လံာ်မၢ်ကူး 5 - Sgaw Karen Common Bible

ယ့ၣ်ၡူးမၤဘျါက့ၤပှၤတဂၤလၢ တၢ်နါတဖၣ်ဒိးအီၤ

¹ ယ့ၣ်ၡူးဒီးအပျဲၢ်အဘီၣ်တဖၣ်ခီဃီၤပီၣ်လဲၣ်ကၤလံၤလါ ဒီးလဲၤတုၤဝဲလၢပီၣ်လဲၣ်ဝၢ်ဘးခီ, လၢပှၤကဒါရၤဖိအကီၢ် ပူၤလီၤ.

² အဝဲဒၣ်စံၣ်လီၤလၢချံပူၤတယံာ်ဘၣ်ဒီး ပှၤလၢတၢ်နါဒိးအီၤတဂၤဟးထီၣ်လၢတၢ်သွၣ်ခိၣ်အပူၤဒီးဟဲ သဂၢၢ်အီၤလီၤ.

³ ပှၤတဂၤအံၤအိၣ်ဝဲဆိးဝဲလၢပှၤသွၣ်ခိၣ်အပူၤ ဒီးပှၤစၢဃာ်အီၤလၢပျံၤထးဒၣ်လဲာ်တန့ၢ်ဘၣ်နီတဂၤဘၣ်လီၤ.

⁴ အဂ့ၢ်ဒ်လဲၣ်န့ၣ်အဝဲဒၣ်အစုဘၣ်တၢ်စၢဃာ်အီၤဒီးအခီၣ်ဘၣ် တၢ်ကျီၤဃာ်အီၤလၢပျံၤထးတဘျုးဘျီဘၣ်ဆၣ်ဒီးအဝဲဒၣ်ထဲး တဲာ်ဒီးဘိးကၢ်ကွံာ်ဝဲဒၣ်ကိးဘျီဒဲးလီၤ. အဝဲဒၣ်အဂံၢ်အဘါဆူၣ်တုၤဒၣ်လဲာ်ပှၤမၤဘှါအီၤတန့ၢ်နီ တဂၤဘၣ်.

⁵ လၢမုၢ်နၤဒီးမုၢ်ဆါန့ၣ်, အဝဲဟးဝ့ၤဝီၤလၢပှၤသွၣ်ခိၣ်အပူၤတဖၣ်ဒီးတၢ်လူၢ်ဖိတဖၣ် အကျါ, ကိးပသူကိးပသီထီၣ်ဝဲဒီးဂဲာ်လီၤအသးလၢ လၢၢ်အက့အခီတဖၣ်လီၤ.

⁶ အဝဲဒၣ်ထံၣ်စိဃီၤယ့ၣ်ၡူးလၢအယံၤဒီးဃ့ၢ်ဃီၤဝဲဆူအအိၣ် ဒီးချံးခီၣ်တီၤလီၤဝဲလၢအမဲာ်ညါလီၤ.

⁷ ဒီးကိးပသူထီၣ်လၢအကလုၢ်ဖးဒိၣ်ဒီးစံးဝဲ, “ယွၤလၢအဒိၣ်ကတၢၢ်ထီကတၢၢ်တဂၤအဖိခွါယ့ၣ်ၡူးဧၢ, မ့ၢ်နဘၣ်ဃးဒီးယၤဒ်လဲၣ်. ယဃ့ကညးနၤလၢယွၤအမဲာ်ညါမၤအၢမၤနးယၤတဂ့ၤ.”

⁸ (စံးတၢ်ဒ်အံၤမ့ၢ်လၢယ့ၣ်ၡူးစံးဘၣ်တ့ၢ်အီၤ, “တၢ်နါအၢတဒုဧၢ, ဟးထီၣ်ကွံာ်လၢပှၤတဂၤအံၤအပူၤတက့ၢ်” အဃိလီၤ.)

⁹ အန့ၣ်ဒီးယ့ၣ်ၡူးသံကွၢ်အီၤ, “နမံၤဒ်လဲၣ်.” အဝဲစံးဆၢက့ၤဝဲ, “ယမံၤမ့ၢ်လ့းကူၣ်လီၤ. အဂ့ၢ်မ့ၢ်လၢပအိၣ်အါဒုအဃိလီၤ.”

