လံာ်တၢ်ဂံၢ် 14 - Sgaw Karen Common Bible

ပှၤဂီၢ်မုၢ်ကဒူးကဒ့ၣ်တၢ်

^1-2 ပှၤဂီၢ်မုၢ်ကိးထီၣ်လၢတၢ်သးအုးဒီနၤညါလီၤ. အဝဲသ့ၣ်ကဒူးကဒ့ၣ်တၢ်ထီဒါစီၤမိၤၡ့ဒီးစီၤအၤဟရိၣ်ဒီး စံးဝဲ, “ပသံလၢကီၢ်အဲၤကူပတူးအပူၤမ့တမ့ၢ်ပသံ ဖဲအံၤလၢပှၢ်မုၢ်ကနၢအပူၤအံၤဂ့ၤဒိၣ်ဒၣ်တၢ်တက့ၢ်လီၤ.

³ ဘၣ်မနုၤလၢယွၤဆှၢပှၤဆူကီၢ်အဝဲန့ၣ်အပူၤလဲၣ်. ပကဘၣ်တၢ်မၤသံပှၤလၢတၢ်ဒုးတၢ်ယၤအပူၤ, ဒီးပမါတဖၣ်ဒီးပဖိတဖၣ်ကဘၣ်တၢ်ဖီၣ်န့ၢ်အီၤလီၤ. တဂ့ၤဒိၣ်လၢပက့ၤကဒါက့ၤဆူကီၢ်အဲၤကူပတူးဘၣ်ဧါ.”

⁴ မၤသးဒ်န့ၣ်ဒီးအဝဲသ့ၣ်စံးလိာ်အသးကဒဲကဒဲ, “မ်ပဃုထၢသကိးခိၣ်နၢ်တဂၤဒီးက့ၤကဒါက့ၤဆူကီၢ်အဲၤကူ ပတူးတက့ၢ်.”

⁵ အန့ၣ်ဒီးစီၤမိၤၡ့ဒီးစီၤအၤဟရိၣ်တီၤလီၤလၢဟီၣ်ခိၣ်လိၤ လၢပှၤဂီၢ်မုၢ်အမဲာ်ညါလီၤ.

⁶ ဒီးစီၤနိၣ်အဖိခွါစီၤယိၤၡူဒီးစီၤယဖူန့ၤအဖိခွါစီၤ ကၤလ့း, လၢပှၤလဲၤကွၢ်ဟုၣ်ကွၢ်စုးတၢ်တဖၣ်အကျါခံဂၤန့ၣ်ဖှီယာ် အတၢ်ကူတၢ်သိးတဖၣ်လၢတၢ်သးအုးအပူၤ,

⁷ ဒီးစံးဘၣ်ပှၤဂီၢ်မုၢ်, “ကီၢ်လၢပလဲၤဃုထံၣ်သ့ၣ်ညါအီၤတဘ့ၣ် န့ၣ်မ့ၢ်ကီၢ်အဂ့ၤဒိၣ်ဒိၣ်ကလဲာ်လီၤ.

⁸ ယွၤမ့ၢ်ဘၣ်အသးလၢပှၤဒီးအဝဲကဆှၢပှၤဆူန့ၣ်, ဒီးဟ့ၣ်ပှၤလၢကီၢ်အထူးအတီၤဒီးကီၢ်လၢဟီၣ်ခိၣ်ညၣ်ထ့ၣ်ဂ့ၤဝဲ န့ၣ်လီၤ.

⁹ ပူထီၣ်ထီဒါယွၤတဂ့ၤ. ဒီးပျံၤပှၤအိၣ်ဖဲန့ၣ်တဖၣ်တဂ့ၤ. ပကမၤနၢၤအဝဲသ့ၣ်ညီကဒၣ်လီၤ. ယွၤအိၣ်ဒီးပှၤဒီးမၤနၢၤလံကစၢ်တဖၣ်လၢအအိၣ်ပှိၤတ့ၢ်အဝဲ သ့ၣ်န့ၣ်လီၤ.

