လံာ်မၢ်ကူး 10 - Sgaw Karen Common Bible

ယ့ၣ်ၡူးသိၣ်လီၤသီလီၤတၢ်ဘၣ်ဃး တၢ်ပာ်မၢ်မါ

¹ ဝံၤဒီးယ့ၣ်ၡူးဟးထီၣ်ဖဲတၢ်လီၢ်န့ၣ်ဒီးလဲၤဝဲဆူကီၢ်ယူဒၤ, ဒီးခီဂာ်ဝဲဆူယၢ်ဒ့ၣ်ကျိအဝၢ်ဘးခီလီၤ. ပှၤဂီၢ်မုၢ်တဖၣ်ဟဲပာ်ဖှိၣ်ထီၣ်ကဒီးအသးဝးတရံးအီၤ, ဒီးအဝဲဒၣ်သိၣ်လီၤသီလီၤအဝဲသ့ၣ်, ဒ်အညီနုၢ်မၤတ့ၢ်ဝဲအသိးလီၤ.

² ပှၤဖၤရံၤၡဲတနီၤဟဲဆူအအိၣ်ဒီးအဲၣ်ဒိးမၤကွၢ်အီၤသတးဒီး သံကွၢ်အီၤ, “ပှၤတဂၤကပာ်မၢ်အမါန့ၣ်ပတၢ်သိၣ်တၢ်သီဟ့ၣ်အီၤတၢ်ပျဲဧါ.”

³ ယ့ၣ်ၡူးစံးဆၢက့ၤအဝဲသ့ၣ်လၢတၢ်သံကွၢ်တထံၣ်, “စီၤမိၤၡ့မၤလိာ်သုဒ်လဲၣ်.”

⁴ အဝဲသ့ၣ်စံးဆၢဝဲ, “စီၤမိၤၡ့ဟ့ၣ်တၢ်ပျဲလၢကကွဲးလံာ်လီၤဖှၣ်တဘ့ၣ်, ဝံၤဒီးပာ်မၢ်ကွံာ်အမါသ့ဝဲဒၣ်လီၤ.”

⁵ ယ့ၣ်ၡူးစံးဘၣ်အဝဲသ့ၣ်, “စီၤမိၤၡ့ကွဲးန့ၢ်သုတၢ်သိၣ်တၢ်သီအံၤမ့ၢ်လၢသုသးကိၤ ဒိၣ်မးအဃိန့ၣ်လီၤ.

⁶ ဘၣ်ဆၣ်ဒီး, လၢယွၤတ့လီၤပာ်လီၤတၢ်လၢထံးလၢသီန့ၣ်, တၢ်ကွဲးအသးစံးဝဲ, ‘ကစၢ်ယွၤတ့လီၤပိာ်ခွါဒီးပိာ်မုၣ်လီၤ.’

⁷ ‘ဒီးလၢတၢ်အံၤအဃိ, ပိာ်ခွါတဂၤကဟးသဒၣ်ကွံာ်အမိၢ်ဒီးအပၢ်ဒီးကအိၣ်ဃုာ်ဒီးအမါ,

⁸ ဒီးပှၤခံဂၤန့ၣ်ကကဲထီၣ်နီၢ်တဂၤဃီလီၤ.’ အန့ၣ်ဒီးအဝဲသ့ၣ်တမ့ၢ်လၢၤပှၤခံဂၤဘၣ်, မ့ၢ်ပှၤတဂၤဃီလီၤ.

⁹ သတးဒီး, တၢ်လၢကစၢ်ယွၤပာ်ဃုာ်တပူၤဃီန့ၣ်, မ်ပှၤကညီသုတထုးဖးကွံာ်တဂ့ၤ.”

¹⁰ တုၤအဝဲသ့ၣ်က့ၤနုာ်လၢဟံၣ်ပူၤတစုဒီး, အပျဲၢ်အဘီၣ်တဖၣ်သံကွၢ်က့ၤကဒီးယ့ၣ်ၡူးဘၣ်ဃးတၢ်ဂ့ၢ်တမံၤအံၤ န့ၣ်လီၤ.

