လံာ်မးသဲ 28 - Sgaw Karen Common Bible

ခရံာ်ဂဲၤဆၢထၢၣ်က့ၤလၢတၢ်သံ

¹ ဖဲပှၤယူဒၤဖိအမုၢ်အိၣ်ဘှံးနံၤဝံၤအလီၢ်ခံ, လၢမုၢ်ခီၣ်ထံးအနံၤဂီၤခီဂီၤဂီၤန့ၣ်, ပှၤမၤကဒါလၣ်မုၣ်နီၢ်မၤရံဒီးနီၢ်မၤရံအဂၤတဂၤန့ၣ် လဲၤဝဲလၢကကွၢ်ယ့ၣ်ၡူးအတၢ်သွၣ်ခိၣ်အပူၤအဂီၢ်လီၤ.

² သတူၢ်ကလာ်, ဟီၣ်ခိၣ်ဟူးဝးဝဲဆူၣ်ဆူၣ်ကလဲာ်, အဂ့ၢ်မ့ၢ်လၢကစၢ်အကလူးတဂၤဟဲလီၤလၢမူခိၣ်, တလ့ၣ်ကွံာ်လၢၢ်လၢတၢ်သွၣ်ခိၣ်ပူၤအခိၣ်ထိးဒီးဆ့ၣ်နီၤဝဲလၢ အဖီခိၣ်အဃိလီၤ.

³ ကလူးအံၤအမဲာ်မၤအသးဒ်လီဝၢ်ဒံးအသိး, ဒီးအကူအသိးတဖၣ်ဝါဝဲဒ်မူခိၣ်ဖီအသိးန့ၣ်လီၤ.

⁴ ပှၤပၢၤတၢ်ဖိတဖၣ်ပျံၤတၢ်တုၤဒၣ်လဲာ်ကနိးကစုာ်ဝဲ, ဒီးကဲထီၣ်ဒ်ပှၤသံတဖၣ်အသိးလီၤ.

⁵ ကလူးန့ၣ်စံးဘၣ်ပှၤပိာ်မုၣ်တဖၣ်န့ၣ်, “တဘၣ်ပျံၤတၢ်တဂ့ၤ. ယသ့ၣ်ညါလၢ သုဃုယ့ၣ်ၡူးလၢအဘၣ်တၢ်ပျၤထီအီၤလၢထူၣ်စုညါ န့ၣ်လီၤ.

⁶ အဝဲတအိၣ်ဖဲအံၤဘၣ်. ဘၣ်တၢ်ဒုးဂဲၤဆၢထၢၣ်သမူထီၣ်က့ၤအီၤဒ်အစံးတ့ၢ်ဝဲအသိးလံ. ဟဲဒီးကွၢ်တၢ်လီၢ်ဖဲအမံလီၤတ့ၢ်ဝဲန့ၣ်တက့ၢ်.

⁷ အခဲအံၤက့ၤက့ၤချ့ချ့ဒီး တဲဘၣ်အပျဲၢ်အဘီၣ်တဖၣ်ဒ်အံၤ, ‘အဝဲဘၣ်တၢ်ဒုးဂဲၤဆၢထၢၣ်သမူထီၣ်က့ၤအီၤလၢတၢ်သံလံ. ဒီးအခဲအံၤကလဲၤဆိပာ်စၢၤဆူကီၢ်ကၤလံၤလါလၢ သုမဲာ်ညါဒီးသုကထံၣ်အီၤဖဲန့ၣ်လီၤ.’ သ့ၣ်နီၣ်ထီၣ်တၢ်လၢယစံးဘၣ်တ့ၢ်လံသုန့ၣ်တက့ၢ်.”

⁸ လၢတၢ်န့ၣ်အဃိ, အဝဲသ့ၣ်ဃ့ၢ်ထီၣ်ကွံာ်ဝဲလၢတၢ်သွၣ်ခိၣ် အပူၤန့ၣ်ချ့သဒံးလၢတၢ်ပျံၤဒီးတၢ်သးခုဖးဒိၣ်အပူၤ, ဒီးဃ့ၢ်ဝဲဒ်သိးအကတဲဘၣ်ယ့ၣ်ၡူးအပျဲၢ်အဘီၣ်တဖၣ် လၢတၢ်ဂ့ၢ်န့ၣ်လီၤ.

⁹ သတူၢ်ကလာ်ယ့ၣ်ၡူးဟဲသဂၢၢ်အဝဲသ့ၣ်ဒီးစံး, “မ်တၢ်ဃူတၢ်မုာ်အိၣ်ဒီးသုတက့ၢ်.” အဝဲသ့ၣ်လဲၤဃီၤဆူယ့ၣ်ၡူးအအိၣ်, ဟံးဃာ်အခီၣ်ဒီးဘူၣ်ထီၣ်ဘါထီၣ်အီၤလီၤ.

¹⁰ ယ့ၣ်ၡူးစံးဘၣ်အဝဲသ့ၣ်, “ပျံၤတၢ်တဂ့ၤ. လဲၤဒီးတဲဘၣ်ယဒီပုၢ်ဝဲၢ်တဖၣ်လၢအကလဲၤဆူကီၢ်ကၤလံၤလါဒီး ဖဲန့ၣ်အဝဲသ့ၣ်ကထံၣ်ဘၣ်ယၤလီၤ.”

