လံာ်မးသဲ 18 - Sgaw Karen Common Bible

ပှၤအဒိၣ်ကတၢၢ်မ့ၢ်မတၤလဲၣ်

¹ အကတီၢ်ဖဲန့ၣ်, အပျဲၢ်အဘီၣ်တဖၣ်ဟဲဆူယ့ၣ်ၡူးအအိၣ်ဒီးသံကွၢ်အီၤ, “ပှၤအဒိၣ်ကတၢၢ်လၢမူခိၣ်ဘီမုၢ်အပူၤန့ၣ်မ့ၢ်မတၤလဲၣ်.”

² ဒီးအဝဲကိးန့ၢ်ဖိသၣ်တဂၤဒီးဒုးအိၣ်ဆၢထၢၣ်အီၤလၢအဝဲသ့ၣ် အမဲာ်ညါ

³ ဒီးစံး, “ယစံးဘၣ်သုတၢ်မ့ၢ်တၢ်တီအံၤလၢ, မ့တမ့ၢ်ဘၣ်လၢသုလဲလိာ်သုတၢ်ပာ်သူၣ်ပာ်သး, ဒီးကဲထီၣ်ဒ်ဖိသၣ်တဖၣ်အသိးဘၣ်ဒီး, သုတလဲၤနုာ်ဘၣ်ဆူမူခိၣ်ဘီမုၢ်အပူၤနီတဘျီဘၣ်.

⁴ ပှၤအဒိၣ်ကတၢၢ်တဂၤလၢမူခိၣ်အဘီမုၢ်အပူၤ, မ့ၢ်ပှၤလၢအဆီၣ်လီၤအသးဒီးကဲထီၣ်ဒ်ဖိသၣ်တဂၤအံၤအသိးလီၤ.

⁵ ပှၤတဂၤလၢ်လၢ်လၢအတူၢ်လိာ်ဖိသၣ်ဒ်အံၤတဂၤလၢယမံၤန့ၣ်, မ့ၢ်အတူၢ်လိာ်ယၤလီၤ.

တၢ်လ့ပစီပှၤဆူတၢ်ဒဲးဘးအပူၤ

⁶ ပှၤတဂၤဂၤလၢအဒုးလီၤဃံၤပှၤအဆံးဒ်သိးအံၤတဂၤလၢအသုတနာ် ယၤလၢၤတဂ့ၤန့ၣ်, ဆၢၣ်ဂူာ်လၢၢ်ဖးဒိၣ်တဖျၢၣ်မ့ၢ်ဘၣ်တၢ်စၢထီၣ်အီၤလၢအကိာ်လိၤ ဒီး, မၤလီၤအုးကွံာ်အီၤလၢပီၣ်လဲၣ်အတၢ်ယိာ်ပူၤန့ၣ်, ကဂ့ၤဒၣ်တၢ်တက့ၢ်လီၤ.

⁷ ဟီၣ်ခိၣ်ဘၣ်အဖှီၣ်လၢတၢ်အိၣ်ဝဲတနီၤလၢအမၤဟးဂီၤပှၤကညီ အတၢ်စူၢ်တၢ်နာ်ယွၤန့ၣ်လီၤ. တၢ်ဒ်သိးအံၤကအိၣ်ဒၣ်ထီဘိလီၤ. ဘၣ်ဆၣ်ဒီး, ပှၤလၢအဒုးအိၣ်ထီၣ်တၢ်တဖၣ်အံၤတဂၤန့ၣ်, ကဘၣ်အဖှီၣ်ဆံးဒိၣ်လဲၣ်.

⁸ ဒီးနစုမ့ၢ်ဂ့ၤ, နခီၣ်မ့ၢ်ဂ့ၤ, မ့ၢ်မၤဟးဂီၤနတၢ်စူၢ်တၢ်နာ် ဒီး, ဒီၣ်တဲာ်ကွံာ်အီၤဒီးစူးကွံာ်အီၤတက့ၢ်. နလဲၤနုာ်ဆူတၢ်မူအပူၤအိၣ်ဒီးနစုကၢ်ခီၣ်ကၢ်န့ၣ်, ဂ့ၤဒိၣ်န့ၢ်ဒံးနဘၣ်တၢ်တ့ၢ်လီၤကွံာ်နၤဆူမ့ၣ်အူအထူအယိာ်အ ပူၤ, အိၣ်ဒီးနစုခံခီနခီၣ်ခံခီလၢာ်တက့ၢ်လီၤ.