¹¹ အဝဲဒၣ်စံးဘၣ်အဝဲသ့ၣ်, “ပှၤပိာ်ခွါတဂၤလၢအပာ်မၢ်ကွံာ်အမါ ဒီးဒိးတ့ဒိးဖျီအသးဒီးပိာ်မုၣ်အဂၤတဂၤန့ၣ်, မ့ၢ်အအဲၣ်ဘၢအမါလီၤ.

¹² ဒ်န့ၣ်အသိး, ပှၤပိာ်မုၣ်တဂၤလၢအပာ်မၢ်ကွံာ်အဝၤဒီး ဒိးတ့ဒိးဖျီအသးဒီးပိာ်ခွါအဂၤတဂၤန့ၣ်, မ့ၢ်အအဲၣ်ဘၢအဝၤလီၤ.”

ယ့ၣ်ၡူးဆိၣ်ဂ့ၤဖိသၣ်ဆံးတဖၣ်

¹³ ပှၤဟဲကိးဖိသၣ်တဖၣ်ဆူယ့ၣ်ၡူးအအိၣ် လၢကပာ်ထီၣ် အစုလၢအဝဲသ့ၣ်အလိၤအဂီၢ်, ဘၣ်ဆၣ်ဒီးအပျဲၢ်အဘီၣ်တဖၣ်ဒူပှၤတဖၣ်န့ၣ်အလိၤလီၤ.

¹⁴ တုၤယ့ၣ်ၡူးထံၣ်တၢ်မၤအသးအံၤဒီး, အသးဒိၣ်ထီၣ်ဒီးစံးဘၣ်အပျဲၢ်အဘီၣ်တဖၣ်န့ၣ်, “ပျဲဖိသၣ်တဖၣ်န့ၣ်ဟဲဆူယအိၣ်ဒီးတြီအီၤတဂ့ၤ. အဂ့ၢ်ဒ်လဲၣ်န့ၣ်, ကစၢ်ယွၤအဘီအမုၢ်မ့ၢ်ပှၤဒ်ဖိသၣ်တဖၣ်အံၤအသိးအတၢ်န့ၣ်လီၤ.

¹⁵ ယစံးဘၣ်သုတီတီလီၤ. ပှၤတဂၤလၢ်လၢ်လၢအတတူၢ်လိာ် ကစၢ်ယွၤအဘီအမုၢ်ဒ်ဖိသၣ်တဂၤအသိးဘၣ်န့ၣ်, တလဲၤနုာ်ဘၣ်ဝဲဆူအပူၤဘၣ်.”

¹⁶ ဝံၤဒီး, အဝဲဒၣ်ဖိးဟုထီၣ်ဖိသၣ်တဖၣ်တဂၤဘၣ်တဂၤ, ပာ်ထီၣ်အစုလၢအလိၤ, ဒီးဆိၣ်ဂ့ၤအဝဲသ့ၣ်လီၤ.

ပှၤထူးပှၤတီၤတဂၤ

¹⁷ ဖဲယ့ၣ်ၡူးဟးထီၣ်ဒီးလဲၤတၢ်အကတီၢ်န့ၣ်, ပှၤတဂၤဟဲဃ့ၢ်ထီၣ်ဒီးချံးခီၣ်တီၤလီၤလၢအမဲာ်ညါဒီးသံ ကွၢ်အီၤ, “သရၣ်လၢအဂ့ၤတဂၤဧၢ, ဒ်သိးယကန့ၢ်ဘၣ်သါတၢ်မူအထူအယိာ်အဂီၢ်ယကဘၣ် မၤတၢ်မနုၤလဲၣ်.”

¹⁸ ယ့ၣ်ၡူးသံကွၢ်အီၤ, “ဘၣ်မနုၤနကိးယၤလၢပှၤအဂ့ၤန့ၣ်လဲၣ်. ပှၤလၢအဂ့ၤတအိၣ်နီတဂၤဘၣ်. အိၣ်ဒၣ်ထဲကစၢ်ယွၤတဂၤဧိၤလီၤ.

¹⁹ ယွၤအတၢ်မၤလိာ်တဖၣ်နသ့ၣ်ညါနဲလီၤ. မၤသံပှၤကညီတဂ့ၤ, အဲၣ်ဘၢမါအဲၣ်ဘၢဝၤတဂ့ၤ, ဟုၣ်တၢ်တဂ့ၤ, အုၣ်နသးကဘျံးကဘျၣ်လၢပှၤအဂ့ၢ်တဂ့ၤ, လီအီၣ်ပှၤဂၤတဂ့ၤ, ယူးယီၣ်နမိၢ်နပၢ်တက့ၢ်.”