¹⁰ ပှၤဂီၢ်မုၢ်ဒီဖုမၤပျံၤမၤဖုးအဝဲသ့ၣ်လၢကကွံာ်သံအီၤလၢ လၢၢ်, ဘၣ်ဆၣ်သတူၢ်ကလာ်န့ၣ်ပှၤဂီၢ်မုၢ်ထံၣ်တၢ်ကပီၤ ကပြုၢ်ကပြီၤဟဲလၢယွၤအိၣ်ဝဲဆိးဝဲအဒဲစီၤဆှံအဖီခိၣ်လီၤ.

စီၤမိၤၡ့ဘါထုကဖၣ်လၢပှၤဂီၢ်မုၢ်အဂီၢ်

¹¹ ယွၤစံးဘၣ်စီၤမိၤၡ့, “မ့ၢ်ပှၤဂီၢ်မုၢ်အံၤကညိကွံာ်ဒံးယၤ ဆံးယံာ်လဲၣ်. ယမၤတ့ၢ်တၢ်လီၤလးအါမံၤလၢအဝဲသ့ၣ် အကျါဒၣ်လဲာ်, ကဂ့ၢ်လိာ်တၢ်လၢတနာ်ယၤအဂီၢ်န့ၣ်ဆံးယံာ်ဒံးလဲၣ်.

¹² ယကဆှၢလီၤတၢ်သံသတြိာ်တခါဒီးမၤဟးဂီၤကွံာ်အဝဲသ့ၣ်, ဘၣ်ဆၣ်ဒီးယကဒုးကဲထီၣ်နၤလၢပှၤကလုာ်တကလုာ်အပၢ်တဂၤ, လၢအဒိၣ်န့ၢ်ဒီးအဂံၢ်အဘါဆူၣ်န့ၢ်ဒံးအဝဲသ့ၣ်တက့ၢ်န့ၣ်လီၤ.”

¹³ ဘၣ်ဆၣ်ဒီးစီၤမိၤၡ့စံးဘၣ်ယွၤ, “နထုးထီၣ်တ့ၢ်ပှၤဂီၢ်မုၢ် အံၤလၢကီၢ်အဲၤကူပတူးလၢနစိကမီၤလီၤ. ဖဲပှၤအဲၤကူပတူးဖိနၢ်ဟူတၢ်လၢနမၤဘၣ်နပှၤဂီၢ်မုၢ်န့ၣ်,

¹⁴ အဝဲသ့ၣ်ကတဲဘၣ်တၢ်အံၤဆူပှၤဂီၢ်မုၢ်လၢအအိၣ်လၢကီၢ်တဘ့ၣ်အံၤ အပူၤလီၤ. ပှၤဂီၢ်မုၢ်အံၤနၢ်ဟူတ့ၢ်လံလၢနၤ, ယွၤ, အိၣ်ဒီးပှၤ, လၢနအိၣ်ဖျါလီၤတံၢ်လီၤဆဲးဖဲနတၢ်အၢၣ်အထူၣ်အိၣ် ကတီၢ်လၢပဖီခိၣ်ဒီးနလဲၤဆိတၢ်လၢပမဲာ်ညါလၢတၢ်အၢၣ်အထူၣ် တထူၣ်အပူၤလၢမုၢ်ဆါခီဒီးလၢမ့ၣ်အူထူၣ်တထူၣ်အပူၤလၢမုၢ်နၤ ခီန့ၣ်လီၤ.

