လံာ်မးသဲ 3 - Sgaw Karen Common Bible

ပှၤဘျၢတၢ်စီၤယိၤဟၣ်အတၢ်စံၣ်တဲၤတဲလီၤ

¹ လၢမုၢ်နံၤတဖၣ်န့ၣ်, ပှၤဘျၢတၢ်စီၤယိၤဟၣ်တဂၤလဲၤဝဲဆူပှၢ်မုၢ်ကနၢ လၢကီၢ်ယူဒၤအပူၤဒီးစံၣ်တဲၤတဲလီၤတၢ်လီၤ.

² အဝဲစံးဝဲ, “ပီၢ်ယၢ်လီၤက့ၤဒီး ဃၣ်လိၤက့ၤသုသးတက့ၢ်. အဂ့ၢ်ဒ်အံၤ, မူခိၣ်အဘီအမုၢ်ကသူၣ်လီၤအသးဘူးထီၣ်လံ.”

³ စီၤယိၤဟၣ်မ့ၢ်ပှၤတဂၤလၢဝံယၡါယၤတဲတၢ်လၢအဂ့ၢ်ဖဲအစံးဝဲ, “ပှၤတဂၤအကလုၢ်သီၣ်ထီၣ်လၢပှၢ်မုၢ်ကနၢအပူၤ, ‘ကတဲာ်ကတီၤကျဲလၢကစၢ်အဂီၢ်တက့ၢ်. မၤလိၤမၤဘျၢကျဲလၢကစၢ်ကဟဲအဂီၢ်တက့ၢ်’ ” န့ၣ်လီၤ(ၡါ. ၄၀:၃).

⁴ စီၤယိၤဟၣ်ကူသိးဝဲတၢ်ကူတၢ်ကၤလၢအဘၣ်တၢ်ထါအီၤလၢကီၤလၤ အူးအဆူၣ်ဒီးအယီၢ်ဒ့န့ၣ်ဘံဃာ်ဝဲဒီးယီၢ်တကိးတၢ်ဖံးလီၤ. အဝဲအီၣ်ဝဲဒွဲၣ်ဒီးအီဝဲကနဲမံၤအစီန့ၣ်လီၤ.

⁵ ပှၤလၢအအိၣ်အဆိးလၢဝ့ၢ်ယရူၤၡလ့ၣ်, ပှၤအိၣ်လၢသကုၤကီၢ်ယူဒၤ, ဒီးပှၤဖဲထံကျိယၢ်ဒ့ၣ်အကပိာ်ကပၤတဖၣ်ဟဲဆူအအိၣ်လီၤ.

⁶ ပှၤတဖၣ်အံၤတဲလီၤကျဲၤလီၤအတၢ်ဒဲးဘးတဖၣ် ဒီးအဝဲဒၣ်ဘျၢအဝဲသ့ၣ်လၢထံကျိယၢ်ဒ့ၣ်အပူၤလီၤ.

⁷ တုၤစီၤယိၤဟၣ်ထံၣ်ဘၣ်ပှၤဖၤရံၤၡဲဒီးပှၤစးဒူၤကဲအါဒံအါ ဂၤလၢအဟဲလၢကဒိးဘျၢအသးလၢထံအဂီၢ်န့ၣ်ဒီးစံးဘၣ်အဝဲသ့ၣ်, “ဂုၢ်ဘီၣ်အီးသ့ၣ်ဧၢ, မတၤဟ့ၣ်ပလီၢ်သုလၢသုကဃ့ၢ်ပူၤကွံာ်လၢ ကစၢ်ယွၤအတၢ်စံၣ်ညီၣ်လၢအကဟဲန့ၣ်လဲၣ်.

⁸ အိၣ်မူဒီးမၤတၢ်မၤလၢအကြၢးဒီးတၢ်ပီၢ်ယၢ်ဒီးတၢ်ဃၣ်လိၤက့ၤ သုသးန့ၣ်တက့ၢ်.

⁹ တဘၣ်ဆိကမိၣ်ဒီးစံး, ‘ယမ့ၢ်စီၤအၤဘြၤဟၣ်အဖိအလံၤအဃိ ယကပူၤဖျဲးဒီးယွၤအတၢ်စံၣ်ညီၣ်လီၤ’ န့ၣ်တဂ့ၤ. အဂ့ၢ်ဒ်အံၤလၢၢ်တဖၣ်အံၤဒၣ်လဲာ်ကစၢ်ယွၤဒုးကဲထီၣ်အီၤလၢ စီၤအၤဘြၤဟၣ်အဖိအလံၤန့ၣ်သ့ဝဲလီၤ.