²⁰ အဝဲဒၣ်စံးဆၢက့ၤအီၤ, “သရၣ်ဧၢ, တၢ်တဖၣ်အံၤခဲလၢာ်ယတိၢ်န့ၢ်ဒီးမၤတ့ၢ်အီၤလၢ ယသးစၢ်လံၤလံၤလီၤ.”

²¹ ယ့ၣ်ၡူးကွၢ်အီၤပှဲၤဒီးတၢ်အဲၣ်တၢ်ကွံဒီးစံးဘၣ်အီၤ, “တၢ်လၢနမၤတလၢတပှဲၤဒံးဘၣ်န့ၣ်အိၣ်တမံၤလီၤ. လဲၤဒီးဆါကွံာ်ကယဲၢ်တၢ်လၢအအိၣ်ဒီးနၤန့ၣ် ဒီးကျိၣ်စ့လၢနန့ၢ်ဘၣ်န့ၣ် ဟ့ၣ်နီၤလီၤပှၤဖှီၣ်ဖိယာ်ဖိတ ဖၣ်, ဒီးနကအိၣ်ဒီးတၢ်ထူးတၢ်တီၤလၢမူခိၣ်လီၤ. အန့ၣ်ဝံၤဟဲဒီးကဲဘၣ်ယပျဲၢ်ယဘီၣ်တက့ၢ်.”

²² တုၤမ့ၢ်ယ့ၣ်ၡူးစံးတၢ်န့ၣ်ဝံၤဒီး, ပှၤတဂၤန့ၣ်အမဲာ်လီၤ သပှၢ်ဝဲဒၣ်, ဒီးဟးထီၣ်ကွံာ်ဝဲပှဲၤဒီးတၢ်သူၣ်အုးသးအုးမ့ၢ်လၢ အတၢ်စုလီၢ်ခီၣ်ခိၣ်အိၣ်အါမးအဃိလီၤ.

²³ ယ့ၣ်ၡူးကွၢ်တရံးတၢ်ဆူအပျဲၢ်အဘီၣ်တဖၣ်အအိၣ်ဒီးစံးဘၣ် အဝဲသ့ၣ်, “ပှၤလၢအအိၣ်ဒီးတၢ်စုလီၢ်ခီၣ်ခိၣ်အါအါဂီၢ်ဂီၢ်တဖၣ် ကလဲၤနုာ်ဆူကစၢ်ယွၤအဘီအမုၢ်အပူၤန့ၣ်, မ့ၢ်တၢ်ကီဒိၣ်မးလဲၣ်.”

²⁴ အတၢ်ကတိၤတဖၣ်အံၤဒုးကမၢကမၣ်အပျဲၢ်အဘီၣ်တဖၣ်, ဘၣ်ဆၣ်ယ့ၣ်ၡူးစံးကဒီးဝဲ, “ယဖိယလံၤသ့ၣ်ဧၢ, ပှၤကလဲၤနုာ်လီၤဆူကစၢ်ယွၤအဘီအမုၢ်အပူၤန့ၣ်, မ့ၢ်တၢ်ကီဒိၣ်မးလဲၣ်.

²⁵ ကီၤလၤအူးတဒုကလဲၤနုာ်ဝၣ်ဖျိထးမဲၢ်ခံအပူၤန့ၣ်မ့ၢ်တၢ်ညီ ဒိၣ်န့ၢ်ဒံးပှၤထူးပှၤတီၤတဂၤကလဲၤနုာ်ဆူကစၢ်ယွၤအဘီ အမုၢ်အပူၤတက့ၢ်လီၤ.”

²⁶ သတးဒီးအပျဲၢ်အဘီၣ်တဖၣ်တၢ်လီၤကမၢကမၣ်ဘၣ်အီၤဒိၣ်ဒိၣ်ကလဲာ် ဒီးသံကွၢ်လိာ်အသးတဂၤဒီးတဂၤ, “မ့မ့ၢ်ဒ်န့ၣ်ဒီး, ပှၤန့ၢ်ဘၣ်တၢ်အုၣ်က့ၤခီၣ်က့ၤဘၣ်ကသ့ဒံးတဂၤဂၤဧါ.”