⁹ ဒီးနမဲာ်ချံမ့ၢ်မၤဟးဂီၤနတၢ်စူၢ်တၢ်နာ်ဒီး, ခွဲးထုးထီၣ်ကွံာ်ဒီးစူးကွံာ်အီၤတက့ၢ်. နလဲၤနုာ်ဆူတၢ်မူအပူၤအိၣ်ဒီးနမဲာ်ချံတခီန့ၣ်, ဂ့ၤဒိၣ်န့ၢ်ဒံးနဘၣ်တၢ်တ့ၢ်လီၤကွံာ်နၤဆူလရာ်အမ့ၣ်အူအပူၤ, အိၣ်ဒီးနမဲာ်ချံခံခီလၢာ်တက့ၢ်လီၤ.

တၢ်ကတိၤဒိဘၣ်ဃးဒီးသိလၢအလီၤမၢ်

¹⁰ ပလီၢ်သုသးဒ်သိးသုသုတမၤတရီတပါဘၣ်ဖိသၣ်ဆံးဒ်အံၤတဖၣ်နီ တဂၤတဂ့ၤ. အဂ့ၢ်ဒ်အံၤ, ယစံးဘၣ်သု, အဝဲသ့ၣ်အမူခိၣ်ကလူးအိၣ်တထံၣ်ဃီလၢပၢ်အိၣ်လၢ မူခိၣ်အမဲာ်ညါလီၤ.

¹¹ (အဂ့ၢ်ဒ်အံၤ, ပှၤကညီဖိခွါဟဲတ့ၢ်ဝဲ, ဒ်သိးအကအုၣ်က့ၤခီၣ်က့ၤပှၤလၢအလီၤမၢ်တဖၣ်လီၤ.)

¹² သုဆိကမိၣ်ဒ်လဲၣ်, ပှၤတဂၤအသိအိၣ်တကယၤ, ဒီးအကျါတဒုမ့ၢ်ဟးဖျိးဒီး, ကပာ်တ့ၢ်အသိခွံဆံခွံဒုလၢကစၢၢ်အလိၤ, ဒီးကလဲၤဃုက့ၤသိလၢအဟးဖျိးတဒုန့ၣ်တမ့ၢ်ဘၣ်ဧါ.

¹³ တုၤအထံၣ်က့ၤဝဲဒီး, ယစံးဘၣ်တဲဘၣ်သုတၢ်မ့ၢ်တၢ်တီ, လၢအဝဲသးခုဝဲလၢသိတဒုအံၤအဃိ, ဒိၣ်န့ၢ်ဒံးသိခွံဆံခွံဒုလၢအတဟးဖျိးဘၣ်တဖၣ်အဃိတက့ၢ်လီၤ.

¹⁴ ဒ်န့ၣ်အသိး, သုပၢ်အိၣ်လၢမူခိၣ်တဘၣ်အသးလၢပှၤအဆံးလၢအနာ်ယၤတဖၣ် အကျါတဂၤ, ကလီၤမၢ်ဝဲန့ၣ်ဘၣ်.

ဒီပုၢ်ဝဲၢ်လၢအမၤကမၣ်တၢ်

¹⁵ နဒီပုၢ်ဝဲၢ်ပှၤနာ်တၢ်ဖိဒ်သိးသိးဒီးနၤမ့ၢ်မၤကမၣ်ဘၣ်နၤဒီး, လဲၤဆူအအိၣ်ဒီးတဲဘၣ်အီၤလၢအတၢ်ကမၣ်တက့ၢ်. တဲအီၤထဲလၢသုခံဂၤအဘၢၣ်စၢၤတက့ၢ်. အဝဲမ့ၢ်ဒိကနၣ်နၤဒီး, နန့ၢ်က့ၤနဒီပုၢ်ဝဲၢ်လံ.

¹⁶ မ့ၢ်တဒိကနၣ်နၤဒီး, ကိးဃုာ်ပှၤအဂၤတဂၤမ့ၢ်ဂ့ၤ, ခံဂၤမ့ၢ်ဂ့ၤဒီးနၤ, ဒ်သိးတၢ်ကတိၤကိးထံၣ်ဒဲး, ကဘၣ်တၢ်ပာ်ဂၢၢ်ပာ်ကျၢၤအီၤလၢပှၤအုၣ်အသးခံဂၤမ့ၢ်ဂ့ၤ, သၢဂၤမ့ၢ်ဂ့ၤန့ၣ်တက့ၢ်.

