လံာ်မးသဲ 26 - Sgaw Karen Common Bible

တၢ်ကူၣ်အၢထီဒါယ့ၣ်ၡူး

¹ တုၤယ့ၣ်ၡူးမၤကတၢၢ်က့ၤတၢ်ကတိၤတဖၣ်န့ၣ်ခဲလၢာ်ဒီး, အဝဲစံးဘၣ်အပျဲၢ်အဘီၣ်တဖၣ်,

² “ဒ်သုသ့ၣ်ညါအသိး, လၢခံသီဝံၤအလီၢ်ခံန့ၣ်ဘူၣ်လဲၤကပာ်ကဘၣ်ဝဲ, ဒီးပှၤကညီဖိခွါကဘၣ်တၢ်ဟ့ၣ်လီၤကွံာ်အီၤဒ်သိးအကဘၣ် တၢ်ပျၤထီကွံာ်အီၤအဂီၢ်လီၤ.”

³ အကတီၢ်ဖဲန့ၣ်, ပှၤလုၢ်တၢ်အခိၣ်အဒိၣ်တဖၣ်ဒီးပှၤယူဒၤဖိကရၢ အခိၣ်အနၢ်တဖၣ်ထံၣ်လိာ်အသးလၢပှၤလုၢ်တၢ်အခိၣ်အဒိၣ် ကတၢၢ်စီၤကၤယါဖၤအနီပူၤ,

⁴ ဒီးသုးကျဲၤကူၣ်ထီၣ်ဖးလီၤသကိးဝဲလၢကဖီၣ်ခူသူၣ်ယ့ၣ်ၡူး ဒီးမၤသံကွံာ်အီၤန့ၣ်လီၤ.

⁵ ဘၣ်ဆၣ်အဝဲသ့ၣ်စံး, “ပတဘၣ်မၤတၢ်အံၤဖဲဘူၣ်အကတီၢ်အံၤဘၣ်, ပှၤဂီၢ်မုၢ်ကတၢထီၣ်တၢလီၤဘၣ်ဖုးလီၤ.”

ယ့ၣ်ၡူးဘၣ်တၢ်ဖှူအီၤလၢသိဖဲသဝီဘ့ၤသနံ

⁶ အကတီၢ်ဖဲန့ၣ်, ယ့ၣ်ၡူးအိၣ်လၢသဝီဘ့ၤသနံလၢပှၤဘၣ်တ့ၢ်တၢ်ဆါ အၢစီၤၡံမိၣ်အဟံၣ်ပူၤလီၤ.

⁷ ဒီးဖဲယ့ၣ်ၡူးအီၣ်တၢ်အဖၢမုၢ်န့ၣ်, ပိာ်မုၣ်တဂၤဟဲဆူအအိၣ်စိာ်ဃုာ်ဒီးပလီလၢၢ်ဝါပှဲၤဒီး သိနၢမူလၢအလုၢ်ဒိၣ်ပှ့ၤဒိၣ်နီၢ်မးတပလီ, ဒီးလူလီၤသိနၢမူန့ၣ်လၢယ့ၣ်ၡူးအခိၣ်လိၤလီၤ.

⁸ ယ့ၣ်ၡူးအပျဲၢ်အဘီၣ်တဖၣ်ထံၣ်တၢ်အံၤဒီး, အဝဲသ့ၣ်သးဒိၣ်ထီၣ်ဒီးစံး, “မၤလၢာ်ဂီၤကလီတၢ်ဒ်အံၤဘၣ်မနုၤလဲၣ်.

⁹ သိနၢမူအံၤမ့ၢ်ဘၣ်တၢ်ဆါလီၤအီၤလၢအပှ့ၤဖးဒိၣ်ဒီး, စ့လၢအန့ၢ်န့ၣ် တၢ်ဟ့ၣ်မၤစၢၤပှၤဖှီၣ်ဖိသ့ဝဲလီၤ.”

¹⁰ ယ့ၣ်ၡူးသ့ၣ်ညါတၢ်လၢအဝဲသ့ၣ်စံးလိာ်အသးဒီးတဲဘၣ်အဝဲသ့ၣ်, “ဘၣ်မနုၤလၢသုမၤတံာ်တာ်ပိာ်မုၣ်အံၤလဲၣ်. တၢ်လၢအဝဲမၤဘၣ်ယၤအံၤ မ့ၢ်တၢ်မၤလၢအဂ့ၤဒီးဃံလၤမးတမံၤလီၤ.

¹¹ ပှၤဖှီၣ်ဖိယာ်ဖိတဖၣ်ကအိၣ်လၢသုသိးသုကျါထီဘိလီၤ. မ့မ့ၢ်ယဲဒၣ်အံၤယတအိၣ်ဒီးသုထီဘိဘၣ်.