²⁷ ယ့ၣ်ၡူးကွၢ်ဃီၤအဝဲသ့ၣ်ဒီးစံးဘၣ်အီၤ, “တၢ်တမံၤအံၤပှၤကညီမၤတသ့လ့ၤတက့ၤဘၣ်. ဘၣ်ဆၣ်လၢကစၢ်ယွၤအဂီၢ်တမ့ၢ်တၢ်ဒ်န့ၣ်ဘၣ်. အဂ့ၢ်ဒ်လဲၣ်န့ၣ်, ယွၤမၤတၢ်သ့ကိးမံၤဒဲးလီၤ.”

²⁸ စီၤပ့းတရူးစံးဘၣ်အီၤ, “ကွၢ်ကွၢ်ပဝဲသ့ၣ်တဖၣ်အံၤကယဲၢ်တၢ်အိၣ်ဒီးပှၤန့ၣ် ပပာ်တ့ၢ်ကွံာ်ခဲလၢာ်ဒီးပကဲထီၣ်တ့ၢ်နပျဲၢ်နဘီၣ်တဖၣ်လံ.”

²⁹ ယ့ၣ်ၡူးစံးဘၣ်အဝဲသ့ၣ်, “ယစံးယဲသပှၢ်ကတၢၢ်လီၤ. လၢယဃိဒီးလၢတၢ်သးခုကစီၣ်အဃိပှၤတဂၤလၢ်လၢ် လၢအပာ်တ့ၢ်ကွံာ်အဟံၣ်အဃီမ့ၢ်ဂ့ၤ, အဒီပုၢ်ဝဲၢ်ပိာ်ခွါမ့ၢ်ဂ့ၤ, အဒီပုၢ်ဝဲၢ်ပိာ်မုၣ်မ့ၢ်ဂ့ၤ, အမိၢ်မ့ၢ်ဂ့ၤ, အပၢ်မ့ၢ်ဂ့ၤ, အဖိအလံၤမ့ၢ်ဂ့ၤ, အစံာ်အပှဲၤမ့ၢ်ဂ့ၤ,

³⁰ ကဒိးန့ၢ်ဘၣ်အါထီၣ်ဝဲ အဘျီလၢအကယၤဖဲအစိၤခဲအံၤ, ဟံၣ်ဃီတဖၣ်, ဒီပုၢ်ဝဲၢ်ပိာ်ခွါတဖၣ်, ဒီပုၢ်ဝဲၢ်ပိာ်မုၣ်တဖၣ်, အမိၢ်တဖၣ်, ဖိလံၤတဖၣ်, ဒီးစံာ်ပှဲၤတဖၣ်, ဃုာ်စ့ၢ်ကီးဒီးတၢ်မၤနးမၤဖှီၣ်အီၤ, ဒီးလၢအစိၤလၢအကဟဲန့ၣ်, ကဒိးန့ၢ်ဘၣ်ဝဲတၢ်မူအထူအယိာ်လီၤ.

³¹ မ့မ့ၢ်ပှၤအါဂၤလၢအအိၣ်ဝဲလၢတၢ်မဲာ်ညါခဲအံၤန့ၣ်, ကအိၣ်က့ၤလၢတၢ်လီၢ်ခံ, ဒီးပှၤအါဂၤလၢအအိၣ်လၢတၢ်လီၢ်ခံခဲအံၤန့ၣ်, ကအိၣ်က့ၤဝဲလၢတၢ်မဲာ်ညါလီၤ.”