¹⁰ ဒီးအဝဲဒၣ်ဃ့ကညးယ့ၣ်ၡူးသပှၢ်ပှၢ်လၢ အသုတမၢအဟးထီၣ်ကွံာ်လၢကီၢ်န့ၣ်အပူၤတဂ့ၤလီၤ.

¹¹ ဖဲတယံၤတဘူးဒီးတၢ်လီၢ်န့ၣ်, တၢ်လူၢ်ဖိ အိၣ်ဝဲတလူၢ်ဒီးထိးတဖုအီၣ်အဆၣ်ဖဲတၢ်လူၢ်န့ၣ်အလိၤလီၤ.

¹² အန့ၣ်ဒီးတၢ်နါတဖၣ်ဃ့ကညးယ့ၣ်ၡူးဒီးစံးဝဲ, “ပျဲပလဲၤဆူထိးတဖၣ်အအိၣ်ဒ်သိးပကနုာ်ဆူအပူၤတက့ၢ်.”

¹³ ယ့ၣ်ၡူးပျဲအဝဲသ့ၣ်မၤဒ်အဃ့ဝဲအသိးလီၤ. ဖဲန့ၣ်တၢ်နါအၢတဖၣ်ဟးထီၣ်ကွံာ်လၢပှၤတဂၤန့ၣ် အလိၤဒီးလဲၤနုာ်ဝဲဆူထိးတဖၣ်အပူၤလီၤ. ထိးဒီတဖုညါလၢအနီၣ်ဂံၢ်အိၣ်ခံကထိဃၣ်ဃၣ်န့ၣ်, ဃ့ၢ်သဖှိလီၤလၢလ့ကဘျၣ်ကပၤလၢအလီၤဘံဆှိခိၣ်, ဆူပီၣ်လဲၣ်ပူၤဒီးလီၤအုးသံဝဲခဲလၢာ်လီၤ.

¹⁴ ပှၤကွၢ်ထိးတဖၣ်ဃ့ၢ်ထီၣ်လၢတၢ်လီၢ်ဖဲန့ၣ်ဒီးစံးဘၣ်တဲဘၣ် တၢ်မၤအသးအဂ့ၢ်အကျိၤအံၤဆူပှၤအိၣ်လၢဝ့ၢ်ပူၤဒီးပှၤအိၣ်လၢ ခိတဖၣ်လီၤ. အန့ၣ်ဒီးပှၤဟဲဝဲဒ်သိးကထံၣ်ဘၣ်တၢ်မၤအသး နီၢ်နီၢ်မ့ၢ်တၢ်မနုၤလဲၣ်န့ၣ်လီၤ.

¹⁵ တုၤအဝဲသ့ၣ်ဟဲတုၤဖဲယ့ၣ်ၡူးအိၣ်တၢ်အလီၢ်န့ၣ်, အဝဲသ့ၣ်ထံၣ်ဘၣ်ပှၤလၢတၢ်နါလ့းကူၣ်ဒိးတ့ၢ်အီၤ တဂၤဆ့ၣ်နီၤဖဲန့ၣ်အိၣ်ဒီးတၢ်ကူတၢ်သိးဒီးအသးဘၣ်လီၢ် ဘၣ်စးဂ့ၤဂ့ၤဘၣ်ဘၣ်သတးဒီး, အဝဲသ့ၣ်ပျံၤတၢ်ဖုးတၢ်လီၤ.

¹⁶ ပှၤလၢအထံၣ်ဘၣ်တၢ်မၤအသးနီၢ်နီၢ်တဖၣ်စံးဘၣ်တဲဘၣ်ပှၤလၢ အဟဲကွၢ်တၢ်တဖၣ်ဘၣ်ဃးတၢ်မၤအသးဒီးပှၤလၢတၢ်နါဒိးအီၤတဂၤ, ဒီးထိးတဖၣ်အဂ့ၢ်အကျိၤလီၤ.

¹⁷ သတးဒီးအဝဲသ့ၣ်တဖၣ်ဃ့ကညးယ့ၣ်ၡူးလၢအကဟးထီၣ်ကွံာ်လၢ အဝဲသ့ၣ်အိၣ်တၢ်အလီၢ်ကဝီၤန့ၣ်လီၤ.