¹² တၢ်လၢအဝဲမၤန့ၣ် မ့ၢ်တၢ်လူလီၤသိနၢမူအံၤလၢယနီၢ်ခိအလိၤ, ဒ်သိးကကတဲာ်ကတီၤယၤလၢတၢ်ခူၣ်လီၤကွံာ်အဂီၢ်လီၤ.

¹³ နာ်ယၤတက့ၢ်. ဖဲတၢ်သးခုအကစီၣ်အံၤဘၣ်တၢ်စံၣ်တဲၤတဲလီၤအီၤတပူၤလၢ်လၢ်လၢ ဟီၣ်ခိၣ်ချၢဒီဘ့ၣ်ညါအံၤန့ၣ်, တၢ်လၢပိာ်မုၣ်မၤတ့ၢ်ဝဲအံၤကဘၣ်တၢ်စံၣ်ဃဲၤအီၤလၢ တၢ်သ့ၣ်နီၣ်ထီၣ်က့ၤအီၤအဂီၢ်လီၤ.”

စီၤယူဒၤအၢၣ်လီၤလၢကဆါလီၤကွံာ်ယ့ၣ်ၡူး

¹⁴ တၢ်န့ၣ်ဝံၤဒီး, အပျဲၢ်အဘီၣ်တဆံခံဂၤအကျါတဂၤလၢအဘၣ်တၢ်ကိးအီၤလၢစီၤယူဒၤ အံၣ်စကၤရံၤအိာ်န့ၣ်, လဲၤဆူပှၤလုၢ်တၢ်အခိၣ်အဒိၣ်တဖၣ်အအိၣ်,

¹⁵ ဒီးသံကွၢ်ဝဲ, “ယမ့ၢ်ဟ့ၣ်လီၤကွံာ်ယ့ၣ်ၡူးဆူသုစုပူၤန့ၣ်, သုကဟ့ၣ်ယၤတၢ်မနုၤလဲၣ်.” ဒီးအဝဲသ့ၣ်ဂံၢ်န့ၢ်စ့ညၣ်အဘ့ၣ်သၢဆံဝံၤဟ့ၣ်လီၤအီၤန့ၣ်လီၤ.

¹⁶ စးထီၣ်အဆၢကတီၢ်ဖဲန့ၣ်, စီၤယူဒၤဃုခိးကွၢ်လၢ်တၢ်အခွဲးဂ့ၤယာ်ဘၣ်လၢအကဟ့ၣ်လီၤကွံာ် ယ့ၣ်ၡူး, ဆူအဝဲသ့ၣ်အစုပူၤအဂီၢ်လီၤ.

ယ့ၣ်ၡူးအီၣ်သကိးဘူၣ်လဲၤကပာ်ဒီး အပျဲၢ်အဘီၣ်တဖၣ်

¹⁷ လၢဘူၣ်ကိၣ်တအိၣ်ဘၣ်ဒီးကိၣ်မံၣ်အခီၣ်ထံးကတၢၢ်တသီန့ၣ်, ယ့ၣ်ၡူးအပျဲၢ်အဘီၣ်တဖၣ်ဟဲဆူအအိၣ်ဒီးသံကွၢ်အီၤ, “နအဲၣ်ဒိးလၢပကကတဲာ်ကတီၤန့ၢ်တၢ်လီၢ်လၢနကအီၣ် ဘူၣ်လဲၤကပာ်အဂီၢ်ဖဲလဲၣ်.”

¹⁸ ယ့ၣ်ၡူးစံးဘၣ်အဝဲသ့ၣ်, “လဲၤဆူပှၤအိၣ်လၢဝ့ၢ်ပူၤတဂၤန့ၣ် အအိၣ်, ဒီးတဲဘၣ်အီၤဒ်အံၤ, ‘ပသရၣ်စံးဝဲလၢအနၣ်ရံၣ်တုၤဃီၤလံ, ဒီးအဝဲဒီး အပျဲၢ်အဘီၣ်တဖၣ်ကအီၣ်သကိးဘူၣ်လဲၤကပာ် လၢနဟံၣ်ပူၤလီၤ.’ ”

¹⁹ အပျဲၢ်အဘီၣ်တဖၣ်မၤဝဲဒ်ယ့ၣ်ၡူးမၤလိာ်အဝဲသ့ၣ်အသိး, ဒီးကတဲာ်ကတီၤဘူၣ်လဲၤကပာ်အတၢ်အီၣ်တၢ်အီန့ၣ်လီၤ.

²⁰ တုၤမုၢ်ဟါလီၤဒီး, ယ့ၣ်ၡူးဆ့ၣ်နီၤသန့ၤဃုာ်ဒီးအပျဲၢ်အဘီၣ် တဆံခံဂၤလၢအကအီၣ်တၢ်အဂီၢ်လီၤ.