ယ့ၣ်ၡူးစံးကတိၤဝဲသၢဘျီတဘျီ ဘၣ်ဃးကဘၣ်သံဝဲအဂ့ၢ်

³² ယ့ၣ်ၡူးဒီးပှၤလၢအလဲၤသကိးဒီးအီၤတဖၣ်လဲၤဝဲလၢကျဲလၢ အလဲၤထီၣ်ဆူဝ့ၢ်ယရူၤၡလ့ၣ်န့ၣ်လီၤ. ယ့ၣ်ၡူးဟးဝဲဒၣ်လၢ အဝဲသ့ၣ်အမဲာ်ညါ, ဒီးအပျဲၢ်အဘီၣ်တဖၣ်အသးလီၤကတုၤဝဲဒၣ်လီၤ. မ့မ့ၢ်ပှၤလၢအပိာ်ထီၣ်အဝဲသ့ၣ်အခံတဖၣ် အသးပှဲၤဝဲ ဒီးတၢ်ပျံၤတၢ်ဖုးလီၤ. ယ့ၣ်ၡူးကိးဃီၤကဒီးထဲအပျဲၢ်အဘီၣ်တဆံခံဂၤဆူအအိၣ်ဒီးစံးဘၣ် အဝဲသ့ၣ်လၢတၢ်ကဘၣ်မၤအသးဒီးအီၤအဂ့ၢ်န့ၣ်လီၤ.

³³ အဝဲဒၣ်စံးဘၣ်အဝဲသ့ၣ်, “ကနၣ်တက့ၢ်. ခဲအံၤပကလဲၤထီၣ်ဆူဝ့ၢ်ယရူၤရှလ့ၣ်ဒီးဖဲန့ၣ်ပှၤကညီဖိခွါ အံၤ, ကဘၣ်တၢ်ဟ့ၣ်လီၤကွံာ်အီၤဆူပှၤလုၢ်တၢ်အခိၣ်အဒိၣ်တဖၣ် ဒီးပှၤသ့တၢ်ဘူၣ်တၢ်ဘါအတၢ်သိၣ်တၢ်သီတဖၣ်အစုပူၤလီၤ. အဝဲသ့ၣ်ကစံၣ်ညီၣ်သံကွံာ်အီၤဒီးကဟ့ၣ်လီၤကွံာ်အီၤဆူပှၤ ကလုာ်ဂၤတဖၣ်အစုပူၤလီၤ.

³⁴ အန့ၣ်ဒီးပှၤကလုာ်ဂၤတဖၣ်ကကတိၤတရီတပါအီၤ, ကထူးပှဲာ်အီၤ, ကတီၢ်အီၤ, ဒီးကမၤသံကွံာ်အီၤ, ဘၣ်ဆၣ်ဒီးသၢသီတသီန့ၣ်ကဂဲၤဆၢထၢၣ်သမူထီၣ်က့ၤလီၤ.”

စီၤယၤကိာ်ဒီးစီၤယိၤဟၣ် အတၢ်ဃ့သကွံၢ်ကညး

³⁵ စီၤယၤကိာ်ဒီးစီၤယိၤဟၣ်လၢအမ့ၢ်စီၤစ့းဘ့းဒဲအဖိခွါတဖၣ် န့ၣ်ဟဲသုးဘူးဃီၤအသးဆူယ့ၣ်ၡူးအအိၣ်ဒီးစံးဘၣ်အီၤ, “သရၣ်ဧၢ, တၢ်တမံၤလၢပကဃ့သကွံၢ်ကညးနၤန့ၣ်ပအဲၣ်ဒိးလၢနကမၤန့ၢ်လၢပဂီၢ်လီၤ.”

³⁶ ယ့ၣ်ၡူးသံကွၢ်အဝဲသ့ၣ်, “တၢ်လၢသုအဲၣ်ဒိးယကမၤန့ၢ်လၢသုဂီၢ်န့ၣ်မ့ၢ်မနုၤတမံၤလဲၣ်.”

³⁷ အဝဲသ့ၣ်စံးဆၢက့ၤအီၤ, “တုၤမ့ၢ်နဆ့ၣ်နီၤဘၣ်လၢနလီၢ်ပစိာ်ဖီခိၣ်လၢနဘီနမုၢ်အပူၤ ပှဲၤဒီးတၢ်လၤတၢ်ကပီၤန့ၣ်, ပျဲပဆ့ၣ်နီၤသကိးဃုာ်ဒီးနၤ, တဂၤလၢနစုထွဲဒီးတဂၤလၢနစုစ့ၣ်န့ၣ်တက့ၢ်.”