¹⁸ ဖဲယ့ၣ်ၡူးလဲၤနုာ်လီၤဆူချံပူၤအကတီၢ်ပှၤလၢတၢ်နါဒိးတ့ၢ်အီၤတဂၤ န့ၣ်ဃ့ကညးအီၤဒီးစံးဝဲ, “ပျဲယလဲၤတၢ်ဒီးနၤတက့ၢ်.”

¹⁹ ဘၣ်ဆၣ်ဒီးယ့ၣ်ၡူးတပျဲအီၤဘၣ်. မ့မ့ၢ်စံးဘၣ်အီၤ, “က့ၤက့ၤဆူနဟံၣ်နဃီဒီးတဲဘၣ်ပှၤအိၣ်ဒီးနၤတဖၣ်လၢ ကစၢ်မၤတ့ၢ်တၢ်လၢနဂီၢ်ဆံးအါဒီးအတၢ်သးကညီၤအိၣ်တ့ၢ်လၢနဖီ ခိၣ်ဆံးအါလဲၣ်န့ၣ်တက့ၢ်.”

²⁰ အန့ၣ်ဒီးပှၤတဂၤန့ၣ်ဟးထီၣ်ကွံာ်ဖဲန့ၣ်ဝံၤလဲၤခီဂာ်ဒ့းကၤပလံၣ် လၢအမ့ၢ်ဝ့ၢ်အဖျၢၣ်တဆံအတၢ်ပၢ ဒီကီၢ်ညါဒီးစံးဘၣ်တဲဘၣ်တၢ်လၢယ့ၣ်ၡူးမၤလၢအဂီၢ်တဖၣ်လီၤ. ဒီးကယဲၢ်ပှၤလၢအနၢ်ဟူဘၣ်တၢ်ဂ့ၢ်န့ၣ်ကမၢကမၣ်ဝဲဒိၣ်မးလီၤ.

စီၤယၤအ့ၤရူးအဖိမုၣ်ဒီးပိာ်မုၣ်လၢအထိးဘၣ် ယ့ၣ်ၡူးအဆ့ကၤ

²¹ ယ့ၣ်ၡူးဒိးထီၣ်ချံဒီးခီဃီၤကဒါက့ၤဆူပီၣ်လဲၣ်ဝၢ်ဘးခီ လီၤ. တုၤအတုၤလၢဘးခီဒီးအိၣ်ဒံးလၢပီၣ်လဲၣ်နံၤအဖၢမုၢ်န့ၣ် ပှၤဂီၢ်မုၢ်ဖးဒိၣ်ဟဲအိၣ်ဝးတရံးအီၤလီၤ.

²² အကတီၢ်ဖဲန့ၣ်, ဘူၣ်ဘျီၣ်လၢအမ့ၢ်တၢ်ဘါလီၢ်အခိၣ်လၢ အမံၤမ့ၢ်ဝဲစီၤယၤအ့ၤရူးတဂၤဟဲတုၤဝဲဒီး တုၤအထံၣ်ယ့ၣ်ၡူးဒီးထိၣ်လီၤပှီၤအသးလၢအမဲာ်ညါဝံၤ

²³ ဃ့ကညးအီၤသပှၢ်ပှၢ်ဒီးစံးဝဲ, “ယဖိမုၣ်ဖိဆါနးမးဒီးဘူးတ့ၢ်မးလၢအကသံလီၤ. ဝံသးစူၤဟဲဒီးပာ်နစုလၢအလိၤဒ်သိးကဘျါက့ၤဝဲဒီးကအိၣ် မူဘၣ်ဒံးဝဲအဂီၢ်န့ၣ်တက့ၢ်.”

²⁴ အန့ၣ်ဒီးယ့ၣ်ၡူးလဲၤသကိးဒီးအီၤလီၤ. ပှၤလၢအပိာ်ထီၣ်ယ့ၣ်ၡူးအခံအိၣ်အါအါဂီၢ်ဂီၢ်တုၤဒၣ်လဲာ် ဘၣ်တၢ်ဆီၣ်သနံးအီၤကိးကပၤဒဲးလီၤ.

