လံာ်နၤဃူၣ် 2 - Sgaw Karen Common Bible

ဝ့ၢ်နံၤနဝ့အတၢ်လီၤပှီၢ်

¹ ဝ့ၢ်နံၤနဝ့ဧၢ, နလီၤဘၣ်လၢတၢ်ဒုးတၢ်ယၤအဖီလာ်လံ. တၢ်စိတၢ်ကမီၤလၢကမၤလီၤသဘှံးနၤန့ၣ်ဟဲလံဝဲလံ. ကျဲၤလီၤပာ်လီၤနပှၤခိးတိာ်ဧိၤတာ်ဧိၤ, ပၢၤဃာ်နကျဲဧိၤကပူၤဧိၤ ဒီးအိၣ်ကတဲာ်ကတီၤနသးလၢတၢ်ဒုးအဂီၢ် န့ၣ်တက့ၢ်.

² ဘူးလံလၢယွၤကမၤအိၣ်ထီၣ်က့ၤပှၤအံၣ်စရ့လးဖိ အလၤအကပီၤဒ်အအိၣ်ပာ်တ့ၢ်လံဝဲတချုး လၢအဒုၣ်အဒါတဖၣ်မၤဟးဂီၤကွံာ်အီၤအသိးန့ၣ်လီၤ.

³ ဒုၣ်ဒါအသုးဖိသ့ၣ်တဖၣ်စိာ်ဝဲကတီၤဂီၤဒီးကူသိးဝဲဆ့ကၤဂီၤတဖၣ်, ဒီးအိၣ်ကတဲာ်ကတီၤအသးလၢကထီၣ်ဒုးတၢ် အဂီၢ်လီၤ. အလ့ၣ်ကဟၣ်ဒုးသုးသ့ၣ်တဖၣ်ကပီၤကပြုၢ်ထီၣ်ဒ် မ့ၣ်အူအသိး ဒီးအကသ့ၣ်တဖၣ်အခီၣ်ပတ့ၤပတိၤအသးလီၤ.

⁴ လ့ၣ်ကဟၣ်သုးတဖၣ်ဃ့ၢ်သဖှိတပျုာ်တပျီၤလၢကျဲတဖၣ်, ဒီးဃ့ၢ်ထီၣ်ဃ့ၢ်လီၤချ့ချ့ကလဲာ်လၢဝ့ၢ်ခၢၣ်သးတၢ်လီၢ်လီၤ ပျီအပူၤန့ၣ်လီၤ. ကပီၤကပြုၢ်ဒ်ဆှီတၢၣ်အသိး ဒီးတိၤထီတိၤလီၤအသးဒ်လီဝၢ်ဒံးအသိးန့ၣ်လီၤ.

⁵ သုးခိၣ်သုးနၢ်တဖၣ်ဘၣ်တၢ်ကိးဖှိၣ်အီၤ ဒီးအဝဲသ့ၣ်အခီၣ်ဘၣ်တိၢ်ဖဲအဂုာ်လဲၤထီၣ်ဆူညါ အခါန့ၣ်လီၤ. ပှၤလဲၤထီၣ်ဒုးတၢ်တဖၣ်ဃ့ၢ်သဘျိၣ်ဆူဝ့ၢ်ခိၣ်ဒူ ဒီးဆီလီၤကတီၤဒီသဒၢတၢ်လၢသ့ၣ်ဖူကျီၣ်တိၢ်လီၤ ဝ့ၢ်ခိၣ်ဒူအဂီၢ်လီၤ.

⁶ တြဲၤတဖၣ်လၢထံကျိအကပၤပိၢ်ဖး အိးသလၣ်ထီၣ်အသး, နူၢ်ဧိၤစီၤဧိၤအပူၤအိၣ်ပှဲၤဝဲဒီး တၢ်ပျံၤတၢ်ဖုးန့ၣ်လီၤ.