¹⁷ ဒီးမ့ၢ်တဒိကနၣ်ဘၣ်အဝဲသ့ၣ်ဘၣ်ဒီး, စံးဘၣ်တဲဘၣ်တၢ်အိၣ်ဖှိၣ်လၢတၢ်ဂ့ၢ်တၢ်ကျိၤခဲလၢာ်တက့ၢ်. ဒီး, မ့ၢ်တဒိကနၣ်ဘၣ်တၢ်အိၣ်ဖှိၣ်အကလုၢ်ဘၣ်ဒီး, ပာ်အီၤဒ်ပှၤတစူၢ်တနာ်ဘၣ်ယွၤဒီး, ဒ်ပှၤဃ့သွဲတဂၤအသိးန့ၣ်တက့ၢ်.

ယ့ၣ်ၡူးကတိၤတၢ်ဘၣ်ဃးဒီးတၢ်တြီဒီးတၢ်ပျဲတၢ်

¹⁸ ယစံးဘၣ်တဲဘၣ်သုတၢ်မ့ၢ်တၢ်တီ, ဖဲဒၣ်တၢ်လၢသုတြီဃာ်လၢပှၤအသုတမၤလၢဟီၣ်ခိၣ်ချၢတဂ့ၤ တမံၤမံၤန့ၣ်, ကဘၣ်တၢ်တြီဃာ်အီၤလၢမူခိၣ်, ဒီးဖဲဒၣ်တၢ်လၢသုပျဲပှၤကမၤအီၤလၢဟီၣ်ခိၣ်ချၢတမံၤမံၤ န့ၣ်, ကဘၣ်တၢ်ပျဲမၤအီၤလၢမူခိၣ်လီၤ.

¹⁹ ယစံးဘၣ်တဲဘၣ်ကဒီးသု, ပှၤလၢသုကျါခံဂၤလၢဟီၣ်ခိၣ်ချၢအံၤအသးမ့ၢ်လီၤပလိာ် လၢတၢ်တမံၤမံၤအဂ့ၢ်လၢအဃ့ဝဲန့ၣ်ဒီး, ယပၢ်အိၣ်လၢမူခိၣ်ကမၤန့ၢ်အဝဲသ့ၣ်တၢ်လၢအဃ့ဝဲန့ၣ်လီၤ.

²⁰ အဂ့ၢ်ဒ်အံၤ, ဖဲပှၤခံဂၤမ့ၢ်ဂ့ၤ, သၢဂၤမ့ၢ်ဂ့ၤပာ်ဖှိၣ်ထီၣ်အသးလၢ ယမံၤအပူၤန့ၣ်, ယအိၣ်လၢအဝဲသ့ၣ်အသိးအကျါလီၤ.”

တၢ်ကတိၤဒိဘၣ်ဃးဒီးကုၢ်လၢ အတပျၢ်ပှၤအတၢ်ကမၣ်

²¹ တုၤနုၤတစုစီၤပ့းတရူးဟဲဆူယ့ၣ်ၡူးအအိၣ်ဒီးသံကွၢ်အီၤ, “ကစၢ်ဧၢ, ယဒီပုၢ်ဝဲၢ်မ့ၢ်မၤကမၣ်ယၤတဘျီဘၣ်တဘျီဒီး, ယကဘၣ်ပျၢ်အီၤပှံၤဘျီလဲၣ်. တုၤအပှဲၤထီၣ်နွံဘျီဧါ.”

²² ဒီးယ့ၣ်ၡူးစံးဘၣ်အီၤ, “ယတစံးဘၣ်နၤတုၤအပှဲၤထီၣ်နွံဘျီဘၣ်. မ့မ့ၢ်တုၤအပှဲၤထီၣ်နွံစုအဘျီနွံဆံလီၤ.

²³ အဂ့ၢ်ဒ်အံၤ, မူခိၣ်ဘီမုၢ်န့ၣ်မ့ၢ်အလီၤဂာ်ဒ်သိးအံၤအဃိလီၤ. တဘျီစီၤပၤလၢအပာ်လီၤအသးလၢအကကွၢ်ကဒါက့ၤအခ့အပှၤ တဖၣ်အစ့စရီအိၣ်ဝဲတဂၤလီၤ.

²⁴ ဖဲအဝဲစးထီၣ်ကွၢ်က့ၤအခ့အပှၤတဖၣ်အစ့စရီ, ဒီးပှၤဟဲကိးန့ၢ်အီၤလၢအခ့အပှၤအကျါတဂၤ, လၢအကမၢ်အိၣ်လၢအအိၣ် စ့အကကွဲၢ်တဖၣ်အကကွဲၢ်လီၤ.