¹⁵ ခဲကနံၣ်အံၤနမ့ၢ်မၤသံကွံာ်နပှၤဂီၢ်မုၢ်ခဲလၢာ်ဒီးပှၤကလုာ် တဖၣ်လၢအနၢ်ဟူတ့ၢ်နတၢ်မံၤဟူသၣ်ဖျါတဖၣ်န့ၣ်ကစံးဝဲလၢ,

¹⁶ နမၤသံတ့ၢ်နပှၤဂီၢ်မုၢ်လၢပှၢ်မုၢ်ကနၢအပူၤမ့ၢ်လၢနဆှၢအီၤဆူ ကီၢ်တဘ့ၣ်လၢနအၢၣ်လီၤတ့ၢ်လၢနကဟ့ၣ်အီၤန့ၣ်တသ့ဘၣ်အဃိန့ၣ် လီၤ.

¹⁷ လၢတၢ်န့ၣ်အဃိ, ခဲကနံၣ်အံၤယွၤဧၢ, ယဘါထုကဖၣ်တၢ်, ဒုးနဲၣ်ပှၤလၢနစိကမီၤဒီးမၤတၢ်လၢနအၢၣ်လီၤတ့ၢ်ဖဲနစံး,

¹⁸ ‘ယၤ, ယွၤအံၤသးဒိၣ်ထီၣ်ကီ, ဒီးယဒုးနဲၣ်တၢ်အဲၣ်တၢ်ကွံ အဒိၣ်အမုၢ်ဒီးတၢ်သူၣ်တီသးလိၤဒီးပျၢ်တၢ်ဒဲးဘးဒီးတၢ်ပူ ထီၣ်န့ၣ်လီၤ. အန့ၣ်ဒၣ်လဲာ်, ယတလီၤတူာ်လီၤကာ်ဘၣ်ဒ်သိးယကစံၣ်ညီၣ်ဖိတဖၣ်ဒီး လံၤတဖၣ်တုၤပှၤသၢစိၤတစိၤဒီးလွံၢ်စိၤတစိၤလၢအမိၢ်အပၢ် တဖၣ်အတၢ်ဒဲးဘးတဖၣ်အဃိန့ၣ်ဘၣ်.

¹⁹ ဒီးခဲအံၤ, ယွၤဧၢ, လၢနတၢ်အဲၣ်လၢအလဲလိာ်ကွံာ်အသးတသ့ဘၣ် အတၢ်ဒိၣ်တၢ်မုၢ်အပူၤန့ၣ်, ယဃ့ကညးလၢပှၤဂီၢ်မုၢ်တဖုအံၤအတၢ်ဒဲးဘးန့ၣ်ပျၢ်ကွံာ်အီၤဒ် နပျၢ်တ့ၢ်လံအဝဲသ့ၣ်အတၢ်ကမၣ်စးထီၣ်လၢအဝဲသ့ၣ်ဟးထီၣ်တ့ၢ်လၢ ကီၢ်အဲၤကူပတူးအသိးန့ၣ်တက့ၢ်.”

²⁰ ယွၤစံးဆၢအီၤ, “ယကပျၢ်ကွံာ်အဝဲသ့ၣ်အတၢ်ကမၣ်ဒ်နဃ့တ့ၢ်နဲ အသိးန့ၣ်လီၤ.

²¹ ဘၣ်ဆၣ်ဒီးယအၢၣ်လီၤအီလီၤလၢ, ဒ်ယမူယဲဒီးဒ်ယတၢ်အိၣ်ဝဲမၤ ပှဲၤဟီၣ်ခိၣ်အသိးန့ၣ်, ယစံးယဲ,

²² ပှၤဂီၢ်မုၢ်အံၤတလဲၤနုာ်ဘၣ်ဆူကီၢ်တဘ့ၣ်န့ၣ်အပူၤနီ တဂၤဘၣ်. အဝဲသ့ၣ်ထံၣ်ဘၣ်တ့ၢ်ယတၢ်အိၣ်ယဲအတၢ်ကပြုၢ်ကပြီၤဒီး တၢ်လီၤလးတဖၣ်လၢယမၤတ့ၢ်ယဲလၢကီၢ်အဲၤကူပတူးအပူၤဒီးလၢ ပှၢ်မုၢ်ကနၢအပူၤ, ဘၣ်ဆၣ်ဒီးအဝဲသ့ၣ်မၤကွၢ်တ့ၢ်ယတၢ်သးစူၤ တဘျီဝံၤတဘျီဒီးဂ့ၢ်လိာ်ဝဲလၢကစူၢ်ယၤအဂီၢ်န့ၣ်လီၤ.