²¹ ဖဲအအီၣ်သကိးတၢ်အဖၢမုၢ်န့ၣ်, ယ့ၣ်ၡူးစံးဘၣ်အဝဲသ့ၣ်, “ယစံးဘၣ်တဲဘၣ်သု, သုဝဲအကျါတဂၤကဆါလီၤကွံာ်ယၤလီၤ.”

²² အပျဲၢ်အဘီၣ်တဖၣ်သးအုးဝဲဒိၣ်မး, ဒီးသံကွၢ်ယ့ၣ်ၡူးတဂၤဝံၤတဂၤ, “ကစၢ်ဧၢ, မ့ၢ်ယၤဧါ.”

²³ ယ့ၣ်ၡူးစံးဆၢအဝဲသ့ၣ်, “ပှၤလၢအဘျၢလီၤအကိၣ်လၢလီခီတဘ့ၣ်ဃီဒီးယၤန့ၣ်, ကဆါလီၤကွံာ်ယၤလီၤ.

²⁴ ပှၤကညီဖိခွါအံၤကဘၣ်သံဝဲ ဒ်တၢ်ကွဲးအသးစီဆှံစံးတ့ၢ်ဝဲ အသိးလီၤ. ဘၣ်ဆၣ်ဒီး, ပှၤကညီလၢအဆါလီၤကွံာ်ပှၤကညီဖိခွါအံၤကဘၣ်အဖှီၣ်ဆံးဒိၣ် လဲၣ်. အဝဲမ့ၢ်တအိၣ်ဖျဲၣ်ထီၣ်ဘၣ်န့ၣ်, ကဂ့ၤဒိၣ်ဒၣ်တၢ်တက့ၢ်လၢအဂီၢ်လီၤ.”

²⁵ စီၤယူဒၤအံၣ်စကၤရံၤအိာ်လၢအဆါလီၤကွံာ်ယ့ၣ်ၡူးတဂၤ ကတိၤထီၣ်တၢ်ဒီးစံး, “သရၣ်ဧၢ, မ့ၢ်ယၤဧါ.” ယ့ၣ်ၡူးစံးဆၢအီၤ, “နစံးတ့ၢ်လံနဲလံ.”

ကစၢ်အတၢ်အီၣ်လၢဟါ

²⁶ ဖဲအဝဲသ့ၣ်အီၣ်တၢ်အဖၢမုၢ်န့ၣ်, ယ့ၣ်ၡူးဟံးန့ၢ်ကိၣ်, စံးထီၣ်ပတြၢၤယွၤအဘျုး, ဒီးစိၢ်ဘျဲးဝဲ, ဒီးဟ့ၣ်လီၤဝဲအပျဲၢ်အဘီၣ်တဖၣ်ဒီးစံး, “ဟံးန့ၢ်ဒီးအီၣ်တက့ၢ်. တၢ်အံၤမ့ၢ်ယနီၢ်ခိလီၤ.”

²⁷ ဝံၤဒီးဟံးထီၣ်ဝဲလီခီတဖျၢၣ်, စံးထီၣ်ပတြၢၤယွၤ, ဒီးဟ့ၣ်လီၤအဝဲသ့ၣ်ဒီးစံး, “သုဝဲခဲလၢာ်, ဟံးန့ၢ်အီတက့ၢ်.

²⁸ တၢ်အံၤမ့ၢ်ယသွံၣ်, လၢအစဲပနီၣ်ဃာ်ကစၢ်ယွၤအတၢ်အၢၣ်လီၤအီ လီၤ, ယသွံၣ်လၢအဘၣ်တၢ်ဂၢ်လီၤကွံာ်အီၤ, ဒ်သိးပှၤအါဂၤအတၢ်ဒဲးဘးကဘၣ်တၢ်ပျၢ်ကွံာ်အီၤအဂီၢ်လီၤ.

²⁹ ယစံးဘၣ်တဲဘၣ်သု, တချုးဒံးဘၣ်လၢမုၢ်တနံၤဖဲယအီစပံးထံ အသီဒီးသုလၢယပၢ်အဘီအမုၢ်အပူၤန့ၣ်, ယတအီစပံးထံအံၤနီ တဘျီလၢၤဘၣ်.”

³⁰ ဝံၤဒီးအဝဲသ့ၣ်သးဝံၣ်ထါသးဝံၣ်တယုၢ်, ဒီးလဲၤထီၣ်ဝဲဆူကစၢၢ်သ့ၣ်စၤယံးအလိၤန့ၣ်လီၤ.

ယ့ၣ်ၡူးကတိၤဆိပာ်စၢၤလၢစီၤပ့းတရူးကသမၢအီၤ

³¹ တုၤနုၤတစု, ယ့ၣ်ၡူးစံးဘၣ်အဝဲသ့ၣ်, “တနၤအံၤ, သုဝဲခဲလၢာ် သုကဃ့ၢ်သဒၣ်ကွံာ်ဒီးပာ်တ့ၢ်ယၤလီၤ. အဂ့ၢ်ဒ်အံၤ, တၢ်ကွဲးအသးစံးဝဲ, ‘ကစၢ်ယွၤကမၤသံပှၤကွၢ်သိ, ဒီးသိလၢသိကရၢၢ်အပူၤတဖၣ်ကလီၤပြံလီၤပြါလီၤ.’