³⁸ ယ့ၣ်ၡူးစံးဘၣ်အဝဲသ့ၣ်, “တၢ်လၢသုဃ့အံၤသုတနၢ်ပၢၢ်အဂ့ၢ် ဘၣ်. တၢ်နးတၢ်ဖှီၣ်အလီခီလၢယကဘၣ်အီယဲန့ၣ်မ့ၢ်သုအီဘၣ်ကကဲဧါ. တၢ်ဒိးဘျၢလၢယကဘၣ်ဒိးဘျၢယသးန့ၣ်, မ့ၢ်သုဒိးဘျၢသုသးဘၣ်ကကဲဧါ.”

³⁹ အဝဲသ့ၣ်စံးဆၢက့ၤ, “ပမၤကဲလီၤ.” ယ့ၣ်ၡူးစံးဘၣ်အဝဲသ့ၣ်, “သပှၢ်ကတၢၢ်လီခီလၢယကဘၣ်အီယဲန့ၣ်သုကအီဘၣ်သုဝဲ, ဒီးဒ်ယကဘၣ်ဒိးဘျၢယသးအသိးန့ၣ်သုကဒိးဘျၢဘၣ်သုသးလီၤ.

⁴⁰ ဘၣ်ဆၣ်ဒီးတၢ်ဒုးဆ့ၣ်နီၤပှၤလၢယစုထွဲမ့ၢ်ဂ့ၤ, ယစုစ့ၣ်မ့ၢ်ဂ့ၤန့ၣ် တအိၣ်လၢယစုပူၤဘၣ်. ကစၢ်ယွၤကဟ့ၣ်လီၤတၢ်လီၢ်တဖၣ် အံၤလၢပှၤလၢအဝဲဒၣ်ကတဲာ်ကတီၤပာ်ဝဲလၢအဂီၢ်န့ၣ်လီၤ.”

⁴¹ တုၤအပျဲၢ်အဘီၣ်အဂၤတဆံနၢ်ဟူတၢ်အံၤဒီး, အဝဲသ့ၣ်သးဒိၣ်ဘၣ်စီၤယၤကိာ်ဒီးစီၤယိၤဟၣ်န့ၣ်လီၤ.

⁴² သတးဒီး, ယ့ၣ်ၡူးကိးဃီၤအဝဲသ့ၣ်တဖၣ်ခဲလၢာ်ဆူအအိၣ်ဒီးစံး ဘၣ်အီၤ, “သုသ့ၣ်ညါသုဝဲလၢပှၤသ့ၣ်တဖၣ်လၢတၢ်ပာ်အီၤဒ် အမ့ၢ်ပှၤပၢဘၣ်တၢ်လၢပှၤတခီဘီမုၢ်ဖိတဖၣ်အဖီခိၣ်န့ၣ်, ပာ်ကစၢ်အသးလၢပှၤလၢအပၢဘၣ်ဝဲအဖီခိၣ်, ဒီးအဝဲသ့ၣ်အခိၣ်အနၢ်တဖၣ်ဟံးန့ၢ်တၢ်စိတၢ်ကမီၤလၢ အဝဲသ့ၣ်အဖီခိၣ်လီၤ.

⁴³ သနာ်က့ဒီးလၢသုဝဲသ့ၣ်တဖၣ်အသိးအကျါန့ၣ်, တဘၣ်မ့ၢ်တၢ်ဒ်န့ၣ်အသိးဘၣ်. မ့မ့ၢ်ပှၤတဂၤဂၤမ့ၢ်အဲၣ်ဒိးကဲပှၤအဒိၣ်လၢသုကျါဒီး, ကဘၣ်ကဲလၢသုခ့သုပှၤ,

⁴⁴ ဒီးပှၤတဂၤဂၤမ့ၢ်အဲၣ်ဒိးကဲထီၣ်ပှၤအခိၣ်လၢသုကျါန့ၣ်, ကဘၣ်မ့ၢ်သုဝဲခဲလၢာ်အကုၢ်အပှၤလီၤ.

⁴⁵ အဂ့ၢ်ဒ်လဲၣ်န့ၣ်, ပှၤကညီဖိခွါဒၣ်လဲာ်ဟဲဝဲတမ့ၢ်လၢပှၤကကဲအခ့ အပှၤအဂီၢ်ဘၣ်. မ့ၢ်ဒ်သိးကကဲတၢ်ခ့တၢ်ပှၤဒီးဟ့ၣ်လီၤအသးသမူလၢ တၢ်ပှ့ၤက့ၤပှၤဂီၢ်မုၢ်တဖၣ်အဂီၢ်လီၤ.”