²⁵ မ့ၢ်လၢအခ့အပှၤအံၤလိးက့ၤစ့အံၤတန့ၢ်ဘၣ်အဃိ, အကစၢ်ဟ့ၣ်လီၤအကလုၢ်လၢအကဘၣ်တၢ်ဆါလီၤကွံာ်အီၤ, အမါဒီးအဖိတဖၣ်, ဒီးတၢ်လၢအအိၣ်ဒီးအီၤခဲလၢာ်, ဒီးလိးက့ၤအကမၢ်န့ၣ်လီၤ.

²⁶ တုၤနုၤတစု, တၢ်အခ့အပှၤန့ၣ်ထိၣ်လီၤပှီၤအသးလၢအခီၣ်လ့ၢ်ခိၣ်လိၤလၢ အကစၢ်အမဲာ်ညါ, ဒီးဃ့ကညးအီၤဒီးစံး, ‘ကစၢ်ဧၢ, ဝံသးစူၤဟ့ၣ်အါထီၣ်ယၤတၢ်ဆၢကတီၢ်တက့ၢ်. ဒီးယကလိးက့ၤနတၢ်ခဲလၢာ်လီၤ.’

²⁷ စီၤပၤသးကညီၤဘၣ်အီၤသတးဒီး, တြူာ်ကွံာ်အကမၢ်ခဲလၢာ်, ဒီးပျၢ်ပူၤဖျဲးကွံာ်အီၤန့ၣ်လီၤ.

²⁸ တုၤတၢ်အခ့အပှၤအဝဲန့ၣ်ဟးထီၣ်ကွံာ်, ဒီးထံၣ်န့ၢ်တၢ်အခ့အပှၤသကိးဒီးအီၤလၢအကမၢ်အိၣ်ဝဲဒီးအီၤ စ့ဒန့ၤရံတကယၤတဂၤဒီး, စှီၤဃာ်အကိာ်ဒီးစံးဘၣ်အီၤ, ‘နကမၢ်လၢအအိၣ်ဒီးယၤန့ၣ်လိးက့ၤတက့ၢ်.’

²⁹ တုၤနုၤတစု, အသကိးန့ၣ်ထိၣ်လီၤပှီၤအသးလၢအမဲာ်ညါ, ဒီးဃ့ကညးအီၤဒီးစံး, ‘ဝံသးစူၤဒီးဟ့ၣ်အါထီၣ်ယၤတၢ်ဆၢကတီၢ်တက့ၢ်. ဒီးယကလိးက့ၤနၤလီၤ.’

³⁰ အဝဲတတူၢ်လိာ်ဘၣ်တၢ်ဃ့ကညးအံၤဘၣ်ဒီး, မၢပှၤဒုးဃာ်အသကိးန့ၣ်လၢဃိာ်ပူၤ, တုၤအလိးတူာ်က့ၤအကမၢ်တစုန့ၣ်လီၤ.

³¹ တုၤတၢ်အခ့အပှၤအဂၤတဖၣ်ထံၣ်တၢ်မၤအသးအံၤဒီး, အဝဲသ့ၣ်အသးဘၣ်တံာ်တာ်ဒိၣ်မး, ဒီးလဲၤဘိးဘၣ်သ့ၣ်ညါအကစၢ်လၢတၢ်မၤအသးန့ၣ်ခဲလၢာ်လီၤ.

³² တုၤနုၤတစု, အကစၢ်န့ၣ်ကိးက့ၤအခ့အပှၤန့ၣ်ဆူအအိၣ်, ဒီးစံးဘၣ်အီၤ, ‘ကုၢ်လၢအအၢတဂၤဧၢ, မ့ၢ်လၢနဃ့ကညးယၤအဃိယပျၢ်ကွံာ်နကမၢ်ခဲလၢာ်လီၤ.

³³ ဒ်ယသးကညီၤနၤအသိးန့ၣ်, နဂ့ၤသးကညီၤတၢ်အခ့အပှၤသကိးသကိးဒီးနၤလီၤ.’

³⁴ ဒီးလၢတၢ်သးဒိၣ်အပူၤအကစၢ်ဆှၢအီၤဆူဃိာ်ပူၤ, ဒ်သိးအကဘၣ်တၢ်မၤနးမၤဖှီၣ်အီၤ, တုၤလၢအလိးတူာ်က့ၤအကမၢ်ခဲလၢာ်တစုလီၤ.

³⁵ လၢတၢ်န့ၣ်အဃိ, သုမ့ၢ်တပျၢ်ကွံာ်ဘၣ်သုဒီပုၢ်ဝဲၢ်အတၢ်ကမၣ်လၢသုသးကံၢ်ပူၤ ဘၣ်ဒီး, ယပၢ်လၢမူခိၣ်ကမၤသုဒ်န့ၣ်အသိးစ့ၢ်ကီးလီၤ.”