³² ဘၣ်ဆၣ်ဒီး, ဖဲတၢ်ဒုးဂဲၤဆၢထၢၣ်ယၤလၢတၢ်သံဝံၤအလီၢ်ခံ, ယကလဲၤဆိပာ်စၢၤဆူကီၢ်ကၤလံၤလါလၢသုမဲာ်ညါလီၤ.”

³³ စီၤပ့းတရူးစံးဘၣ်ယ့ၣ်ၡူး, “ပှၤအဂၤခဲလၢာ်မ့ၢ်သးဟးဂီၤဒီးပာ်တ့ၢ်ကွံာ်နၤဘၣ်ဆၣ်, ယတပာ်တ့ၢ်နၤနီတဘျီဘၣ်.”

³⁴ ယ့ၣ်ၡူးစံးဘၣ်စီၤပ့းတရူး, “ယစံးဘၣ်တဲဘၣ်နၤ, တနၤအံၤတချုးလၢဆီဖါကီၢ်အိၣ်အိထီၣ်န့ၣ်, နကသမၢဒီးစံးလၢနတသ့ၣ်ညါယၤဘၣ်န့ၣ်သၢဘျီလီၤ.”

³⁵ စီၤပ့းတရူးစံးဆၢအီၤ, “ယမ့ၢ်ဘၣ်သံဃုာ်ဒီးနၤဒၣ်လဲာ်, ယတသမၢနၤနီတဘျီဘၣ်.” ဒီးအပျဲၢ်အဘီၣ်အဂၤတဖၣ်ခဲလၢာ်စံးတၢ်တမံၤဃီလီၤ.

ယ့ၣ်ၡူးဃ့ဘါထုကဖၣ်လၢက့ၤသစ့းမနၤ

³⁶ တုၤနုၤတစု, ယ့ၣ်ၡူးလဲၤဃုာ်ဒီးအပျဲၢ်အဘီၣ်တဖၣ်, ဆူတၢ်လီၢ်တတီၤလၢအဘၣ်တၢ်ကိးအီၤလၢက့ၤသစ့းမနၤလီၤ. ဒီးအဝဲစံးဘၣ်အပျဲၢ်အဘီၣ်တဖၣ်, “ဖဲယလဲၤဖဲန့ၣ်ဒီးဘါထုကဖၣ်တၢ်အခါ, ဆ့ၣ်နီၤအိၣ်သုဝဲဖဲအံၤတက့ၢ်.”

³⁷ အဝဲလဲၤကိးဃုာ်စီၤပ့းတရူးဒီးစီၤစ့းဘ့းဒဲအဖိခွါခံဂၤန့ၣ်လီၤ. အသူၣ်အုးသးအုးဒီးသူၣ်ကိၢ်သးဂီၤဝဲဒိၣ်မးလီၤ.

³⁸ ဒီးအဝဲဒၣ်စံးဘၣ်ပှၤသၢဂၤန့ၣ်, “တၢ်သူၣ်အုးသးအုးလၢယသးပူၤအံၤဒိၣ်မးဝဲတုၤဒၣ်လဲာ် ကမၤသဘှံးယၤလီၤ. အိၣ်ဖဲအံၤဒီးဆိးသီဒီးယၤတက့ၢ်.”

³⁹ အဝဲလဲၤယံၤထီၣ်ဝဲတစဲး, ထိၣ်လီၤပှီၤအသး, ဒီးကျးလီၤအမဲာ်လၢဟီၣ်ခိၣ်လိၤ, ဒီးဃ့ဘါထုကဖၣ်ယွၤဒီးစံး, “ယပၢ်ဧၢ, မ့ၢ်သ့ဒီးဟံးန့ၢ်ကွံာ်တၢ်နးတၢ်ဖှီၣ်အလီခီအံၤ လၢယအိၣ်တက့ၢ်. ဘၣ်ဆၣ်ဒီး, မ်အသုတမ့ၢ်ဒ်ယသးအတၢ်အဲၣ်ဒိးတဂ့ၤ. မ်အကမ့ၢ်ဒၣ်ဝဲဒ်နသးအတၢ်အဲၣ်ဒိးန့ၣ်တက့ၢ်.”

⁴⁰ တုၤနုၤတစု, အဝဲဟဲက့ၤကဒါက့ၤဆူအပျဲၢ်အဘီၣ်သၢဂၤအအိၣ်ဒီး ထံၣ်လၢအဝဲသ့ၣ်မံဘၣ်အသးလီၤ. ဒီးယ့ၣ်ၡူးစံးဘၣ်စီၤပ့းတရူး, “ဘၣ်မနုၤလၢသုသကိးသၢဂၤအံၤသုဆိးသီဒီးယၤထဲ တနၣ်ရံၣ်ဧိၤတကဲဘၣ်န့ၣ်လဲၣ်.