ယ့ၣ်ၡူးဒုးထံၣ်ထီၣ်က့ၤစီၤဘၣ်တံၤမဲအမဲာ်

⁴⁶ ယ့ၣ်ၡူးဒီးအပျဲၢ်အဘီၣ်တဖၣ်ဟဲတုၤလၢဝ့ၢ်ယရံၤဃိ, ဒီးဖဲအဝဲသ့ၣ်ဟးထီၣ်လၢဝ့ၢ်န့ၣ်အပူၤအိၣ်ဃုာ်ဒီးပှၤဂီၢ် မုၢ်ဖးဒိၣ်အဖၢမုၢ်န့ၣ်, စီၤတံၤမဲအဖိခွါစီၤဘၣ်တံၤမဲလၢအမဲာ် တထံၣ်တၢ်တဂၤဆ့ၣ်နီၤဃ့အီၣ်တၢ်ဖဲကျဲကပၤထံးန့ၣ်လီၤ.

⁴⁷ တုၤအဝဲဒၣ်နၢ်ဟူလၢပှၤလၢအဟဲလၢကျဲန့ၣ်မ့ၢ်ပှၤနစၤရ့းဖိ ယ့ၣ်ၡူးဒီး, တဘျီဃီကိးပသူထီၣ်ဝဲ, “စီၤဒၤဝံးအဖိခွါယ့ၣ်ၡူးဧၢ, သူၣ်ကညီၤသးကညီၤဘၣ်ယၤတက့ၢ်.”

⁴⁸ ပှၤအါဂၤဒူအလိၤဒီးစံးဘၣ်အီၤလၢအကအိၣ်ဘှီၣ်ကလာ်လီၤ. ဘၣ်ဆၣ်ဒီးအဝဲဒၣ်ကိးပသူထီၣ်ဒိၣ်န့ၢ်အလီၢ်တက့ၢ်, “စီၤဒၤဝံးအဖိခွါဧၢ, သူၣ်ကညီၤသးကညီၤဘၣ်ယၤတက့ၢ်.”

⁴⁹ ယ့ၣ်ၡူးအိၣ်ကတီၢ်ဒီးစံးဝဲ, “ကိးဃီၤအီၤတက့ၢ်.” အန့ၣ်ဒီးအဝဲသ့ၣ်ကိးဃီၤပှၤမဲာ်တထံၣ်တၢ်တဂၤန့ၣ်ဒီးစံးဘၣ် အီၤ, “ပာ်နသးမုာ်မုာ်ဒီးဂဲၤဆၢထၢၣ်တက့ၢ်. အဝဲဒၣ်ကိးနၤလီၤ.”

⁵⁰ အဝဲဒၣ်ကွံာ်လီၤကွံာ်အဆ့ကၤဖီခိၣ်, စံၣ်ထီၣ်ဝဲ, ဒီးဟဲဝဲဆူယ့ၣ်ၡူးအအိၣ်လီၤ.

⁵¹ ယ့ၣ်ၡူးသံကွၢ်အီၤ, “နအဲၣ်ဒိးယကမၤတၢ်မနုၤတမံၤလၢနဂီၢ်လဲၣ်.” ပှၤမဲာ်တထံၣ်တၢ်တဂၤန့ၣ်စံးဆၢက့ၤအီၤ, “သရၣ်ဧၢ, ယအဲၣ်ဒိးထံၣ်ထီၣ်က့ၤတၢ်လီၤ.”

⁵² ယ့ၣ်ၡူးစံးဘၣ်အီၤ, “နက့ၤသ့လံ, နတၢ်နာ်မၤဘျါက့ၤနၤ လံ.” တဘျီဃီဖဲန့ၣ်အမဲာ်ထံၣ်ထီၣ်က့ၤတၢ်ဒီး အဝဲဒၣ်ပိာ်ထီၣ်ယ့ၣ်ၡူးအခံလၢအတၢ်လဲၤကျဲန့ၣ်လီၤ.