့ၣ်တက့ၢ်. ဆိၣ်အၢအဝဲသ့ၣ်လၢယဂီၢ်ဖဲန့ၣ်တက့ၢ်.”

¹⁴ အဝဲလဲၤကိးအီၤဆူစိဖံၣ်အပျီပူၤလၢအအိၣ်လၢကစၢၢ်ပံးစကၤ အဒီခိၣ်န့ၣ်လီၤ. ဖဲန့ၣ်အဝဲမၤထီၣ်စ့ၢ်ကီးတၢ်လုၢ်လီၢ်နွံခါဒီးလုၢ်ထီၣ်ဝဲ ကျီၢ်ဖါတဒုဒီးသိဖါတဒုစုာ်စုာ်လၢတၢ်လုၢ်လီၢ်တခါစုာ်စုာ်အဖီခိၣ်န့ၣ်လီၤ.

¹⁵ စီၤဘံးလၣ်စံးဘၣ်စီၤဘၤလး, “ဆၢထၢၣ်ဖဲအံၤလၢနတၢ်လုၢ်မ့ၣ် အူအကပၤဒီးယကလဲၤထံၣ်လိာ်ဒီးကစၢ်ယွၤလၢဖဲန့ၣ်လီၤ.”

¹⁶ ယွၤထံၣ်လိာ်ဒီးစီၤဘံးလၣ်ဒီးတဲဘၣ်အီၤတၢ်လၢအဝဲကဘၣ်စံး ဝဲဒီးမၢအက့ၤကဒါက့ၤဆူစီၤဘၤလးအိၣ်ဒီးဟ့ၣ်လီၤအီၤလၢ အတၢ်ကစီၣ်န့ၣ်လီၤ.

¹⁷ မၤသးဒ်န့ၣ်ဒီးအဝဲက့ၤကဒါက့ၤဝဲဒီးထံၣ်ဘၣ်ဝဲစီၤဘၤလးဆၢ ထၢၣ်ဒံးဒၣ်ဖဲအတၢ်လုၢ်မ့ၣ်အူအကပၤဃုာ်ဒီးကီၢ်မိၤအးအပှၤခိၣ် နၢ်တဖၣ်န့ၣ်လီၤ. စီၤဘၤလးသံကွၢ်ဝဲလၢမ့ၢ်ယွၤစံးတ့ၢ်တၢ်မနုၤတမံၤလဲၣ်.

¹⁸ ဒီးစီၤဘံးလၣ်အဲးထီၣ်အထးခိၣ်လၢဝံအကျိာ်ဒ်အံၤလီၤ. “ဟဲ, စီၤစံးပိၢ်အဖိခွါစီၤဘၤလးဧၢ, ဒီးဒိကနၣ်တၢ်လၢ ယကဘၣ်စံးကတိၤန့ၣ်တက့ၢ်.

¹⁹ ကစၢ်ယွၤန့ၣ်တလီၤဂာ်ဒီးပှၤကညီတဖၣ်လၢအလီတၢ်ဘၣ်. အဝဲတမ့ၢ်ပှၤကညီတဂၤလၢအလဲလိာ်ကွံာ်အတၢ်ပာ်သးန့ၣ်ဘၣ်. ကယဲၢ်တၢ်လၢအအၢၣ်လီၤအီလီၤတ့ၢ်ဝဲန့ၣ်အဝဲမၤဝဲလီၤ. အဝဲကတိၤတၢ်ဒီးတၢ်မၤအသးန့ၣ်လီၤ.

²⁰ ယဘၣ်တၢ်သိၣ်လိနဲၣ်ယုၤတ့ၢ်ယၤလၢယကဆိၣ်ဂ့ၤတၢ်အဂီၢ်လီၤ. ဒီးဖဲကစၢ်ယွၤဆိၣ်ဂ့ၤတၢ်အခါန့ၣ်ယထုးက့ၤအီၤတန့ၢ်ဘၣ်.

²¹ ယထံၣ်ဆိပာ်တၢ်လၢကီၢ်အံၣ်စရ့လးအတၢ်အိၣ်မူဆူညါတဟဲစိာ်န့ၢ် အီၤတၢ်တတၢးတနါမ့တမ့ၢ်, တၢ်ကီတၢ်ခဲနီတမံၤန့ၣ်ဘၣ်. ယွၤ, အဝဲသ့ၣ်အကစၢ်ယွၤန့ၣ်အိၣ်ဒီးအဝဲသ့ၣ်လီၤ. အဝဲသ့ၣ်ကိးထီၣ်ဘိးဘၣ်သ့ၣ်ညါဝဲလၢယွၤမ့ၢ် အဝဲသ့ၣ်အစီၤပၤန့ၣ်လီၤ.