⁴¹ ဆိးသီဒီးဃ့ဘါထုကဖၣ်ယွၤ, ဒ်သိးသုသုတလီၤဃံၤလၢတၢ်လ့ပစီအဃိတဂ့ၤန့ၣ်တက့ၢ်. သးအဂံၢ်အဘါမ့ၢ်ဆူၣ်သနာ်က့, နီၢ်ခိအဂံၢ်အဘါစၢ်ဝဲလီၤ.”

⁴² ယ့ၣ်ၡူးလဲၤကဒီးဝဲခံဘျီတဘျီဒီးဃ့ဘါထုကဖၣ်ယွၤဒီး စံး, “ယပၢ်ဧၢ, တၢ်နးတၢ်ဖှီၣ်အလီခီအံၤ, တၢ်ထုးကွံာ်အီၤလၢယအိၣ်မ့ၢ်တသ့ဘၣ်ဒီး, ယမ့ၢ်ဘၣ်အီအီၤန့ၣ်, မ်အကမ့ၢ်ဒၣ်ဝဲဒ်တၢ်ဘၣ်နသးအသိးန့ၣ်တက့ၢ်.”

⁴³ အဝဲဟဲက့ၤကဒီးတဘျီဒီးထံၣ်ဝဲလၢအပျဲၢ်အဘီၣ်သၢဂၤ မံဘၣ်အသးလီၤ. အဝဲသ့ၣ်အမဲာ်ဖံးဃၢဒီးစီၣ်ထီၣ်အမဲာ်တန့ၢ်ဘၣ်လီၤ.

⁴⁴ မၤကဒီးတစု, ယ့ၣ်ၡူးပာ်တ့ၢ်အဝဲသ့ၣ်ဒီးလဲၤကဒီးဝဲ, ဒီးဃ့ဘါထုကဖၣ်ယွၤသၢဘျီတဘျီဒီးစံးတၢ်ကတိၤတမံၤဃီလီၤ.

⁴⁵ တုၤနုၤတစု, ယ့ၣ်ၡူးဟဲက့ၤကဒါက့ၤဆူအပျဲၢ်အဘီၣ်တဖၣ်အအိၣ်ဒီးစံး, “မ့ၢ်သုမံဒီးအိၣ်ဘှံးဒံးဒၣ်အဖၢမုၢ်ဧါ. ကွၢ်တက့ၢ်. နၣ်ရံၣ်လၢပှၤကညီဖိခွါအံၤ ကဘၣ်တၢ်ဟ့ၣ်လီၤကွံာ်အီၤဆူပှၤ တၢ်ဒဲးဘးဖိတဖၣ်အစိကမီၤအစုပူၤန့ၣ်, တုၤဃီၤဝဲလံ.

⁴⁶ ဂဲၤဆၢထၢၣ်. မ်ပလဲၤသကိးပဝဲတက့ၢ်. ကွၢ်တက့ၢ်. ပှၤလၢအဆါလီၤကွံာ်ယၤန့ၣ် ဟဲတုၤဖဲအံၤလံ.”

တၢ်ဖီၣ်ယ့ၣ်ၡူး

⁴⁷ ယ့ၣ်ၡူးကတိၤဒံးတၢ်အဖၢမုၢ်ဒီး, အပျဲၢ်အဘီၣ်တဆံခံဂၤအကျါတဂၤ လၢအမ့ၢ်စီၤယူဒၤဟဲတုၤဝဲ အိၣ်ဃုာ်ဒီးပှၤဂီၢ်မုၢ်ဖးဒိၣ်လၢအစိာ်ဒီးနးဒီးနီၣ်တီၢ်တဖၣ်, လၢအဘၣ်တၢ်မၢလီၤအီၤလၢပှၤလုၢ်တၢ်အခိၣ်အဒိၣ်တဖၣ်ဒီးပှၤ ယူဒၤဖိကရၢအခိၣ်အနၢ်တဖၣ်လီၤ.

⁴⁸ ပှၤဆါလီၤကွံာ်ယ့ၣ်ၡူးတဂၤဟ့ၣ်ပာ်ပှၤဂီၢ်မုၢ်တၢ်ပနီၣ်တမံၤ ဒီးစံးဝဲ, “ပှၤလၢယနၢမူအီၤန့ၣ်, မ့ၢ်ပှၤလၢသုသးလီအီၤတဂၤလီၤ. ဖီၣ်အီၤတက့ၢ်.”

⁴⁹ စီၤယူဒၤဟဲတဘျီဃီဆူယ့ၣ်ၡူးအအိၣ်ဒီးစံး, “သရၣ်ဧၢ, မ်တၢ်ဃူတၢ်မုာ် အိၣ်ဒီးနၤတက့ၢ်.” စံးတၢ်န့ၣ်ဝံၤဒီးနၢမူအီၤလီၤ.