²³ အဝဲသ့ၣ်တနုာ်လီၤဘၣ်ဆူကီၢ်လၢယအၢၣ်လီၤအီလီၤတ့ၢ်ဒီး အမိၢ်ပၢ်ဖံဖုလၢပျၢၤတဖၣ်န့ၣ်လ့ၤတက့ၤဘၣ်. ပှၤလၢအညိကွံာ်ယၤတဖၣ်န့ၣ်တလဲၤနုာ်ဘၣ်ဆူကီၢ်န့ၣ်နီတဂၤဘၣ်.

²⁴ ဘၣ်ဆၣ်, မ့ၢ်လၢယခ့ယပှၤစီၤကၤလ့းအိၣ်ဒီးတၢ်ပာ်သူၣ်ပာ်သးလီၤ ဆီတမံၤဒီးအသးတီတ့ၢ်ဒီးယၤအဃိ, ယကလဲၤကိးနုာ်အီၤဆူကီၢ်တဘ့ၣ်လၢအလဲၤဃုထံၣ်သ့ၣ်ညါတ့ၢ်ဝဲ အပူၤဒီးအဝဲအစၢၤအသွဲၣ်တဖၣ်ကမၤန့ၢ်ကီၢ်တဘ့ၣ်န့ၣ်,

²⁵ လၢခဲအံၤအတၢ်လူၢ်တၢ်တြီၤအပူၤ, ပှၤဧမၤလ့းဖိတဖၣ်ဒီးပှၤ ကနၤဧၣ်ဖိတဖၣ်အိၣ်ဆိးဝဲန့ၣ်လီၤ. ခဲမုၢ်ဆ့ၣ်တနံၤန့ၣ်ဃၣ်ကဒါက့ၤဒီးလဲၤနုာ်ဆူပှၢ်မုၢ်ကနၢလၢ ကျဲလဲၤဆူအၤကဘၢ်အပီၣ်လဲၣ်က့ၣ်ကွီၤန့ၣ်တက့ၢ်.”

ယွၤစံၣ်ညီၣ်ပှၤဂီၢ်မုၢ်လၢတၢ်ကဒူးကဒ့ၣ်အဃိ

^26-27 ယွၤစံးဘၣ်စီၤမိၤၡ့ဒီးစီၤအၤဟရိၣ်, “ပှၤတတီတလိၤတဖုအံၤက, ကဒူးကဒ့ၣ်တၢ်ထီဒါယၤဆံးယံာ်ဒံး န့ၣ်လဲၣ်. ယနၢ်ဟူဘၣ်တ့ၢ်တၢ်ကဒူးကဒ့ၣ်တဖၣ်အံၤအါကဲၣ်ဆိးလံ.

²⁸ ခဲအံၤဟ့ၣ်အဝဲသ့ၣ်လၢတၢ်စံးဆၢအံၤတက့ၢ်. “ယဆိၣ်လီၤယသးလၢ, ဒ်ယမူယဲအသိး, ယကမၤတၢ်လၢသုဂီၢ်ဒ်သုဃ့တ့ၢ်တၢ်အသိးန့ၣ်လီၤ. ယၤ, ယွၤစံးလံတၢ်လံ.

²⁹ သုကသံဒီးသုစိၣ်တဖၣ်ကဘၣ်တၢ်ရၤလီၤအီၤသကုၤပှၢ်မုၢ်ကနၢအံၤ န့ၣ်လီၤ. မ့ၢ်လၢသုကဒူးကဒ့ၣ်တၢ်ထီဒါတ့ၢ်ယၤအဃိ, ပှၤလၢသုကျါလၢအသးပှၢ်န့ၢ်အနံၣ်ခံဆံတဖၣ်တနုာ်ဘၣ်ဆူ ကီၢ်န့ၣ်အပူၤနီတဂၤဘၣ်.