²⁵ အကတီၢ်ဖဲန့ၣ်, ပှၤပိာ်မုၣ်အိၣ်ဝဲတဂၤလၢအအိၣ်ဒီး တၢ်ဆါသွံၣ်လီၤတဆံခံနံၣ်လီၤ.

²⁶ ကသံၣ်သရၣ်အါဂၤဂုာ်ကျဲးစၢးမၤဘျါအီၤဒီးအဝဲဒၣ်အကျိၣ် အစ့လၢာ်ကွံာ်ခဲလၢာ်သနာ်က့, အတၢ်ဆါန့ၣ်တကိညၢ်အမဲာ်ညါနးထီၣ်ကွ့ၢ်ကွ့ၢ်လီၤ.

²⁷ အဝဲဒၣ်နၢ်ဟူတ့ၢ်လံယ့ၣ်ၡူးအဂ့ၢ်သတးဒီးဝာ်နုာ်ဖျိပှၤဂီၢ် မုၢ်ဆူယ့ၣ်ၡူးအလီၢ်ခံဒီးထိးဘၣ်အဆ့ကၤလၢအစုလီၤ.

²⁸ အဂ့ၢ်ဒ်အံၤစံးလီၤအသး “ယမ့ၢ်ထိးဘၣ်ထဲအကူအသိးဒီးယကဘျါက့ၤယဲလီၤ.”

²⁹ တကီၢ်ခါအတၢ်ဆါသွံၣ်လီၤန့ၣ် တုာ်ဝဲဒီးသ့ၣ်ညါဝဲလၢအတၢ်ဆါဘျါက့ၤဝဲလံန့ၣ်လီၤ.

³⁰ တဘျီဃီဖဲန့ၣ်ယ့ၣ်ၡူးသ့ၣ်ညါလၢတၢ်စိတၢ်ကမီၤဟးထီၣ်ကွံာ် လၢအပူၤသတးဒီးဃၣ်ကဒါက့ၤအသးဆူပှၤဂီၢ်မုၢ်အအိၣ် ဒီးသံကွၢ်ဝဲ, “မ့ၢ်မတၤတဂၤထိးဘၣ်ယဆ့ကၤလဲၣ်.”

³¹ အပျဲၢ်အဘီၣ်တဖၣ်စံးဆၢအီၤ, “နထံၣ်ပှၤဂီၢ်မုၢ်ဆီၣ်သနံးနၤထဲအံၤညါန့ၣ် မ့ၢ်နစံးဒံးလၢမတၤထိးယၤတဂၤလဲၣ်န့ၣ်ဧါ.”

³² ဘၣ်ဆၣ်ယ့ၣ်ၡူးကွၢ်တရံးတၢ်ဝးဝးလၢကထံၣ်ဘၣ်ပှၤလၢ အထိးဘၣ်တ့ၢ်အီၤတဂၤန့ၣ်လီၤ.

³³ အန့ၣ်တစုပိာ်မုၣ်တဂၤန့ၣ်မ့ၢ်လၢအသ့ၣ်ညါ လီၤအသးလၢအတၢ်ဆါဘျါက့ၤလံသတးဒီး, ဟဲထီၣ်ဆူတၢ်မဲာ်ညါလၢတၢ်ပျံၤတၢ်ဖုးဒီးတၢ်ကနိးကစုာ် အပူၤ, ချံးခီၣ်တီၤလီၤလၢယ့ၣ်ၡူးအမဲာ်ညါဒီးစံးဘၣ်တဲဘၣ်အီၤတၢ် မၤအသးနီၢ်နီၢ်တဖၣ်ခဲလၢာ်လီၤ.

³⁴ ယ့ၣ်ၡူးစံးဘၣ်အီၤ, “ဖိမုၣ်ဧၢ, နတၢ်နာ်န့ၣ်မၤဘျါက့ၤနၤလံ. က့ၤမုာ်မုာ်တက့ၢ်. နတၢ်ဆါဘျါလံ.”