⁵⁰ ယ့ၣ်ၡူးစံးဆၢအီၤ, “တံၤသကိးဧၢ, တၢ်လၢနကမၤန့ၣ်မၤအီၤချ့ချ့ တက့ၢ်.” တုၤနုၤတစု, ပှၤသ့ၣ်တဖၣ်န့ၣ်ဟဲဆူယ့ၣ်ၡူးအအိၣ်, ဖီၣ်န့ၢ်အီၤဒီးဟံးဃာ်အီၤကျၢၤကျၢၤလီၤ.

⁵¹ ပှၤလၢအအိၣ်ဒီးယ့ၣ်ၡူး အကျါတဂၤ, ထုးထီၣ်အနးဒီးကျီပှၤလုၢ်တၢ်အခိၣ်အဒိၣ်ကတၢၢ် အကုၢ်အပှၤတဂၤ, ဘၣ်လၢအနၢ်ဒီးတဲာ်ကွံာ်ဝဲလီၤ.

⁵² ယ့ၣ်ၡူးစံးဘၣ်အီၤ, “ပာ်က့ၤနနးလၢအလီၢ်ဒၣ်ဝဲတက့ၢ်. အဂ့ၢ်ဒ်အံၤပှၤလၢအဖီၣ်ထီၣ်နးန့ၣ်ကသံလၢနးခဲလၢာ်လီၤ.

⁵³ မ့ၢ်နတသ့ၣ်ညါလၢယကိးထီၣ်တၢ်မၤစၢၤလၢယပၢ်အအိၣ်သ့ဝဲ, ဒီးတဘျီဃီ ကဆှၢလီၤန့ၢ်ယၤကလူးအသုးမုၢ်အါန့ၢ်ဒံးတဆံခံဖုန့ၣ်ဘၣ်ဧါ.

⁵⁴ ဘၣ်ဆၣ် တၢ်မ့ၢ်မၤအသးဒ်န့ၣ်ဒီး, တၢ်ကွဲးအသးစီဆှံလၢအစံးလၢတၢ်ကဘၣ်မၤအသးဒ်အံၤလီၤန့ၣ်, ကလၢထီၣ်ပှဲၤထီၣ်ဝဲလၢကျဲဒ်လဲၣ်.”

⁵⁵ တုၤနုၤတစု, ယ့ၣ်ၡူးကတိၤတၢ်ဒီးပှၤဂီၢ်မုၢ်ဒီးစံး, “မ့ၢ်သုဘၣ်ဟဲစိာ်နးဒီးနီၣ်တီၢ်လၢ သုကဖီၣ်န့ၢ်ယၤအဂီၢ်, ဒ်ပှၤလၢအမၤကမၣ်တၢ်သိၣ်တၢ်သီတဂၤအသိးန့ၣ်ဧါ. ကိးနံၤဒဲးယဆ့ၣ်နီၤဒီးသိၣ်လီၤသီလီၤတၢ်လၢတၢ်လုၢ်ဟံၣ် အပူၤ, ဒီးသုတဖီၣ်ယၤမးလဲၣ်.

⁵⁶ ဘၣ်ဆၣ်ဒီး, တၢ်တဖၣ်အံၤမၤတ့ၢ်အသး, ဒ်သိးဒီးတၢ်လၢဝံတဖၣ်ကွဲးတ့ၢ်ဝဲလၢတၢ်ကွဲးအသးစီဆှံတဖၣ်အပူၤ, ကလၢထီၣ်ပှဲၤထီၣ်ဝဲအဂီၢ်လီၤ.” တုၤနုၤတစု, အပျဲၢ်အဘီၣ်ခဲလၢာ်ပာ်တ့ၢ်ဒီးဃ့ၢ်သဒၣ်ကွံာ်အီၤ လီၤ.

ယ့ၣ်ၡူးလၢပှၤယူဒၤဖိအကီၣ်ကးအမဲာ်ညါ

⁵⁷ ပှၤလၢအဖီၣ်န့ၢ်ယ့ၣ်ၡူးတဖၣ်န့ၣ်, က့ၤကိးအီၤဆူပှၤလုၢ်တၢ်အခိၣ် အဒိၣ်ကတၢၢ်လၢအမ့ၢ်စီၤကၤယါဖၤအဟံၣ်, ဖဲပှၤသ့တၢ်ဘူၣ်တၢ်ဘါအတၢ်သိၣ်တၢ်သီတဖၣ်ဒီး ပှၤယူဒၤဖိကရၢအခိၣ်အနၢ်တဖၣ် အိၣ်ဖှိၣ်ရိဖှိၣ်သကိးဝဲအလီၢ် န့ၣ်လီၤ.