ပှၤပၢၤတၢ်ဖိအတၢ်ဟ့ၣ်ထီၣ်တၢ်ဂ့ၢ်

¹¹ ဖဲပှၤပိာ်မုၣ်တဖၣ်လဲၤတၢ်အဖၢမုၢ်န့ၣ်, ပှၤသုးဖိလၢအပၢၤယ့ၣ်ၡူးအသွၣ်ခိၣ်အပူၤတနီၤက့ၤကဒါက့ၤဆူဝ့ၢ်ပူၤ, ဒီးစံးဘၣ်တဲဘၣ်ပှၤလုၢ်တၢ်အခိၣ်အဒိၣ်တဖၣ်လၢတၢ်လၢ အမၤတ့ၢ်လံအသးကိးမံၤဒဲးန့ၣ်လီၤ.

¹² ပှၤလုၢ်တၢ်အခိၣ်အဒိၣ်တဖၣ်ထံၣ်လိာ်အိၣ်ဖှိၣ်ရိဖှိၣ်သကိးဒီး ပှၤယူဒၤဖိကရၢအခိၣ်အနၢ်တဖၣ်, ဒီးကူၣ်ထီၣ်ဖးလီၤတၢ်လီၤ. အဝဲသ့ၣ်ဟ့ၣ်ပှၤသုးဖိတဖၣ်လၢစ့အါအါကလဲာ်

¹³ ဒီးစံးဘၣ်အဝဲသ့ၣ်, “သုကဘၣ်စံးလၢယ့ၣ်ၡူးအပျဲၢ်အဘီၣ် တဖၣ်ဟဲလၢမုၢ်နၤ, ဒီးဟုၣ်န့ၢ်ကွံာ်အဝဲအစိၣ်ဖဲသုမံဘၣ်သုသးအခါန့ၣ်လီၤ.

¹⁴ ဒီးပဒိၣ်ဖးဒိၣ်မ့ၢ်နၢ်ဟူဘၣ်တၢ်ဂ့ၢ်အံၤဒီး, ပကတဲနၢ်ပၢၢ်အီၤလၢသုတၢ်ကမၣ်တအိၣ်ဘၣ်လီၤ. ဒီးသုကိၢ်တၢ်အလီၢ်တအိၣ်နီတမံၤလၢၤဘၣ်.”

¹⁵ ပှၤပၢၤတၢ်ဖိတဖၣ်ဟံးန့ၢ်စ့ဒီး မၤဝဲဒ်အဘၣ်တၢ်မၢအီၤအသိးန့ၣ်လီၤ. ဒီးလၢတၢ်န့ၣ်အဃိ, တၢ်န့ၣ်, မ့ၢ်တၢ်ကစီၣ်လၢပှၤယူဒၤဖိတဖၣ်ဟ့ၣ်ထီၣ်သကုၤဆးဒး တုၤမုၢ်မဆါတနံၤအံၤလီၤ.

ယ့ၣ်ၡူးလီၣ်ဖျါထီၣ်အသးလၢအပျဲၢ်အဘီၣ်တဖၣ်

¹⁶ ယ့ၣ်ၡူးအပျဲၢ်အဘီၣ်တဆံတဂၤ, လဲၤဆူတၢ်လူၢ်ခိၣ်လၢကီၢ်ကၤလံၤလါ အပူၤ, ဖဲယ့ၣ်ၡူးစံးဘၣ်တ့ၢ်အဝဲသ့ၣ်လၢအကဘၣ်လဲၤဝဲန့ၣ်လီၤ.

¹⁷ တုၤအဝဲသ့ၣ်ထံၣ်အီၤဒီး, အဝဲသ့ၣ်ဘူၣ်ထီၣ်ဘါထီၣ်အီၤ, ဘၣ်ဆၣ်ဒီးအဝဲသ့ၣ်တနီၤအသးဒ့ဒီဝဲလီၤ.

¹⁸ ယ့ၣ်ၡူးလဲၤဘူးထီၣ်ဒီးအဝဲသ့ၣ်ဒီးစံး, “ယဘၣ်တၢ်ဟ့ၣ်လီၤလံယၤလၢတၢ်စိတၢ်ကမီၤလၢမူခိၣ်ဒီးလၢ ဟီၣ်ခိၣ်ချၢခဲလၢာ်လံ.

¹⁹ လၢတၢ်န့ၣ်အဃိ, လဲၤဆူပှၤကလုာ်ခဲလၢာ်အအိၣ်လၢတၢ်လီၢ်ကိးပူၤဒဲး ဒီးဒုးကဲထီၣ်အဝဲသ့ၣ်လၢယပျဲၢ်ယဘီၣ်တဖၣ်တက့ၢ်. ဘျၢအဝဲသ့ၣ်လၢပၢ်, ဖိဒီးသးစီဆှံအမံၤအပူၤန့ၣ်တက့ၢ်.

²⁰ ဒီးသိၣ်လိသီလိအဝဲသ့ၣ်လၢအကတိၢ်န့ၢ်ဒီး မၤထွဲတၢ်လၢယမၤလိာ်တ့ၢ်သုကိးမံၤဒဲးန့ၣ်တက့ၢ်. ဒီးယကအိၣ်ဒီးသုထီဘိ တုၤတၢ်အစိၤကတၢၢ်တစုန့ၣ်လီၤ.”