¹⁰ အခဲအံၤဒၣ်လဲာ်ကွါအိၣ်ပာ်လီၤအသးလၢသ့ၣ်အဂံၢ်တဖၣ်အခီၣ်ထံးလံ. သ့ၣ်တထံးလၢ်လၢ်လၢအတသူထီၣ်သၣ်ထီၣ်တၤသၣ်လၢအဂ့ၤန့ၣ် ကဘၣ်တၢ်ကူာ်လီၤဒီးတ့ၢ်လီၤကွံာ်အီၤဆူမ့ၣ်အူအပူၤလီၤ.

¹¹ ယဘျၢသုလၢထံလၢတၢ်ပီၢ်ယၢ်ဒီးတၢ်ဃၣ်လိၤက့ၤသုသးအဂီၢ်လီၤ. ဘၣ်ဆၣ်ပှၤလၢအကဟဲလၢယလီၢ်ခံတဂၤန့ၣ်ကဘျၢသုလၢသးစီဆှံဒီး မ့ၣ်အူန့ၣ်လီၤ. အဝဲဒၣ်အစိကမီၤဒိၣ်န့ၢ်ယၤဒီးယတကြၢးဒၣ်လဲာ်လၢယကစိာ် အခီၣ်ဖံးဘၣ်လီၤ.

¹² ကီၢ်လဲၢ်အိၣ်လၢအစုပူၤလၢအကပညၢကွံာ်ဖ့တဖၣ်ဒီး အဝဲကမၤပျီအကြဲၢ်ဒီးဂၢ်ဖှိၣ်က့ၤအဘုလၢဖီပူၤလီၤ. မ့မ့ၢ်ဖ့တဖၣ်န့ၣ်ကဆူးထီၣ်ကွံာ်ဝဲလၢမ့ၣ်အူလၢ အတလီၤပံာ်နီတဘျီဘၣ်န့ၣ်လီၤ.”

ယ့ၣ်ၡူးအတၢ်ဒိးဘျၢအသး

¹³ ဒီးယ့ၣ်ၡူးဟးထီၣ်လၢကီၢ်ကၤလံၤလါဒီးဟဲဝဲဆူယၢ်ဒ့ၣ်ကျိ ဆူစီၤယိၤဟၣ်အအိၣ်ဒ်သိးအကဒိးဘျၢအသးလၢအစုပူၤလီၤ.

¹⁴ စီၤယိၤဟၣ်သးအိၣ်ဂ့ၢ်လိာ်တၢ်အံၤ ဒီးတြီအီၤဒီးစံး, “ယကြၢးဒိးဘျၢယသးလၢနစုပူၤဒီးနဟဲဆူယအိၣ် လၢတၢ်ဒိးဘျၢအဂီၢ်တခီဧါ.”

¹⁵ ဘၣ်ဆၣ်ဒီးယ့ၣ်ၡူးစံးဆၢအီၤ, “မ့မ့ၢ်ဘျီအဝဲအံၤ မ်နသုတဂ့ၢ်လိာ်ယၤတဂ့ၤ. အဂ့ၢ်ဒ်အံၤ, ခီဖျိတၢ်အံၤန့ၣ်ပကမၤလၢပှဲၤထီၣ်ကစၢ်ယွၤအတၢ် အဲၣ်ဒိးခဲလၢာ်လီၤ.” ဒီးစီၤယိၤဟၣ်အၢၣ်လီၤထွဲအခံလီၤ.

¹⁶ တုၤယ့ၣ်ၡူးဘၣ်တၢ်ဘျၢအီၤဝံၤဟဲက့ၤထီၣ်လၢထံကျါန့ၣ်, တၢ်မၤအသးလၢမူခိၣ်ဘၣ်တၢ်အိးထီၣ်အီၤဒီးအဝဲထံၣ်ဘၣ်ကစၢ်ယွၤ အသးဟဲလီၤလၢအလိၤမၤအသးဒ်ထိၣ်လွံၢ်ယူၤလီၤဒီးစီၢ်လီၤဝဲ အသိးန့ၣ်လီၤ.

¹⁷ အန့ၣ်ဒီး တၢ်အကလုၢ်သီၣ်ထီၣ်လၢမူခိၣ်ဒီးစံး, “အအံၤမ့ၢ်ယဖိခွါဒၣ်ယဲလၢယအဲၣ်အီၤဒီးဘၣ်သူၣ်ဘၣ် သးယၤဒိၣ်မးတဂၤလီၤ.”