³⁰ ယအၢၣ်လီၤအီလီၤတ့ၢ်လၢသုကအိၣ်ဘၣ်ဖဲန့ၣ်ဘၣ်ဆၣ်ဒီးမ့တမ့ၢ် လၢစီၤကၤလ့းဒီးစီၤယိၤၡူဘၣ်န့ၣ်ပှၤတလဲၤနုာ်ဘၣ်နီတဂၤ ဘၣ်.

³¹ သုစံးလၢသုဖိတဖၣ်ကဘၣ်တၢ်ဖီၣ်န့ၢ်အီၤလီၤ. ဘၣ်ဆၣ်ဒီးယကလဲၤကိးအီၤဆူကီၢ်လၢသုဂ့ၢ်လိာ်ကွံာ်အီၤန့ၣ် အပူၤဒီးတၢ်န့ၣ်ကမ့ၢ်အဝဲသ့ၣ်အဟံၣ်အဃီန့ၣ်လီၤ.

³² သုကသံဖဲပှၢ်မုၢ်ကနၢအံၤအပူၤလီၤ.

³³ သုဖိတဖၣ်ကဟးဝ့ၤဝီၤတၢ်လၢပှၢ်မုၢ်ကနၢအပူၤအနံၣ်လွံၢ်ဆံ, ကတူၢ်ဘၣ်တၢ်လၢသုတၢ်သးတတီတလိၤအဃိ, တုၤလၢပှၤလၢသုကျါလၢခံကတၢၢ်တဂၤသံဝဲတစုန့ၣ်လီၤ.

³⁴ သုကတူၢ်ဘၣ်တၢ်လၢအကြၢးဝဲဘၣ်ဝဲဒီးသုတၢ်ဒဲးဘးလၢအနံၣ် လွံၢ်ဆံအတီၢ်ပူၤ, တနံၣ်လၢအသီလွံၢ်ဆံစုာ်စုာ်အဂီၢ်လၢသုသူတ့ၢ်အီၤလၢတၢ်ဃု ထံၣ်သ့ၣ်ညါကီၢ်အဂီၢ်န့ၣ်လီၤ. သုကသ့ၣ်ညါယဘၣ်ထီဒါသုအခီပညီဒ်လဲၣ်န့ၣ်လီၤ.

³⁵ ယဆိၣ်တၢ်လၢယကမၤတၢ်အံၤဆူသျုဝဲပှၤတတီတလိၤတဖၣ်, ပှၤလၢအပာ်ဖှိၣ်ထီၣ်အသးထီဒါယၤအဂီၢ်န့ၣ်လီၤ. လၢပှၢ်မုၢ်ကနၢအံၤအပူၤသုဝဲကိးဂၤဒဲးကသံဝဲလီၤ. ယၤ, ယွၤကတိၤလံတၢ်လံ.”

³⁶ ပှၤတဖၣ်လၢစီၤမိၤၡ့ဆှၢတ့ၢ်ဝဲဒ်သိးကလဲၤကွၢ်ဟုၣ်ကွၢ်စုး ကီၢ်န့ၣ်ဟဲက့ၤစိာ်တၢ်ပာ်ဖျါလၢအတတီ, လၢအဒုးအိၣ်ထီၣ်တၢ်ကဒူးကဒ့ၣ်ထီဒါယွၤလီၤ.

³⁷ မၤသးဒ်န့ၣ်ဒီးယွၤတီၢ်အဝဲသ့ၣ်လၢတၢ်ဆူးတၢ်ဆါတမံၤဒီး အဝဲသ့ၣ်သံဝဲလီၤ.