⁵⁸ စီၤပ့းတရူးပိာ်ထီၣ်အဝဲသ့ၣ်အခံလၢအယံၤ, ပၢၢ်တုၤလၢပှၤလုၢ်တၢ်အခိၣ်အဒိၣ်ကတၢၢ် အဟံၣ်အကရၢၢ်ပူၤန့ၣ် လီၤ. အဝဲလဲၤနုာ်ဆူကရၢၢ်ပူၤတၢ်လီၤပျီအလီၢ်, ဒီးဆ့ၣ်နီၤသကိးဝဲဒီးပှၤခိးတၢ်ပၢၤတၢ်ဖိတဖၣ်, ဒ်သိးကသ့ၣ်ညါတၢ်ကမၤအသးလၢခံကတၢၢ်ဒ်လဲၣ်အဂီၢ်န့ၣ်လီၤ.

⁵⁹ ပှၤလုၢ်တၢ်အခိၣ်အဒိၣ်တဖၣ်, ဒီးကီၣ်ကးဒီဖုညါကျဲးစၢးဃုတၢ်အုၣ်အသးကဘျံးကဘျၣ် ထီဒါယ့ၣ်ၡူးဒ်သိးကမၤသံဘၣ်အီၤအဂီၢ်လီၤ.

⁶⁰ ပှၤအါဂၤဟဲဒီးစံးဘၣ်တဲဘၣ်တၢ်ကဘျံးကဘျၣ်အါမံၤအါ ကလုာ်ထီဒါယ့ၣ်ၡူး, ဘၣ်ဆၣ်ဒီးတထံၣ်န့ၢ်ဝဲတၢ်ဂ့ၢ်လီၤတံၢ်လီၤဆဲးနီ တမံၤဘၣ်. လၢခံကတၢၢ်ပှၤဟဲထီၣ်ဆူတၢ်မဲာ်ညါခံဂၤ

⁶¹ ဒီးစံး, “ပှၤအံၤစံးဝဲ, ‘ယမၤလီၤပှီၢ်ကွံာ်ကစၢ်ယွၤအတၢ် လုၢ်ဟံၣ်ဒီးလၢသၢသီအတီၢ်ပူၤန့ၣ် ယဘှီထီၣ်က့ၤအီၤသ့လီၤ.’ ”

⁶² ပှၤလုၢ်တၢ်အခိၣ်အဒိၣ်ကတၢၢ်ဆၢထၢၣ်ဒီးသံကွၢ်ယ့ၣ်ၡူး, “တၢ်ကမၣ်လၢပှၤတဖၣ်အံၤဃုတုာ်နၤခဲအံၤန့ၣ်, မ့ၢ်တၢ်လၢနကတဲဆၢအီၤတအိၣ်ဘၣ်နီတမံၤဘၣ်ဧါ.”

⁶³ ဘၣ်ဆၣ်ယ့ၣ်ၡူးအိၣ်ဘှီၣ်ကလာ်လီၤ. မၤကဒီးတဘျီပှၤလုၢ်တၢ်အခိၣ်အဒိၣ်ကတၢၢ် ကတိၤတၢ်လၢယ့ၣ်ၡူးဒီးစံး, “အခဲအံၤယမၢနဆိၣ်လီၤနသး လၢကစၢ်ယွၤလၢအမူဝဲတဂၤအမံၤအပူၤလီၤ. တဲဘၣ်ပှၤ, မ့ၢ်နမ့ၢ်ခရံာ်, ကစၢ်ယွၤအဖိခွါန့ၣ်ဧါ.”

⁶⁴ ယ့ၣ်ၡူးစံးဆၢအီၤ, “နစံးတ့ၢ်လံနဲလံ. မ့မ့ၢ်ယတဲဘၣ်သုခဲလၢာ် လၢစးထီၣ်ခဲအံၤဒီးဆူညါသုကထံၣ်ပှၤကညီဖိခွါဆ့ၣ်နီၤလၢတၢ် သ့တၢ်လၢာ်တဂၤအစုထွဲဒီးဟဲဒိးဝဲမူခိၣ်အတၢ်အၢၣ်တဖၣ်လီၤ.”

⁶⁵ ထဲန့ၣ်တဘျီ, ပှၤလုၢ်တၢ်အခိၣ်အဒိၣ်ကတၢၢ်တဂၤ ဖှီယာ် အကူအသိးဒၣ်ဝဲဒီးစံး, “ကတိၤတရီတပါလံယွၤလံ. ပမၤန့ၢ်တၢ်အုၣ်အသးအဂၤတဖၣ်အလီၢ်တအိၣ်လၢၤဘၣ်. ခဲအံၤဒၣ်လဲာ်သုနၢ်ဟူလံအတၢ်ကတိၤတရီတပါယွၤလံ.