³⁵ ဖဲယ့ၣ်ၡူးကတိၤတၢ်အဖၢမုၢ်, စီၤယၤအ့ၤရူးအပှၤဟံၣ်ဖိတနီၤဟဲတုၤဝဲဒီးစံးဘၣ်အီၤ, “နဖိမုၣ်သံလံ. ဘၣ်မနုၤနမၤတံာ်တာ်ဒံးသရၣ်လဲၣ်.”

³⁶ တၢ်လၢအဝဲသ့ၣ်တဖၣ်စံးဝဲန့ၣ်ယ့ၣ်ၡူးတကနၣ်ဃုာ်ဝဲဘၣ်ဒီးစံး ဘၣ်စီၤယၤအ့ၤရူး, “ပျံၤတၢ်တဂ့ၤ. ထဲနာ်တၢ်တက့ၢ်.”

³⁷ အန့ၣ်ဒီးအဝဲဒၣ်တပျဲပှၤအဂၤကလဲၤပိာ်အခံဆူညါနီတဂၤလၢၤဘၣ်. ပျဲဝဲထဲစီၤပ့းတရူးဒီးစီၤယၤကိာ်, ဒီးအဒီပုၢ်ဝဲၢ်စီၤယိၤဟၣ်ဧိၤလီၤ.

³⁸ တုၤအလဲၤတုၤဝဲလၢစီၤယၤအ့ၤရူးအဟံၣ်ဒီးယ့ၣ်ၡူးထံၣ်ဘၣ်တၢ် သဘံၣ်ဘုၣ်မၤအသးဒီးနၢ်ဟူတၢ်ဟီၣ်တၢ်ယၢၤဒီးတၢ်ကိးပသူကိး ပသီလီၤ.

³⁹ လဲၤနုာ်ဝဲဆူဟံၣ်ပူၤဒီးစံးဘၣ်ပှၤတဖၣ်န့ၣ်, “ဘၣ်မနုၤသုဘၣ်မၤသဘံၣ်ဘုၣ်တၢ်ဒီးဟီၣ်တၢ်ယၢၤတၢ် ထဲထဲအံၤန့ၣ်လဲၣ်. ဖိသၣ်မုၣ်တသံဘၣ်, မ့ၢ်ဒၣ်အမံဘၣ်အသး လီၤ.”

⁴⁰ အဝဲသ့ၣ်တဖၣ်နံၤဘၣ်ဖၣ်လဲအီၤလီၤ. အန့ၣ်ဒီးဟီထီၣ်ကွံာ်အဝဲသ့ၣ်ခဲလၢာ်ဆူခိဝံၤကိးနုာ်ထဲဖိ သၣ်အမိၢ်အပၢ်ဒီးအပျဲၢ်အဘီၣ်သၢဂၤဒီးလဲၤနုာ် လီၤဝဲဆူဖိသၣ်အိၣ်မံလီၤဝဲအဒၢးပူၤလီၤ.

⁴¹ အဝဲဒၣ်ဟံးထီၣ်ဖိသၣ်မုၣ်န့ၣ်လၢအစုဒီးစံးဘၣ်အီၤ, “တၤလံၤသၤကူမံၤ,” အခီပညီ “ပိာ်မုၣ်ဖိဧၢ, ယစံးဘၣ်နၤ, ဂဲၤဆၢထၢၣ်တက့ၢ်.”

⁴² ဖိသၣ်မုၣ်န့ၣ်ဂဲၤဆၢထၢၣ်ဒီးဟးဝဲတဘျီဃီလီၤ. (အဝဲဒၣ်အသးအိၣ်တဆံခံနံၣ်လီၤ) တၢ်မၤအသးအံၤဒုးကမၢကမၣ်ပှၤတဖၣ်န့ၣ်ဒိၣ်မးလီၤ.

⁴³ ဘၣ်ဆၣ်ယ့ၣ်ၡူးမၤလိာ်အဝဲသ့ၣ်လၢတၢ်ကတိၤလၢအဆူၣ် ဒ်သိးအသုတစံးဘၣ်တဲဘၣ်တၢ်ဂ့ၢ်အံၤလၢပှၤနီတဂၤတဂ့ၤ, ဒီးမၢပှၤဟ့ၣ်ဒုးအီၣ်ဖိသၣ်န့ၣ်လၢတၢ်အီၣ်တမံၤမံၤလီၤ.