³⁸ လၢပှၤကွၢ်ဟုၣ်ကွၢ်စုးတၢ်တဆံခံဂၤအကျါန့ၣ်အိၣ်မူတ့ၢ်ဝဲ ထဲစီၤယိၤၡူဒီးစီၤကၤလ့းဧိၤန့ၣ်လီၤ.

တၢ်ကျဲးစၢးလဲၤနုာ်ဒုးကီၢ်အခီၣ်ထံးတဘျီ

³⁹ တုၤစီၤမိၤၡ့တဲဘၣ်ပှၤအံၣ်စရ့လးဖိတဖၣ်လၢ, တၢ်လၢယွၤစံးတ့ၢ်ဝဲန့ၣ်, အဝဲသ့ၣ်ဟီၣ်ဝဲယၢၤဝဲနးနးကလဲာ်လီၤ.

⁴⁰ လၢမုၢ်ဆ့ၣ်ထီၣ်တနံၤဂီၤဂီၤန့ၣ်အဝဲသ့ၣ်စးထီၣ်ဟးထီၣ်လၢက လဲၤနုာ်ဒုးကီၢ်လၢတၢ်လူၢ်ဒီခိၣ်ဒီးစံးဝဲဒၣ်, “ခဲအံၤပအိၣ်ကတဲာ်ကတီၤပသးလၢပကလဲၤဆူတၢ်လီၢ်လၢယွၤစံး ဘၣ်တ့ၢ်ပှၤလၢအဂ့ၢ်န့ၣ်လီၤ. ပအၢၣ်လီၤလၢပမၤတ့ၢ်တၢ်ဒဲးဘးလီၤ.”

⁴¹ ဘၣ်ဆၣ်ဒီးစီၤမိၤၡ့စံးဝဲဒၣ်, “မ့မ့ၢ်ဒ်န့ၣ်ဒီးခဲအံၤဘၣ်မနုၤသု တစူၢ်ယွၤန့ၣ်လဲၣ်. သုတမၤနၢၤတၢ်ဘၣ်.

⁴² လဲၤတဂ့ၤ. ယွၤတအိၣ်ဒီးသုဘၣ်. ဒီးသုဒုၣ်သုဒါတဖၣ်ကမၤနၢၤကွံာ်သုလီၤ.

⁴³ ဖဲသုကွၢ်ဆၢၣ်မဲာ်ပှၤဧၤမလ့းဖိဒီးပှၤကနၤဧၣ်ဖိတဖၣ်န့ၣ်သု ကသံလၢတၢ်ဒုးအပူၤလီၤ. ယွၤတအိၣ်ဘၣ်ဒီးသုဘၣ်. အဂ့ၢ်ဒ်အံၤ, မ့ၢ်လၢသုဂ့ၢ်လိာ်လၢသုကပိာ်အခံအဃိန့ၣ်လီၤ.”

⁴⁴ အန့ၣ်ဒၣ်လဲာ်, အဝဲသ့ၣ်လိာ်ဒူအသးလၢကလဲၤထီၣ်ဆူကီၢ်လၢတၢ်လူၢ် ဒီခိၣ်, ဖဲယွၤအတၢ်အၢၣ်လီၤအီလီၤအတလါမ့ၢ်ဂ့ၤစီၤမိၤၡ့မ့ၢ်ဂ့ၤ တဟးထီၣ်ဒၣ်လဲာ်လၢသူၣ်ဒဲလီၢ်ပူၤဘၣ်အခါန့ၣ်လီၤ.

⁴⁵ တုၤနုၤတစု, ပှၤဧမၤလ့းဖိတဖၣ်ဒီးပှၤကနၤဧၣ်ဖိတဖၣ်လၢအအိၣ် လၢတၢ်လီၢ်ဖဲန့ၣ်, ဒုးအဝဲသ့ၣ်ဒီးမၤနၢၤကွံာ်အဝဲသ့ၣ်ဒီးလူၤထွဲ အဝဲသ့ၣ်ယံၤတုၤလၢဃိၢ်မါန့ၣ်လီၤ.