⁷ နီၢ်ပၤမုၣ်ဘၣ်တၢ်ဖီၣ်န့ၢ်အီၤ, ဒီးအကုၢ်ပိာ်မုၣ်သ့ၣ်တဖၣ်ဟီၣ်ဝဲယၢၤဝဲဒ် ထိၣ်ကးက့ၣ်ကအုအသိး, ဒီးဒဲလီၤအသးနါပှၢ်တဖၣ်လၢတၢ်သူၣ်အုးသးအုးအပူၤန့ၣ်လီၤ.

⁸ ဒ်တမၢၣ်တဘိကၢ်ဒီးထံယွၤလီၤဝဲအသိး, ပှၤဂီၢ်မုၢ်ဃ့ၢ်ထီၣ်ကွံာ်ချ့ချ့လၢဝ့ၢ်နံၤနဝ့အပူၤလီၤ. တၢ်ကိးထီၣ်ဝဲ, “အိၣ်ကတီၢ်, အိၣ်ကတီၢ်” ဘၣ်ဆၣ်ဒီးပှၤတဃၣ်ကဒါက့ၤဘၣ်အသး နီတဂၤဘၣ်.

⁹ ဂုာ်န့ၢ်စ့, ဂုာ်န့ၢ်ထူတက့ၢ်. ဝ့ၢ်အံၤပှဲၤဝဲဒီးတၢ်ထူးတၢ်တီၤလီၤ.

¹⁰ ဝ့ၢ်နံၤနဝ့ဘၣ်တၢ်မၤဟးဂီၤကွံာ်, ဘၣ်တၢ်လဲၤကပာ်ကွံာ်ဒီးအိၣ် သယုၢ်လံဝဲလံ. ပှၤအသးတဖၣ်ပှံၢ်လီၤဝဲလၢတၢ်ပျံၤတၢ်ဖုးအဃိ, အခီၣ်လ့ၣ်ခိၣ်တဖၣ်ကနိးကစုာ်ဝဲ, အဂံၢ်အဘါလၢာ်ကွံာ်ဝဲဒီးအမဲာ်သၣ်တဖၣ်လီၤဝါကွံာ်ဝဲလံန့ၣ်လီၤ.

¹¹ ဝ့ၢ်လၢအလီၤဂာ်ဒီးခ့ယုၢ်တဖၣ်အတဝၢပူၤ, တၢ်လီၢ်ဖဲခ့ယုၢ်ဖိတဖၣ်အီၣ်တၢ်, ဖဲခ့ယုၢ်ဖါဒီးခ့ယုၢ်မိၢ်လဲၤဝဲဒီးအဖိတဖၣ်လၢကအိၣ်ပူၤဖျဲးဝဲ အဂီၢ်န့ၣ်, ခဲကနံၣ်အံၤအိၣ်ဖဲလဲၣ်.

¹² ခ့ယုၢ်မၤသံကွံာ်အဆၣ်အီၣ် ဒီးအ့ၣ်ဖှီကွံာ်အီၤဆူအကူးလံာ်ကူးလာ်လၢခ့ယုၢ်မိၢ်ဒီး အဖိတဖၣ်အဂီၢ်လီၤ. မၤပှဲၤဝဲအတဝၢလၢတၢ်ညၣ်လၢအအ့ၣ်ဖှီတ့ၢ်ဝဲန့ၣ်လီၤ.

¹³ ယွၤသ့တၢ်လၢာ်စံးဝဲဒၣ်, “ယမ့ၢ်နဒုၣ်နဒါလီၤ. ယကဒွဲၣ်အူကွံာ်နလ့ၣ်ကဟၣ်ဒုးသုးတဖၣ်လီၤ. နပှၤသုးဖိတဖၣ်ကဘၣ်တၢ်မၤသံကွံာ်အီၤလၢတၢ်ဒုးတၢ်ယၤအပူၤ, ဒီးယကဟံးထီၣ်ကွံာ်ကယဲၢ်တၢ်ခဲလၢာ်လၢန ဟံးန့ၢ်လၢပှၤဂၤတဖၣ်အအိၣ်န့ၣ်လီၤ. ဒီးနပှၤဃ့ၢ်စိာ်ဆှၢတၢ်ကစီၣ်အကလုၢ်န့ၣ်, တၢ်တနၢ်ဟူလၢၤဘၣ်အီၤနီတစုဘၣ်.”