²² ကစၢ်ယွၤထုးထီၣ်တ့ၢ်အဝဲသ့ၣ်လၢကီၢ်အဲၤကူပတူးအပူၤလီၤ. အဝဲဒုးတၢ်လၢအဝဲသ့ၣ်အဂီၢ်ဒ်ကျီၢ်ဖါအမံၤတဒုအသိးန့ၣ်လီၤ.

²³ တၢ်မၤကဒါမဲာ်အတၢ်သမူပယၢ်, ဒီးတၢ်ဝံတၢ်နါအတၢ်ဟိၣ်တၢ်ယိတအိၣ်ဘၣ်နီတမံၤလၢတၢ်သူအီၤ ထီဒါကီၢ်အံၣ်စရ့လးအပှၤကလုာ်ကသ့ဝဲန့ၣ်ဘၣ်. ခဲအံၤ, ပှၤဂီၢ်မုၢ်ကစံးကတိၤတၢ်လၢကီၢ်အံၣ်စရ့လးအဂ့ၢ်ဒီး စံး, ‘ကွၢ်တၢ်လၢကစၢ်ယွၤမၤတ့ၢ်ဝဲတက့ၢ်.’

²⁴ ကီၢ်အံၣ်စရ့လးအပှၤကလုာ်အံၤလီၤဂာ်ဒ်ခ့ယုၢ်လၢအဂံၢ်ဆူၣ်ဘါ ဆူၣ်တဒုအသိးန့ၣ်လီၤ. တချုးလၢအအ့ၣ်ဖှီတၢ်ဒီးအီၣ်ကွံာ်တၢ်ဒံးဘၣ်, တချုးအအီဘၣ်တၢ်တဖၣ်လၢအမၤသံဝဲအသွံၣ်ဘၣ်န့ၣ်, တအိၣ်ဘှံးဝဲဘၣ်.”

²⁵ အန့ၣ်တစုစီၤဘၤလးစံးဘၣ်စီၤဘံးလၣ်, “နဂ့ၢ်လိာ်လၢနကဆိၣ် အၢကီၢ်အံၣ်စရ့လးအပှၤဂီၢ်မုၢ်, ဘၣ်ဆၣ်ဒီး, အစှၤကတၢၢ်န့ၣ်ဆိၣ်ဂ့ၤအီၤတဂ့ၤ.”

²⁶ စီၤဘံးလၣ်စံးဆၢဝဲ, “တၢ်လၢယွၤတဲဘၣ်ယၤန့ၣ်, ယဘၣ်မၤအီၤခဲလၢာ်လီၤန့ၣ်, ယတဲဘၣ်နၤတမ့ၢ်ဘၣ်ဧါ.”

စီၤဘံးလၣ်အတၢ်ကတိၤလၢဝံအကျိာ် သၢဘျီတဘျီ

²⁷ စီၤဘၤလးစံးဝဲဒၣ်, “ဟဲဃုာ်ဒီးယၤ, ဒီးယကလဲၤကိးနၤဆူတၢ်လီၢ်အဂၤတတီၤလီၤ. ဘၣ်သ့ၣ်သ့ၣ်ကစၢ်ယွၤအဲၣ်ဒိးပျဲနကဆိၣ်အၢအဝဲသ့ၣ်လၢယဂီၢ်ဖဲ န့ၣ်လီၤ.

²⁸ မၤသးဒ်န့ၣ်ဒီး, အဝဲလဲၤကိးစီၤဘံးလၣ်ဆူကစၢၢ်ပဧိၢ်အဒီခိၣ် လၢအကွၢ်စိလီၤတၢ်ဆူမဲးမုၢ်ခိၣ်န့ၣ်လီၤ.

²⁹ စီၤဘံးလၣ်စံးဘၣ်အီၤ, “မၤထီၣ်တၢ်လုၢ်လီၢ်နွံခါလၢယဂီၢ် ဖဲအံၤဒီးဟဲစိာ်ကျီၢ်ဖါနွံဒုဒီးသိဖါနွံဒုတက့ၢ်.”

³⁰ စီၤဘံၤလံးမၤဝဲဒ်တၢ်စံးတ့ၢ်အီၤအသိး, ဒီးလုၢ်ထီၣ်ဝဲကျီၢ်ဖါတဒုဒီးသိဖါတဒုစုာ်စုာ် လၢတၢ်လုၢ်လီၢ်တခါစုာ်စုာ်အဖီခိၣ်န့ၣ်လီၤ.