⁶⁶ သုဆိကမိၣ်ဒ်လဲၣ်.” အဝဲသ့ၣ်စံးဆၢဝဲ, “အတၢ်ကမၣ်အိၣ်ဒီးကြၢးဘၣ်တၢ်မၤသံအီၤလီၤ.”

⁶⁷ တုၤနုၤတစု, အဝဲသ့ၣ်ထူးပှဲာ်ယ့ၣ်ၡူးအမဲာ်ဒီးဒိအီၤတီၢ်အီၤလီၤ. ပှၤလၢအဒဲယ့ၣ်ၡူးအမဲာ်တဖၣ်

⁶⁸ စံးဝဲ, “ခရံာ်ဧၢ, တယာ်ဒီးတဲတက့ၢ်. ပှၤလၢအဒဲနမဲာ်အံၤမ့ၢ်မတၤလဲၣ်.”

စီၤပ့းတရူးသမၢယ့ၣ်ၡူး

⁶⁹ ဖဲစီၤပ့းတရူးဆ့ၣ်နီၤလၢတၢ်ချၢလၢတၢ်လီၢ်လီၤပျီအပူၤအဖၢ မုၢ်န့ၣ်, ပှၤလုၢ်တၢ်အခိၣ်အဒိၣ်ကတၢၢ်အကုၢ်ပိာ်မုၣ်ဖိတဖၣ် အကျါတဂၤဟဲဆူအအိၣ်ဒီးစံး, “နၤစ့ၢ်ကီး, နမ့ၢ်ပှၤလၢအအိၣ်သကိးတ့ၢ်ဒီးပှၤကၤလံၤလါဖိယ့ၣ်ၡူး လီၤ.”

⁷⁰ ဘၣ်ဆၣ်ဒီး, အဝဲသမၢဝဲလၢအဝဲသ့ၣ်ခဲလၢာ်အမဲာ်ညါဒီးစံး, “မ့ၢ်နတဲ တၢ်မနုၤလဲၣ်န့ၣ်ယတသ့ၣ်ညါဘၣ်.”

⁷¹ ဝံၤဒီး, အဝဲဟးထီၣ်ဒီးလဲၤထီၣ်ဝဲဆူတၢ်လီၢ်လီၤပျီအံၤအကျဲစၢၤ လီၤ. ကုၢ်ပိာ်မုၣ်ဖိအဂၤတဂၤထံၣ်အီၤဒီးစံးဘၣ်ပှၤပိာ်ခွါတဖၣ်လၢ အအိၣ်ဖဲန့ၣ်ဒ်အံၤ, “အဝဲအိၣ်သကိးတ့ၢ်ဒီးပှၤနစၤရ့းဖိယ့ၣ်ၡူးလီၤ.”

⁷² မၤကဒီးတဘျီစီၤပ့းတရူးသမၢတၢ်ဒီးစံး, “ယဆိၣ်လီၤယသးလၢ ယတသ့ၣ်ညါပှၤအဝဲန့ၣ်ဘၣ်.”

⁷³ တစိၢ်ဖိဝံၤအလီၢ်ခံ, ပှၤပိာ်ခွါလၢအအိၣ်ဆၢထၢၣ်ဖဲန့ၣ်တဖၣ် ဟဲဆူစီၤပ့းတရူးအအိၣ်ဒီးစံး, “သပှၢ်တၢၢ်, နမ့ၢ်ပှၤလၢအဝဲသ့ၣ်အကျါတဂၤလီၤ. နကတိၤတၢ်အသီၣ် လီၣ်ဖျါထီၣ်နၤလီၤ.”

⁷⁴ တုၤနုၤတစုစီၤပ့းတရူးစံးဝဲ, “ယဆိၣ်လီၤယသးလၢယကတိၤ တၢ်မ့ၢ်တၢ်တီလီၤ. ယမ့ၢ်တဲတၢ်လၢအတမ့ၢ်တတီဘၣ်ဒီး, မ်ကစၢ်ယွၤကစံၣ်ညီၣ်ဒၣ်ဝဲယၤတက့ၢ်. ယတသ့ၣ်ညါ ပှၤအဝဲန့ၣ်ဘၣ်.” တကီၢ်ခါဖဲန့ၣ်ဆီဖါကီၢ်အိၣ်အိထီၣ်ဝဲလီၤ.

⁷⁵ တုၤနုၤတစု, စီၤပ့းတရူးသ့ၣ်နီၣ်ထီၣ်တၢ်လၢယ့ၣ်ၡူးစံးဘၣ် တ့ၢ်အီၤ, “တချုးလၢဆီဖါကီၢ်အိၣ်အိထီၣ်န့ၣ်, နကသမၢဒီးစံးလၢနတသ့ၣ်ညါယၤဘၣ်သၢဘျီလီၤ.” ဒီးအဝဲဟးထီၣ်ကွံာ်ဝဲဖဲန့ၣ် ဒီးဟီၣ်ဝဲလၢာ်သးလီၤ.